Pagpangita sa Akong Katuyoan

Nancy J. Maynes

Usa ka Gabii uban ni Elder Richard J. Maynes

Tibuok Kalibutan nga Debosyunal alang sa mga Young Adult • Mayo 1, 2016 • Salt Lake Tabernacle

Malipayon kaayo ko nga ania karong gabhiona uban sa akong bana, ug mapasalamaton ko sa oportunidad nga mamulong kaninyo.

Sa dihang una kong gisultihan sa akong bana nga mamulong siya kabahin sa Pagpahiuli sa ebanghelyo, ug ilabi na sa Unang Panan-awon ni Joseph Smith, nag-istorya mi kon sa unsang paagi kini nga hilisgutan nakaapekto sa akong kinabuhi ug sa unsang paagi nga ang akong kasinatian adunay positibo nga impluwensya sa pagpalig-on sa inyong pagtuo.

Usa ako ka kinabig sa Simbahan, ug gusto nakong ipakigbahin kaninyo ang akong labing bililhon nga kasinatian—ang akong istorya sa pagkakabig.

Nagtubo ko sa mahigugmaon kaayo nga panimalay, ug duna koy dalayegon nga mga ginikanan. Dili mi permi nga manimba, apan isip mga miyembro sa Presbyterian nga Simbahan, kanunay kaming motambong sa simbahan sa Pasko ug Pagkabanhaw, ug usahay dad-on ko sa akong inahan sa Sunday school. Diha ko una nga nakaangkon sa akong pagpamatuod sa Manluluwas. Ganahan kong makadungog og mga istorya mahitungod ni Jesus. Nasayud ako nga espesyal Siya nga tawo.

Isip usa ka batang babaye gibati nako ang panginahanglan nga mag-ampo sa akong pagkatulog sa gabii. Nasayud ko nga ang Langitnong Amahan naminaw kanako.

Sa mga 20 anyos pa ko nakig-date ko ug nakasinati og daghang mga kasagmuyo, kahigawad, ug kawalay kadasig nga usahay resulta sa pagpakig-date. Tingali ang uban ninyo mibati sa samang mga pagbati, apan adunay usa ka kalainan. Anaa sa inyong mga kinabuhi ang ebanghelyo ni Jesukristo. Dako kaayo kana nga panalangin! Ang ebanghelyo naghatag kaninyo og katuyoan ug kalig-on. Naghatag kini kaninyo og paglaum.” Nianang puntuha sa akong kinabuhi, nasayud ako nga adunay kulang. Akong gibati nga wala koy bisan unsa nga tinuod nga katuyoan o direksyon sa akong kinabuhi. Misugod ko sa pag-adto sa lain-laing mga simbahan nga naglaum nga makakaplag og mga tubag. Nangita ko og usa ka butang nga makahatag og kahulugan sa akong kinabuhi, apan wala ko masayud kon asa kini pangitaon.

Usa ka adlaw nga lisud kaayo, nakahukom ko nga mag-ampo. Mao nga miluhod ko sa kilid sa akong higdaanan—butang nga dili nako kasagarang buhaton—ug gipadayag ang tanan nakong pagbati ngadto sa Langitnong Amahan, nangayo Kaniya og tabang ug nga Iya kong hatagan og direksyon sa akong kinabuhi. Miarang-arang ang akong gibati ug mipadayon sa akong normal nga inadlaw nga mga kalihokan.

Paglabay sa pipila ka adlaw ang akong pag-ampo gitubag. Usa ka returned missionary miabut sa akong kinabuhi. Ang iyang ngalan mao si Richard John Maynes. Mihangyo siya nga makig-date, ug iyang gibuhat unsay maayong buhaton sa mga returned missionaries: Nangutana siya kon duna ba koy nahibaloan mahitungod sa Simbahan ug nakabasa ba ko sa Basahon ni Mormon.

Wala magdugay human niana iya kong gihatagan og Basahon ni Mormon aron mabasa. Misugod ko sa pagbasa niini, ug usa sa mga butang nga nakapainteres dayon nako mao ang ulohan nga pahina, nga mabasa, “Ang Basahon ni Mormon: Lain nga Tugon ni Jesukristo.” Wala koy ideya nga ang Basahon ni Mormon mahitungod ni Jesus.

Misugod usab ko sa pagdawat sa mga leksyon sa misyonaryo, ug nalamdagan ang akong kinabuhi. Sa dihang ang mga misyonaryo mitudlo kanako mahitungod sa bata nga si Joseph nga gibisitahan sa Dios nga Amahan ug Iyang Anak, si Jesukristo, kinsa duha ka managlahing binuhat, daw mitakdo kini sa unsay dugay na nakong gibati ug gituohan, apan dili kana maoy gitudlo sa sa akong simbahan. Ang Unang Panan-awon importante nga bahin sa akong pagkakabig. Mibati ko og koneksyon ngadto ni Joseph Smith tungod kay aduna siyay sama nga pangutana kanako: Asa nako makaplagan ang kamatuoran? Ang Langitnong Amahan mitubag sa iyang sinsero nga pag-ampo, ug Siya mitubag sa akong pag-ampo. Mipadayon ko sa pagdawat sa tanang mga leksyon ug nasayud sa akong kasingkasing nga ang gitudlo kanako tinuod.

Ang returned missionary nga si Richard John Maynes mibunyag kanako niadto nga ting-init. Nagpadayon mi nga mag-date, ug paglabay sa usa ka tuig naminyo mi sa Manti Utah Temple.

Karon, sinugdanan ra gayud kadto sa akong pagkakabig. Sama sa kadaghanan kanato, ang pagkakabig usa ka proseso. Ang atong mga pagpamatuod kinahanglang amumahan ug lig-unon matag adlaw pinaagi sa pagbasa sa mga kasulatan, pag-ampo, pag-adto sa simbahan, pagtambong sa templo, ug pagsunod sa atong propeta.

Ang mga kasulatan kinahanglan nga importante nga bahin sa atong kinabuhi. Isip usa ka batan-ong babaye, dili miyembro sa Simbahan, gihangyo ko sa pagpili og usa ka kasulatan nga sag-ulohon. Mipili ko sa Mga Proverbio 3:5–6:

“Sumalig ka sa Ginoo sa bug-os mong kasingkasing; ug ayaw pagsalig sa imong kaugalingong salabutan.

“Sa tanan nimong mga dalan ilha siya, ug siya magamando sa imong mga alagianan.”

Dili ko makasulti kaninyo kon kapila misulod sa akong hunahuna kana nga kasulatan sa dihang nagkinahanglan ko og tabang gikan sa kahitas-an. Kon ato lamang ibutang ang atong pagtuo ug pagsalig diha sa Ginoo, nasayud nga wala kita makasabut sa tanang panghitabo sa atong kinabuhi ug mahinumdom sa pagpasalamat Kaniya sa daghan nato nga mga panalangin, Iyang ipakita kanato ang dalan. Karon mahimong dili kini mahitabo sa atong panahon, apan nasayud ko nga ang Langitnong Amahan adunay plano alang sa matag usa kanato.

Usa sa akong laing paborito nga kasulatan makita sa Doktrina ug mga Pakigsaad 123:12: “Kay aduna pay daghan sa ibabaw sa yuta diha sa tanan nga mga tinuohan, mga pundok, ug mga pundok sa relihiyon, kinsa nabutaan pinaagi sa maliputon nga paglingla sa mga tawo, diin sila naghulat aron sa pagpangilad, ug kinsa natago gikan sa kamatuoran tungod kay sila wala masayud asa kini pangitaa.”

Importante kaayo alang kanato isip mga miyembro sa Simbahan ang pagtabang ug pagpakigbahin sa ebanghelyo ngadto sa uban. Adunay daghang mga tawo sama kanako nga nangita apan wala masayud asa mangita sa kamatuoran.

Ang duha sa labing importanteng mga desisyon nga akong nabuhat sa akong kinabuhi mao ang magpabunyag ug maminyo sa templo ngadto sa akong bana. Mapasalamaton kaayo ko sa ebanghelyo sa akong kinabuhi. Kitang tanan nasayud nga ang kinabuhi usahay dili sayon. Kinahanglan lang natong hinumduman ang mga pulong ni Elder Jeffrey R. Holland. Miingon Siya:

“Ang Agalon sa Langit ug Yuta anaa aron sa pagpanalangin kaninyo. …

“Salig Kaniya. Salig og maayo Kaniya. Salig Kaniya hangtud sa kahangturan.”¹

Nasayud ko nga tinuod ang Langitnong Amahan. Iya kitang gihiguma. Nakadungog Siya sa atong mga pag-ampo. Nasayud ko nga si Jesukristo mao ang atong Manluluwas. Siya namatay alang sa matag usa kanato ug mihatag kanato sa mahinungdanong gasa sa paghinulsol, nga nagtugot kanato sa paghimo sa mga kausaban sa atong kinabuhi nga mahimong mas maayo matag adlaw. Nasayud ko nga kita adunay buhi nga propeta, si Presidente Thomas S. Monson, ug ako nasayud nga si Propeta Joseph Smith nakakita sa Amahan ug sa Anak ug mihatag kanato sa Basahon ni Mormon: Lain nga Tugon ni Jesukristo.

Akong pag-ampo nga magpadayon kamo sa paglig-on ug pag-amuma sa inyong mga pagpamatuod matag adlaw pinaagi sa pagbuhat niadtong mga butang nga gitudlo kanato sa Manluluwas ug sa atong mga propeta nga atong buhaton. Akong pag-ampo nga kamo mopadayon sa pagsalig sa Ginoo ug mahibalo nga Siya nakaila kon kinsa kamo ug nga Siya mogiya sa inyong agianan.

Gisulti ko kining mga butanga sa pangalan ni Jesukristo, amen.