“Mga Ideya sa Pagpalambo sa Imong Personal nga Pagtuon sa Kasulatan,” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)
“Mga Ideya sa Pagpalambo sa Imong Personal nga Pagtuon sa Kasulatan,” Dali, Sunod Kanako—Alang sa mga Indibidwal ug mga Pamilya: 2021
Mga Ideya sa Pagpalambo sa Imong Personal nga Pagtuon sa Kasulatan
Aniay pipila ka yanong mga paagi sa pagpalambo sa imong pagtuon sa pulong sa Dios diha sa mga kasulatan.
Pag-ampo alang sa Kadasig
Ang mga kasulatan mao ang mga pulong sa Dios, busa pangayo Kaniya alang sa pagsabut niini.
Pangitaa ang mga Kamatuoran mahitungod ni Jesukristo
Ang mga kasulatan nagtudlo kanato nga ang tanang mga butang nagpamatuod ni Kristo (tan-awa sa 2 Nephi 11:4; Moises 6:63), busa hunahunaa ang pagsulat og mugbo o sa pagmarka sa mga bersikulo nga nagpamatuod sa Manluluwas, palig-on sa imong gugma alang Kaniya, ug sa pagtudlo unsaon sa pagsunod Kaniya.
Pangitaa ang Makapadasig nga mga Pulong ug mga Hugpong sa mga Pulong
Makita nimo nga piho nga mga pulong ug mga hugpong sa mga pulong diha sa mga kasulatan makadani kanimo, ingon og kini piho nga gisulat alang kanimo. Mahimong bation nimo sa personal nga paagi nga kini angay ug nagdasig ug nag-awhag kanimo. Hunahunaa ang pagmarka niini diha sa imong mga kasulatan o pagsulat niini sa study journal.
Pangitaa ang mga Kamatuoran sa Ebanghelyo
Usahay ang mga kamatuoran sa ebanghelyo (sa kasagaran gitawag nga doktrina o mga baruganan) direkta nga gipahayag, ug usahay gipasabut pinaagi sa ehemplo o istorya. Pangutan-a ang imong kaugalingon, “Unsa nga mahangturong mga kamatuoran ang gitudlo niini nga mga bersikulo?”
Paminaw ngadto sa Espiritu
Bantayi ang imong mga hunahuna ug mga pagbati, bisan og kini walay kalabutan sa unsay imong gibasa. Kadto nga mga pagbati mahimo nga mao gayud ang mga butang nga gusto sa imong Langitnong Amahan nga imong makat-unan.
Ipahisama ang mga Kasulatan sa Imong Kinabuhi
Hunahunaa kon sa unsa nga paagi nga ang mga istorya ug mga pagtulun-an nga imong gibasa magamit sa imong kinabuhi. Sama pananglit, mahimo nimong pangutan-on ang imong kaugalingon, “Unsa nga mga kasinatian ako aduna nga susama sa unsay akong gibasa?” o “Unsaon nako sa pagsunod ang panig-ingnan niini nga tawo dinhi sa mga kasulatan?”
Pangutana samtang Ikaw Nagtuon
Samtang ikaw magtuon sa mga kasulatan, tingali adunay mga pangutana nga mosulod sa hunahuna. Tingali kini nga mga pangutana may kalabutan ngadto sa unsay imong gibasa o sa imong kinabuhi sa kinatibuk-an. Pamalandunga kini nga mga pangutana ug pangita og mga tubag samtang ikaw nagpadayon sa pagtuon sa mga kasulatan.
Gamita ang Mga Tabang sa Pagtuon sa Kasulatan
Aron makabaton pa og dugang nga panabut sa mga bersikulo nga imong gibasa, gamita ang mga footnote, ang Topical Guide, ang Bible Dictionary, ang Giya ngadto sa mga Kasulatan (scriptures.ChurchofJesusChrist.org), ug ubang mga tabang sa pagtuon.
Hunahunaa ang Konteksto sa mga Kasulatan
Ikaw makakaplag og makahuluganong mga panabut mahitungod sa usa ka tudling sa kasulatan samtang hunahunaon nimo ang konteksto niini lakip ang mga kahimtang o ang dapit nga gigikanan niini. Sama pananglit, ang pagkahibalo sa kaagi ug mga tinuohan sa katawhan nga ang Dios nakigsulti makatabang kanimo sa pagsabut og mas maayo sa tuyo sa Iyang mga pulong.
I-rekord ang Imong mga Hunahuna ug mga Pagbati
Adunay daghang mga paagi nga marekord ang mga pagbati nga moabut samtang ikaw nagtuon. Sama pananglit, mahimo nimong markahan ang makahuluganong pulong o hugpong sa mga pulong ug i-rekord ang imong mga hunahuna isip usa ka pahinumdom sa imong mga kasulatan. Mahimo usab nga maghimo ka og journal sa mga panabut, mga pagbati, ug mga hunahuna nga imong nadawat.
Tun-i ang mga Pulong sa mga Propeta ug mga Apostoles sa Ulahing mga Adlaw
Basaha unsay gitudlo sa mga propeta ug mga apostoles sa ulahing mga adlaw mahitungod sa mga baruganan nga imong makit-an diha sa mga kasulatan (sama pananglit, tan-awa sa conference.ChurchofJesusChrist.org ug sa mga magasin sa Simbahan).
Ipakigbahin ang mga Panabut
Ang paghisgot sa mga panabut gikan sa imong personal nga pagtuon dili lamang usa ka maayong paagi sa pagtudlo sa uban, apan makatabang usab kini nga malig-on ang imong pagsabut sa unsay imong nabasa.
Pagpuyo Unsay Imong Makat-unan
Ang pagtuon sa kasulatan dili lamang magdasig kanato apan maggiya usab kanato sa pag-usab sa paagi sa atong pagpuyo. Paminaw sa unsay giaghat sa Espiritu kanimo nga buhaton samtang ikaw nagbasa, ug dayon ipasalig ang pagbuhat niadtong mga pag-aghat.
Si Elder David A. Bednar miingon: “Kinahanglang dili kita maghulat sa Simbahan isip kapunongan nga motudlo o musulti kanato sa tanang butang nga kinahanglan natong mahibaloan aron mahimong matinud-anong mga disipulo ug maisugong molahutay ngadto sa katapusan. Hinuon, ang atong personal nga responsibilidad mao ang pagkat-on sa angay natong makat-onan, pagpuyo sa tukmang paagi nga atong nahibaloan, ug mamahimo kitang matang sa tawo kinsa gusto sa atong Agalon. Ug ang atong mga panimalay mao ang pinakamaayong dapit sa pagkat-on, pagpuyo, ug pag-uswag” (“Andam nga Makaangkon sa Matag Gikinahanglan nga Butang,” Liahona, Mayo 2019, 102).