Harvest Time in France, ni James Taylor Harwood

Enero18–24

Doktrina ug mga Pakigsaad 3–5

“Ang Akong Buhat Magpadayon”

Samtang ikaw magtuon sa Doktrina ug mga Pakigsaad 3–5, mahimong makadawat ka og mga panghunahuna mahitungod sa unsay gikinahanglan sa mga bata nga imong gitudloan nga masabtan. Ang mga kalihokan niini nga outline makahatag usab kanimo og mga ideya.

Irekord ang Imong mga Impresyon

Dapita ang Pagpaambit

Ipakita ang litrato ni Joseph Smith gikan sa outline niini nga semana sa Dali, Sunod Kanako—Alang sa mga Indibidwal ug mga Pamilya, ug tabangi ang mga bata sa pagpakigbahin sa unsay ilang nahibaloan mahitungod sa istorya nga gihulagway niini. Tabangi sila sa paghinumdom sa istorya ni Martin Harris nga giwala ang hubad sa unang mga pahina sa Basahon ni Mormon (tan-awa sa “Kapitulo 4: Martin Harris ug ang Nawala nga mga Panid,” Mga Istorya sa Doktrina ug mga Pakigsaad, 18–21; o Saints, 1:51–56).

Itudlo ang Doktrina: Mas Gagmay nga mga Bata

Doktrina ug mga Pakigsaad 3:7–10

Makapili ako sa matarung kon ang uban maninguha sa pagpabuhat kanako og sayop.

Tabangi ang mga bata sa pagkat-on unsa ang nakat-unan ni Joseph Smith: kon mosalig sila sa Langitnong Amahan, Siya “nag-uban [kanila] sa matag panahon sa kasamok” (Doktrina ug mga Pakigsaad 3:8).

Posible nga mga Kalihokan

• Ribyuha ang istorya ni Martin Harris ug ang nawala nga mga panid (tan-awa sa Mga Istorya sa Doktrina ug mga Pakigsaad, 18–21, o ang katukma nga video sa ChurchofJesusChrist.org). Pakigbahin sa mga bata og pipila ka posible nga mga sitwasyon nga sila mahimong tintalon sa pagbuhat og usa ka butang nga nakahibalo sila nga dili matarung. Sa unsa nga paagi ang Langitnong Amahan makatabang kanato sa pagpili sa matarung? (tan-awa sa Doktrina ug mga Pakigsaad 3:8).

  

  Martin Harris, ni Lewis A. Ramsey

• Basaha kini nga mga pulong gikan sa Doktrina ug mga Pakigsaad 3:8: “Siya unta mitunol sa iyang bukton ug mitabang kanimo.” Dapita ang mga bata sa pagtindog ug ipatunol ang ilang mga bukton samtang imong basahon ang hugpong sa mga pulong pag-usab. Pakigbahin kanila og pipila ka mga paagi ang Ginoo mahimong motunol sa Iyang bukton aron sa pagtabang kanila kon ang uban maninguha sa pagpabuhat kanila og sayop nga mga butang. Papuli-puliha sila sa pagpatunol sa ilang mga bukton samtang sila nagsulti og ubang mga paagi ang Ginoo nagtunol sa Iyang bukton aron sa pagtabang kanato.

Doktrina ug mga Pakigsaad 4

Ang Ginoo nagkinahanglan kanako sa pagbuhat sa Iyang buluhaton.

Ang mga bata makahimo nga “anaa sa pag-alagad sa Dios” (Doktrina ug mga Pakigsaad 4:2) sa daghan nga mga paagi ug sila makaandam karon alang sa dugang nga mga oportunidad sa ilang umaabut.

Posible nga mga Kalihokan

• Basaha ang Doktrina ug mga Pakigsaad 4:1 ngadto sa mga bata. Pagdala og mga hulagway nga nagpakita sa “katingalahang” buhat sa Dios sa ulahing adlaw (sama sa mga hulagway sa mga misyonaryo, mga templo, ug sa Basahon ni Mormon). Papuli-puliha ang mga bata sa pagpili og usa ka hulagway ug sa pag-istorya mahitungod niini. Pakigbahin kon ngano ang buluhaton sa Ginoo katingalahan kanimo.

• Tabangi ang mga bata sa paghunahuna og mga aksyon o pagdrowing og mga hulagway nga nagpakita sa hugpong sa mga pulong “moalagad kaniya sa tibuok ninyo nga kasingkasing, gahum, hunahuna ug kusog” (Doktrina ug mga Pakigsaad 4:2). Pakigbahin og ehemplo sa usa ka tawo nga imong kaila kinsa nag-alagad sa Dios niini nga paagi.

• Panganta og dungan sa usa ka awit mahitungod sa misyonaryo nga buhat, sama sa “Gusto Ko Karon nga Mamisyonaryo” (Songbook sa mga Bata, 90). Paghisgot kon unsa ang gitudlo sa awit mahitungod kon sa unsa nga paagi kita makatabang sa Dios sa Iyang buluhaton.

Doktrina ug mga Pakigsaad 5:10

Atong nadawat ang pulong sa Dios pinaagi ni Joseph Smith.

Sa unsa nga paagi ikaw makatabang sa mga bata sa paglig-on sa ilang mga pagpamatuod nga si Joseph Smith ug ang ubang mga propeta nagtudlo sa pulong sa Dios?

Posible nga mga Kalihokan

• Pagtago og usa ka hulagway ni Joseph Smith sa usa ka dapit sa kwarto (tan-awa sa Libro sa mga Hulagway sa Ebanghelyo, nu. 87). Basaha ang Doktrina ug mga Pakigsaad 5:10, ug dapita ang mga bata sa pagpangita sa hulagway aron mahibaloan kinsa ang gipasabut sa pulong nga “kanimo”. Pagpamatuod nga nadawat nato ang pulong sa Dios pinaagi ni Joseph Smith.

• Ipakita sa mga bata ang mga kopya sa Basahon ni Mormon ug sa Doktrina ug mga Pakigsaad. Ipasabut nga gihatag sa Dios kanato kini nga mga kasulatan pinaagi ni Joseph Smith. Pakigbahin og pipila sa imong paborito nga mga bersikulo gikan niini nga mga basahon, ug sultihi kon nganong mapasalamaton ka alang niini.

Itudlo ang Doktrina: Mas Dagko nga mga Bata

Doktrina ug mga Pakigsaad 3:5–10; 5:21–22

Kinahanglan akong mas magtagad sa pagpahimuot sa Dios kay sa pagpahimuot sa uban.

Samtang ang mga bata nagkat-on mahitungod sa kasinatian ni Joseph Smith sa nawala nga hubad sa mga panid sa Basahon ni Mormon, madasig sila nga magpabiling matinud-anon kon ang uban motintal kanila sa pagkadili masulundon.

Posible nga mga Kalihokan

• Pila ka mga adlaw nga mag-una, dapita ang usa sa mga bata sa pag-anha sa klase nga andam sa pagpakigbahin og istorya kalabut ni Joseph Smith ug Martin Harris nga nawad-an sa unang mga pahina sa hubad sa Basahon ni Mormon (tan-awa sa Mga Istorya sa Doktrina ug mga Pakigsaad, 18–21; o Saints, 1:51–56). Basaha og dungan ang Doktrina ug mga Pakigsaad 3:5–8; 5:21–22, ug pangitaa ang mga panalangin nga moabut kon kita magpabilin nga matinuoron ngadto sa Dios.

• Hatagi ang mga bata og panahon sa paghunahuna mahitungod sa usa ka sitwasyon diin ang usa ka higala tingali naninguha sa pagpabuhat kanila og usa ka butang nga sayop. Dapita sila sa pagpangita og tudling diha sa Doktrina ug mga Pakigsaad 3:5–8; 5:21–22 nga makatabang kanila atol niadto nga mga sitwasyon. Pagrole-play og pipila ka mga ehemplo.

Doktrina ug mga Pakigsaad 4

Ang Ginoo nagkinahanglan kanako sa pagbuhat sa Iyang buluhaton.

Ang Doktrina ug mga Pakigsaad 4 makadasig sa mga bata nga mahimong kabahin sa “katingalahang buhat” sa Ginoo (bersikulo 1).

Posible nga mga Kalihokan

• Isulat diha sa pisara ang Pag-alagad sa Dios. Dapita ang mga bata sa pagsiksik sa Doktrina ug mga Pakigsaad 4 ug sa paghimo og lista sa mga butang nga ilang nakat-unan mahitungod sa unsay kahulugan sa pag-alagad sa Dios. Hangyoa sila sa pagdugang sa ilang lista sa mga butang nga ilang nakat-unan gikan sa awit “Magmaisugon Ko” (Songbook sa mga Bata, 85) o lain nga awit mahitungod sa pag-alagad sa Dios.

• Pagdala og mga himan (o mga hulagway sa mga himan) nga gamiton sa usa ka tawo sa pagtrabaho sa umahan. Sa unsang paagi kini nga mga himan nagtabang kanato? Tabangi ang mga bata sa pagpangita og mga butang diha sa Doktrina ug mga Pakigsaad 4:5–6 nga mahimong sama sa mga himan sa pagbuhat sa buluhaton sa Dios.

• Dapita ang usa ka full-time o ward nga mga misyonaryo sa pagpakigbahin og usa ka butang gikan sa Doktrina ug mga Pakigsaad 4 nga nakapadasig kanila sa pagbuhat sa buluhaton sa Dios. Unsa ang atong mahimo sa pagtabang sa buluhaton sa Dios?

Doktrina ug mga Pakigsaad 5:1–7, 11, 16, 23–24

Makasaksi ako nga ang Basahon ni Mormon tinuod.

Gisaaran si Martin Harris nga mahimo siya nga usa sa mga saksi sa bulawan nga mga palid kon siya matinud-anon. Dili kita makakita sa mga palid sama ni Martin, apan makadawat kita og espiritwal nga saksi sa Basahon ni Mormon. Unsaon nimo pagtabang ang mga bata nga makapalambo ug makapaambit sa ilang kaugalingong pagpamatuod sa Basahon ni Mormon?

Posible nga mga Kalihokan

• Pagsulat og mga pangutana diha sa pisara sama sa mosunod, ug tabangi ang mga bata sa pagpangita sa mga tubag diha sa Doktrina ug mga Pakigsaad 5:1–3, 7, 11: Unsa ang gitinguha ni Martin Harris nga mahibaloan? Kang kinsa mapakita ni Joseph Smith ang bulawan nga mga palid? Ngano nga ang pagtan-aw sa bulawan nga palid malagmit dili igo sa pagkumbinsir sa usa ka tawo nga ang Basahon ni Mormon tinuod?

• Pangutan-a ang mga bata kon unsa ang usa ka saksi ug kon ngano nga ang usa ka saksi importante. Unsa ang gikinahanglan nga buhaton ni Martin Harris nga mahimong usa ka saksi sa bulawan nga mga palid? (tan-awa sa Doktrina ug mga Pakigsaad 5:23–24). Bisan og kita wala makakita sa mga palid, unsa ang atong mabuhat nga mahimong mga saksi sa Basahon ni Mormon? (tan-awa sa Doktrina ug mga Pakigsaad 5:16; Moroni 10:3–5).

Awhaga ang Pagkat-on diha sa Panimalay

Awhaga ang mga bata sa pagsulat sa ilang mga pagpamatuod sa Basahon ni Mormon ug sa pagpakigbahin niini ngadto sa usa ka tawo nga ilang kaila.

Pagpalambo sa Atong Pagtudlo

Ipahiangay ang mga kalihokan aron sa pagpaapil sa mga bata nga may kakulangan. Ang gamay nga pagpahiangay sa mga kalihokan makasiguro nga ang tanan nga mga bata makakat-on gikan niini. Sama pananglit, kon ang usa ka kalihokan nagsugyot sa pagpakita og usa ka hulagway, mahimo kamong manganta hinuon aron sa pagpaapil sa mga bata nga may mga kakulian sa panan-aw.