Mga Ideya sa Pagpalambo sa Inyong Pamilya nga Pagtuon sa Kasulatan

Ang kanunay nga pagtuon sa kasulatan diha sa pamilya usa ka gamhanan nga paagi sa pagtabang sa inyong pamilya nga makakat-on sa ebanghelyo. Unsa ka daghan ug kadugay ang inyong pagbasa isip pamilya dili sama kaimportante kay sa pagkakanunay sa inyong mga paningkamot. Samtang ikaw naghimo sa imong pagtuon sa kasulatan nga importanting bahin sa kinabuhi sa imong pamilya, ikaw nagtabang sa mga sakop sa imong pamilya nga mas maduol kang Jesukristo ug motukod sa ilang mga pagpamatuod sa pundasyon sa Iyang pulong.

Hunahunaa ang mosunod nga mga pangutana:

• Unsaon nimo pag-awhag ang mga sakop sa pamilya sa pagtuon sa mga kasulatan sa ilang kaugalingon?

• Unsay imong mabuhat sa pag-awhag sa mga sakop sa pamilya sa pagpakigbahin unsay ilang nakat-unan?

• Unsaon nimo paghatag og gibug-aton ang mga baruganan nga imong nakat-unan diha sa Doktrina ug mga Pakigsaad sa matag adlaw nga mga higayon sa pagtudlo?

Hinumdumi nga ang panimalay mao ang labing maayong dapit sa pagkat-on sa ebanghelyo. Ikaw makakat-on ug makatudlo sa ebanghelyo diha sa panimalay sa mga paagi nga dili posible diha sa klase sa Simbahan. Pagmamugnaon samtang ikaw naghunahuna og mga paagi nga matabangan ang imong pamilya sa pagkat-on gikan sa mga kasulatan.

Mga Ideya sa Kalihokan

Gamita ang mosunod nga mga ideya sa pagpalambo sa inyong pamilya nga pagtuon sa kasulatan:

Paggamit og musika

Kanta og mga awit nga nagsuporta sa mga baruganan nga gitudlo diha sa mga kasulatan. Usa ka gisugyot nga himno o awit sa mga bata gilista diha sa matag semana nga latid. Mahimo kang mangutana kalabut sa mga pulong o hugpong sa mga pulong diha sa awit. Agig dugang sa pagkanta, ang imong pamilya makahimo og mga lihok nga moangay sa mga awit o makapaminaw sa mga awit isip background nga musika samtang nagbuhat sila sa ubang mga kalihokan.

Pagpakigbahin og makahuluganong mga kasulatan

Paghatag og panahon sa mga sakop sa pamilya sa pagpakigbahin og mga tudling sa kasulatan nga ilang nakaplagan nga makahuluganon sa panahon sa ilang personal nga pagtuon.

Paggamit sa imong kaugalingon nga mga pulong

Dapita ang mga sakop sa pamilya sa pag-summarize sa ilang kaugalingong mga pulong unsay ilang nakat-unan gikan sa mga kasulatan nga inyong gitun-an.

Gamita ang mga kasulatan diha sa inyong kinabuhi

Pagkahuman og basa sa tudling sa kasulatan, hangyoa ang mga sakop sa pamilya sa pagpakigbahin og mga paagi nga magamit ang mga tudling diha sa ilang mga kinabuhi.

Pangutana

Dapita ang mga sakop sa pamilya sa pagpangutana og ebanghelyo nga pangutana, ug dayon paggahin og panahon sa pagpangita og mga bersikulo nga makatabang sa pagtubag sa pangutana.

Pagpakita og usa ka kasulatan

Pagpili og usa ka bersikulo nga makahuluganon kanimo, ug ibutang kini sa dapit nga makita kanunay sa mga sakop sa pamilya. Pagdapit sa ubang mga sakop sa pamilya nga magpuli-puli sa pagpili og kasulatan nga ipakita.

Paghimo og lista sa kasulatan

Isip pamilya, pagpili og pipila ka mga bersikulo nga gusto nimong hisgutan sa umaabut nga semana.

Pagmemorya og mga kasulatan

Pagpili og usa ka tudling sa kasulatan nga makahuluganon sa imong pamilya, ug dapita ang mga sakop sa pamilya sa pagmemorya niini pinaagi sa pagbalik-balik niini kada adlaw o paghimo og dula sa pagmemorya.

Pagpaambit og mga leksyon nga naggamit og mga butang

Pangita og mga butang nga may kalabutan sa mga kapitulo ug mga bersikulo nga inyong gibasa isip pamilya. Dapita ang mga sakop sa pamilya sa pagsulti mahitungod sa unsa nga paagi ang matag butang nga may kalabutan sa mga pagtulun-an diha sa mga kasulatan.

Pagpili og usa ka hilisgutan

Pagpapuli-puli sa mga sakop sa pamilya sa pagpili og hilisgutan nga tun-an og dungan sa pamilya. Paggamit sa Topical Guide, sa Bible Dictionary, o sa Ang Giya ngadto sa mga Kasulatan (scriptures.ChurchofJesusChrist.org) sa pagpangita og mga tudling sa kasulatan mahitungod sa hilusgutan.

Pagdrowing og hulagway

Pagpabasa og pipila ka bersikulo isip pamilya, ug dayon paghatag og panahon alang sa mga sakop sa pamilya sa pagdrowing og butang nga may kalabutan sa unsay inyong gibasa. Paggahin og panahon sa paghisgot sa gidrowing sa usag usa.

Pagpadrama og usa ka istorya

Human mabasa ang istorya, dapita ang mga sakop sa pamilya sa pag-drama niini. Pagkahuman, paghisgut kon sa unsa nga paagi may kalabutan ang istorya sa mga butang nga nasinati sa indibidwal ug isip pamilya.

Pagtudlo sa mga Bata

Kon ikaw adunay gagmay nga mga bata sa imong pamilya, aniay mga kalihokan nga makatabang kanila sa pagkat-on:

Kanta

Mga Himno ug mga awit gikan sa Songbook sa mga Bata gamhanang magtudlo og doktrina. Ang matag latid niini nga kapanguhaan naglakip og usa ka gisugyot nga awit. Makagamit ka usab sa indeks sa hilisgutan sa luyo sa Songbook sa mga Bata sa pagpangita og mga awit nga may kalabutan sa mga baruganan sa ebanghelyo nga imong gitudlo. Tabangi ang imong mga anak nga makasaysay sa mga mensahe sa mga awit diha sa ilang mga kinabuhi.

Paminawa o i-aksyon ang usa ka istorya

Ang gagmay nga mga bata gusto og mga istorya—gikan sa mga kasulatan, gikan sa imong kinabuhi, gikan sa kasaysayan sa Simbahan, o gikan sa mga magasin sa Simbahan. Pangita og mga paagi sa pag-apil kanila sa pag-istorya og usa ka sugilanon. Mahimo silang mogunit og mga hulagway o mga butang, modrowing sa unsay ilang nadungog, i-aksyon ang istorya, o gani motabang sa pag-istorya sa sugilanon. Tabangi ang imong mga anak nga makaila sa mga kamatuoran sa ebanghelyo diha sa mga istorya nga imong gipakigbahin.

Basa og usa ka kasulatan

Ang gagmay nga mga bata tingali dili pa kaayo makamao nga mobasa, apan mahimo gihapon nimo silang ilakip sa pagkat-on gikan sa mga kasulatan. Mahimong gikinahanglan nimo ang pagtutok sa usa ka bersikulo, o importante nga hugpong sa mga pulong, o pulong.

Tan-aw og hulagway o tan-aw og usa ka video

Pangutana mahitungod sa usa ka hulagway o video kalabut ngadto sa usa ka baruganan sa ebanghelyo nga inyong gihisgutan. Sama pananglit, makapangutana ka, “Unsay nahitabo dinhi sa hulagway? Unsay imong gibati niini?” Ang Gospel Library app, ang Gospel Media Library sa ChurchofJesusChrist.org, ug children.ChurchofJesusChrist.org mga maayong dapit sa pagpangita og mga hulagway ug mga video.

Pagmugna

Ang mga bata makatukod, makadrowing, o makakolor og usa ka butang nga may kalabutan sa istorya o baruganan nga sila nagkat-on.

Apil sa leksyon nga naggamit og butang [object lesson]

Ang usa ka yanong leksyon nga naggamit og butang makatabang sa imong mga anak nga makasabut og baruganan sa ebanghelyo nga lisud sabton. Kon mogamit og mga leksyon nga maggamit og butang, pangita og mga paagi nga makaapil ang mga bata. Mas makakat-on sila gikan sa pagbinayloay og mga kasinatian kay sa pagtan-aw lamang sa usa ka demonstrasyon.

Pagdrama-drama [role-play]

Kon ang mga bata magdrama-drama og usa ka sitwasyon nga malagmit ilang masinati sa tinuod nila nga kinabuhi, mas makasabut sila og maayo kon sa unsang paagi ang usa ka baruganan sa ebanghelyo magamit sa ilang mga kinabuhi.

Pagbalik-balik sa mga kalihokan

Ang gagmayng mga bata tingali kinahanglang makadungog sa mga konsepto sa makadaghang higayon aron makasabut niini. Sama pananglit, mahimo kang mopaambit og istorya sa kasulatan sa makadaghang higayon sa lain-laing paagi—pagbasa gikan sa mga kasulatan, pag-summarize diha sa imong kaugalingong mga pulong, pagpatabang sa imong mga bata sa pagsaysay sa istorya, pagdapit kanila sa pag-aksyon sa istorya, ug uban pa.

Paghimo og mga koneksyon ngadto sa pagpalambo sa ilang personal nga mga tumong

Ang pamilyang pagtuon sa kasulatan makahatag og pagdasig alang sa mga kabatan-onan ug sa mga kabataan sa paghimo og mga tumong alang sa ilang espiritwal, pisikal, intelektwal, ug sosyal nga paglambo (tan-awa sa Lucas 2:52).

Pagtudlo sa mga Kabatan-onan

Kon ikaw adunay batan-on sa imong pamilya, aniay pipila ka mga kalihokan nga makatabang kanila sa pagkat-on:

Dapita sila sa pagtudlo

Kasagaran kita mas makakat-on kon kita motudlo og usa ka butang kay sa kita makadungog lamang mahitungod niini. Hatagi ang imong batan-on og oportunidad sa paggiya og panaghisgot sa pamilya mahitungod sa mga kasulatan.

Paghimo og mga koneksyon ngadto sa seminary

Ang mga estudyante sa seminary karon nga tuig nagtuon sa Doktrina ug mga Pakigsaad. Kon ang imong batan-on nagtambong sa seminary, dapita siya sa pagpakigbahin unsay iyang nakat-unan didto.

Pagpahisama sa mga kasulatan

Usahay ang mga kabatan-onan adunay kalisud kon sa unsa nga paagi ang doktrina ug ang mga baruganan sa mga kasulatan magamit diha sa ilang mga kinabuhi. Tabangi sila kon sa unsa nga paagi ang mga istorya ug mga pagtulun-an diha sa mga kasulatan may kalabutan ngadto sa mga sitwasyon nga ilang gisinati sa panimalay, sa eskwelahan, o kauban sa ilang mga higala.

Pangutana og mga pangutana nga nag-awhag og pagpamalandong

Daghang mga kabatan-onan ang maayong motubag sa mga pangutana nga nagtugot kanila sa pagpahayag sa ilang mga hunahuna ug mga pagbati mahitungod sa mga kasulatan kay sa yano lamang nga balikon pagsulti unsay giingon sa mga kasulatan. Sama pananglit, makapangutana ka, “Unsa kaha ang gitudlo sa Ginoo kaninyo niini nga mga bersikulo?” o “Ngano kaha kini nga pagpadayag makahuluganon ngadto sa mga Santos niadtong mga 1830?”

Paghimo og mga koneksyon ngadto sa pagpalambo sa ilang personal nga mga tumong

Ang pamilyang pagtuon sa kasulatan makahatag og pagdasig alang sa mga kabatan-onan ug sa mga kabataan sa paghimo og mga tumong alang sa ilang espiritwal, pisikal, intelektwal, ug sosyal nga paglambo (tan-awa sa Lucas 2:52).

Andam sa pagdawat sa ilang mga pangutana

Ang usa ka pangutana gikan sa usa ka batan-on usa ka bililhong oportunidad sa pagpakigbahin og kamatuoran ug sa pagpaningkamot nga makasabut sa hilisgutan nga siya sa tinuod interesado. Ayaw kahadlok sa mga pangutana o isalikway kini, bisan kini ingon og walay kalabutan sa hilisgutan sa panaghisgot. Kini OK kon dili nimo matubag ang tanan. Ang panimalay mao ang labing maayo nga dapit sa pagpangita og dungan sa mga tubag.

Awhaga sila sa pagpakigbahin sa ilang mga panabut

Ang mga kabatan-onan adunay talagsaong panglantaw ug mga panabut nga ikatampo ngadto sa pamilya nga pagtuon sa kasulatan. Pahibaloa sila nga ikaw interesado sa unsay gitudlo sa Espiritu kanila mahitungod sa mga kasulatan. Gani ikaw makahimo sa paghangyo kanila sa pagpakigbahin og mga panabut gikan sa ilang personal nga pagtuon.

Pagmapahiangayon

Kon ikaw adunay batan-on kinsa dili andam sa pag-apil sa pamilya nga pagtuon sa kasulatan, pangita og laing mga paagi sa pakigdait kaniya. Sama pananglit, makahisgot ka ba sa ebanghelyo sa yanong paagi diha sa inyong mga panagsultihanay o makigbahin og makahuluganong kasulatan sa paagi nga ingon og wala mangasaba o magmapahitas-on? Ang pagtuon sa kasulatan dili kinahanglan nga parehas ang paghimo sa matag pamilya. Ang ubang mga anak mas gustong magtuon sa mga kasulatan sa tinagsa. Pagmainampuon ug sunda ang mga pag-aghat sa Espiritu.

Miingon si Presidente Russell M. Nelson: “Ako mosaad nga samtang makugihon kamo nga molihok aron sa pagbag-o sa inyong panimalay ngadto sa usa ka sentro sa pagkat-on sa ebanghelyo, sa hinayhinay ang inyong mga adlaw nga Igpapahulay mahimong ikahimuot. Inyong mga anak maghinam-hinam sa pagkat-on ug pagsunod sa mga panudlo sa Manluluwas, ug ang impluwensya sa kaaway sa inyong kinabuhi ug sa inyong panimalay makuhaan. Ang mga kausaban sa inyong pamilya dako ug magpadayon” (“Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 113).