Joseph Smith

Marso 15–21

Doktrina ug mga Pakigsaad 27–28

“Ang Tanan nga mga Butang Kinahanglan Gayud nga Himoon sa Kahusay”

Ang mga kamatuoran nga gitudlo sa Doktrina ug mga Pakigsaad 27–28 makapalig-on sa mga pagpamatuod sa mga bata nga imong gitudloan. Samtang ikaw naghunahuna sa mga panginahanglan sa mga bata, hain nga mga kamatuoran ikaw nadani sa pagpunting diha sa klase?

Irekord ang Imong mga Impresyon

pagpaambit nga icon

Dapita ang Pagpaambit

Pagpakita og hulagway ni Propeta Joseph Smith ug hulagway sa propeta karon. Dapita ang mga bata sa paghingalan sa mga tawo diha sa mga hulagway ug ipakigbahin ang mga butang nga gibuhat sa mga propeta.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 27:1–2

Ang sakramento nagtabang kanako sa paghinumdom ni Jesukristo.

Ang gagmay nga mga bata makakat-on sa importansya sa sakramento ug makapangita og mga paagi sa paghinumdom sa Manluluwas sulod niining sagrado nga ordinansa.

Posible nga mga Kalihokan

• Pagpakita og hulagway ni Jesus nga naghatag sa sakramento ngadto sa Iyang mga Apostoles (tan-awa sa Libro sa mga Hulagway sa Ebanghelyo, nu. 54). Unsa kaha kini sama sa pag-ambit sa sakramento uban sa Manluluwas? (tan-awa sa Doktrina ug mga Pakigsaad 27:5). Basaha ang Doktrina ug mga Pakigsaad 27:2, magsugod sa “maghinumdom ngadto sa Amahan,” ug hangyoa ang mga bata sa pagpaminaw alang sa unsay gusto sa Manluluwas kanato nga hinumduman kon kita moambit sa sakramento.

• Pagpakita ngadto sa mga bata og pan ug tubig ug usa ka hulagway sa Manluluwas. Paguniti sa mga bata ang hulagway samtang ikaw nagtudlo kanila nga ang sakramento nagtabang kanato sa paghinumdom ni Jesukristo.

• Tabangi ang mga bata sa paghunahuna og mga butang nga sila makabuhat aron sa paghinumdom ni Jesus sa panahon sa sakramento. Unsa ang mahimo sa ilang mga pamilya sa pagtabang sa usag usa nga mahimong may ligdong nga pagtahud? Dapita ang mga bata sa pagdrowing og usa ka hulagway nga ilang matan-aw panahon sa sakramento aron sa pagtabang kanila sa paghinumdom sa Manluluwas.

Doktrina ug mga Pakigsaad 27:15–18

Ang taming sa Dios nagpanalipod kanako.

Paghunahuna og mga paagi nga ikaw makatabang sa mga bata nga imong gitudloan nga makahibalo kon sa unsa nga paagi ang mga sugo sama sa pagsul-ob sa taming sa Dios.

Posible nga mga Kalihokan

• Ipakita sa mga bata ang hulagway sa taming (tan-awa sa outline niini nga semana sa Dali, Sunod Kanako—Alang sa mga Indibidwal ug mga Pamilya). Samtang ikaw nagbasa sa Doktrina ug mga Pakigsaad 27:15–18, tabangi ang mga bata sa pagpangita sa mga bahin sa taming diha sa hulagway. Sultihi ang mga bata kon giunsa sa taming sa Dios pagtabang kanimo nga “makasugakod sa dautang adlaw” (bersikulo 15).

• Ang outline alang sa Mga Taga-Efeso sa Dali Sunod Kanako—Alang sa Primary: Bag-ong Tugon 2019 adunay pahina sa kalihokan mahitungod sa taming sa Dios. Guntinga ang mga bahin sa taming, ug ipabutang kini sa mga bata diha sa usa sa mga tawo samtang ikaw nagbasa sa Doktrina ug mga Pakigsaad 27:15–18. Tabangi ang mga bata sa pagsabut sa mga butang nga sila makabuhat sa pagsul-ob sa taming sa Dios, sama sa pag-ampo, pagpili sa matarung, pagserbisyo sa uban, ug uban pa.

  mga bata nagdula

  Ako makasul-ob sa taming sa Dios.

Doktrina ug mga Pakigsaad 28:2, 6–7

Ang propeta naggiya sa Simbahan.

Nasayud ba ang mga bata nga imong gitudloan ngano nga kita adunay mga propeta? Gamita ang Doktrina ug mga Pakigsaad 28 aron sa pagtabang nila nga mahibalo nga ang propeta mao lamang ang tawo kinsa makagiya sa Simbahan.

Posible nga mga Kalihokan

• Basaha o isulti sa imong kaugalingon nga mga pulong ang istorya ni Hiram Page (tan-awa sa “Kapitulo 14: Ang Propeta ug mga Pagpadayag alang sa Simbahan,” Mga Istorya sa Doktrina ug mga Pakigsaad, 56–57). Pakigbahin sa imong pagpamatuod nga ang Langitnong Amahan ug si Jesukristo mipili ni Joseph Smith sa paggiya sa Simbahan sa iyang panahon (tan-awa sa Doktrina ug mga Pakigsaad 28:2). Pakigbahin sa imong pagpamatuod nga ang propeta karon gitawag aron tabangan ang Ginoo sa paggiya sa Iyang Simbahan sa atong panahon.

• Padulaa ang mga bata og “sunda ang lider”—usa ka bata makatindog sa atubangan sa kwarto, ug ang nahibilin sa mga bata makasunod sa bisan unsay iyang buhaton. Kini makagiya ngadto sa paghisgot mahitungod kon nganong kita mosunod sa propeta. Makapakita ka og hulagway ni Jesukristo ug hatagi og importansya nga kita nagsunod sa propeta tungod kay siya nagsunod sa Manluluwas ug namulong sa mga pulong sa Manluluwas.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 27:1–2

Ang sakramento nagtabang kanako sa paghinumdom ni Jesukristo.

Sa unsa nga paagi nga ang pagkat-on sa mga baruganan diha sa Doktrina ug mga Pakigsaad 27:1–2 nagtabang sa mga bata nga imong gitudloan nga magbaton og mas makahuluganong kasinatian sa pag-ambit sa sakramento?

Posible nga mga Kalihokan

• Dapita ang mga bata sa pagsulat og mga butang nga ilang gihunahuna nga gusto sa Manluluwas nga ilang mahibaloan mahitungod sa sakramento. Kon gikinahanglan, mahimo nilang basahon ang “Sakramento” diha sa Giya ngadto sa mga Kasulatan (scriptures.ChurchofJesusChrist.org). Himoa nga sila mopakigbahin sa pipila sa mga butang nga ilang gisulat, ug hangyoa sila sa pagdugang ngadto sa ilang mga lista human mabasa ang Doktrina ug mga Pakigsaad 27:1–2. Sa unsa nga paagi ang mga butang diha sa ilang mga lista nakaapekto kon giunsa nila sa pag-ambit ang sakramento kada Dominggo?

• Tabangi ang mga bata sa paghunahuna mahitungod sa unsay kahulugan sa pag-ambit sa sakramento “uban sa bug-os nga tinguha ngadto sa himaya [sa Dios]” (bersikulo 2). Paghisgot og mga pangutana sama sa mosunod: Unsa ang pipila ka makapalinga nga tingali gitutokan sa atong mga mata o mga hunahuna atol sa sakramento? Unsa ang atong mabuhat aron sa pagtutok sa atong atensyon diha sa Manluluwas samtang kita nag-ambit sa sakramento? Unsaon niini pagtabang kanato sa pagsunod Kaniya sa matag adlaw?

Doktrina ug mga Pakigsaad 27:15–18

Ang taming sa Dios nagtabang kanako nga makasugakod sa dautan.

Ang mga bata nga imong gitudloan moatubang og daghang dautan nga mga impluwensya sa tibuok nilang mga kinabuhi. Ang Langitnong Amahan buot motabang kanila nga makasugakod sa dautan. Unsaon nimo pagdasig kanila sa pagsul-ob sa taming sa Dios?

Posible nga mga Kalihokan

• Dapita ang mga bata sa pagbasa sa Doktrina ug mga Pakigsaad 27:15–18 ug sa pagdrowing sa mga bahin sa taming nga ginganlan (kon kinahanglan, mahimo silang motan-aw sa imahe diha sa outline niini nga semana sa Dali, Sunod Kanako—Alang sa mga Indibidwal ug sa mga Pamilya). Unsa ang gitudlo kanato sa mga pulong nga naghulagway sa matag bahin sa taming mahitungod sa unsa ang atong kinahanglan aron sa pag-away sa dautan nga naglibut kanato (sama pananglit, pagkamatarung, hugot nga pagtuo, kaluwasan, ug uban pa)?

• Dapita ang mga bata sa paghunahuna og mga butang nga ilang mahimo aron makasugakod sa mga tintasyon nga naglibut kanila. Hangyoa sila sa pagtapos sa kapahayag “Isul-ob nato ang taming sa Dios kada adlaw pinaagi …” sa ilang mga ideya. Tabangi sila nga makahibalo kon giunsa ang ilang mga paninguha sa pagduol ngadto ni Kristo nagtabang kanila sa pagsul-ob sa taming sa Dios.

Doktrina ug mga Pakigsaad 28:1–7, 15

Ang Langitnong Amahan naggiya kanako pinaagi sa Espiritu Santo.

Doktrina ug mga Pakigsaad 28:1–7, 15 makatabang sa mga bata nga imong gitudloan sa pagsabut nga ang tanan magiyahan sa Espiritu Santo, apan ang pagpadayag alang sa Simbahan sa kanunay ihatag pinaagi sa propeta.

Posible nga mga Kalihokan

• I-asoy ang istorya ni Hiram Page nga nangangkon nga nakadawat og mga pagpadayag alang sa Simbahan (tan-awa sa “Kapitulo 14: Ang Propeta ug mga Pagpadayag alang sa Simbahan,” Mga Istorya sa Doktrina ug mga Pakigsaad, 56–57). Unsaon nato pagtubag ang mga pangangkon ni Hiram Page? Pagbasa og dungan sa Doktrina ug mga Pakigsaad 28:1–7, 15 alang sa pipila ka mga ideya.

• Tabangi ang mga bata sa pagsiksik sa mosunod nga mga kasulatan aron sa paghatag og usa ka lista sa mga paagi ang Espiritu Santo makagiya kanila: Doktrina ug mga Pakigsaad 28:1, 4, 15; Juan 14:26; Moroni 8:26; 10:4–5. Patrabahoa sila nga magparis kon kana makatabang. Ngano nga ang gasa sa Espiritu Santo importante kaayo? Pakigbahin kon giunsa sa Espiritu Santo paggiya kanimo.

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagpangutana sa ilang mga ginikanan kon sila makatudlo ba og home evening nga leksyon kabahin sa usa ka butang nga ilang nakat-unan sa klase.

Pagpalambo sa Atong Pagtudlo

Paggamit og musika. Ang mga kanta sa primary ug mga himno makatabang sa mga bata sa tanang edad nga makasabut ug makagamit sa mga kamatuoran sa ebanghelyo sa halandumong paagi. Makahimo usab sila sa mga bata nga aktibong moapil sa pagkat-on.

pahina sa kalihokan: Ang Dios naggiya sa Iyang Simbahan