“Ang Paggamit sa Dali, Sunod Kanako—Alang sa mga Indibidwal ug mga Pamilya,” Dali, Sunod Kanako—Alang sa mga Indibidwal ug mga Pamilya: Basahon ni Mormon 2021 (2020)
“Ang Paggamit sa Dali, Sunod Kanako—Alang sa mga Indibidwal ug mga Pamilya,” Dali, Sunod Kanako—Alang sa mga Indibidwal ug mga Pamilya: 2021
Ang Paggamit sa Dali, Sunod Kanako—Alang sa mga Indibidwal ug mga Pamilya
Para Kang Kinsa Kini nga Kapanguhaan?
Kini nga kapanguhaan gihimo alang sa matag indibidwal ug pamilya diha sa Simbahan. Gihimo kini aron matabangan kamo nga makakat-on sa ebanghelyo—sa imong kaugalingon ba o kauban sa imong pamilya. Kon wala ka makatuon sa ebanghelyo sa regular nga paagi, kini nga kapanguhaan makatabang kanimo sa pagsugod. Kon ikaw aduna nay maayong kaanad sa pagtuon sa ebanghelyo, kini nga kapanguhaan makatabang kanimo nga makabaton og mas makahuluganong mga kasinatian.
Unsaon Nako sa Paggamit Niini nga Kapanguhaan?
Gamita kini nga kapanguhaan sa bisan unsang paagi nga makatabang kanimo. Makita nimo kini nga makatabang isip giya o tabang alang sa personal ug pamilya nga pagtuon sa kasulatan. Magamit usab nimo kini alang sa home evening. Ang mga gilatid [outline] naghatag og dugang nga importansya sa mga baruganan nga makaplagan diha sa Doctrina ug mga Pakigsaad, nagsugyot og mga ideya sa pagtuon, ug mga kalihokan alang sa mga indibidwal ug mga pamilya, ug naghatag og mga luna sa pagrekord sa imong mga pagbati.
Dali, Sunod Kanako—Alang sa mga Indibidwal ug mga Pamilya wala magpasabut nga ipuli o ikompetensya sa maayong mga butang nga imong gibuhat. Sunda ang giya sa Espiritu sa pagtino unsaon sa paghimo ang imong kaugalingong pagtuon sa pulong sa Dios.
Sa Unsa nga Paagi Kini nga Kapanguhaan may Kalabutan sa Unsay Mahitabo sa Simbahan?
Ang gilatid dinhi niini nga kapanguhaan gi-organisar sumala sa sinemana nga iskedyul sa pagbasa. Dali, Sunod Kanako—Alang sa Primary ug ang Dali, Sunod Kanako—Alang sa Sunday School nagsunod sa samang iskedyul. Sa pagsuporta sa imong mga paningkamot sa pagkat-on ug pagsunod sa ebanghelyo diha sa panimalay, ang imong mga magtutudlo sa simbahan mohatag kanimo og mga oportunidad sa pagpakigbahin sa imong mga kasinatian, mga hunahuna, ug mga pangutana mahitungod sa mga tudling sa kasulatan nga imo nang gitun-an diha sa panimalay.
Tungod kay ang Sunday School kaduha lamang itudlo sa usa ka bulan, ang magtutudlo sa Sunday School mahimong mopili kon iyang laktawan o itipon ang mga latid aron makasunod sa sinemana nga iskedyul. Kini gikinahanglan usab sa mga semana diin ang regular nga mga miting sa Simbahan dili mapahigayon tungod sa komperensya sa stake o ubang mga hinungdan. Sulod niini nga mga semana gidapit ka sa pagpadayon sa pagtuon sa Doktrina ug mga Pakigsaad diha sa panimalay.
Kinahanglan Ba Akong Mosunod sa Iskedyul?
Ang iskedyul makatabang kanimo sa paghuman og basa sa Doktrina ug mga Pakigsaad sa katapusan sa tuig. Agi ug dugang, ang pagsunod sa samang iskedyul sama sa uban makagiya ngadto sa makahuluganong mga kasinatian sa panimalay, sa simbahan, ug bisan asa pa. Apan ayaw batia nga nahigtan ka sa iskedyul o napugos sa pagbasa sa matag bersikulo; ang iskedyul giya lamang aron matabangan ka sa pagpahaum sa imong kaugalingon nga kapaspason. Ang importante nga butang mao nga ikaw nagkat-on sa ebanghelyo sa indibidwal nga paagi ug isip usa ka pamilya.