Ang Pagkakabig Mao ang Atong Tumong

Ang katuyoan sa tanang pagkat-on ug pagtudlo sa ebanghelyo mao ang pagpalig-on sa atong pagkakabig ngadto kang Jesukristo ug pagtabang kanato nga mas mahisama Kaniya. Tungod niini nga rason, kon magtuon kita sa ebanghelyo, wala lamang kita mangita og bag-ong impormasyon; gusto kitang mahimong “bag-o [nga] binuhat” (2 Mga Taga-Corinto 5:17). Nagpasabut kini sa pagsalig diha sa Langitnong Amahan ug ni Jesukristo aron matabangan kita sa pag-usab sa atong mga kasingkasing, sa atong mga panglantaw, sa atong mga lihok, ug sa ato gayud nga mga kinaiya.

Apan ang matang sa pagkat-on sa ebanghelyo nga makapalig-on sa atong pagtuo ug modangat ngadto sa milagro sa pagkakabig dili mahitabo diha-diha dayon. Molapas pa kini sa lawak klasehanan ngadto sa kasingkasing sa indibidwal ug sa panimalay. Nagkinahanglan kini og kanunay, inadlaw-adlaw nga paningkamot sa pagsabut ug pagsunod sa ebanghelyo. Apan ang Langitnong Amahan wala magpaabut kanato sa pagbuhat niini nga mag-inusara––Siya mopadala sa Espiritu Santo sa pagtabang kanato nga mahimong kinabig.

Ang Espiritu Santo naggiya kanato ngadto sa kamatuoran ug nagsaksi niana nga kamatuoran (tan-awa diha sa Juan 16:13). Molamdag Siya sa atong mga hunahuna, mopalagsik sa atong mga panabut, ug motandog sa atong mga kasingkasing uban sa pagpadayag gikan sa Dios, ang tinubdan sa tanang kamatuoran. Ang Espiritu Santo nagputli sa atong mga kasingkasing. Modasig Siya kanato og tinguha sa pagsunod sa kamatuoran, ug mohunghong Siya kanato og mga paagi sa pagbuhat niini. Sa tinuod, “ang Espiritu Santo … magatudlo [kanato] sa tanang butang” (Juan 14:26).

Tungod niini nga mga rason, ang atong mga paningkamot sa pagsunod, pagkat-on, ug pagtudlo sa ebanghelyo, kinahanglan nga kita, una ug labaw sa tanan magtinguha sa pakig-uban sa Espiritu. Kini nga tumong kinahanglang modumala sa atong mga pagpili ug mogiya sa atong mga hunahuna ug mga lihok. Kinahanglang tinguhaon nato ang bisan unsa nga magdapit sa impluwensya sa Espiritu ug sa pagsalikway sa bisan unsa nga moabug niana nga impluwensya—kay nasayud kita nga kon takus kita sa presensya sa Espiritu Santo, takus usab kita nga mopuyo diha sa presensya sa Langitnong Amahan ug sa Iyang Anak, si Jesukristo.