“Enero 4–10. Joseph Smith—Kasaysayan 1:1–26: ‘Ako Nakakita og usa ka Dako nga Gilis sa Kahayag,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)
“Enero 4–10. Joseph Smith—Kasaysayan 1:1–26,” Dali, Sunod Kanako—Alang sa mga Indibidwal ug mga Pamilya: 2021
Sagrado nga Kakahoyan, ni Greg K. Olsen
Enero 4–10
Joseph Smith—Kasaysayan 1:1–26
“Ako Nakakita og usa ka Dako nga Gilis sa Kahayag”
Samtang magbasa ka sa Joseph Smith—Kasaysayan 1:1–26, unsa nga mga mensahe ang imong nakita alang sa imong kinabuhi? Unsa ang labing bililhon nganha nimo ug sa imong pamilya?
Irekord ang Imong mga Impresyon
Ang Doktrina ug mga Pakigsaad usa ka libro sa mga tubag sa pag-ampo: kadaghanan sa sagrado nga mga pagpadayag dinhi niining libro miabut agig tubag sa mga pangutana. Tungod niini tukma ang pagsugod sa pagtuon sa Doktrina ug mga Pakigsaad pinaagi sa paghunahuna sa pangutana nga nasugdan sa pagbubo sa pagpadayag sa ulahing mga adlaw—ang usa nga gipangutana ni Joseph Smith didto sa kakahoyan niadtong 1820. Usa ka “gubat sa mga pulong ug kagubot sa mga opinyon” (Joseph Smith—Kasaysayan 1:10) nakapalibog ni Joseph kabahin sa relihiyon ug ang kahimtang sa iyang kalag; tingali makasabut mo niana. Adunay daghang nagkasumpaki nga mga ideya ug makapaagni nga mga tingog sa atong panahon, ug kon gusto natong himay himayon kining mga mensahe ug makit-an ang kamatuoran, makahimo kita sa unsay gibuhat ni Joseph. Makapangutana kita, magtuon sa mga kasulatan, mamalandong, ug sa katapusan mangutana sa Dios. Agig tubag sa pag-ampo ni Joseph, usa ka gilis sa kahayag ang mikunsad gikan sa langit; ang Dios Amahan ug si Jesukristo mipakita ug mitubag sa iyang mga pangutana. Ang pamatuod ni Joseph nianang milagrusong kasinatian maisugong namahayag nga si bisan “kinsa [kulang] sa kaalam mahimo nga mangayo sa Dios, ug makaangkon” (Joseph Smith—Kasaysayan 1:26). Kitang tanan mahimong makadawat, kon dili man usa ka langitnong panan-awon, bisan lang og mas makasabut pinaagi sa langitnong pagdan-ag.
Mga Ideya alang sa Personal nga Pagtuon sa Kasulatan
Joseph Smith—Kasaysayan 1:1–26
Si Joseph Smith mao ang Propeta sa Pagpahiuli.
Ang katuyoan sa kasaysayan ni Joseph Smith mao ang pagpahimutang kanato “sa kamatuoran nga makahibalo sa tinuod nga mga hitabo” tungod kay ang kamatuoran mahitungod kang Joseph kanunayng gituis (Joseph Smith—Kasaysayan 1:1). Samtang magbasa ka sa Joseph Smith—Kasaysayan 1:1–26, unsa ang makapalig-on sa imong pagpamatuod kabahin sa iyang balaan nga tawag? Timan-i ang mga ebidensya nga imong nakita nga ang Ginoo miandam ni Joseph Smith alang sa iyang propetikanhong misyon. Samtang magbasa ka, mahimo nimong isulat ang imong mga gihunahuna ug mga pagbati mahitungod kang Joseph Smith ug sa iyang pagpamatuod.
Tan-awa usab sa Mga Santos, 1:3–21.
Joseph Smith—Kasaysayan 1:5–20
Kon mangutana ko diha sa hugot nga pagtuo, ang Dios motubag.
Nakasulay ka ba nga “nagkulang og kaalam” o mibati nga naglibog mahitungod sa usa ka desisyon nga gikinahanglan nimong himoon? (Joseph Smith—Kasaysayan 1:13). Unsay imong nakat-unan gikan sa kasinatian ni Joseph Smith diha sa mga bersikulo 5–20? Hunahunaa ang imong kaugalingong panginahanglan sa kaalam ug mas dakong pagsabut, ug hunahunaa kon unsaon nimo sa pagpangita sa kamatuoran.
Tan-awa usab sa 1 Nephi 10:17–19; 15:6–11; Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, May 2018, 93–96.
Mahimo natong ipangutana sa Dios ang atong mga pangutana pinaagi sa pag-ampo.
Joseph Smith—Kasaysayan 1:15–20
Nganong adunay nagkalain-laing mga istorya ang Unang Panan-awon?
Atol sa iyang kinabuhi, si Joseph Smith misulat sa iyang kasinatian diha sa Sagradong Kakahoyan sa labing minus upat ka higayon, kasagaran naggamit og usa ka tigsulat. Agi og dugang, pipila sa mga nadungog nga istorya mga sinulat sa mga tawo kinsa nakadungog ni Joseph nga naghisgut mahitungod sa iyang panan-awon. Bisan og kining mga istorya nagkadaiya ang mga detalye, depende sa naminaw ug kahimtang, kini sa bisan unsaon nagkatakdo gihapon. Ug ang matag istorya nakadugang og detalye nga nakatabang kanato nga mas masabtan ang kasinatian ni Joseph Smith, sama sa upat ka Ebanghelyo nga nakatabang kanato nga mas masabtan ang pagpangalagad sa Manluluwas.
Aron mabasa ang mga istorya ni Joseph, tan-awa sa “First Vision Accounts” (Gospel Topics, topics.ChurchofJesusChrist.org). Unsay imong nakat-unan gumikan sa pagbasa sa tanan niining mga istorya?
Joseph Smith—Kasaysayan 1:15–20
Ang Unang Panan-awon maoy misugod sa Pagpahiuli sa ebanghelyo ni Jesukristo.
Si Joseph Smith misalig nga ang Dios motubag sa iyang pag-ampo, apan wala siya magdahum kon sa unsang paagi nga ang tubag makapausab sa iyang kinabuhi—ug sa kalibutan. Samtang magbasa ka mahitungod sa kasinatian ni Joseph, pamalandungi kon sa unsang paagi ang Unang Panan-awon nakapausab sa imong kinabuhi. Pananglitan, mahimo nimong kompletuhon kining pamahayag sa lahi nga mga paagi: “Tungod sa pagkahitabo sa Unang Pana-awon, nasayud ko nga …” Sa unsang paagi nga ikaw napanalanginan tungod sa Unang Panan-awon?
Tan-awa usab sa Mga Santos, 1:15–21; Russell M. Nelson, “Paminaw Kaniya,” Liahona, Mayo 2020, 88–92.
Joseph Smith—Kasaysayan 1:21–26
Mahimo ko nga magpabilin nga tinuod sa unsay akong nahibaloan, bisan kon ang uban mosalikway kanako.
Usa sa mga panalangin sa mga kasulatan mao nga kini naglangkob og makapadasig nga mga ehemplo sa maisugon nga mga kalalakin-an ug kababayen-an kinsa miatubang og mga hagit inubanan sa hugot nga patuo ni Jesukristo. Sa dihang si Joseph Smith miatubang sa oposisyon tungod sa iyang panan-awon, siya mibati nga nahisama ni Apostol Pablo, kinsa gigukod usab tungod sa pagsulti nga siya nakakita og usa ka panan-awon. Samtang magbasa ka sa istorya ni Joseph, unsa ang nakapadasig nimo nga magpabilin nga tinuod sa imong pagpamatuod? Unsa pay laing mga ehemplo—gikan sa mga kasulatan o sa mga tawo nga imong nailhan—nga nakahatag kanimo og kaisug sa pagpabilin nga tinuod ngadto sa espirituhanon nga mga kasinatian nga imong naangkon?
Mga Ideya alang sa Pamilya nga Pagtuon sa Kasulatan ug Family Home Evening
-
Joseph Smith—Kasaysayan 1:6.Unsaon nato sa pagdala ang mga dili panag-uyon nga dili mahimong makig-away sama sa mga tawo nga gihulagway niining bersikulo?
-
Joseph Smith—Kasaysayan 1:11–13.Ang pagbasa niining mga bersikulo lagmit makapadasig sa mga sakop sa pamilya sa pagpaambit og mga kasinatian sa dihang ang mga tudling sa kasulatan nakatandog sa ilang mga kasingkasing ug midasig kanila sa pagbuhat.
-
Joseph Smith—Kasaysayan 1:16–20.Samtang magbasa ang imong pamilya niining mga bersikulo, ikonsiderar ang pagpakita sa painting nga kauban niining latid o laing hulagway sa Unang Panan-awon (tingali ang imong pamilya malingaw sa pagdibuho og ilang kaugalingong paghulagway). Makatan-aw usab kamo sa video nga “Ask of God: Joseph Smith’s First Vision” (ChurchofJesusChrist.org). Makahimo kamo nga magtagsa-tagsa og himo og lista sa mga kamatuoran gikan niining panan-awon, unya ipaambit ang inyong lista sa usag-usa. Mahimo kining maanindot nga panahon alang sa mga sakop sa pamilya sa pagpaambit kon unsaon nila sa pag-angkon sa ilang mga pagpamatuod sa Unang Panan-awon ni Joseph Smith.
-
Joseph Smith—Kasaysayan 1:17.Sa dihang mipakita ang Dios ngadto ni Joseph Smith, Siya misangpit sa ngalan ni Joseph. Kanus-a ang higayon nga ang mga sakop sa imong pamilya mibati nga ang Langitnong Amahan personal nga nakaila kanila?
-
Joseph Smith—Kasaysayan 1:21–26.Unsaon nato sa pagtubag kon ang mga tawo mokwestyon sa atong mga pagpamatuod?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Gisugyot nga awit: “Ang Unang Pag-ampo ni Joseph Smith,” Mga Himno ug mga Awit sa mga Bata, nu. 14.
Mga tingog sa Pagpahiuli
Pamilya ni Joseph Smith
Kitang tanan hilabihan nga naapiktuhan sa kinabuhi sa atong pamilya, ug walay kalainan si Joseph Smith. Ang relihiyusong pagtuo sa iyang mga ginikanan ug mga binuhatan nakatisok og binhi sa pagtuo nga nakapahimo sa Pagpahiuli nga posible. Nasulat sa journal ni Joseph kining pasidungog: “Mga pulong ug sinultihan dili igo aron ipahayag ang pasalamat nga akong nautang sa Dios sa paghatag kanako og dungganan kaayo nga ginikanan.”1
Ang mosunod nga mga kinutlo gikan sa iyang inahan, si Lucy Mack Smith; iyang igsoon nga si William Smith; ug ang Propeta mismo mihatag kanato og usa ka daklit nga pagtan-aw ngadto sa relihiyoso nga impluwensya diha sa panimalay nga Smith.
Pamilya ni Joseph Smith, ni Dan Baxter
Lucy Mack Smith
“[Sa mga 1802], Ako nagmasakiton. … Naghunahuna ko, dili pa ako andam nga mamatay tungod kay wala ko kahibalo sa mga pamaagi ni Kristo, ug para nako ingon kini og adunay usa ka mangiob nga haw-ang taliwala kanako ug ni Kristo nga ako dili mosulay sa pagtabok. …
“Midangop ako sa Ginoo ug naghangyo ug nangamuyo sa Ginoo nga siya motagana sa akong kinabuhi nga unta ako makadala sa akong mga anak ug makahupay sa kasingkasing sa akong bana; sa ingon ako matulog sa tibuok gabii. … Mipakigsaad ako uban sa Dios [nga] kon iyang itugot nga ako mabuhi maningkamot ko sa pag-angkon niana nga relihiyon nga makahimo ko sa pag-alagad og husto kaniya, maanaa man kini sa Biblia o bisan asa man kini mahimong makaplagan, bisan kon kini maangkon gikan sa langit pinaagi sa pag-ampo ug sa hugot nga pagtuo. Sa katapusan ang usa ka tingog nagsulti kanato ug miingon, ‘Pangayo ug kamo pagahatagan; pangita, ug kamo makakaplag; pagtuktok, ug kamo pagaablihan. Hupaya ang imong pagbati. Ikaw mituo sa Dios; tuo usab kanako.’ …
“Sukad niining panahona nakabaton ako og makanunayon nga kalig-on. Diyutay ra ang akong mahisgut kabahin sa relihiyon apan napuno ang akong hunahuna niini, ug nagtuo ako nga buhaton nako ang tanang pagkugi sa higayon nga makapangita na ko og relihiyoso nga tawo kinsa nasayud sa pamaagi sa Dios aron motudlo kanako sa mga butang sa langit.”2
William Smith
“Ang akong inahan, kinsa hilabihan ka relihiyoso nga pagkababaye ug maikagon kaayo sa kaayohan sa iyang mga anak, niining kinabuhia ug sa sunod, mipahimulos sa tanang pamaagi kutob sa mahimo sa mahigugmaong ginikanan, aron makaapil kami sa pagpangita og kaluwasan sa among kalag, o (sumala pa sa tawag niana kaniadto) ‘sa pagkahimong relihiyoso.’ Siya midasig kanamo sa pagtambong og mga panagtigum, ug hapit ang tibuok pamilya nahimong interesado nianang butanga, ug mga tigpangita sa kamatuoran.”3
“Kanunay kaming adunay pag-ampo sa pamilya kutob sa akong mahinumduman. Mahinumdom pa kaayo ko sa akong amahan nga kanunayng mogamit sa iyang antiohos diha sa iyang bulsa, … ug kon kaming mga batang lalaki makakita na niya nga mangapkap na sa iyang antiohos, nasayud na kami nga mao na kana ang timailhan nga mangandam sa pag-ampo, ug kon dili kami makamatngon si mama moingon, ‘William,’ o si bisan kinsa nga nagbaliwala, ‘pag-andam alang sa pag-ampo.’ Human sa pag-ampo manganta kami.”4
Si Joseph Sr. ug Lucy Smith nagtudlo sa ilang pamilya aron sa pagtuon sa mga kasulatan.
Joseph Smith
“Makasulti na ako karon nga [akong amahan] wala gayud siya maghimo og ngil-ad nga buhat, nga maingon nga dili maayo sa iyang kinabuhi, sa akong nahibaloan. Gihigugma ko ang akong amahan ug ang iyang panumduman; ug ang panumduman sa iyang halangdon nga mga buhat adunay bug-at nga impluwensya sa akong hunahuna, ug daghan sa iyang mabination ug mga pulong sa pagkaginikanan nasulat sa papan [tablet] sa akong kasingkasing. Sagrado kanako, ang mga hunahuna nga akong gimahal sa kasaysayan sa iyang kinabuhi, nga miagi sa akong hunahuna, ug nasilsil pinaagi sa akong kaugalingong pagpaniid, sukad ako natawo. … Ang akong inahan usab maoy usa sa labing hamili ug pinakamaayo sa tanang mga babaye.”5
The First Vision of the Restoration, ni Michael Bedard