Si Moroni nga nagpakita ngadto ni Joseph Smith

Gitawag Ako Niya pinaagi sa Akong Ngalan, ni Michael Malm

Enero 11–17

Doktrina ug mga Pakigsaad 2; Joseph Smith—Kasaysayan 1:27–65

“Ang mga Kasingkasing sa mga Anak Mobati ngadto sa Ilang mga Amahan”

Ang Espiritu Santo makatudlo kanimo sa matag higayon nga ikaw mobasa sa mga kasulatan—bisan og kadaghan na nimo nabasa ang mga kasulatan. Busa pangandam sa pagdawat og bag-ong mga panabut ug pagdasig.

Irekord ang Imong mga Impresyon

Tulo na ka tuig sukad nga ang Dios nga Amahan ug ang Iyang Anak, si Jesukristo, mipakita ngadto kang Joseph Smith diha sa kakahuyan, apan si Joseph wala na nakadawat og bisan unsang dugang nga mga pagpadayag sukad niadto. Nagsugod na siya sa paghunahuna mahitungod sa iyang kahimtang atubangan sa Ginoo. Sama kanatong tanan, nakahimo siya og mga kasaypanan, ug mibati nga gipanghimaraut tungod niini. Apan ang Dios aduna pay ipabuhat kaniya. Ug ang buhat nga si Joseph gitawag sa pagbuhat adunay koneksyon sa unsay gihangyo sa Dios ngari kanato. Si Joseph mipagawas sa Basahon ni Mormon; unsa ang gihangyo kanato nga atong buhaton niini? Nakadawat si Joseph og mga yawe aron ang mga kasingkasing sa mga anak mobati ngadto sa ilang mga amahan; sa unsang paagi nga ang atong mga kasingkasing mobati ngadto sa atong mga katigulangan? Gisultihan si Joseph kabahin sa mga panagna nga sa dili madugay matuman; unsa ang atong parte sa pagtabang sa pagpatuman niini? Kon mosalmut kita sa buhat sa Dios, makapaabut kita sa pagsagubang og oposisyon ug gani pagpanggukod, sama sa nahitabo sa Propeta. Apan mahimo kita nga makabaton og hugot nga pagtuo nga ang Ginoo mohimo kanato nga mga instrumento diha sa Iyang mga kamot, sama sa iyang gibuhat alang kang Joseph.

Tan-awa usab sa Mga Santos, 1:22–53.

icon sa personal nga pagtuon

Mga Ideya alang sa Personal nga Pagtuon sa Kasulatan

Joseph Smith—Kasaysayan 1:27–33

Ang Dios adunay ipabuhat kanako.

Samtang magbasa ka sa Joseph Smith—Kasaysayan 1:27–33, ikonsiderar nga ang Dios adunay usa ka buhat alang kanimo, sama sa iyang gihimo alang kang Joseph Smith. Pamalandungi kini nga imbitasyon gikan ni Presidente Russel M. Nelson: “Pangutan-a ang inyong Langitnong Amahan sa pangalan ni Jesukristo unsa ang Iyang gibati mahitungod kaninyo ug sa inyong misyon dinhi sa yuta. Kon kamo mangayo uban sa tinuod nga katuyoan, sa kadugayan ang Espiritu mohunghong og makapausab sa kinabuhi nga mga kamatuoran diha kaninyo. … Ako mosaad kaninyo nga kon kamo mosugod sa pagkakita bisan daklit lang kon unsay pagtan-aw sa inyong Langitnong Amahan kaninyo ug unsay Iyang gilauman nga inyong buhaton alang Kaniya, mausab gayud ang inyong kinabuhi!” (“Pagkahimo nga Tinuod nga mga Milenyal” [tibuok kalibutan nga debosyonal alang sa mga young adult, Ene. 10, 2016], broadcasts.ChurchofJesusChrist.org).

Tingali usahay imong mabati ang nabati ni Joseph diha sa mga bersikulo 28–29. Unsay imong nakat-unan gikan sa ehemplo ni Joseph mahitungod sa unsay imong buhaton kon ang imong mga aksyon wala nasubay sa buhat sa Dios diin ikaw gitawag sa pagbuhat?

Joseph Smith—Kasaysayan 1:34–65

Ang Basahon ni Mormon naglangkob “sa kahingpitan sa Ebanghelyo.”

Samtang magbasa ka sa Joseph Smith—Kasaysayan 1:34–65, hunahunaa unsa ang mga detalye niining mga bersikulo nga tingali magustohan nimo kon wala pa gyud ka nakadungog sukad kabahin sa Basahon ni Mormon. Isip usa ka tumutuo, ngano nga kining istorya importante sa imong pagpamatuod sa Basahon ni Mormon?

Hunahunaa kon sa unsang paagi nga natuman diha sa Basahon ni Mormon ang mga gipanagna diha sa Isaias 29:4, 11–18.

Joseph Smith—Kasaysayan 1:36–41

Ang Pagpahiuli sa ebanghelyo nakatuman sa karaan nga mga panagna.

Si Moroni mikutlo ngadto ni Joseph og pipila ka mga panagna sa Daang Tugon ug sa Bag-ong Tugon, sama sa Isaias 11; Mga Buhat 3:22–23; ug Joel 2:28–32. Ngano nga kining mga panagna nahimong importante nga mahibaloan ni Joseph? Nganong importante alang kanimo nga mahibalo niini?

Doktrina ug mga Pakigsaad 2

Unsa ang gipahiuli ni Elijah?

Si Presidente Henry B. Eyring miingon: “Importante nga mahibaloan nganong misaad ang Ginoo nga ipadala si Elijah. Si Elijah usa ka bantugang propeta nga adunay dakong gahum nga gihatag sa Dios kaniya. Iyang gihuptan ang pinakadakong gahum nga gihatag sa Dios sa Iyang mga anak: gihuptan niya ang gahum sa pagsilyo, ang gahum sa pagbugkos dinhi sa yuta ug pagpabugkos didto sa langit” (“Mga Kasingkasing Nahiusa sa Pagkabugkos,” Liahona, Mayo 2005, 78).

Tan-awa usab sa Doktrina ug mga Pakigsaad 110:13–16; David A. Bednar, “Himoa Kini nga Balay nga Matukod Ngadto sa Akong Ngalan,” Liahona, Mayo 2020, 84–87.

Palmyra New York Temple sa tinglarag

Templo sa Palmyra New York. Ang mga Pamilya mabugkos diha sa templo pinaagi sa gahum nga gipahiuli pinaagi ni Elijah.

Doktrina ug mga Pakigsaad 2

Si Elijah miabut aron ang akong kasingkasing mobati ngadto sa akong mga katigulangan.

Unsa ang gikatudlo sa mga pulong sama sa “tanum,” “kasingkasing,” ug “ibalik” dinhi niining seksyon diha nimo mahitungod sa misyon ni Elijah ug ang mga panalangin sa mga yawe sa pagkapari nga iyang gipahiuli? Unsa ang pagbati sa imong kasingkasing ngadto sa imong mga katigulangan? Paghunahuna og mga paagi nga imong masinati ang maong mga pagbati nga mas kanunay. Tingali makahangyo ka og usa ka paryente nga mopaambit diha nimo og usa ka istorya mahitungod sa usa sa imong mga katigulangan—gani, mas maayo nga imo kining isulat. Siguro matino nimo ang usa ka namatay na nga katigulangan kinsa wala gayud nakadawat sa mga ordinansa sa ebanghelyo ug dayon ipahigayon kana nga buhat diha sa templo.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Joseph Smith—Kasaysayan 1:28–29.Unsay gibati ni Joseph Smith mahitungod sa iyang kasaypanan? Unsa ang iyang gibuhat agi’g tubag niadto nga mga pagbati? Unsay atong makat-unan gikan kaniya mahitungod sa unsay buhaton kon kita makahimo og kasaypanan?

Joseph Smith—Kasaysayan 1:33–54.Mahimo ka nga mohangyo og usa ka sakop sa pamilya nga mobasa og kusog sa bahin o sa tanang mensahe ni Moroni gikan sa Joseph Smith—Kasaysayan 1:33–42 kaupat ka higayon (tungod kay si Moroni mibalik-balik niini nga mensahe kaupat kahigayon). Taliwala sa matag basa, paghangyo og laing mga sakop sa pamilya sa pagpaambit kon unsay ilang nahinumduman gikan sa iyang mensahe, nga dili motan-aw sa mga kasulatan. Ngano kaha nga ibalik-balik sa Ginoo ang importanting mga mensahe sa makadaghang higayon? Unsa pay laing mga paagi ang Ginoo motudlo kanato pinaagi sa pagbalik-balik?

Doktrina ug mga Pakigsaad 2:2.Aron matabangan ang inyong mga anak nga makasabut sa “mga saad nga gihimo ngadto sa mga amahan,” mahimo kamong magdungan sa pagbasa sa Abraham 2:9–11. Tinua ang mga saad nga gihimo sa Dios isip parte sa Iyang mga pakigsaad ni Abraham. Unsaon man nato sa “pagtanum” kining mga saad diha sa atong mga kasingkasing?

Doktrina ug mga Pakigsaad 2:2–3.Aron matabangan ang mga sakop sa pamilya nga mobati ang ilang mga kasingkasing ngadto sa ilang mga amahan (o mga katigulangan), mahimo nimong dapiton sila aron makat-on mahitungod sa usa ka katigulangan ug aron ipaambit unsa ilang nakat-unan sa tibuok pamilya. Nganong gusto sa Ginoo nga makat-on kita mahitungod sa atong mga sakop sa pamilya ug mopahigayon og mga ordinansa sa templo alang kanila? Sa unsang paagi nga kita napanalanginan kon kita moapil diha sa family history ug sa buhat sa templo? (tan-awa sa Dale G. Renlund, “Buhat sa Family History ug sa Templo: Pagsilyo ug Pagkaayo,” Liahona, Mayo 2018, 46–49).

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Family History—Naghimo Ako,” Songbook sa mga Bata, 100.

Pagpalambo sa Personal nga Pagtuon

Gamita ang mga tabang sa pagtuon sa kasulatan. Ang mga himan sama sa mga footnote, Topical Guide, Bible Dictionary, Giya ngadto sa mga Kasulatan, ug ChurchofJesusChrist.org makatabang nimo nga mas makasabut sa mga tawo, mga panghitabo, ug hugpong sa mga pulong diha sa mga kasulatan.

Si Moroni naghatag ni Joseph Smith sa bulawan nga palid

Joseph Nagdawat sa mga Palid, ni Gary E. Smith