panimalay ni Peter Whitmer

Peter Whitmer Home, ni Al Rounds

Marso 1–7

Doktrina ug mga Pakigsaad 20–22

“Ang Pag-uswag sa Simbahan ni Kristo”

Samtang ikaw magtuon sa Doktrina ug mga Pakigsaad 20–22 niini nga semana, mga ideya sa pagtudlo mahimong moabut sa imong hunahuna. Makakita ka og dugang nga mga ideya sa pagtudlo dinhi niini nga outline.

Irekord ang Imong mga Impresyon

pagpaambit nga icon

Dapita ang Pagpaambit

Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya, ug hangyoa ang mga bata sa pagpaambit sa unsa ang ilang nahibaloan mahitungod sa organisasyon sa Simbahan. Alang sa tabang, tan-awa sa “Kapitulo 9: Organisasyon sa Simbahan ni Jesukristo” (Mga Istorya sa Doktrina ug mga Pakigsaad, 40–42).

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 20–21

Ang Simbahan ni Jesukristo gipahiuli na.

Kaniadtong Abril 6, 1830, si Joseph Smith ug Oliver Cowdery nagpundok kuyog sa uban aron sa pag-organisar sa gipahiuli nga Simbahan ni Jesukristo. Unsaon nimo sa pagtabang ang mga bata nga imong gitudloan nga makasabut sa importansya niini nga hitabo?

Posible nga mga Kalihokan

• Gamita ang ulohan sa seksyon sa Doktrina ug mga Pakigsaad 21 o kapitulo 9 sa Mga Istorya sa Doktrina ug mga Pakigsaad aron sa pagsulti og lakbit sa mga bata kon unsa ang nahitabo sa adlaw nga ang Simbahan gi-organisar. Aron pagtabang kanila nga makasabut niini nga hitabo, ipasalida ang video “Organization of the Church” (ChurchofJesusChrist.org).

• Sultihi ang mga bata kon nganong mapasalamaton ka nga kita adunay Ang Simbahan ni Jesukristo sa mga Santos sa Ulahing mga Adlaw. Ipasabut nga ang pagkamiyembro sa Simbahan nag-andam kanato sa pagpuyo og balik uban sa Dios. Tabangi sila sa pagsulti og balik sa hugpong sa mga pulong “ako sakop sa Ang Simbahan ni Jesukristo sa mga Santos sa Ulahing mga Adlaw” sa makadaghang higayon o kantaha ang “Ang Simbahan ni Jesukristo” (Songbook sa mga Bata, 48).

Doktrina ug mga Pakigsaad 20:37, 71–74

Nag-andam ako nga mabunyagan.

Ang mga bata nga imong gitudloan nangandam nga mabunyagan. Tabangi sila sa pagsabut kon unsa ang kahulugan sa magpabunyag ug unsa ang ilang mabuhat nga maandam.

Posible nga mga Kalihokan

• Pagpakita og hulagway sa usa ka bata nga gibunyagan (tan-awa sa Libro sa mga Hulagway sa Ebanghelyo, nu. 104), ug hangyoa ang mga bata sa pagtudlo sa mga butang nga ilang namatikdan. Basaha o i-summarize ang Doktrina ug mga Pakigsaad 20:71–74, ug tabangi ang mga bata sa pagtan-aw kon ang mga hulagway nagkabagay ba sa mga panudlo niini nga mga bersikulo. Pagpamatuod nga kita kinahanglan nga mosunod sa ehemplo sa Manluluwas ug magpabunyag sa paagi nga Siya misugo.

• I-summarize ang Doktrina ug mga Pakigsaad 20:37. Unsa ang atong nakat-unan gikan niini nga bersikulo mahitungod sa mga tawo kinsa gusto nga magpabunyag? Pagpakita og mga hulagway sa mga paagi ang mga bata makaandam alang sa bunyag, sama sa pagserbisyo sa uban ug pag-ampo.

• Pagkanta og usa ka awit mahitungod sa bunyag, sama sa “Kon Ako Bunyagan” (Songbook sa mga Bata, 53), o tan-awa ang “The Baptism of Jesus” (biblevideos.ChurchofJesusChrist.org). Dapita ang mga bata sa pagpakigbahin sa ilang mga pagbati mahitungod sa pagpabunyag.

Doktrina ug mga Pakigsaad 20:75–79

Ang sakramento nagtabang kanako sa paghinumdom ni Jesukristo.

Unsaon nimo pagtabang ang mga bata nga mas makasabut kon nganong moambit kita sa sakramento matag semana?

Posible nga mga Kalihokan

• Basaha ang Doktrina ug mga Pakigsaad 20:77 ngadto sa mga bata. Hangyoa sila sa pagtindog kon mabati nila kon unsa ang atong kinahanglan nga hinumduman kon mokaon kita sa pan sa sakramento. Buhata ang sama sa bersikulo 79. (Mahimo nimong ipasabut nga naggamit kita og tubig imbis bino.) Unsaon nato pagpakita nga nahinumdom kita ni Jesus?

• Sultihi ang mga bata mahitungod sa usa ka panahon nga ikaw mihimo og saad ug mituman niini. Dapita sila sa pag-istorya og susama nga ilang kaugalingon. Ipasabut nga kon kita moambit sa sakramento, naghimo kita og mga saad. Basaha ang Doktrina ug mga Pakigsaad 20:77, naghatag og importansya sa mga saad nga atong gihimo nga sa “kanunay mohinumdom kaniya” ug “maghupot sa iyang mga sugo.” Dapita ang mga bata sa pagpakigbahin og panahon sa dihang sila nahinumdom sa Manluluwas o misunod og usa ka sugo.

  mga bata nag-ambit sa sakramento

  Ang sakramento makatabang kanako sa paghunahuna mahitungod ni Jesukristo.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 20–21

Ang Simbahan ni Jesukristo gipahiuli.

Agi og pagsunod sa sugo sa Ginoo, si Joseph Smith, Oliver Cowdery, ug uban mi-organisar sa gipahiuli nga Simbahan ni Jesukristo sa Abril 6, 1830. Paghunahuna og mga paagi sa pagtabang sa mga bata nga makakita kon giunsa niini nga hitabo pagpanalangin sa ilang mga kinabuhi.

Posible nga mga Kalihokan

• Pahinumdumi ang mga bata mahitungod sa pipila ka importanting mga hitabo nga ilang nakat-unan—sama sa pagpahiuli sa priesthood ug sa paghubad sa Basahon ni Mormon. Nganong kinahanglan kining mga butanga mahitabo sa wala pa ma-organisar ang Simbahan?

• Pagpakita og mga hulagway sa mga butang nga atong gibuhat sa Simbahan nga gihulagway diha sa seksyon 20, sama sa pagkat-on mahitungod sa Dios ug ni Jesukristo, pagpangalagad, pagbunyag, ug pag-ambit sa sakramento. Tabangi ang mga bata sa pagpares niini nga mga hulagway ngadto sa mga kasulatan nga naghulagway niini, sama sa Doktrina ug mga Pakigsaad 20:17–21, 47, 70, 72–74, 75–79, ug ang ulohan alang sa seksyon 21. Unsa nga mga panalangin kita aduna tungod kay kita mga miyembro sa Simbahan?

• Panganta og dungan sa “Ang Simbahan ni Jesukristo” (Songbook sa mga Bata, 48).

Doktrina ug mga Pakigsaad 20:37, 77, 79

Sa dihang ako gibunyagan, ako misaad sa pagsunod ni Jesukristo.

Daghang mga bata sa imong klase ang nabunyagan. Pahinumdumi sila sa pakigsaad nga ilang gihimo “sa pagdala diha kanila sa ngalan ni Jesukristo” (Doktrina ug mga Pakigsaad 20:37).

Posible nga mga Kalihokan

• Dapita ang pipila ka mga bata sa pag-anha nga andam sa pagpakigbahin kon unsa ang ilang gibati o nasinati sa dihang sila gibunyagan. Tingali makadala sila og litrato gikan sa ilang adlaw sa pagbunyag aron ipakita sa klase. Nganong mipili sila nga magpabunyag? Sa unsa nga paagi ang pagpabunyag ug pagdawat sa Espiritu Santo mipanalangin kanila?

• Pagbasa og dungan sa Doktrina ug mga Pakigsaad 20:77, ug hangyoa ang mga bata sa pag-ila sa mga saad nga atong gihimo sa panahon sa sakramento. Aron sa pagtabang sa mga bata sa pagsabut nga adunay mga butang nga sila makabuhat sa kada adlaw nga sa “kanunay mohinumdom” ni Jesukristo, dapita ang usa ka bata sa paglihok og usa ka butang nga siya makahimo aron sa paghinumdom sa Manluluwas. Hangyoa ang mga bata sa pagtagna unsa ang aksyon. Sumala sa bersikulo 77, sa unsa nga paagi kita mapanalanginan kon kita sa kanunay naghinumdom sa Manluluwas?

• Tabangi ang mga bata sa pagtandi sa Doktrina ug mga Pakigsaad 20:37 ngadto sa bersikulo 77 aron sa pagpangita og hugpong sa mga pulong nga gibalik pagsulti diha sa duha. Pagpakita sa mga bata og usa ka butang nga adunay ngalan diha niini (sama sa usa ka marka sa butang o personal nga ngalan). Unsa ang gisulti sa ngalan mahitungod sa butang? Pagbasa og dungan sa Doktrina ug mga Pakigsaad 20:37 aron sa pagdiskubre kinsang ngalan ang atong gidala diha sa atong mga kaugalingon kon kita nabunyagan. Unsa ang kahulugan sa pagdala sa ngalan ni Jesukristo diha kanato? Unsaon nato sa paghunahuna ug paglihok tungod kay anaa kanato kini nga ngalan?

Doktrina ug mga Pakigsaad 21:4–6

Ako mapanalanginan kon ako mosunod sa propeta.

Unsaon nimo pagtabang ang mga bata pagdawat sa mga panalangin nga gisaad dinhi niini nga mga bersikulo ngadto niadtong kinsa mosunod sa propeta?

Posible nga mga Kalihokan

• Isulat diha sa pisara Mga Sugo ug Mga Panalangin. Dapita ang mga Bata sa pagbasa sa Doktrina ug mga Pakigsaad 21:4–6, mangita sa mga sugo nga gihatag sa Ginoo ug sa mga panalangin nga Iyang gisaad. Dapita sila sa pagsulat niini diha sa pisara sa unsay ilang nakit-an.

• Pagpakita og hulagway sa propeta karon, ug dapita ang mga bata sa pagpakigbahin og usa ka butang nga ilang nakat-unan o nadunggan gikan kaniya nga bag-ohay lang. Basaha og dungan ang Doktrina ug mga Pakigsaad 21:5. Dapita ang mga bata sa pagsulat o pagdrowing og usa ka butang nga sila makabuhat sa pagsunod sa propeta. Pakigbahin sa imong pagpamatuod nga kon kita mosunod sa propeta, kita nagsunod sa Manluluwas.

pagkat-on nga icon

Awhaga ang Pagkat-on diha sa Panimalay

Dapita ang mga bata sa paghimo og lista sa mga rason nga sila mapasalamaton alang sa gipahiuli nga Simbahan ni Jesukristo. Awhaga sila sa pagpakigbahin sa ilang lista ngadto sa usa ka sakop sa pamilya o higala.

Pagpalambo sa Atong Pagtudlo

Gamit og mga istorya sa pagtudlo sa doktrina. “Ang mga istorya motabang sa mga bata nga makakita kon sa unsang paagi ang ebanghelyo magamit sa matag adlaw nga kinabuhi. … Kon magtudlo og gagmay nga mga bata, pagplano og mga paagi sa pagpaapil kanila diha sa istorya; sama pananglit, mahimo nilang kuptan ang mga hulagway, balikon pagsulti ang mga hugpong sa mga pulong, o ipalihok ang mga parte” (Pagtudlo Sumala sa Pamaagi sa Manluluwas, 25).

pahina sa kalihokan: ang Simbahan na-organisar kaniadtong 1830