“Enero 18–24. Doktrina ug mga Pakigsaad 3–5: ‘Ang Akong Buhat Magpadayon,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)

“Enero 18–24. Doktrina ug mga Pakigsaad 3–5,” Dali, Sunod Kanako—Alang sa mga Indibidwal ug mga Pamilya: 2021

Imahe

mga lalaki nagtrabaho diha sa umahan

Harvest Time in France, ni James Taylor Harwood

Enero 18–24

Doktrina ug mga Pakigsaad 3–5

“Ang Akong Buhat Magpadayon”

Isulat unsay imong makat-unan ug mabati samtang imong tun-an ang mga kasulatan. Makatabang kini nimo nga mahinumduman kadto nga mga impresyon ug ipaambit kini sa uban.

Irekord ang Imong mga Impresyon

Atol sa iyang unang mga katuigan isip propeta sa Ginoo, si Joseph Smith wala pa masayud sa tanan mahitungod sa “katingalahan nga buhat” nga gitawag siya sa pagbuhat. Apan usa ka butang sa iyang mga nag-unang kasinatian nagtudlo kaniya mao ang pagpasarang alang sa buhat sa Dios, ang iyang mga mata kinahanglan gayud nga “bug-os nga tinguha ngadto sa Dios” (Doktrina ug mga Pakigsaad 4:1, 5). Pananglitan, kon ang Ginoo mihatag kaniya og tambag nga batok sa iyang kaugalingong mga tinguha, kinahanglan siya nga mosunod sa tambag sa Ginoo. Ug bisan kon siya adunay “daghan nga mga pagpadayag, ug … gahum sa pagbuhat og daghan nga gamhanan nga mga buhat,” kon ang iyang kaugalingong kabubut-on mahimong mas importante diha sa iyang panan-aw kay sa kabubut-on sa Dios, siya “kinahanglan mapukan” (Doktrina ug mga Pakigsaad 3:4). Apan si Joseph nakat-on og lain pang butang nga ingon ka importante sa pagbuhat sa buluhaton sa Dios: “ang Ginoo maloloy-on,” ug kon si Joseph sinsero nga naghinulsol, siya “sa gihapon gipili” (bersikulo 10). Human sa tanan, ang buhat sa Dios mao ang, usa ka buhat sa katubsanan. Ug kana nga buhat “dili gayud makawang” (bersikulo 1).

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 3:1–15

Kinahanglan ako nga mosalig sa Dios kay sa mahadlok sa tawo.

Sa nag-unang pagpangalagad ni Joseph Smith, ang maayong mga higala lisud pangitaon—ilabi na sa higala sama ni Martin Harris, usa ka respetado nga tawo, adunahan, kinsa anaa sa posisyon nga makahatag og bililhon nga abag. Ug si Martin andam nga moabag ni Joseph, bisan kon mawad-an siya sa respeto sa iyang mga higala ug nagkinahanglan og pagsakripisyo nga pinansyal.

Busa sayon ra nga masabut kon nganong si Joseph gustong pasidunggan ang hangyo ni Martin sa pagkuha sa unang porsyon sa hubad sa Basahon ni Mormon aron ipakita ngadto sa iyang asawa, kinsa natahap sa kamatuoran sa Basahon ni Mormon. Mipadayon si Joseph sa pagpangutana sa Ginoo mahitungod niining hangyo, bisan kon Siya midumili niini, hangtud nga sa katapusan, human nangutana si Joseph sa ikatulo nga higayon, ang Ginoo misanong. Subo kaayo, nga ang manuskrito nawala samtang kini anaa sa posisyon ni Martin, ug sila si Joseph ug Martin gipanton og maayo sa Ginoo (tan-awa sa Mga Santos, 1:51–53).

Samtang magbasa ka sa Doktrina ug mga Pakigsaad 3:1–15, pamalandungi kon sa unsang paagi nga ang mga opinyon sa mga tawo mahimo nga moimpluwensya nimo. Mahimo usab nimong isulat nga agig dugang sa pagbadlong kang Joseph Smith, ang Ginoo namulong og mga pulong sa kalooy. Unsay imong nakat-unan gikan sa pamaagi ang Ginoo mikoriher ug mi-awhag kang Joseph? Unsa nga tambag ang imong nakita nga makatabang nimo kon ikaw matintal sa pagkahadlok sa ubang tawo kay sa Dios?

Tan-awa usab sa “The Contributions of Martin Harris,” Revelations in Context, 1–9, history.ChurchofJesusChrist.org.

Doktrina ug mga Pakigsaad 4

Ang Ginoo misugo kanako sa pag-alagad Kaniya sa tibuok nakong kasingkasing.

Ang Seksyon 4 mao kanunay ang gigamit sa full-time nga mga misyonaryo. Hinoon, makapa-ikag hunahunaon nga kining pagpadayag unang nahatag ngadto ni Joseph Smith Sr., kinsa wala natawag og misyon apan sa gihapon “nagtinguha sa pag-alagad sa Dios” (bersikulo 3).

Usa ka paagi sa pagbasa niining seksyon mao ang paghunahuna niini isip usa ka diskripsyon sa trabaho alang sa usa ka tawo kinsa gustong mohimo sa buhat sa Ginoo. Unsa ang mga kwalipikasyon? Nganong kini nga mga kahanas o kinaiya gikinahanglan? Tingali mahimo nimo sa mainampoong paagi mopili og usa ka butang nga mas maayo nimong mahimo aron “nakahimo [sa imong kaugalingon nga] takus alang sa buhat” (bersikulo 5).

Doktrina ug mga Pakigsaad 5

Makabaton ko og akong kaugalingon nga saksi sa Basahon ni Mormon.

Kon ikaw tawagon sa pagpamatuod diha sa korte mahitungod sa katinuod sa Basahon ni Mormon, unsa nga ebidensya ang imong ikahatag? Usa ka susama nga pangutana nga gihunahuna ni Martin Harris sa dihang ang asawa, si Lucy, misang-at og usa ka pag-angkon nga si Joseph Smith naglingla sa mga tawo pinaagi sa pagpakaaron-ingnon nga mihubad sa bulawan nga palid (tan-awa sa Mga Santos, 1:56–58). Mao nga si Martin mihangyo kang Joseph og dugang pa nga ebidensya nga tinuod ang bulawan nga palid. Ang Doktrina ug mga Pakigsaad 5 mao ang usa ka pagpadayag agig tubag sa hangyo ni Martin.

Unsay imong nakat-unan gikan sa Doktrina ug mga Pakigsaad 5 mahitungod sa mosunod:

Unsay bation sa Ginoo mahitungod niadtong dili motuo sa espiritwal nga mga kamatuoran hangtud nga sila makaangkon og ebidensya (tan-awa sa mga bersikulo 5–8; tan-awa usab sa Juan 20:24–29).
Ang papel sa mga saksi diha sa buhat sa Ginoo (tan-awa sa mga bersikulo 11–15; tan-awa usab sa 2 Mga Taga-Corinto 13:1).
Unsaon sa pagbaton og pagpamatuod sa Basahon ni Mormon alang sa imong kaugalingon (tan-awa sa bersikulo 16; tan-awa usab sa Moroni 10:3–5).

Doktrina ug mga Pakigsaad 5:1–10

Kini nga henerasyon makadawat sa pulong sa Dios pinaagi ni Joseph Smith.

Unsa ang gitudlo sa Doktrina ug mga Pakigsaad 5:1–10 diha nimo mahitungod sa importanting papel ni Joseph Smith sa atong dispensasyon—ug sa imong kinabuhi? Pamalandungi kon sa unsang paagi nga ikaw nakadawat sa pulong sa Dios pinaagi ni Propeta Joseph Smith. Ikonsiderar ang pagsulat diha sa usa ka journal o ipaambit sa usa ka tawo ang imong pasalamat alang sa mga kamatuoran nga gipahiuli o nahatagan og katin-awan pinaagi kaniya.

Tan-awa usab sa 2 Nephi 3:6–24.

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 3:1–4.Hangyoa ang usa ka sakop sa pamilya sa paglakaw diha sa “hiwi” nga linya ug dayon diha sa “tul-id” nga linya. Unsay gipasabut niini ngadto sa atong pamilya nga ang dalan sa “[Dios] tul-id”?

Doktrina ug mga Pakigsaad 3:7–10.Kon adunay tawo nga mopugos kanato sa pagsupak sa Dios, unsa nga mga kamatuoran dinhi niining mga bersikulo ang makatabang kanato nga magmatinud-anon? Tingali ang mga sakop sa pamilya mahimong dramahon ang usa ka sitwasyon diin ang usa ka tawo magpabilin nga matinud-anon bisan pa sa pagpamugos sa pagsupak sa Dios.

Doktrina ug mga Pakigsaad 4.Samtang hisgutan sa imong pamilya unsay ipasabut sa pagtrabaho diha sa umahan sa Dios, makahimo sila og pipila ka trabaho diha sa tanaman (o kunohay nagtrabaho). Unsa nga mga himan ang gikinahanglan alang sa pagtrabaho sa tanaman? Unsay gihulagway sa Dios diha sa seksyon 4 nga mahimong isipon nga himan nga gikinahanglan aron mahimo ang Iyang buhat? Ang imong pamilya mahimong maghisgut kon nganong ang matag himan importante sa paghimo sa buhat sa Dios.

Doktrina ug mga Pakigsaad 5:7.Unsa ang mga ehemplo sa mga kamatuoran nga atong gituohan apan dili makita? Unsaon nato sa pagtubag ang usa ka higala kinsa gusto og ebidensya nga tinuod ang Basahon ni Mormon?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Magmaisugon Ko,” Songbook sa mga Bata, 85.

Pagpalambo sa Personal nga Pagtuon

Pagmemorya og bersikulo. “Ang pagmemorya og kasulatan mao ang paghulma og bag-ong panaghigala. Sama kini sa pagdiskubre og bag-ong tawo nga makatabang sa panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban” (Richard G. Scott, “Ang Gahum sa Kasulatan,” Liahona, Nob. 2011, 6).