Martin Harris Farm, ni Al Rounds

Pebrero 22–28

Doktrina ug mga Pakigsaad 18–19

“Ang Bili sa mga Kalag Mahinungdanon”

Hangyoa ang Langitnong Amahan sa pagtabang kanimo sa pagpangita sa mga baruganan diha sa Doktrina ug mga Pakigsaad 18–19 nga ilabi ka makahuluganon ngadto sa mga bata.

Irekord ang Imong mga Impresyon

Dapita ang Pagpaambit

Basaha ang Doktrina ug mga Pakigsaad 18:2, ug ipasabut nga ang Espiritu mitabang kang Oliver Cowdery nga mahibalo nga ang mga kasulatan tinuod. Sultihi ang mga bata mahitungod sa usa ka kasinatian sa dihang ang Espiritu mipamatuod nganha kanimo nga ang mga kasulatan tinuod. Himoa nga makigbahin sila og mga kasinatian sa dihang gibati nila nga ang mga kasulatan tinuod.

Itudlo ang Doktrina: Mas Gagmay nga mga Bata

Doktrina ug mga Pakigsaad 18:10–12

Kada usa kanato mahinungdanon ang bili ngadto sa Dios.

Kon ang mga bata makahibalo nga ang Langitnong Amahan nahigugma kanila—ug sa tanan Niyang mga anak—mas may pagsalig ug mas maloloy-on sila ngadto sa uban.

Posible nga mga Kalihokan

• Tabangi ang mga bata sa pagsulti og balik uban kanimo sa Doktrina ug mga Pakigsaad 18:10 sa makadaghang higayon. Ipasabut nga ang “mga kalag” nagpasabut ngadto sa tanang anak sa Dios. Balika og sulti ang bersikulo 10 uban sa mga bata, niini nga panahon nag-ilis sa “mga kalag” ngadto sa mga ngalan sa mga bata. (Tan-awa usab ang pahina sa kalihokan niini nga semana.)

• Tabangi ang mga bata sa paghunahuna og mga butang nga gihunahuna sa mga tawo nga bililhon. Dayon papuli-puliha ang mga bata sa pagtan-aw sa salamin, ug samtang sila naghimo, sultihi ang kada bata nga siya usa ka anak sa Dios ug mahinungdanon ang bili. Pagpamatuod nga alang sa Langitnong Amahan, sila mas bililhon pa kay sa tanang mga butang nga ilang gihunahuna sa una.

Doktrina ug mga Pakigsaad 18:13–16.

Ang pagpakigbahin sa ebanghelyo nagdala og hingpit nga kalipay.

Unsaon nimo sa pagdasig ang mga bata sa pagdapit sa uban sa pagduol ngadto ni Kristo ug magsinati og hingpit nga kalipay?

Posible nga mga Kalihokan

• Sultihi ang mga bata mahitungod sa usa ka butang nga nagdala kanimo og hingpit nga kalipay. Pasultiha kanimo ang matag bata mahitungod sa usa ka butang nga nagdala kaniya og hingpit nga kalipay. Basaha ang Doktrina ug mga Pakigsaad 18:13, 16. Unsa ang nagdala sa Ginoo og hingpit nga kalipay? Unsa ang Iyang gisulti nga magdala kanato og hingpit nga kalipay?

• Pagkanta og dungan sa usa ka awit mahitungod sa misyonaryo nga buhat, sama sa “Gusto Ko Karon nga Mamisyonaryo” (Songbook sa mga Bata, 90), ug tabangi ang mga bata sa paghunahuna og mga paagi nga ilang ipakigbahin ang ebanghelyo, lakip diha sa ilang kaugalingong panimalay. Pagsulti mahitungod sa usa ka panahon sa dihang ikaw mipakigbahin sa ebanghelyo, ug himoa nga ang mga bata makigbahin sa ilang mga kasinatian.

Doktrina ug mga Pakigsaad 19:18–19, 23–24

Gisunod ni Jesukristo ang Langitnong Amahan, bisan og kini lisud.

Ang pagkaandam sa Manluluwas sa “pag-inom sa mapait nga kopa ug [dili] mobiya” (bersikulo 18) usa ka ehemplo kanatong tanan sa pagsunod sa kabubut-on sa Langitnong Amahan. Hunahunaa kon unsaon nimo pagdasig ang mga bata sa pagsunod sa ehemplo ni Jesus.

Posible nga mga Kalihokan

• Pagpakita og usa ka hulagway ni Jesukristo nga nag-antus sa Getsemani (tan-awa sa outline niini nga semana sa Dali, Sunod Kanako—Alang sa mga Indibidwal ug mga Pamilya). Hangyoa ang mga bata sa pagsulti kanimo kon unsa ang nahitabo dinhi niini nga hulagway. I-summarize sa imong kaugalingon nga mga pulong kon unsa ang gisulti sa Manluluwas diha sa Doktrina ug mga Pakigsaad 19:18–19 mahitungod sa Iyang pag-antus. Hatagi og gibug-aton nga ang pag-antus alang sa atong mga sala mao ang labing malisud nga butang nga nahimo ni bisan kinsa sukad, apan tungod kay si Jesus nahigugma sa Iyang Amahan ug kanato, misunod Siya sa kabubut-on sa Dios. Unsaon nato sa pagsunod ang Langitnong Amahan?

• Tabangi ang mga bata sa paghunahuna og yano nga mga aksyon nga mabagay sa mga hugpong sa mga pulong diha sa Doktrina ug mga Pakigsaad 19:23. Basaha ang mga bersikulo sa makadaghan nga higayon samtang ang mga bata maghimo sa mga aksyon. Tabangi sila sa paghunahuna og mga paagi kita makakat-on ni Jesus ug mamati sa Iyang mga pulong.

Itudlo ang Doktrina: Mas Dagko nga mga Bata

Doktrina ug mga Pakigsaad 18:10–12

Kada usa kanato mahinungdanon ang bili ngadto sa Dios.

Daghang mga tawo ang nakigbisog sa mga pagbati sa ubos og bili sa kaugalingon; ang uban walay kalooy ngadto sa mga tawo kinsa lahi kanila. Ang gamhanang mensahe sa Doktrina ug mga Pakigsaad 18:10 makausab kon unsa ang atong pagtan-aw sa atong mga kaugalingon ug sa mga tawo nga nagpalibut kanato.

Posible nga mga Kalihokan

• Hangyoa ang matag bata sa pagsulat sa iyang ngalan sa usa ka piraso nga papel ug ipasa ang mga papel libut sa kwarto. Dapita sila sa pagsulat sa matag papel nga ilang madawat og unsa nga butang ilang nagustuhan mahitungod niana nga tawo. Awhaga sila sa pagmaloloy-on ug manggihunahunaon sa ilang mga komentaryo. Dayon tabangi ang mga bata sa pagbasa sa Doktrina ug mga Pakigsaad 18:10–12, ug dapita sila sa pagpakigbahin kon unsa ang ilang nakat-unan mahitungod sa unsa ang pagbati sa Dios kanato. Ipasabut nga kitang tanan mahinungdanon og bili ngadto sa Dios tungod kay kita Iyang mga anak.

• Pakit-a ang mga bata og usa ka butang nga bililhon kaayo kanimo. Unsaon nato pagtratar ang mga butang nga bililhon kanato? Hangyoa ang usa ka bata sa pagbasa sa Doktrina ug mga Pakigsaad 18:10. Unsaon nato sa pagpakita sa ubang mga tawo nga “ang bili sa [ilang] mga kalag mahinungdanon” sa atong panan-aw?

  

  Bili sa usa ka Kalag, ni Liz Lemon Swindle

Doktrina ug mga Pakigsaad 19:16–19

Si Jesukristo nag-antus alang kanako.

Unsaon nimo sa pagdapit ang espiritu sa ligdong nga pagtahud diha sa inyong klase aron nga ang Espiritu Santo makapamatuod ngadto sa mga bata nga gibayran ni Jesukristo ang bili sa ilang mga sala?

Posible nga mga Kalihokan

• Pakigbahin sa istorya ni Jesukristo nga nag-antus alang sa atong mga sala (tan-awa sa “Kapitulo 51: Jesus Nag-antus sa Tanaman sa Getsemani,” Mga Istorya sa Bag-ong Tugon, 129–32, o ang katugma nga video sa ChurchofJesusChrist.org). Dapita ang mga bata sa pag-istorya og usab sa ilang kaugalingon nga mga pulong, ug dayon dapita sila sa pagbasa kon giunsa sa paghulagway sa Manluluwas ang kasinatian diha sa Doktrina ug mga Pakigsaad 19:16–19. Unsay atong nakat-unan gikan sa Iyang paghulagway?

• Dapita ang mga bata sa pagpiyong sa ilang mga mata samtang imong gibasa ang Doktrina ug mga Pakigsaad 19:16–19 ug sa paghunahuna mahitungod sa unsay ilang gibati mahitungod sa Manluluwas. Tabangi ang mga bata sa pagpangita diha sa Hymns o sa Songbook sa mga Bata alang sa mga awit nga magtabang kanila pagpahayag sa ilang mga pagbati mahitungod ni Jesukristo (tan-awa ang topic indexes niini nga mga basahon). Dapita ang mga bata sa pagkanta sa mga awit nga ilang napili ug paghatag sa ilang pagpamatuod.

• Tabangi ang mga bata sa pagsag-ulo sa ikatulo nga artikulo sa hugot nga pagtuo.

Doktrina ug mga Pakigsaad 19:26, 34–35, 38

Ang mga panalangin sa Dios mas dako pa kay sa mga bahandi sa yuta.

Ang pag-imprinta sa Basahon ni Mormon mahal, ug si Joseph Smith dili makaabut sa pagbayad niini. Ang Ginoo misugo ni Martin Harris sa “paghatag og bahin sa [iyang] kabtangan,” ang iyang mauswagong umahan, sa pagbayad sa tig-imprinta (bersikulo 34). Nakadawat kita og hilabihang mga panalangin tungod sa mga sakripisyo ni Martin ug sa ubang daghan pa.

Posible nga mga Kalihokan

• Isulat diha sa pisara ang mga pangutana sama sa mosunod aron sa pagtabang sa mga bata sa pagsabut Doktrina ug mga Pakigsaad 19:26, 34–35, 38: Unsa ang gisugo sa Ginoo ni Martin Harris nga buhaton? Nganong gisugo Niya siya sa pagbuhat niini? Unsa ang Iyang gisaad agi og balus? Dapita ang mga bata nga magparis aron sa pagpangita sa mga tubag dinhi niini nga mga bersikulo. Pangutan-a sila unsa kaha ang ilang bation kon sila pa si Martin Harris.

• Ipakita sa mga bata ang usa ka kopya sa Basahon ni Mormon, ug sultihi sila og usa ka butang nga imong nagustohan mahitungod niini. Dapita sila sa pagpaambit kon unsay ilang gibati mahitungod niini. Sa lakbit pagsulti mahitungod sa sakripisyo ni Martin Harris aron ang Basahon ni Mormon ma-imprinta (Mga Istorya sa Doktrina ug mga Pakigsaad, 33). Unsa ang gisulti sa Ginoo ngadto ni Martin diha sa Doktrina ug mga Pakigsaad 19:38 nga tingali nakatabang kaniya nga magmatinud-anon ug magmasulundon? Tabangi ang mga bata sa paghunahuna og usa ka butang nga ilang ikasakripisyo aron sa pagsunod sa Dios o pagtabang sa Iyang buluhaton.

Awhaga ang Pagkat-on diha sa Panimalay

Dapita ang mga bata sa paghunahuna og usa ka tawo kinsa matabangan pinaagi sa unsay ilang nakat-unan gikan sa Doktrina ug mga Pakigsaad 18 o 19—sama pananglit, nga tanan kita mahinungdanon og bili ngadto sa Dios. Awhaga sila sa pagplano kon unsaon nila sa pagpakigbahin kon unsa ang ilang nakat-unan uban niana nga tawo.

Pagpalambo sa Atong Pagtudlo

Tabangi ang mga bata sa pagkat-on gikan sa mga kasulatan. Ang pipila sa mga bata adunay kalisud sa pagbasa sa mga kasulatan. Ang pagtutok sa usa ka bersikulo o hugpong sa mga pulong mahimong makatabang kanila.