Marso 15–21

Doktrina ug mga Pakigsaad 27–28

“Ang Tanan nga mga Butang Kinahanglan gayud Himoon sa Kahusay”

Si Elder D. Todd Christofferson miingon nga samtang magtuon ka sa mga kasulatan ug isulat ang mga impresyon, “makahatag kamo og luna sa inyong kasingkasing para sa pulong sa Dios, ug Siya makigsulti nganha kaninyo” (“Kon Makabig na Kamo,” Liahona, Mayo 2004, 12).

Irekord ang Imong mga Impresyon

Ang pagpadayag bag-o pa gihapon nga konsepto alang sa mga Santos samtang nagpadayon nga gipahibalo ang Pagpahiuli. Ang nahaunang mga miyembro sa Simbahan nasayud nga si Propeta Joseph Smith makadawat og pagpadayag alang sa Simbahan, apan makadawat ba usab ang uban? Ang mga pangutana sama niini nahimong kritikal sa dihang si Hiram Page, usa sa Walo ka mga Saksi sa bulawan nga mga palid, mituo nga siya nakadawat og mga pagpadayag alang sa Simbahan. Daghang mga matinud-anon nga mga Santos ang mituo nga kini nga mga pagpadayag naggikan sa Dios. Ang Ginoo mitubag pinaagi sa pagtudlo nga diha sa Iyang Simbahan “ang tanan nga mga butang kinahanglan gayud himoon sa kahusay” (Doktrina ug mga Pakigsaad 28:13), nga nagpasabut nga usa lang “ang gitudlo sa pagdawat og mga sugo ug mga pagpadayag” alang sa tibuok Simbahan (Doktrina ug mga Pakigsaad 28:2). Bisan pa man, ang uban makadawat og personal nga pagpadayag alang sa ilang bahin sa buhat sa Ginoo. Sa pagkatinuod, ang mga pulong sa Ginoo ngadto ni Oliver Cowdery mga pahinumdom ngari kanatong tanan: “Kini ihatag nganha kanimo … unsa ang imong buhaton” (Doktrina ug mga Pakigsaad 28:15).

Tan-awa usab sa “All Things Must Be Done in Order,” Revelations in Context, 50–53.

Mga Ideya alang sa Personal nga Pagtuon sa Kasulatan

Doktrina ug mga Pakigsaad 27:1–4

Kinahanglan moambit ko sa sakramento inubanan sa bug-os nga tinguha sa himaya sa Dios.

Si Sally Knight ug si Emma Smith nabunyagan niadtong Hunyo 1830, apan ang ilang kumpirmasyon gibalda sa manggugubot nga panon. Paglabay sa duha ka bulan, si Sally ug ang iyang bana, si Newel, mibisita ni Emma ug ni Joseph, ug nadesisyunan nga ang kumpirmasyon kinahanglan mapahigayon na, ug kana nga pundok makaambit na sa sakramento. Samtang padulong nga magkuha og bino alang sa sakramento, si Joseph gipugngan sa usa ka anghel. Unsa ang gitudlo sa anghel kaniya mahitungod sa sakramento? (tan-awa sa Doktrina ug mga Pakigsaad 27:1–4).

Unsa ang gitudlo niining mga bersikulo mahitungod sa paagi nga gusto sa Manluluwas sa imong paghunahuna sa sakramento? Unsa ang imong nabati nga nadasig ka nga buhaton tungod sa unsay imong nakat-unan?

Ang sakramento nagpahinumdom kanato sa sakripisyo sa Manluluwas.

Doktrina ug mga Pakigsaad 27:15–18

Ang hinagiban sa Dios makatabang sa pagpanalipod kanato gikan sa dautan.

Si Presidente M. Russell Ballard miingon: “Walay bisan usa nga labing talagsaon ug kinadak-ang butang nga atong mahimo alang sa atong kaugalingon sa espirituhanon nga paagi. Ang tinuod nga espirituhanong gahum anaa sa daghang ginagmay nga mga buhat nga gihiusa aron mahimong espirituhanon nga kalig-on nga mopanalipod ug mosanta sa tanang dautan” (Be Strong in the Lord,” Ensign, Hulyo 2004, 8).

Samtang magbasa ka sa Doktrina ug mga Pakigsaad 27:15–18, makahimo ka og tsart sama sa usa nga naa sa ubos. Unsa ang imong gibuhat aron makabutang og matag piraso sa taming sa Dios?

Piraso sa taming	Parte sa lawas nga gipanalipdan	Unsa kaha ang girepresentar niana nga parte sa lawas
Taming sa Katarung	Kasingkasing	Atong mga tinguha ug mga pagbati
Kalo nga Puthaw sa Kaluwasan	Ulo o hunahuna

Tan-awa usab sa Mga Taga Epeso 6:11–18; 2 Nephi 1:23.

Doktrina ug mga Pakigsaad 28

Ang buhi nga propeta mao ang tigpamaba sa Dios sa Iyang Simbahan.

Hunahunaa unsa kaha kon si bisan kinsa nga tawo ang makadawat sa mga sugo ug pagpadayag alang sa tibuok Simbahan. Sa dihang si Hiram Page nangangkon nga nakadawat og ingon nga pagpadayag, adunay kalibug taliwala sa mga miyembro sa Simbahan. Sa Doktrina ug mga Pakigsaad 28, ang Ginoo mipadayag og usa ka han-ay alang sa pagpadayag sa Iyang Simbahan. Unsay imong nakat-unan gikan niining seksyon mahitungod sa piho nga tahas sa Presidente sa Simbahan? Unsay inyong nakat-unan gikan sa mga pulong sa Ginoo ngadto ni Oliver Cowdery diha sa bersikulo 3? Unsay imong nakat-unan gikan niining seksyon mahitungod sa unsang paagi ang Dios makatudlo nimo?

Tan-awa sa Dallin H. Oaks, “Duha ka Linya sa Komunikasyon,” Liahona, Nob. 2010, 83–86.

Doktrina ug mga Pakigsaad 28:8–9

Nganong ang misyon ni Oliver Cowdery ngadto sa mga Lamanite mahinungdanon?

Usa ka katuyoan sa Basahon ni Mormon mao “ang mga Lamanite unta moabut ngadto sa kasayuran sa ilang mga amahan, ug nga sila unta mahibalo sa mga saad sa Ginoo” (Doktrina ug mga Pakigsaad 3:20). Kini nauyon sa mga saad nga gihimo sa Ginoo ngadto sa daghang mga propeta sa Basahon ni Mormon (pananglitan, tan-awa, sa, 1 Nephi 13:34–41; Enos 1:11–18; Helaman 15:12–13). Ang nahaunang mga miyembro sa Simbahan gikonsiderar ang mga American Indian nga mga kaliwatan sa mga katawhan sa Basahon ni Mormon. (Ang opisyal nga position sa Simbahan karon mao nga ang mga Lamanite “nahilakip sa mga katigulangan sa mga American Indian” [introduction to the Book of Mormon].)

Alang sa dugang nga pagbasa mahitungod sa misyon ni Oliver ngadto sa duol nga mga tribo sa American Indian, tan-awa sa “A Mission to the Lamanites” (Revelations in Context, 45–49). Unsa ang gitudlo niini nga misyon diha nimo mahitungod sa Ginoo ug sa Iyang buhat?

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 27:1–2.Sa unsang paagi nga mas mahinumduman nato ang mga sakripisyo sa Manluluwas alang kanato samtang kita moambit sa sakramento?

Doktrina ug mga Pakigsaad 27:5–14.Unsay atong nasayran mahitungod sa mga propeta niining mga bersikulo? Mahimo ka nga mangita og mga impormasyon mahitungod niini diha sa Giya ngadto sa mga Kasulatan (scriptures.ChurchofJesusChrist.org). Unsa nga mga panalangin ang maana kanato pinaagi sa mga yawe nga ilang gihuptan? Alang sa dugang impormasyon mahitungod sa pipila niining mga yawe, tan-awa sa Mateo 16:16–19; Doktrina ug mga Pakigsaad 110:11–16.

Doktrina ug mga Pakigsaad 27:15–18.Tingali ang imong pamilya malingaw nga modula og magpakaaron-ingnon nga gubat gamit ang dugang nga mga sinina aron magrepresentar sa taming sa Dios, sama sa kalo, mga vest, mga apron, o sapatos. Sa unsang paagi ang taming makapanalipod kanato sa gubat? Hisguti ang pipila sa mga dautang impluwensya nga giatubang sa inyong pamilya ug ang mga butang nga imong mahimo aron masul-ob ang espirituhanon nga taming.

Doktrina ug mga Pakigsaad 28:2–7.Unsa ang atong nakat-unan gikan niini nga mga bersikulo mahitungod sa tawag sa usa ka propeta? Tingali ang mga sakop sa pamilya mahimong makaribyu sa nangagi nga mga mensahe gikan sa buhi nga propeta ug mopaambit kon sa unsang paagi ang iyang tambag makatabang kanato sa pagsunod ni Jesukristo.

Doktrina ug mga Pakigsaad 28:11.Kon gusto kita nga modalit og pagkoriher sa usa ka tawo, nganong importante nga kini “tali kaniya ug kanimo lamang”?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Come, Listen to a Prophet’s Voice [Dali, Pamation Nato ang Propeta],” Mga Himno, nu. 21.

Pagpalambo sa Personal nga Pagtuon

Tun-i ang mga pulong sa mga propeta ug mga apostoles sa ulahing adlaw. Basaha unsay gitudlo sa mga propeta ug mga apostoles sa ulahing adlaw mahitungod sa mga baruganan nga imong nakit-an sa mga kasulatan. Hunahunaa ang pagribyu sa indeks sa hilisgutan sa kinatibuk-ang komperensya diha sa conference.ChurchofJesusChrist.org o diha sa Gospel Library app.