“Enero 25–31. Doktrina ug mga Pakigsaad 6–9: ‘Kini Mao ang Espiritu sa Pagpadayag,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)

“Enero 25–31. Doktrina ug mga Pakigsaad 6–9,” Dali, Sunod Kanako—Alang sa mga Indibidwal ug mga Pamilya: 2021

Imahe

tigsulat nagsulat sa papel

Enero 25–31

Doktrina ug mga Pakigsaad 6–9

“Kini Mao ang Espiritu sa Pagpadayag”

Ang Ginoo mopadayag sa mga kamatuoran ngari kanato diha sa atong mga hunahuna ug sa mga kasingkasing (tan-awa sa Doktrina ug mga Pakigsaad 8:2–3). Samtang magbasa ka sa Doktrina ug mga Pakigsaad 6–9, isulat ang bisan unsang hunahuna nga imong madawat.

Irekord ang Imong mga Impresyon

Niadtong tinglarag sa 1828, usa ka batan-ong magtutudlo sa eskwelahan nga ginganlan og Oliver Cowdery nagtrabaho sa pagtudlo didto sa Manchester, New York, ug mipuyo uban sa pamilya ni Lucy ug Joseph Smith Sr. Si Oliver nakadungog kabahin sa ilang anak nga si Joseph, kinsa karon nagpuyo didto sa Harmony, Pennsylvania, ug si Oliver, kinsa miisip sa iyang kaugalingon nga nangita sa kamatuoran, gustong masayud pa og dugang. Ang mga Smith mihulagway sa mga pagbisita sa mga anghel, sa karaan nga sinulat, ug sa gasa sa paghubad pinaagi sa gahum sa Dios. Si Oliver naikag. Tinuod ba kaha kini? Si Lucy ug si Joseph Sr. mihatag kaniya og tambag nga magamit ngadto ni bisan kinsa nga nangita sa kamatuoran: pag-ampo ug pangutana sa Ginoo.

Gibuhat ni Oliver, ug ang Ginoo mitubag, nagsulti og kalinaw ug kasiguroan ngadto sa hunahuna ni Oliver. Ang pagpadayag, nadiskubrihan ni Oliver, mahimong personal—butang nga iyang makat-unan og dugang pa sa umaabut nga mga bulan. Ang pagpadayag dili lang alang sa mga propeta; kini alang sa tanan kinsa nagtinguha niini ug nangita niini. Wala pa masayud si Oliver sa tanang butang, apan nasayud siya og igo lang aron mohimo sa iyang sunod nga lakang. Ang Ginoo nagbuhat og importanting butang pinaagi ni Joseph Smith, ug si Oliver gusto nga mahimong kabahin niini.

Alang sa dugang nga impormasyon mahitungod sa luyo sa kasaysayan sa Doktrina ug mga Pakigsaad 6–9, tan-awa sa Mga Santos, 1:58–64; “Days of Harmony” (video, ChurchofJesusChrist.org).

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 6; 8–9

Ang Langitnong Amahan namulong ngari kanako pinaagi “sa Espiritu sa kamatuoran.”

Niadtong tingpamulak sa 1829 mibyahe si Oliver Cowdery ngadto sa Harmony ug miboluntaryo nga mamahimong tigsulat ni Joseph Smith samtang siya mihubad sa Basahon ni Mormon. Karon si Oliver aduna nay suod nga paglantaw sa proseso sa paghubad. Ang kasinatian nakahatag niya og kalipay, ug naghunahuna kon mapanalanginan ba kaha siya sa samang gasa sa paghubad. Ang Ginoo mitugot kaniya sa pagsulay sa paghubad, apan ang pagdawat og pagpadayag bag-o alang kang Oliver, ug ang iyang pagsulay wala magsilbi. Kinahanglan pa gihapon siya nga makat-on og daghan, ug sa Doktrina ug mga Pakigsaad 6, 8, ug 9 makita nga ang Ginoo andam nga motudlo kaniya.

Samtang magbasa ka niining mga seksyon, timan-i unsa ang gitudlo sa Ginoo mahitungod sa personal nga pagpadayag. Sa unsa nga paagi nga ang Iyang mga pulong dunay kalabutan sa imong mga nasinati—o gustong masinati?

Pananglitan, unsa ang gisugyot sa Doktrina ug mga Pakigsaad 6:5–7; 8:1; 9:7–8 mahitungod sa unsay gikinahanglan sa Ginoo diha nimo sa dili pa Siya mopadayag sa Iyang kabubut-on?

Unsay imong nakat-unan gikan sa Doktrina ug mga Pakigsaad 6:14–17, 22–24; 8:2–3; 9:7–9 mahitungod sa lain-laing paagi sa pagpadayag nga mahimong moabut?

Aduna ka pa bay laing nakat-unan mahitungod sa pagpadayag gikan niini nga mga seksyon?

Aron makat-on pa og dugang mahitungod sa pagpadayag, tan-awa sa Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 93–96; Julie B. Beck, “Ug Ibabaw sa mga Sulugoong Babaye Niadtong mga Adlawa Igabu-bu Ko ang Akong Espiritu,” Liahona, Mayo 2010, 10–12. Alang sa dugang nga impormasyon mahitungod sa “gasa ni Aaron” nga gihulagway diha sa seksyon 8, tan-awa sa “Oliver Cowdery’s Gift,” Revelations in Context, 15–19.

Aron makakat-on pa og dugang mahitungod sa unsa ang panudlo sa buhi nga mga propeta ug mga apostoles bahin sa pagpadayag, tan-awa ang “Paminaw Kaniya!” nga koleksyon sa video.

Doktrina ug mga Pakigsaad 6:18–21, 29–37

Paghunahuna ngadto kang Kristo sa matag hunahuna.

Bisan og si Joseph nakasinati na og “malisud nga mga kahimtang” samtang naghimo sa buhat sa Ginoo (Doktrina ug mga Pakigsaad 6:18), siya ug si Oliver lagmit walay ideya kon unsa kalisud ang dangatan niadtong mga kahimtang sa misunod nga pipila ka mga tuig. Apan ang Ginoo nasayud, ug Siya nasayud unsa nga mga pagsulay usab ang anaa sa umaabut nimo. Ang Iyang tambag ngadto ni Joseph ug Oliver sa Doktrina ug mga Pakigsaad 6:18–21, 29–37 makatabang usab nimo. Unsa kaha ang gibati nilang Joseph ug Oliver human nadungog kini nga mga pulong? Unsay nakita nimo niining mga bersikulo nga makatabang nimo nga mosalig sa Ginoo? Sa unsang paagi nga imong mas mahunahuna si Kristo diha sa imong kinabuhi?

Doktrina ug mga Pakigsaad 6–7; 9:3, 7–14

“Bisan ingon nga ikaw nagtinguha kanako busa kini mahimo nganha kanimo.”

Timan-i kon kapila ka higayon ang mga pulong sama sa “tinguha” o “mga tinguha” migawas diha sa mga seksyon 6 ug 7. Unsay imong nakat-unan gikan niini nga mga seksyon mahitungod sa importansya nga gibutang sa Dios diha sa imong mga tinguha? Ipangutana sa imong kaugalingon ang pangutana sa Ginoo diha sa Doktrina ug mga Pakigsaad 7:1: “Unsa ang imong gitinguha?”

Usa sa matarung nga tinguha ni Oliver Cowdery—ang paghubad sama sa gibuhat ni Joseph Smith—wala matuman. Samtang magbasa ka sa Doktrina ug mga Pakigsaad 9:3, 7–14, unsa nga mga pagbati ang imong nadawat nga tingali makatabang nimo kon ang imong matarung nga mga gitinguha dili matuman?

Tan-awa usab sa Doktrina ug mga Pakigsaad 11:8; Dallin H. Oaks, “Tinguha,” Liahona, Mayo 2011, 42–45.

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 6:7, 13.Unsaon nimo sa pagtabang ang imong pamilya nga makasabut nga ang tinuod nga “mga bahandi” makita diha sa kinabuhing dayon? (bersikulo 7). Mahimo kang modapit og mga sakop sa pamilya sa paghimo og murag kwarta ug sulatan o drowingan kini og pipila sa daghang mga panalangin nga nadawat sa imong pamilya tungod sa gipahiuli nga ebanghelyo.

Doktrina ug mga Pakigsaad 6:15, 22–23; 8:2–3; 9:7–9.Ang pagbasa niining mga bersikulo mahitungod sa paagi nga ang Dios namulong ngadto sa Iyang mga anak mahimong usa ka maanindot nga oportunidad sa pagpaambit diha sa imong pamilya kon sa unsang paagi nga Siya makig-istorya kanimo.

Doktrina ug mga Pakigsaad 6:33–37.Ang mga sakop sa pamilya mahimong mopaambit og mga paagi nga sila “makahimo og maayo,” bisan kon mobati sila og kahadlok. Makatabang usab ang pagtan-aw sa tanan o pipila sa mensahe ni Elder Ronald A. Rasband sa “Ayaw Kabalaka” ( Liahona, Nob. 2018, 18–21). Unsa ang ipasabut sa “paghunahuna ngadto kang [Kristo] sa matag hunahuna”? (bersikulo 36). Unsa ang pipila ka mga ehemplo sa mga tawo kinsa midangop ngadto sa Ginoo aron sa pagbuntog sa pagduhaduha ug kahadlok? (tan-awa, pananglitan, sa Ester 4; Alma 26:23–31).

Doktrina ug mga Pakigsaad 8:10.Tingali mahimo kining usa ka maanindot nga oportunidad sa pagpaambit kon sa unsang paagi ang pagtuo ni Jesukristo nakapalig-on kanimo ug sa imong pamilya. Nganong importante man nga kita “mangayo diha sa hugot nga pagtuo”? Unsa nga mga panalangin ang imong nakita gikan sa pagpangita og mga tubag o tabang diha sa hugot nga pagtuo?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Buhata Gayud ang Matarung,” Songbook sa mga Bata, 80.

Imahe

icon sa mga tingog sa pagpahiuli

Mga Tingog sa Pagpahiuli

Hubad sa Basahon ni Mormon

Niadtong Abril 1829, sa buwan sa dihang ang mga seksyon 6–9 sa Doktrina ug mga Pakigsaad nadawat, ang nag-unang buhat ni Joseph Smith mao ang paghubad sa Basahon ni Mormon. Sa dihang gihangyo sa pagsaysay kon giunsa sa paghubad kini nga rekord, miingon si Joseph “nga dili tumong niini ang pagsulti sa kalibutan sa tanang partikular.”¹ Kanunay niyang ipahayag nga kini gihubad “pinaagi sa gasa, ug gahum sa Dios.”²

Wala kitay nahibaloan nga daghang detalye mahitungod sa milagroso nga proseso sa paghubad, apan nasayud kita nga si Joseph Smith usa ka manalagna, gitabangan sa mga instrumento nga giandam sa Dios: duha ka sihag nga bato nga gitawag og Urim ug Thummim ug laing bato nga gitawag og bato sa manalagna.³

Ang mosunod nga mga pamahayag, gikan sa mga saksi sa proseso sa paghubad, nagsuportar sa pagsaksi ni Joseph.

Gituohan nga kini nga kahon, nga gipanag-iya ni Hyrum Smith, maoy temporaryo nga gigamit sa pagtago sa bulawan nga mga palid.

Emma Smith

Imahe

Emma Smith

“Sa dihang naghubad ang akong bana sa Basahon ni Mormon, nakasulat ko og usa ka tipik niini, samtang siya midiktar sa matag kapahayag [sentence], pulong ngadto sa laing pulong, ug sa dihang naabut siya sa mga ngalan sa tawo dili siya makalitok niini, o sa tag-as nga mga pulong, iya kining isulti ang panitik, ug samtang nagsulat ko niini, kon masayop ko sa bisan unsa nga titik, iya akong pahunungon ug iyang korehian ang akong panitik bisan og imposible nga makita niya kon giunsa nako sa pagsulat kini nianang higayuna. Bisan ang pulong nga Sarah dili siya makalitok sa sinugdanan, apan kinahanglan pa nga litukon ang titik niini, ug mosulti ko niini alang kaniya.”⁴

“Ang mga palid kanunayng nahimutang diha sa lamesa nga walay bisan unsa nga salipud nga makatago niini, giputos sa gamayng hapin sa lamesa, nga akong gihatag niya aron pustan niini. Kausa akong nahikap ang mga palid, samtang anaa kini sa lamesa, gisubay ang luta ug porma niini. Morag mabawog kini sama sa baga nga papel, ug dunay tingog nga sama sa metal kon ang mga tumoy paklion gamit ang kumagko, sama sa buhaton usahay sa usa ka tawo nga mopakli sa mga palid sa libro gamit ang kumagko. …

“Ako nagtuo nga ang Basahon ni Mormon balaanon ang pagkatinuod—ako wala gayud magduda bisan gamay sa katinuod niini. Natagbaw ko nga walay tawo nga makadiktar sa mga sinulat diha sa mga manuskrito gawas kon siya dinasig; tungod kay, sa diha nga nahimong isip iyang tigsulat, si [Joseph] modiktar ngari kanako matag karon ug unya; ug inigbalik human og kaon, o human sa mga pagkabalda, mobalik siya kon diin siya mohunong, nga dili magtan-aw sa manuskrito o ipabasa ang bisan asa nga bahin niini ngadto kaniya. Usa kini ka naandang butang nga iyang himoon. Dili kini posible nga ang usa ka makinaadmanon nga tawo makahimo niini; ug, alang sa usa ka tawo nga ignorante kaayo ug dili makinaadmanon sama niya, imposible gayud ni kaayo.”⁵

Paghulagway kang Emma ug Joseph Smith ni Michael T. Malm

Oliver Cowdery

Imahe

Oliver Cowdery

“Ako misulat gamit ang akong kaugalingong pangsulat sa tibuok Basahon ni Mormon (gawas lang sa pipila ka mga pahina) ingon nga kini gihubad gikan sa mga ngabil sa propeta, samtang siya mihubad niini pinaagi sa gasa ug gahum sa Dios, pinasikad sa Urim ug Thummim, o, sumala sa tawag niini sa basahon, balaan nga mga tighubad. Akong nakita sa kaugalingon nakong mga mata, ug nagunitan sa akong mga kamot, ang bulawan nga mga palid diin kini nahubad. Nakita usab nako ang mga tighubad [interpreter].”⁶