Pagkahimong Tawo nga Kamo Gipakatawo nga Mamahimo
Usa ka Gabii uban ni Presidente Russell M. Nelson
Tibuok Kalibutan alang sa mga Young Adults • Enero 10, 2016 • Brigham Young University–Hawaii
Minahal nga mga kaigsoonan, malipayon kaayo mi nga makauban kamo niining adlaw nga Igpapahulay. Nahigugma kami kaninyo! Ug kami misalig kaninyo! Samtang mohatag ko og pipila ka mga ideya, nag-ampo ko nga inyong gamiton ang inyong kabubut-on sa pagdapit sa Espiritu Santo sa pagtudlo kaninyo.1
Mosulti una ko og Malipayong Bag-ong Tuig! Kini usa ka bag-o nga tuig. Mihimo ba mo og pipila ka New Year’s resolution? Ug–nasupak na ba ninyo ang katunga niini? Gusto ba ninyo nga kini ang mahimong labing maayong tuig sa inyong kinabuhi? Ang tuigkon inyong sundon—mas maayo sukad—sa mga resolusyon nga bililhon kaayo kaninyo? Gusto kong makigsulti kaninyo kabahin sa usa ka butang nga akong gituohan nga makatabang. Atong tan-awon kon makahunahuna ba mo kon unsa kini:
Hunahunaa ang babaye kinsa, sulod sa 12 ka tuig, miantus sa walay kaayohan nga sakit. Iyang gituyhad ang iyang kamot aron mohikap sa kupo sa Manluluwas. Kini ang iyang bugtong higayon nga mamaayo.2
Hunahunaa ang tawo didto sa tuburan sa Betsata kinsa, sulod sa 38 ka tuig, nag-antus sa usa ka sakit ug wala gayud makauna og ubog ngadto sa makaayo nga tubig.3
Hunahunaa ang mga disipulo sa Manluluwas kinsa, diha nga ang makahulga sa kinabuhi nga mga balud mihampak ngadto sa ilang gamayng sakayan, misinggit ngadto sa Manluluwas, “Wala ka ba lang magpakabana nga mangalumos kita?”4
Unsay komon niining mga tawhana?
Sila mga desperado! Desperado alang sa Manluluwas nga moayo kanila, motabang kanila, molimpyo kanila, mogiya kanila, manalipod kanila ug moluwas kanila! Sila desperado alang ni Jesukristo nga motabang kanila sa pagbuhat sa mga butang nga dili gayud nila mabuhat kon sila ra. Sila desperado nga makabaton sa kalig-on ug gahum sa Manluluwas diha sa ilang kinabuhi. Nasayud ba kamo niana nga pagbati? Tuohi ko, ako nasayud.
Tingali desperado mo nga makompleto ang usa ka buluhaton tungod kay ang tagal nga petsa paspas nga nagsingabut—o milabay na. Tingali desperado mo nga dunay tawo nga nga nakasabut ninyo, nga tinud-anay nga mohigugma ninyo. tinud-anay nga nakasabut ninyo, nga tinud-anay nga mohigugma ninyo. Tingali desperado mo karon nga madawat sa unibersidad o makakita og trabaho o lugar nga kapuy-an, desperado nga makakita og bag-ong mga higala ug sa pagpangita sa inyong mahangturon kompanyon.
Nan, kini mao ang maayong balita: Ang pagkadesperado mahimo nga makaawhag og maayo.
Si Propeta Joseph Smith klarong nakasinati og grabeng kadesperado sa Liberty Jail. Siya nangamuyo sa Ginoo, “O Dios, hain ba ikaw?”5 Tungod sa ingon ka grabe nga espirituhanong kadesperado, ang Propeta nakadawat og pipila sa labing makapadasig nga mga pagpadayag niini nga dispensasyon.
Kon kita desperado nga magiyahan sa langit, kita mas maningkamot og maayo nga makadawat og inspirasyon gikan sa langit. Kon kita desperado nga mahimong himsog sa pisikal nga paagi, kita mokaon ug mag-ehersisyo aron mahimo kini. Walay mga pasumangil! Kon desperado kita nga dunay dugang nga kwarta, maghinam-hinam kita nga mosunod sa balaod sa Ginoo sa panalapi—nga mao, siyempre, ang ikapulo!
Hunahunaa ang pamaagi ni Presidente George Q. Cannon’s Q sa ikapulo sa dihang siya usa ka kabus nga batan-ong lalaki. Sa dihang ang iyang bishop mikomentaryo sa kadako sa kantidad sa ikapulo nga gibayad sa kabus nga batan-ong George, si George misulti og susama niini: “Oy bishop, wala ko magbayad sa ikapulo base sa akong kinitaan. Nagbayad ko sa ikapulo base sa unsay akonggusto nga kinitaan.” Ug sa pagkasunod gayud nga tuig si George mikita sa tukmang kantidad sa kwarta nga iyang gibayran og ikapulo sa miaging tuig!6
Kon kita desperado nga mahimong mga tawo nga kita gipakatawo nga mamahimo, ang atong panan-aw mausab. Kita maulian gikan sa espirituhanong pagkalimot nga gipahamtang sa kaaway, ug diha-diha makakita kita og mga butang sa atong kaugalingon, sa uban, ug sa atong kinabuhi nga wala nato makita kaniadto. Ang “makalingaw” ug “kalingawan” sa kalibutan makita na nga halos kataw-anan, gani tingali peligro sa espirituhanong paagi. Kita magsugod sa pagkakita sa pangilad ug lit-ag sa kaaway kon unsa gayud kini—mga tintasyon aron makalimtan nato ang atong tinuod nga pagkatawo ug atong destinasyon.
Magsugod kita sa paggahin sa atong panahon sa lahi nga paagi. Ang panahon sa Facebook dili na sama ka madanihon sa panahon sa templo. Atong masinati sa atong kaugalingon ang halawom nga kamatuoran nga gitudlo sa usa ka maalamon nga presidente sa templo: “Kon kita mosulod sa templo, atong gibiyaan ang kalibutan sa pagpakaaron-ingnon.” 7 Mas mainteresado kita sa mahangturong mga kamatuoran nga itudlo kanato sa Ginoo diha sa Iyang balaan nga balay kay sa labing ulahi nga makapaukyab nga mga komentaryo sa social media, nga mahimong taphaw kaayo ug walay hinungdan.
Usa ka utokan nga estudyanteng babaye sa BYU miingon kanako nga nakadiskubre siya og bali nga koneksyon tali sa unsa ka masaligon ug malipayon ang iyang gibati ug sa gidugayon sa panahon nga iyang gigahin sa social media. Iyang gipaminosan ang iyang panahon sa Facebook ug Twitter ug miingon: “Akong gibati nga daw duna koy mas maayo nga imahinasyon ug mas klaro nga panghunahuna sa pagpamalandong sa mga hilisgutan ug dunay lawom nga pag-istoryahanay sa uban. Karon mobati ko og mas lig-on nga presensya sa Espiritu sa akong kinabuhi, nga mao ang labing maayong butang nga akong mapangayo.”
Kon desperado kita nga mahimong atong tinuod nga kaugalingon, kita mogamit sa teknolohiya sa matarung nga paagi. Kon wala mo masayud unsaon sa pagbuhat niana, adto sa LDS.org ug pagkat-on.
Kon kita desperado nga mahimong tinuod nga mga disipulo ni Jesukristo nga kita gipakatawo nga mamahimo, sa kalit makakaplag kita og kaisug ug determinasyon sa pagtangtang gikan sa atong kinabuhi sa tanan nga dili balaan ug dili putli! Ang atong kaandam sa pagsunod sa tambag sa atong mga lider mausab. Kita mangayo og tambag ug mahinamong mosunod niini. Ang pagkamapainubsanon mohulip sa garbo ug pagkaarogante. Ang mga kasulatan mahimong atong “nag-unang tinubdan” sa mga tubag ug sa kahupayan nga tingali atong maamgohan nga maoy kanunay natong gipangita diha sa internet.
Andam ba mo nga mosulay og eksperimento sulod sa 30 ka adlaw?
Luhod kada adlaw ug pasalamati ang inyong Langitnong Amahan alang sa mga kasulatan. Sultihi Siya sa usa ka pangutana nga inyong labing gikinahanglan nga matubag nianang adlawa. Pangamuyo nga ang Espiritu Santo magauban kaninyo samtang kamo magbasa. Dayon ablihi ang inyong mga kasulatan—bisan asa—ug pagbasa hangtud nga makit-an ninyo ang tubag.8 Sulayi kini sulod sa 30 ka adlaw ug tan-awa unsay mahitabo.
Kon kita desperado nga molambo ngadto sa katawhan nga gikinahanglan sa Dios nga kita mamahimo, tingali kita makaamgo nga usa ka wala kinahanglana nga palas-anon nagpugong kanato. Kana nga palas-anon tingali mao ang espirituhanong kasakit, nga kanunay nga nag-uban sa dili maayo nga mga pagpili ug wala mahinulsuli nga sala. Ang kamatuoran mao nga ang wala mahinulsuli nga sala sama sa usa ka magnet alang sa dugang pa nga mga sala! Mao nga, kon kamo kinahanglan nga maghinulsol, sugdi karon. Kon kita nangandoy nga maghinulsol, kon, sama sa amahan ni Haring Lamoni, kita buot nga moundang sa tanan natong mga sala9 (bisan ang atong paborito), niana ang paglangay-langay mahunong, ang kaulaw mahanaw, ug kita andam, gani maghinam-hinam, sa pag-adto—sa tinud-anay, mobati kita nga daw kadaganon—ngadto sa atong bishop alang sa tabang nga atong gikinahanglan aron tinuod nga maghinulsol.
Karon, diyutay ra gyud kaayo ang mga garantiya niining kinabuhia, apan aniay usa: Adunay 100 ka porsyento nga garantiya nga kon kita tinud-anay nga maghinulsol, ang Manluluwas molimpyo ug moayo kanato—sa hingpit gayud.
Si Elder D. Todd Christofferson mitudlo: “Ang gahum sa Pag-ula [sa Manluluwas] makapapas sa mga epekto sa sala ngari kanato. Kon maghinulsol kita, ang Iyang maulaong grasya makahatag og kaangayan kanato ug makalimpyo kanato (tan-awa sa 3 Nephi 27:16–20). Kini sama ra nga kita wala mabuntog, sama ra nga kita wala magpadala sa tintasyon.”10
Mga kaigsoonan, mosaad ko kaninyo nga tinuod kana! Ug, kon kini man usa ka dakong sala nga wala mahinulsuli o makahasol nga kahuyang nga kanunay makapandol kanato, kitang tanan nagkinahanglan sa tabang sa Manluluwas nga mahimong mga tawo nga kita gipakatawo nga mamahimo. Kini imposible kaayong mabuhat kon wala ang Iyang kalig-on ug gahum.
Maayo gani, ang Manluluwas mibayad sa bili sa matag gasa sa Espiritu nga atong gikinahanglan sa pagtabang kanato 11 Anaa na kanato nga mainampuong modiskobre kon unsa nga mga gasa ang atong gikinahanglan. Tingali magkinahanglan kita sa gasa sa pagdisiplina sa kaugalingon o sa pagkamalipayon. Tingali nagkinahanglan kita sa gasa sa pailub, o sa gasa nga mamaayo, o sa gasa sa pagpasaylo. Tingali nagkinahanglan kita sa gasa nga ang atong sekswal nga mga pagbati mahiuyon sa mahangturong mga balaod. Tingali makaamgo kita nga dili kita magpakabuhi og usa pa ka minuto nga wala ang gasa sa dili matarug nga hugot nga pagtuo diha ni Ginoong Jesukristo. Kon kita desperado alang sa bisan unsa nga gasa sa Espiritu, mao na kana nga sa katapusan mag-ampo kita uban sa tibuok kusog sa atong kasingkasing alang niana nga gasa.12 Ug ang dakong balita mao nga ang matag espirituhanong gasa mogiya kanato sa laing lakang padulong sa atong tinuod nga mga kaugalingon.
Minahal nga mga kaigsoonan, kinsa akong gihigugma, ang reyalidad mao nga sa umaabut ang matag usa kanato adunay indibidwal nga personal nga interbyu uban sa Manluluwas Mismo. Kon kita makaamgo nga kini tinuod gayud nga mahitabo, kita mahimong andam sa pagbuhat sa tanan nga gikinahanglan aron sa pagpangandam!
Busa, karon usa ka pangutana sa akong pagtapos: Unsa kaha kon inyong masayran nga ang Manluluwas mibalik na dinhi sa yuta—nga nahimamat na Niya ang pipila sa Iyang tinuod nga mga sumusunod sa pipila ka talagsaon, dagkong panagtigum13—mga panagtigum diin ang kalibutan, lakip ang CNN ug mga blogger sa internet, walay nasayran. Kon inyong nasayran nga ang Manluluwas anaa na sa kalibutan, unsa gyud ang desperado ninyong buhaton karon, ug unsa ang inyong andam nga buhaton ugma?
Akong iampo nga niining tuiga aduna kamoy pipila ka higayon sa grabe nga kadesperado nga moduso kaninyo padayon nianang dalan sa pagkahimong lalaki o babaye nga kamo gipakatawo nga mamahimo. Ang inyong tinuod nga kaugalingon talagsaon! Ayaw tuguti nga mahimong ubos pa niini. Sa pangalan ni Jesukristo, amen.
© 2015 sa Intellectual Reserve, Inc. Ang tanang mga katungod gigahin. Pagtugot sa Iningles: 11/15. Pagtugot sa paghubad 11/15. Hubad sa “Becoming the Person You Were Born to Be.” Cebuano PD60000934 853