Disyembre 28–Enero 3

Doktrina ug mga Pakigsaad 1

“Patalinghug, O Kamo mga Katawhan”

Hunahunaa ang Doktrina ug mga Pakigsaad 1 isip ang personal nga pasiuna sa Ginoo niining basahon sa Iyang mga pagpadayag sa ulahing mga adlaw. Unsa ang Iyang gusto nga imong mahibaloan mahitungod sa Doktrina ug mga Pakigsaad? Pamalandungi kini nga pangutana, ug isulat ang bisan unsa nga impresyon nga moabut samtang magbasa ka sa seksyon 1.

Irekord ang Imong mga Impresyon

Niadtong Nobyembre 1831, ang gipahiuli nga Simbahan ni Jesukristo usa palang ka tuig ug tunga. Bisan og nagtubo, kini nga pundok dili pa gihapon inila nga nagkatag sa pagpamuyo, gipangulohan sa usa ka propeta sa nagpangidaron pa og kapin sa baynte. Apan ang Dios miisip niining mga tumutuo nga Iyang mga sulugoon ug Iyang mga mensahero, ug gusto Siya nga ang mga pagpadayag nga Iyang nahatag kanila imantala ngadto sa kalibutan.

Ang Doktrina ug mga Pakigsaad seksyon 1 mao ang unang pahina sa koleksyon sa mga pagpadayag, ug klaro kining nagpakita nga bisan og gamay ra ang miyembro sa Simbahan, gusto sa Dios nga ang tanang butang kabahin sa mensahe ipaambit sa Iyang mga Santos. Usa kini ka “tingog sa pasidaan” alang sa tanang “mga lumulupyo sa yuta,” magtudlo kanila sa paghinulsol ug sa paglig-on sa “walay katapusan nga pakigsaad” (mga bersikulo 4, 8, 22). Ang mga sulugoon nga nagdala niining mensahe mga “mahuyang ug yano,” apan ang mapainubsanon nga mga sulugoon mao lang ang gikinahanglan sa Dios—kaniadto ug karon—sa pagdala sa Iyang Simbahan “gikan sa kangiub ug gikan sa kangitngit” (mga bersikulo 23, 30).

Alang sa dugang pa mahitungod sa kasaysayan nga nagpaluyo sa Doktrina ug mga Pakigsaad 1, tan-awa sa Mga Santos, 1:140–43.

Mga Ideya alang sa Personal nga Pagtuon sa Kasulatan

Doktrina ug mga Pakigsaad 1

Ang Ginoo midapit kanako nga “siksika kini nga mga sugo.”

Ang usa ka pasiunang pahina nagpaila sa basahon. Nagtino kini sa mga tema sa basahon ug mga katuyoan ug motabang sa mga tigbasa nga maandam sa pagbasa. Samtang magbasa ka sa seksyon 1—sa “pasiuna” sa Ginoo ngadto sa Doktrina ug mga Pakigsaad (bersikulo 6)—pangitaa ang mga tema ug mga katuyoan nga gihatag sa Ginoo alang sa Iyang mga pagpadayag. Unsay imong nakat-unan gikan sa seksyon 1 nga makatabang nimo nga mapahimuslan ang mga kaayuhan gikan sa imong pagtuon sa Doktrina ug mga Pakigsaad? Pananglitan, lagmit imong pamalandungan kon unsa ang kahulugan sa “maminaw sa tingog sa Ginoo” niini nga mga pagpadayag (bersikulo 14) o ang “siksika kini nga mga sugo” sa (bersikulo 37).

Tan-awa usab sa pasiuna ngadto sa Doktrina ug mga Pakigsaad.

Doktrina ug mga Pakigsaad 1:1–6, 23–24, 37–39

Ang Dios namulong pinaagi sa Iyang mga sulugoon, ug ang Iyang mga pulong matuman.

Ang seksyon 1 gisugdan ug gitapos sa pamahayag sa Dios nga Siya mamulong pinaagi sa Iyang pinili nga mga sulugoon (tan-awa sa mga bersikulo 4–6, 23–24, 38). Isulat unsay imong nakat-unan gikan niining pagpadayag mahitungod sa Ginoo ug sa Iyang tingog. Unsay imong nakat-unan mahitungod sa mga sulugoon sa Ginoo? Kanus-a nga nadungog nimo ang tingog sa Ginoo diha sa tingog sa Iyang mga sulugoon? (tan-awa sa bersikulo 38).

Ang mga propeta ug mga apostoles magtudlo kanato sa mga sugo sa Dios.

Doktrina ug mga Pakigsaad 1:3, 24–28, 31–33

Kon ako mapaubsanon, ang pagpanton sa Ginoo makadala kanako sa paghinulsol.

Timan-i nga sa bersikulo 3 ug mga bersikulo 24–28, ang Ginoo nag-ingon nga ang mga sala ug kasaypanan sa katawhan mapahibalo. Sa usa ka kahimtang kini sakit, subo nga kasinatian, ug sa laing kahimtang nagtudlo kini. Ngano nga kining mga sitwasyon lahi man kaayo? Hunahunaa kon unsay imong reaksyon kon imong mahibaloan ang imong mga sala ug mga kahuyang. Unsa nga mga kalidad ang imong nakita diha sa mga bersikulo 24–28 nga makatabang nimo nga motubag sa husto nga paagi? Unsa ang gikatudlo, niining mga bersikulo 31–33, mahitungod kon unsa ang paglantaw sa Ginoo sa imong mga kahuyang ug mga sala?

Tan-awa usab sa Mga Proverbio 3:11–12; Ether 12:27; Moroni 6:8.

Doktrina ug mga Pakigsaad 1:12–30, 35–36

Ang Ginoo mipahiuli sa Iyang ebanghelyo aron sa pagtabang nako sa pag-atubang sa mga hagit sa ulahing mga adlaw.

Bisan og ang seksyon 1 nagpasidaan sa malisud nga mga adlaw nga moabut, naglangkob usab kini sa makapadasig nga mensahe: “Ako ang Ginoo, nahibalo sa katalagman nga moabut diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit” (bersikulo 17).

Timan-i ang mga kalamidad nga gipasidaan sa Ginoo (pananglitan, tan-awa sa, mga bersikulo 13–16, 35). Unsa pay laing mga kalamidad nga imong nabatyagan sa kalibutan karon—o diha sa imong kaugalingong kinabuhi? Ang mga bersikulo 17–30 naghulagway sa unsay nabuhat sa Ginoo alang kanimo diha sa pagpaabut niining mga kalamidad. Hunahunaa ang paghimo og lista sa unsay imong makit-an.

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 1:1–6, 37–39.Aron makasugod og panaghisgut-hisgut mahitungod sa mga pasidaan gikan sa Ginoo, mahimo ka nga maghisgut mahitungod sa mga pasidaan nga atong nadawat gikan sa uban kabahin sa mga peligro nga dili nato makita—sama sa danlog nga salog, usa ka biyolenting unos, o usa ka sakyanan nga nagsingabut. Unsa ang gikatudlo niining mga ehemplo ngari kanato mahitungod sa mga pasidaan sa Ginoo? Sumala sa Doktrina ug mga Pakigsaad 1:1–6, 37–39, sa unsang paagi ang Ginoo mopasidaan kanato? Unsay Iyang gipasidaan kanato bag-uhay lang? Tingali mahimo kang motan-aw o mobasa bahin sa bag-ong mga mensahe sa kinatibuk-ang komperensya ug mangita og mga ehemplo sa Dios nga “tingog sa pasidaan.”

Doktrina ug mga Pakigsaad 1:16.Unsa ang kahulugan sa “pag-establisar sa pagkamatarong [sa Dios]”? Unsaon nato sa pagsiguro nga kita nagbuhat niana, kay sa maglakaw “diha sa [atong] kaugalingong paagi”?

Doktrina ug mga Pakigsaad 1:30.Unsa ang kahulugan sa pag-ingon nga ang Simbahan “tinuod ug buhi”? Aron ipahunahuna sa imong pamilya ang mahitungod niining pangutana, tingali mahimo nimong ipakita nila ang mga litrato sa buhi nga mga butang ug dili buhi nga mga butang. Mahimo usab nimong hisgutan kon unsa ang inyong mahimo isip usa ka pamilya aron makatabang nga “madala [ang Simbahan] gikan sa kangiob ug gikan sa kangitngit.”

Doktrina ug mga Pakigsaad 1:37.Hunahunaa ang pagplano isip usa ka pamilya kon unsaon ninyo sa “pagsiksik kini nga mga sugo” diha sa Doktrina ug mga Pakigsaad niining tuiga. Unsaon ninyo paghimo ang inyong pagtuon sa kasulatan nga usa ka regular nga bahin sa kinabuhi sa pamilya? Unsa nga mga ideya sa pagtuon ang makatabang ninyo gikan sa mga kasulatan? (Tan-awa sa “Mga Ideya sa Pagpalambo sa Imong Pamilya nga Pagtuon sa Kasulatan” sa sinugdanan niining kapanguhaan.)

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Sunda ang Propeta,” Songbook sa mga Bata, 58, ilabi na sa katapusan nga bersikulo.

Pagpalambo sa Personal nga Pagtuon

Pangitaa si Jesukristo. Ang katuyoan sa mga kasulatan mao ang pagpamatuod sa Manluluwas ug sa Iyang ebanghelyo. Samtang magbasa ka sa Doktrina ug mga Pakigsaad 1, hunahunaa ang pagmarka o sulatan ang mga bersikulo nga magtudlo nimo og butang mahitungod kang Jesukristo.

Ang unang mga pagpadayag sa gipahiuli nga Simbahan gitipon ngadto sa Basahon sa mga Sugo.