“Kapitulo 40: Mga Panan-awon Sulod sa Templo sa Kirtland: Abril 1836,” Mga Istorya sa Pagtulun-an ug mga Pakigsaad (2002), 155–57
“Kapitulo 40,” Mga Istorya sa Pagtulun-an ug mga Pakigsaad, 155–57
Kapitulo 40
Mga Panan-awon Sulod sa Templo sa Kirtland
(Abril 1836)
Usa ka Domingo sa hapon, ang mga Santos adunay usa ka katiguman diha sa templo sa Kirtland. Ang mga Apostoles maoy nanalangin sa sakramento. Si Joseph Smith ug ang iyang mga magtatambag maoy nag-apud-apud sa sakramento ngadto sa mga Santos.
D&C 110: Pasiuna
Unya si Joseph Smith ug Oliver Cowdery nangadto sa usa ka dapit sulod sa templo. Nangluhod sila ug nag-ampo. Human sa ilang pag-ampo, usa ka kahibulongang butang ang nahitabo. Ilang nakita ang Ginoong Jesukristo. Ang iyang mga mata hayag, ingon ug kalayo. Ang iyang buhok puti pa kay sa “snow.” Ang iyang nawong hayag pa kay sa siga sa adlaw.
Si Jesus misulti kang Joseph ug Oliver Cowdery sa daghang maanindot nga mga butang. Siya miingon nga siya mao ang ilang Manluluwas. Siya nagpakamatay alang kanila. Siya nabanhaw na. Si Jesus miingon nga ang mga tawo kinsa nagtukod sa templo kinahanglan magmalipayon kaayo. Si Jesus miingon nga siya nahimuot sa templo. Kini mao ang iyang balay. Si Jesus miingon nga siya moduaw sa templo sa makadaghan. Siya makigsulti sa mga Santos. Apan kon dili ampingan sa mga Santos ang templo aron mahimong sagrado, siya dili moduaw.
Unya si Joseph ug Oliver nakakita sa mga anghel sulod sa templo sa Kirtland. Una ilang nakita si Moses. Si Moses maoy usa ka propeta kinsa nagpuyo sa dugay nang panahon. Siya ang nagdala sa mga Israelite sa paggawas sa Ehipto. Ang istorya ni Moses anaa sa Daang Tugon ug sa Perlas nga Labing Bililhon. Si Moses mihatag ug tinuyo nga gahum sa pagkapari ngadto kang Joseph ug Oliver. Unya makatabang sila sa pagpapundok sa mga Israelite gikan sa tanang suok sa yuta.
Sunod, si Joseph ug Oliver nakakita kang Elias. Si Elias nagdala sa gahum sa pagkapari ni Abraham sa Simbahan ni Jesukristo. Si Abraham nagpuyo sa dugay nang panahon. Ang Dios nanalangin kang Abraham. Siya naghatag kang Abraham sa tinuyo nga gahum sa pagkapari. Ang banay ni Abraham kanunay nga naghupot sa pagkapari. Ang mga matarung nga sakop sa Simbahan mahimong kabahin sa banay ni Abraham.
Unya si Joseph ug si Oliver nakakita kang Elijah. Si Elijah usa ka propeta kinsa nagpuyo sa dugay nang panahon. Si Elijah miingon nga ang katawhan kinahanglan masayud sa ilang mga katigulangan. Ang katawhan kinahanglan maghimo sa buluhaton sa templo alang sa ilang mga katigulangan. Si Elijah mihatag ug tinuyo nga gahum sa pagkapari ngadto kang Joseph ug Oliver. Ang gahum sa pagkapari motabang sa mga banay nga matarung. Sila mabugkos sa usag usa. Unya makahimo sila nga mabuhi sa kahangturan.
D&C 2:2; 110:13–16; 1 Mga Hari 17–2 Mga Hari 2; Malaquias 4:5–6