Manuskrito sa Basahon ni Mormon

Kopya sa orihinal nga manuskrito sa Basahon ni Mormon.

Pebrero 1–7

Doktrina ug mga Pakigsaad 10–11

“Aron Ikaw Mahimo nga Magmadaugon”

Ang pagsulat sa mga impresyon samtang nagbasa sa mga kasulatan sama sa pagtanom og mga liso; bisan gamay nga impresyon makadala ngadto sa makahuluganong personal nga pagpadayag.

Irekord ang Imong mga Impresyon

Samtang miuswag ang paghubad sa Basahon ni Mormon, natural nga mitumaw ang usa ka pangutana: Unsay angay buhaton ni Joseph Smith ug ni Oliver Cowdery niadtong mga nahubad nga pahina nga nangawala? Ang butang nga makatarunganon mao nga tingali mobalik ug usbon sa paghubad kadto nga tipik, apan ang Ginoo makakita og butang nga dili nila makita—ang dautang mga tawo nagplano sa pag-usab sa mga pulong niadtong mga pahina aron sa pagmugna og katahap diha sa dinasig nga buhat ni Joseph. Ang Dios dunay plano sa pagbabag sa mga paningkamot ni Satanas ug pabayron tungod sa unsay nawala. Kini nga plano nasugdan na sulod sa liboan katuig sa dihang si propeta Nephi mibati nga nadasig sa paghimo og ikaduha nga talaan nga naglangkob sa samang panahon. Sa kaulahian, si Mormon nadasig sa pag-apil niining talaan diha sa Basahon ni Mormon “alang sa usa ka maalamon nga katuyoan” nga nahibaloan sa Ginoo (tan-awa sa Ang mga Pulong ni Mormon 1:3–7).

“Akong kaalam,” ang Ginoo misulti kang Joseph, “labaw pa ka gamhanan kay sa kaigmat sa yawa” (Doktrina ug mga Pakigsaad 10:43). Mao kana ang masaligon nga mensahe diha sa panahon sama sa atoa karon, kon ang nagpadayon nga mga paningkamot sa kaaway sa pagpaluya sa pagtuo magkakusog. Sama ni Joseph, mahimo kitang “magmatinud-anon ug mopadayon” diha sa buhat nga gipabuhat sa Dios kanato (bersikulo 3). Dayon atong masuta nga Siya mihatag na og paagi aron nga “ang mga ganghaan sa impyerno dili makabuntog batok kanato” (bersikulo 69).

Tan-awa sa Mga Santos, 1:51–61.

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 10:1–33

Si Satanas nagtinguha sa pagguba sa buhat sa Dios.

Mas gusto ni Satanas nga atong kalimtan nga siya buhi—o nga kita dili kaayo makamatngon sa iyang mga pagsulay sa pag-impluwensya kanato (tan-awa sa 2 Nephi 28:22–23). Apan ang pulong sa Ginoo sa Doktrina ug mga Pakigsaad 10 mibutyag nga si Satanas nagmakanunayon, aktibo nga misukwahi sa buhat sa Dios. Samtang magbasa ka sa mga bersikulo 1–33, tinua kon sa unsang paagi si Satanas naningkamot sa pagguba sa buhat sa Dios diha sa panahon ni Joseph Smith (tan-awa usab sa mga bersikulo 62–63). Unsay pagkasusama nga imong nakita sa mga paagi sa buhat ni Satanas karon? Makapangayo ka sa Ginoo sa pagtabang kanimo nga makita kon sa unsang paagi nga si Satanas lagmit motintal kanimo. Unsay imong nakat-unan gikan sa seksyon 10 nga makatabang nimo sa pagbatok sa mga paningkamot ni Satanas?

Doktrina ug mga Pakigsaad 10:34–52

Ang “akong kaalam [sa Ginoo] labaw pa ka gamhanan kay sa kaigmat sa yawa.”

Kapin sa 2,400 ka tuig nga nag-una, ang Ginoo miandam sa pagpabayad sa nawala nga mga pahina sa Basahon ni Mormon (tan-awa sa 1 Nephi 9). Unsay imong nakat-unan mahitungod sa Ginoo gikan sa Doktrina ug mga Pakigsaad 10:34–52? Unsa ang ebidensya sa kalooy ug nag-una nga kahibalo sa Ginoo ang imong nakita diha sa imong kinabuhi?

Ang rekord nga giandam sa Dios aron ipuli sa nawala nga manuskrito makita diha sa 1 Nephi hangtud sa Omni. Sa unsang paagi ang mga istorya ug mga pagtulun-an niining rekord “[nakahatag] og mas dakong panglantaw [sa] ebanghelyo” alang kanimo? (Doktrina ug mga Pakigsaad 10:45).

Si Mormon nagpamubo sa mga palid

Si Mormon Nagpamubo sa mga Palid, ni Tom Lovell

Doktrina ug mga Pakigsaad 11

Kon mangayo ko sa Dios, ako makadawat.

Pipila sa mga sakop sa pamilya ni Joseph Smith ug mga higala mihangyo kaniya sa pagpangutana sa kabubut-on sa Ginoo alang kanila. Malipayon si Joseph nga mibuhat sa ingon, apan ang Ginoo andam usab sa paghatag kanila og personal nga pagpadayag. Sa Doktrina ug mga Pakigsaad 11, usa ka pagpadayag nga nadawat ni Joseph alang sa iyang magulang nga si Hyrum, ang Ginoo miingon, “Ako mohatag nganha kanimo sa akong Espiritu, … ug unya ikaw masayud … sa tanan nga bisan unsa nga mga butang nga ikaw nagtinguha” (Doktrina ug mga Pakigsaad 11:13–14).

Ang Ginoo nag-ingon nga ang Iyang mga pulong alang “sa tanan kinsa adunay maayo nga mga tinguha, ug naggalab sa ilang sanggot sa pag-ani” (bersikulo 27). Sa Doktrina ug mga Pakigsaad 11, unsa ang gustong isulti sa Ginoo diha nimo mahitungod sa personal nga pagpadayag? mahitungod sa pagsalmot diha sa buhat sa Dios? Unsa pay laing mensahe ang anaa Kaniya alang nimo?

Doktrina ug mga Pakigsaad 11:15–26

Samtang magtinguha ko sa “pagbaton sa pulong [sa Dios],” akong madawat ang Iyang Espiritu ug gahum.

Bisan sa wala pa nahubad ang Basahon ni Mormon, si Hyrum Smith ganahan nang mosangyaw sa ebanghelyo. Samtang magbasa ka sa tubag sa Ginoo ngadto sa iyang mga gitinguha, ikonsiderar unsa ang kahulugan niini diha nimo sa “pagbaton sa pulong sa [Dios]” (bersikulo 21). Sa unsang paagi ang pagbaton sa mga pulong sa Dios makatabang nimo sa pagserbisyo diha sa Simbahan? Sa unsang paagi nga kini makadala sa gahum sa Dios diha sa imong kinabuhi?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 10:5.Unsa ang atong makat-unan gikan niini nga bersikulo mahitungod sa gahum sa pag-ampo? Unsaon nato sa “pag-ampo kanunay”? (Alang sa pipila ka ideya, tan-awa sa David A. Bednar, “Pag-ampo Kanunay,” Liahona, Nob. 2008, 41–44.)

Doktrina ug mga Pakigsaad 10:38–46.Aron matabangan ang imong pamilya nga mahisgutan kon sa unsang paagi ang Ginoo mibayad alang sa nawala nga mga pahina sa nahubad nga Basahon ni Mormon, tingali ang mga sakop sa pamilya mahimong mag-istoryahanay mahitungod sa butang nga bag-ohay lang nawala nila. Unsay ilang gibati sa dihang ilang nadiskubrihan nga nawala kini? Unsay ilang gibati sa dihang nakit-an kini? Bisan og ang nawala nga mga pahina sa Basahon ni Mormon wala nga gayud makit-i, giunsa sa Ginoo sa pagpuli tungod sa pagkawala niini, sumala sa Doktrina ug mga Pakigsaad 10:38–46?

Doktrina ug mga Pakigsaad 10:55–70.Dapita ang mga sakop sa pamilya sa pagpangita o pagmarka sa hugpong sa mga pulong nga gisugdan sa “Ako” o “Ako mohimo.” Unsay atong makat-unan sa hugpong sa mga pulong nga “Ako” mahitungod kon si kinsa si Jesukristo ug sama sa unsa Siya? Unsay atong makat-unan gikan sa hugpong sa mga pulong nga “Ako mohimo” mahitungod sa unsay Iyang gibuhat? Awhaga ang mga sakop sa pamilya sa pagpaambit kon sa unsang paagi ang mga kamatuoran nakapalig-on sa ilang pagtuo diha ni Jesukristo.

Doktrina ug mga Pakigsaad 11:12–14.Ang pagbasa niining mga bersikulo makatabang sa mga sakop sa imong pamilya nga makaila kon ang Espiritu makighinabi kanila. Mahimo nimong pasigaon ang flashlight diha sa salog ug dapita ang usa ka sakop sa pamilya sa pagbalhin kon diin ang kahayag nagdan-ag. Sa unsang paagi nga nahisama kini sa pagsunod sa giya sa Espiritu Santo? Unsa nga personal nga mga kasinatian ang imong ikapaambit?

Doktrina ug mga Pakigsaad 11:15–30.Hunahunaa ang paghimo og lista sa mga butang nga gisulti sa Ginoo nga buhaton ni Hyrum Smith aron siya maandam sa pagpaambit sa ebanghelyo. Unsay kinahanglan natong trabahoon isip usa ka pamilya?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Pagsiksik, Pamalandong, ug Pag-ampo,” Songbook sa mga Bata, 66; tan-awa sa “Ideas to Improve Your Family Scripture Study.”

Pagpalambo sa Atong Pagtudlo

Gamita ang mga kasulatan sa imong kinabuhi. Human makabasa og usa ka tudling sa kasulatan, hangyoa ang mga sakop sa pamilya sa pagpaambit og mga paagi nga magamit ang mensahe ngadto sa ilang mga kinabuhi. Pananglitan, mahimo sila nga mopaambit kon giunsa sila sa pag-impluwensya sa Espiritu sa mga paagi nga gihulagway diha sa Doktrina ug mga Pakigsaad 11:12–13.

si Joseph ug si Hyrum Smith

Joseph ug si Hyrum Smith, ni KennethA. Corbett