Pagkahimo nga Tinuod nga mga Milenyal

Presidente Russell M. Nelson:

Sa Korum sa Napulog Duha ka mga Apostoles

Usa ka Gabii uban ni Presidente Russell M. Nelson

Tibuok Kalibutan alang sa mga Young Adults • Enero 10, 2016 • Brigham Young University–Hawaii

Minahal kong mga kaigsoonan, kining tuiga usa gyud ka maanindot nga tuig. Sa unang mga adlaw niini, si Wenday ug ako nanamilit na sa akong mahal nga sister nga si Marjory, nga mibiya na niining mortal nga kinabuhi. Gi-welcome namo ang duha ka masuso sa among pamilya—si Wade Richard Walker ug Isaac Russell McDonough. Ug karon duna mi pribilehiyo sa pagpamaulong kaninyong talagsaong mga young adult sa tibuok kalibutan. Mapasalamaton kaayo kami kaninyo.

Mapasalamaton kaayo ako sa importante nga mensahe ni Wendy ug sa iyang makadasig nga ehemplo! Mapasalamaton usab ako sa pagtambong ni Elder Kim B. Clark sa Seventy ug sa Church Commissioner of Education; sa iyang asawa si, Sue; ug Chad H. Webb, administrator of Seminaries and Institutes of Religion, ug sa iyang asawa, nga si Kristi.

Akong gidala kaninyo ang pagtimbaya ug gugma gikan sa Unang Kapangulohan ug sa Korum sa Napulog Duha ka mga Apostoles. Mapasalamaton kami sa inyong debosyon sa Ginoo ug sa Iyang gipahiuli nga ebanghelyo. Mapasalamaton kami sa matag higayon nga kamo mobarug ug mamulong alang sa kamatuoran—ilabi na kon kini dili popular.

Daghang mga tawo ang motawag kaninyo isip Milenyal. Akong angkunon nga kon ang mga researcher motawag ninyo niana nga pulong ug mohulagway kon unsa ang mapadayag sa ilang mga pagtuon kabahin ninyo—inyong ganahan ug dili ganahan, inyong mga pagbati ug mga hilig, inyong mga kalig-on ug kahuyang—dili ko komportable. Adunay usa ka butang kabahin sa paagi nga sila mogamit sa termino nga Milenyal nga naghasol kanako. Ug sa walay lipud-lipod, dili kaayo ko interesado kon unsay ikasulti sa mga eksperto kabahin ninyo kay sa unsay gisulti sa Ginoo kanako kabahin ninyo.

Sa dihang nag-ampo ko kabahin ninyo ug nangutana sa Ginoo unsay Iyang pagbati mahitungod ninyo, lahi kaayo ang akong gibati gikan sa unsay gisulti sa mga researcher. Ang espirituhanong mga impresyon nga akong nadawat kabahin ninyo naghimo kanako nga motuo nga ang termino nga Milenyal tinuoray nga haum alang kaninyo. Apan tungod sa lahi kaayo nga rason kay sa nasabtan sukad sa mga eksperto.

Ang termino nga Milenyal haum gayud kaninyo kon kana nga termino nagpahinumdom kaninyo kon si kinsagayud kamo ug unsay katuyoan sa inyong kinabuhi gayud. Ang usa ka Tinuod nga Milenyal mao ang usa ka tawo kinsa natudloan ug nagtudlo sa ebanghelyo ni Jesukristo didto sa premortal nga kinabuhi, ug kinsa mihimo og mga pakigsaad didto uban sa atong Langitnong Amahan kalabut sa maisugong mga butang—bisan ang kamaisugon samoral nga kaisug—nga inyong buhaton samtang ania sa yuta.

Ang usa ka Tinuod nga Milenyal mao ang usa ka lalaki o babaye kinsa gisaligan sa Dios aron ipadala ngadto sa yuta atol sa labing mahinungdanong dispensasyon sa kasaysayan sa kalibutan. Ang usa ka Tinuod nga Milenyal mao ang usa ka lalaki o babaye kinsa nabuhi karon aron sa pagtabang sa pag-andam sa mga katawhan niini nga kalibutan alang sa Ikaduhang Pag-anhi ni Jesukristo ug sa Iyang milenyal nga paghari. Makasiguro kamo niini—kamo natawo aron mahimong usa ka Tinuod nga Milenyal.

Ang pangutanan mao “Unsaon man ninyo pagbarug ug pagpakabuhi isip usa ka Tinuod nga Milenyal?” Ako adunay upat ka mga rekomendasyon.

Pagkat-on kon si kinsa gayud kamo!

Ang akong unang rekomendasyon: Pagkat-on kon kinsa gayud kamo.

Paggahin og panahon sa paghunahuna sa mainampoong paagi kabahin niini nga mga kamatuoran:

Kamo pinili nga anak nga lalaki o anak nga babaye sa Dios.
Kamo gilalang diha sa Iyang panagway.
Gitudloan kamo didto sa kalibutan sa espiritu sa pag-andam kaninyo alang sa bisan unsa ug tanang butang nga inyong masugatan atol niining ulahi nga bahin niining ulahing mga adlaw.¹ Kana nga pagtudlo naglahutay sulod kaninyo!

Nagpuyo kita sa “ika-onse nga takna.” Ang Ginoo mipahayag nga kini mao ang katapusan nga panahon nga Siya motawag og mga mamumuo ngadto sa Iyang ubasan sa pagpundok sa mga pinili gikan sa upat ka mga suok sa kalibutan² Ug kamo gipadala sa pag-apil niini nga panagpundok. Balik-balik nako mismong nakit-an ang gamhanang impluwensya sa Tinuod nga mga Milenyal samtang sila nagdala sa uban ngadto sa kahibalo sa kamatuoran. Usa kini ka bahin sa inyong pagkatawo ug katuyoan isip binhi ni Abraham!³

Pipila ka bulan ang milabay si Wendy ug ako adunay talagsaong kasinatian sa layong bahin sa Siberia. Lakip niadtong mga nanagbiyahe uban kanamo sa among “P-day” sa Irkutsk mao ang presidente sa misyon, si Gregory S. Brinton; iyang asawa,si Sally; ug ilang returned missionary nga anak, si Sam, kinsa miserbisyo sa iyang misyon sa Russia. Among gibisita ang matahum nga Lake Baikal ug usa ka merkado diha sa baybayon niini.

Dihang mibalik kami sa among van, among namatikdan nga wala si Sam. Sa wala madugay mibalik siya, giubanan sa usa ka hamtong nga babaye nga ginganlan og Valentina. Sa iyang lumad nga Russian, si Valentina madasigong mituaw, “Kinahanglan ko nga makigkita sa inahan niining batan-ong lalaki. Matinahuron, maalamon, ug mabination kaayo siya! Kinahanglan ko nga makigkita sa iyanginahan!” Si Valentina nadani sa masanag, puno sa kahayag nga panagway ni Sam.

Si Sam mipaila-ila ni Valentina ngadto sa iyang inahan ug amahan, mihatag kaniya og pamphlet mahitungod sa Manluluwas, ug nakigsabut nga bisitahan siya sa mga misyonaryo. Sa dihang ang mga misyonaryo sa wala madugay mibisita kaniya ug mihatag og kopya sa Basahon ni Mormon, misaad siya nga mobasa niini. Pipila ka mga babaye nga nagtrabaho sa samang dapit naghinam-hinam usab kabahin sa bag-ong basahon nga nadawat ni Valentina. Wala pa kita masayud sa katapusan niini nga istorya, apan tungod sa talagsaong kahayag nga gipasanag ni Sam, si Valentina ug pipila sa iyang mga higala gipaila sa ebanghelyo.

Ang Tinuod nga mga Milenyal, sama ni Sam, nasayud kon si kinsa gayud sila. Sila mapahinungurong mga disipulo ni Jesukristo kinsa mopahimulos dayon sa matag oportunidad sa pagtabang sa ilang kaugalingon ug sa uban nga mangandam alang sa milenyal nga paghari sa atong Manluluwas.

Busa, ang akong unang rekomendasyon mao ang pagkat-onalang sa inyong kaugalingon kon si kinsa gayud kamo. Pangutan-a ang inyong Langitnong Amahan, sa pangalan ni Jesukristo, unsa ang Iyang gibati mahitungod kaninyo ug sa inyong misyon dinhi sa yuta. Kon kamo mangayo uban sa tinuod nga katuyoan, sa kadugayan ang Espiritu mohunghong og makapausab sa kinabuhi nga mga kamatuoran diha kaninyo. I-rekord kadto nga mga impresyon ug ribyuha kini kanunay, ug sunda kadto nga mga impresyon nga walay pagkasayop.

Ako mosaad kaninyo nga kon kamo mosugod sa pagkakita bisan daklit lang kon unsay pagtan-aw sa inyong Langitnong Amahan kaninyo ug unsay Iyang gilauman nga inyong buhaton alang Kaniya, mausab gayud ang inyong kinabuhi!

Laumi ug pangandam sa pagkab-ot sa imposible.

Ang akong ikaduhang rekomendasyon: Laumi ug pangandam sa pagkab-ot sa imposible.

Ang Dios kanunay nga misugo sa Iyang mga anak sa pakigsaad sa pagbuhat sa lisud nga mga butang. Tungod kay kamo mga anak sa Dios nga nagtuman sa pakigsaad, nagpuyo sa ulahing bahin sa ulahing mga adlaw, ang Ginoo mopabuhat kaninyo sa pagbuhat sa malisud nga butang. Makasiguro kamo niana—ang mga pagsulay sama sa kang Abraham wala mohunong diha kang Abraham.⁴

Nasayud ko unsa ka makahahadlok nga pabuhaton og usa ka butang nga daw labaw ra kaayo sa inyong kapasidad. Sakop ako sa Korum sa Napulog Duha ka mga Apostoles sulod pa lamang sa 19 ka bulan sa dihang si Presidente Spencer W. Kimball namatay. Sa unang miting sa Unang Kapangulohan ug Korum sa Napulog Duha ka mga Apostoles human sa pagkaorden ni Presidente Ezra Taft Benson, siya mihatag og piho nga mga buluhaton ngadto sa Napulog Duha. Angiyang mga istruksyon ngari nako naglakip sa “Elder Nelson, ikaw ang moabli sa mga nasud sa Eastern Europe alang sa pagsangyaw sa ebanghelyo.”

1985 kadto. Atol niadtong mga tuig sa politikanhong kabalaka nga atong nailhan isip ang Cold War, dili lamang usa ka tinuod nga paril ang nagbahin sa dakbayan sa Berlin, apan ang tibuok Eastern Europe anaa ubos sa pig-ut nga komunismo. Ang mga simbahan gisirad-an, ug ang relihiyoso nga pagsimba gilimitahan og maayo.

Migahin ko og dakong bahin sa akong propesyunal nga kinabuhi sa pag-abli og mga kasingkasing aron sa pagpahigayon og makaluwas sa kinabuhi nga mga operasyon, apan wala koy kasinatian aron motuo ko nga makapaabli ko og mga nasud alang sa pagsangyaw sa ebanghelyo. Bisan pa niana, usa ka propeta mihatag kanako og buluhaton, busa gisugdan nako sa pagbuhat ang daw imposible nga butang.

Gikan sa sinugdanan, ang mga babag gibutang sa akong agianan. Miabut ko sa kadaghanan sa mga nasud nga wala masayud kon asa moadto. Bisan kon nakahimo ko nga masayran ang ngalan sa tukma nga opisyales sa gobyerno, kasagaran ikanselar ang miting sa katapusang minuto o iuswag. Sa usa ka nasud, sa dihang ang usa ka sabut gilangay og duha ka adlaw, pipila ka mga tintasyon gituyo og pahigayon aron sa pagsulay kanako—lakip ang mga lit-ag sa ilegal nga pagpangilis og kwarta ug uban pang ginadili nga mga kalihokan. Sa laing okasyon, ang usa ka miting gisugdan uban sa hangyo nga ako mobiyadiha-diha dayon!

Apan ang Ginoo makahimo sa pagbuhat sa Iyang kaugalingong buhat,⁵ ug pribilehiyo nako nga makita ang sunod-sunod nga pagkahitabo sa mga milagro—kanunay, ug human lamang nga akong gibuhat ang akong labing maayo nga panghunahuna, ang akong labing maisugong mga paningkamot, ug ang akong labing matinguhaong pag-ampo sa buluhaton.

Ang Simbahan pormal nga giila sa pipila niadto nga mga nasud sa wala pa malumpag ang Paril sa Berlin. Ang uban misunod sa wala madugay. Niadtong tuig 1992, nakahimo ko sa pag-report kang Presidente Benson nga ang Simbahan karon naestablisar na sa matag nasud sa Eastern Europe!

Isip usa ka Tinuod nga Milenyal nga masaligan sa Ginoo, kamo usab makahimo og kasaysayan! Kamo hangyoon sa pagdawat og mahagitong mga buluhaton ug mahimong instrumento sa mga kamot sa Ginoo. Ug Siya makapahimo kaninyo nga makab-ot ang imposible.

Unsaon ninyo pagkab-ot ang imposible? Pinaagi sa pagbuhat sa bisan unsa nga gikinahanglan sa paglig-on sa inyong hugot nga pagtuo kang Jesukristo pinaagi sa pagpalambo sa inyong pagsabut sa doktrina nga gitudlo sa Iyang gipahiuli nga Simbahan ug pinaagi sa walay puas nga pagtinguha sa kamatuoran. Isip usa ka Tinuod nga Milenyal, nakatisok sa lunsay nga doktrina, kon kamo hangyoon sa pagbuhat sa imposibleng mga butang, makadawat kamo sa buluhaton uban sa hugot nga pagtuo ug pagkamapadayunon ug malipayong mobuhat sa tanan nga anaa ubos sa inyong gahum sa pagtuman sa mga katuyoan sa Ginoo.⁶

Kamo adunay mga adlaw nga mawad-an gayud sa kadasig. Busa, pag-ampo alang sa kaisug nga dili moundang! Magkinahanglan kamo niana nga kalig-on tungod kay mag-anam og ka dili popular ang mamahimong usa ka Santos sa Ulahing mga Adlaw. Subo lang, pipila sa inyong giisip nga mga higala mobudhi kaninyo. Ug ang ubang butang daw dili lang gayud makiangayon.

Hinoon, ako mosaad kaninyo nga samtang kamo mosunod ni Jesukristo, inyong makaplagan ang malungtarong kalinaw ug tinuod nga kalipay. Samtang sundon ninyo ang inyong mga pakigsaad uban sa nagkadugang nga katukma, ug samtang kamo manalipod sa Simbahan ug gingharian sa Dios dinhi sa yuta karon, ang Ginoo mopanalangin kaninyo og kalig-on ug kaalam sa pagbuhat sa imposible.

Pagkat-on unsaon sa pag-access sa gahum sa langit.

Ang akong ikatulo nga rekomendasyon: Pagkat-on unsaon sa pag-access sa gahum sa langit.

Matag usa kanato adunay mga pangutana. Ang magtinguha sa pagkat-on, pagsabut, ug pag-ila sa kamatuoran usa ka mahinungdanong bahin sa atong mortal nga kasinatian. Dakong parte sa akong kinabuhi gigahin diha sa pag-research. Kamo usab labing makakat-on pinaagi sa pagpangutana og dinasig nga mga pangutana.

Niini gayud nga higayuna ang uban kaninyo nanlimbasug nga masayud unsay angay buhaton sa inyong kinabuhi. Ang uban ninyo tingali maghunahuna kon napasaylo ba mo sa inyong mga sala. Kadaghanan ninyo naglibug kinsa ug asa ang inyong mahangturong kauban—ug angay kamong maghunahuna niini.

Ang pipila tingali makapangutana nganong ang Simbahan nagbuhat sa pipila ka mga butang. Tingali daghan ninyo ang dili sigurado unsaon nga makadawat og mga tubag sa inyong mga pag-ampo.

Ang atong Langitnong Amahan ug ang Iyang Anak andam nga motubag sa inyong mga pangutana pinaagi sa pagpangalagad sa Espiritu Santo. Apan depende na ninyo nga magkat-on unsaon nga mokwalipay, ug modawat, niadto nga mga tubag.

Asa man kamo makasugod? Sugdi pinaagi sa paggahin og daghang panahon sa balaang mga dapit. Ang templo usa ka balaan nga dapit. Ingon man ang chapel, diin kamo mohimo og bag-o nga mga pakigsaad sa sakrament matag Dominggo. Dapiton ko usab kamo sa paghimo sa inyong apartment, inyong dormitoryo, inyong panimalay, o inyong kwarto nga usa ka balaan nga dapit diin makahiklin kamo nga luwas gikan sa dautan nga mga kalinga sa kalibutan.

Ang pag-ampo usa ka yawe. Pag-ampo aron masayud kon unsay hunungon sa pagbuhat ug unsay sugdan sa pagbuhat. Pag-ampo aron masayud unsay idugang sa inyong palibut ug unsay tangtangon aron ang Espiritu magauban kaninyo sa kabuhong.

Pangamuyo sa Ginoo alang sa gasa sa pag-ila. Dayon magpuyo ug maningkamot nga mahimong takus nga makadawat niana nga gasa, nga kon ang makalibug nga mga panghitabo motumaw sa kalibutan, kamo masayud gayud unsa ang tinuod ug unsay dili. ⁷

Pagserbisyo uban sa gugma. Ang mahigugmaong pagserbisyo niadtong nahisalaag o samaran sa espiritu moabli sa inyong kasingkasing ngadto sa personal nga pagpadayag.

Paggahin og mas dakong panahon—mas dako gayud nga panahon—sa mga dapit diin ang Espiritu anaa. Kana nagpasabut nga mas daghang panahon uban sa mga higala kinsa nagtinguha nga makabaton sa Espiritu uban kanila. Paggahin og mas daghang panahon sa pag-ampo, mas daghang panahon sa mga kasulatan, mas daghang panahon sa buhat sa family history, mas daghang panahon sa templo. Mosaad ko nga samtang kamo kanunay nga mohatag sa Ginoo og dako nga bahin sa inyong panahon, Siya mopilo-pilo sa nahibilin.

Atong gipaluyohan ang 15 ka mga lalaki kinsa giordenahan isip mga propeta, mga manalagna, ug mga tigpadayag. Kon moabut ang lisud nga problema—ug daw mag-anam kini kalisud matag adlaw—kining 15 ka mga lalaki manlimbasug sa pagsulbad sa problema, maningkamot nga makakita sa posibleng mga resulta sa lain-laing mga solusyon, ug sila makugihong magtinguha sa pagpaminaw sa tingog sa Ginoo. Human sa pagpuasa, pag-ampo, pagtuon, pagpamalandong, ug pakigtambag uban sa akong mga Kaigsoonan mahitungod sa importante kaayong mga butang, kasagaran makamata ko inig ka gabii uban sa dugang mga impresyon kabahin sa mga isyu nga among gikabalak-an. Ug ang akong mga Kaigsoonan dunay sama nga kasinatian.

Ang Unang Kapangulohan ug Korum sa Napulog Duha ka mga Apostoles magtinambagay sa usag usa ug mopakigbahin sa tanan nga gipasabut ug gipabati kanamo sa Ginoo, sa indibidwal ug tiningub nga paagi. Ug dayon motan-aw kami sa Ginoo nga moimpluwensya sa Presidente sa Simbahan sa pagpahayag sa kabubut-on sa Ginoo.

Kining propetikanhong proseso gisunod niadtong 2012 sa pag-usab sa minimum nga edad sa misyonaryo, ug usab sa bag-o lang nga mga gidugang sa handbook sa Simbahan, isip resulta sa paghimong legal sa kaminyoon sa mga sama og sekso sa ubang mga nasud.. Napuno sa kapuangod alang sa tanan, ug ilabi na sa mga bata, naningkamot mi og maayo sa pagsabut sa kabubut-on sa Ginoo kabahin niini nga butang. Kanunay nga naghunahuna sa plano sa Dios sa kaluwasan ug sa Iyang paglaum alang sa kinabuhing dayon alang sa matag usa sa Iyang mga anak, among gikonsiderar ang dili maihap nga mga pag-usab ug mga kombinasyon sa posibleng mga sitwasyon nga mahimong motumaw. Pabalik-balik kaming nag-abut sa templo sa pagpuasa ug pag-ampo ug nagtinguha og dugang giya ug inspirasyon. Ug unya, sa dihang ang Ginoo midasig sa Iyang propeta, si Presidente Thomas S. Monson, sa pagpahayag sa hunahuna sa Ginoo ug sa kabubut-on sa Ginoo, ang matag usa kanamo niana nga sagradong higayon mibati og espirituhanong kumpirmasyon. Among pribilehiyo isip mga Apostoles sa pagpaluyo sa unsay gipadayag ngadto ni Presidente Monson. Pagpadayag gikan sa Ginoo ngadto sa Iyang mga sulugoon usa ka sagrado nga proseso, ug mao usab inyong pribilehiyo sa pagdawat og personal nga pagpadayag.

Mga kaigsoonan, kamo adunay sama nga access ngadto sa hunahuna ug kabubut-on sa Ginoo alang sa inyong kaugalingong kinabuhi sama namong mga Apostoles alang sa Iyang Simbahan. Sama sa gikinahanglan sa Ginoo gikan nato sa pagpangita ug pagpamalandong, pagpuasa ug pag-ampo, pagtuon ug pagpaningkamot sa lisud nga mga pangutana, Siya nagkinahanglan gikan ninyo sa pagbuhat sa ingon samtang kamo magtinguha og mga tubag sa inyong kaugalingong mga pangutana.

Makakat-on kamo sa pagpaminaw sa tingog sa Ginoo pinaagi sa mga paghunghong sa Espiritu Santo.⁸ Samtang daw makatabang ang Google, Twitter, ug Facebook, sila dili gayud makahatag sa labing importanteng mga tubag!

Akong minahal nga batan-ong mga higala, inyong mahibaloan ang hunahuna ug kabubut-on sa Ginoo alang sa inyong kaugalingong kinabuhi. Dili kinahanglang maghunahuna kamo kon anaa ba kamo sa dapit nga gusto sa Ginoo nga kamo maanaa o kon nagbuhat ba kamo sa gusto Niya nga inyong buhaton. Mahimo kamong makahibalo! Ang Espiritu Santo “magtug-an kaninyo sa tanang butang nga inyong buhaton.”⁹

Sunda ang mga Propeta

Ang akong ikaupat nga rekomendasyon: Sunda ang mga propeta.

Niadtong 1979, samtang nagserbisyo isip kinatibuk-ang presidente sa Sunday School, gidapit ko sa pagtambong sa usa ka seminar sa mga Regional Representatives diin si Presidente Spencer W. Kimball mihatag og makapadasig nga pakigpulong kabahin sa pag-abli sa pultahan sa mga nasud nga nianang higayona sirado ngadto sa Simbahan, sama sa China. Gihagit niya ang tanang mitambong sa pagtuon sa pinulongan nga Mandarin aron makatanyag kami sa among propesyonal nga kahanas sa pagtabang sa mga tawo sa China.

Ngari kanako, ang hagit ni Presidente Kimball ingon og usa ka propetikanhong sugo. Mao nga niana dayong gabhiuna akong gihangyo ang akong asawa, si Dantzel, kon andam ba siyang magtuon og Mandarin uban kanako. Miuyon siya, ug nakakaplag kami og usa ka tutor nga motabang kanamo. Siyempre wala mi makat-on nga maayo kaayong makasulti og Mandarin, apan igo ang among nahibaloan nga, sa dihang gidapit ko pagkasunod tuig (pinaagi sa nagsunod-sunod nga wala gayud damha nga mga hitabo) sa pag-adto ngadto sa China isip usa ka visiting professor aron sa pagtudlo og open-heart surgery, mas andam na ako sa pagdawat sa imbitasyon.

Paspasan nato og unom ka tuig ngadto sa 1985, ang tuig human ako gitawag ngadto sa Korum sa Napulog Duha. Usa ka adlaw nakadawat ko og dinaliang hangyo sa pag-adto ngadto sa China sa pagpahigayon og open-heart surgery sa ilang sikat nga opera star, gitamud sa tibuok China isip nasudnong bayani. Akong gipasabut nga ang akong full-time nga eklesiyastikanhong responsibilidad nagpugong kanako sa pag-adto apan ang mga doktor sa China mihangyo kanako nga moadto diha-diha dayon sa pagpahigayon sa makaluwas sa kinabuhi nga operasyon.

Akong gihisgutan ang sitwasyon uban sa akong presidente sa korum ug sa Unang Kapangulohan. Mibati sila nga, isip usa ka pabor ngadto sa mga tawo sa China, kinahanglan kong mobiyahe ug mopahigayon sa operasyon.

Nga akong gibuhat. Maayo gani, malampuson ang operasyon! Ug mao kadto ang katapusang open-heart nga operasyon nga akong gipahigayon. Didto kadto sa Jinan, China, niadtong Marso 4, 1985.

Karon, moderetso na usab ta sa Oktubre 2015, tulo ka bulan pa lang ang milabay. Si Wendy ug ako gidapit sa pagbalik ngadto sa Shandong University School of Medicine sa Jinan. Nahingangha kami sa dihang mainiton akong giabi-abi isip “karaan nga higala” sa China ug nahiusa pag-usab uban sa mga surgeon nga akong natudloan 35 ka tuig na ang milabay. Ang labing nindot nga bahin sa among pagbisita mao ang pakighimamat sa anak ug apo niadtong sikat nga opera star. Ang tanan niining talagsaong mga kasinatian nahitabo tungod sa usa ka rason: Naminaw ko sa tambag sa usa ka propeta sa pagtuon og Mandarin!

Ang mga propeta makakita sa unahan. Makakita sila sa makalilisang nga kakuyaw nga gibutang o ibutang sa kaaway diha sa atong dalan. Ang mga propeta makakita usab sa talagsaong mga posibilidad ug mga pribilehiyo nga naghulat niadtong naminaw uban sa tuyo sa pagsunod. Nasayud ko nga tinuod kini! Pabalik-balik ko kini nga nasinati sa akong kaugalingon.

Ang Ginoo misaad kanato nga Siya dili gayud motugot sa propeta nga mopahisalaag kanato. Si Presidente Harold B. Lee mideklarar: “Mahimo nga kamo dili makauyon unsa ang moabut gikan sa awtoridad sa Simbahan. Mahimo nga kini mosupak sa inyong politikanhong mga panglantaw. Mahimo nga kini supak sa inyong sosyal nga mga panglantaw. Mahimo kining mosamok sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa ba-ba sa Ginoo Mismo, uban ang pagpailub ug hugot nga pagtuo, ang saad mao ‘ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan.’ (D&P 21:6).”¹⁰

Kamo dili kanunay makasabut sa matag pahayag sa buhi nga propeta. Apan kon kamo nasayud nga ang propeta usa ka propeta, kamo makaduol sa Ginoo sa kamapainubsanon ug hugot nga pagtuo ug mangayo alang sa inyong kaugalingong saksi kabahin sa bisan unsa nga giproklamar sa Iyang propeta.

Mga 41 b.c., daghang mga Nephites miapil sa Simbahan, ug ang Simbahan miuswag. Apan ang tinago nga mga kalihokan misugod usab sa pagtubo, ug daghan sa ilang maliputon nga mga pangulo mitago taliwala sa mga katawhan ug lisud mailhan. Sa dihang ang katawhan nahimong mas magarbuhon, daghan sa mga Nephite ang “mibiay-biay niana nga sagrado, milimud sa espiritu sa pagpanagna ug pagpadayag.”¹¹

Kadtong sama nga mga hulga anaa sa atong taliwala karon. Ang bug-at nga reyalidad mao nga ang “mga sulugoon ni Satanas” ¹² nakatago taliwala sa tibuok katilingban. Busa pagmatngon og maayo kon kang kinsang tambag ang inyong sundon.¹³

Minahal ko nga mga kaigsoonan, kamo gipakatawo aron mahimong Tinuod nga mga Milenyal! Kamo usa ka pinili nga henerasyon, ¹⁴ gideterminar nang daan sa Dios sa pagbuhat og talagsaong buhat—sa pagtabang sa pag-andam sa mga katawhan niini nga kalibutan alang sa Ikaduhang Pag-anhi sa Ginoo.

Karon isip usa ka Apostol ni Ginoong Jesukristo, ako mopanalangin sa matag usa kaninyo, sama nga akong gibutang ang akong mga kamot diha sa inyong mga ulo, uban sa abilidad nga mahimong Tinuod nga mga Milenyal nga kamo gipakatawo nga mamahimo. Ako mopanalangin kaninyo nga adunay tinguha ug abilidad sa pagkat-on sa inyong tinuod nga pagkatawo ug katuyoan; nga kamo maglaum ug mag-andam sa pagbuhat sa “imposible” nga mga butang; nga kamo dili maluya sa inyong mga paningkamot sa pagkat-on unsaon sa pag-access sa gahum sa langit aron sa pagtabang kaninyo sa pagsulbad sa inyong mga problema ug pagtubag sa inyong mga pangutana. Ug ako mopanalangin kaninyo nga hingpit nga mosunod sa mga propeta, nga mobati og kalinaw diha sa inyong kasingkasing samtang kamo nagbuhat niini. Ako mopanalangin kaninyo nga masayud ug mobati kon unsa kamo kamahal sa Ginoo ug unsa ka dako ang Iyang pagsalig kaninyo.

Akong gihigugma ug gipaluyohan si Presidente Thomas S. Monson niining sagradong buhat sa Makagagahum nga Dios. Si Jesukristo ang atong Manluluwas. Kini ang Iyang Simbahan. Kita ang Iyang katawhan! Sa ingon ako mopamatuod sa sagradong pangalan ni Jesukristo, amen.