“Marso 8–14. Doktrina ug mga Pakigsaad 23–26: ‘Pagpalig-on sa Simbahan,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)
“Marso 8–14. Doktrina ug mga Pakigsaad 23–26,” Dali, Sunod Kanako—Alang sa mga Indibidwal ug mga Pamilya: 2021
Marso 8–14
Doktrina ug mga Pakigsaad 23–26
“Pagpalig-on sa Simbahan”
Samtang magbasa ka sa Doktrina ug mga Pakigsaad 23–26, isulat ang mga impresyon nga imong madawat gikan sa Espiritu Santo. Unsaon nimo paggamit ang tambag niining mga pagpadayag aron sa pagpalig-on sa imong kaugalingong pagkadisipulo ug usab sa Simbahan?
Irekord ang Imong mga Impresyon
Human naorganisar ang Simbahan, ang mga Santos nag-atubang og bag-ong hagit—sa pagpakatap sa ebanghelyo ug pagpalig-on niadtong kinsa nahiusa na uban sa Simbahan, ang tanan samtang ang pagpanggukod mipadayon sa pagsaka. Si Emma Smith unang nakasaksi sa oposisyon. Niadtong Hunyo 1830, si Emma ug ang mga sakop sa pamilyang Knight nangandoy nga mabunyagan. Apan ang mga kaaway sa Simbahan naningkamot sa pagbalda sa nahimo unta nga sagradong kasinatian. Una ilang giguba ang dam nga gitukod aron sa paghatag og igong kalawmon sa tubig alang sa mga pagbunyag. Bisan human giayo ang dam, ang nanggukod nagpundok aron isinggit ang mga pagpanghulga ug pagbugalbugal niadtong gibunyagan. Unya, sa dihang si Joseph mokumpirmar na sa bag-ong mga miyembro, gidakop siya tungod kay nakasamok siya sa komunidad pinaagi sa pagsangyaw mahitungod sa Basahon ni Mormon. Ingon kini og makaguol nga pagsugod sa bag-ong natukod nga Simbahan sa Ginoo. Apan taliwala niining kawalay kasiguroan ug kasamok, ang Ginoo mihatag og bililhon nga mga pulong sa tambag ug pagdasig, nga nagrepresentar sa Iyang “tingog ngadto sa tanan” (Doktrina ug mga Pakigsaad 25:16).
Tan-awa usab sa Mga Santos, 1:101–102, 106–110.
Mga Ideya alang sa Personal nga Pagtuon sa Kasulatan
Doktrina ug mga Pakigsaad 23–26
Makatabang ko sa pagpalig-on sa Simbahan sa Ginoo.
Karon, hapit 200 na ka tuig human ang gipahiuli nga Simbahan naorganisar, ang panginahanglan “sa pagpalig-on sa simbahan” nagpadayon (Doktrina ug mga Pakigsaad 23:3–5). Ug kining buhat dili lang alang ni Joseph Smith, Oliver Cowdery, o sa atong kasamtangang mga lider—alang kini natong tanan. Sa imong tibuok nga pagtuon sa Doktrina ug mga Pakigsaad 23–26, pamalandungi ang tambag nga gihatag sa Ginoo sa nahaunang mga miyembro sa Simbahan sa pagtabang kanila sa pagpalig-on sa Simbahan. Unsay imong gibati nga gusto sa Ginoo nga imong buhaton aron makaapil niining paningkamot?
Ang Manluluwas makabayaw kanako “gikan sa [akong] mga kasakit.”
Ang mangulo sa Simbahan atol sa panahon nga grabe ang pagpanggukod mahimong bug-at gayud nga palas-anon alang kang Joseph Smith. Pangitaa ang mga pulong sa pagdasig sa Ginoo ngadto kaniya diha sa Doktrina ug mga Pakigsaad 24.
Unsay gisugyot sa mosunod nga mga kasulatan diha nimo mahitungod sa paagi nga ang Manluluwas makabayaw kanimo gikan sa imong mga kasakit?
Doktrina ug mga Pakigsaad 24:1–3
Doktrina ug mga Pakigsaad 24:8
Doktrina ug mga Pakigsaad 121:7–8
Sa unsang paagi nga si Jesukristo mibayaw kanimo gikan sa imong mga kasakit? Unsay imong buhaton aron makapadayon sa pagpangita sa Iyang tabang atol sa malisud nga mga panahon?
Giayo Niya ang Daghang Nagkalain-laing mga Sakit, ni J. Kirk Richards
Si Emma Smith “ang pinili nga babaye.”
Sa dihang si Emma Hale naminyo ni Joseph Smith, lagmit nakahibalo na siya nga mohimo siya og mga sakripisyo. Misupak siya sa kagustuhan sa iyang amahan ug gibaylo ang komportabling kinabuhi ngadto sa kinabuhi nga walay kasiguroan. Tingali naghunahuna siya unsay gilauman sa Ginoo kaniya diha sa buhat sa Pagpahiuli. Pangitaa ang mga tubag nga gihatag sa Ginoo diha sa Doktrina ug mga Pakigsaad 25. Timan-i ang mga pulong sa Ginoo diha sa bersikulo 16—aduna ka bay nakit-an nga bisan unsa niining seksyon nga imong gibati ang Iyang “tingog ngadto [kanimo]”?
Tan-awa usab sa Joy D. Jones, “Usa ka Talagsaong Balaanon nga Tawag,” Liahona, Mayo 2020, 15–18.
Doktrina ug mga Pakigsaad 26:2
Unsa ang inuyunan sa kadaghanan?
Kon ang mga miyembro makadawat og tawag o ordinasyon sa pagkapari diha sa Simbahan, kita adunay oportunidad aron pormal nga paluyohan sila pinaagi sa pag-isa sa atong mga kamot agi’g pagpakita sa suporta. Ang baruganan sa pagpakita diha sa dayag nga pagsuporta ug pag-uyon gitawag og gikauyunan sa kadaghanan. Sumala sa gitudlo ni Presidente Gordon B. Hinckley, “Ang pamaagi sa pagpaluyo labaw pa kay sa naandang pagpataas sa kamot. Usa kini ka pasalig sa pagdapig, sa pagsuporta, sa pagtabang niadtong kinsa napili” (“This Work Is Concerned with People,” Ensign, Mayo 1995, 51).
Mga Ideya alang sa Pamilya nga Pagtuon sa Kasulatan ug Family Home Evening
-
Doktrina ug mga Pakigsaad 23:6.Ngano kaha ang Ginoo gusto nga mag-ampo kita “diha sa [atong] banay, ug diha sa [atong] mga higala, ug sa tanan nga mga dapit”? Unsa ang gitudlo sa awit nga “Ang Gugma ang Gipamulong Dinhi” (Songbook sa mga Bata, 102)—o laing awit mahitungod sa pag-ampo—ngari kanato mahitungod sa gahum sa pag-ampo?
Tan-awa usab sa 2 Nephi 32:8–9; 3 Nephi 18:18–23.
-
Doktrina ug mga Pakigsaad 24:8.Makatabang kaha alang sa imong pamilya ang paghisgot mahitungod sa unsay kahulugan sa “pagpailub sa mga kasakit”? Kon ikaw adunay bata pa nga mga anak, tingali makalingaw ang pagsag-ulo sa eksperimento nga gihulagway ni Presidente Dieter F. Uchtdorf sa “Ipadayon ang Pagpailub” ( Liahona, Mayo 2010, 56; tan-awa usab ang video sa ChurchofJesusChrist.org). Unsa ang gitudlo kanato sa Doktrina ug mga Pakigsaad 24:8 mahitungod sa pailub? Sa unsang paagi ang Ginoo nagtabang kanato diha sa atong mga kasakit?
-
Doktrina ug mga Pakigsaad 25:11–12.Tingali mahimo ninyong kantahon ang mga kinaham nga himno sa matag sakop sa pamilya o kantahon ug hisgutan ang mahitungod sa rason ngano nga kini man ang iyang “awit sa kasingkasing.” Sa unsang paagi nga kini nga mga awit “usa ka pag-ampo ngadto sa [Dios]”?
-
Doktrina ug mga Pakigsaad 26:2.Tingali makatabang ang pagpangita sa “Inuyunan sa Kadaghanan” diha sa Giya ngadto sa mga Kasulatan (scriptures.ChurchofJesusChrist.org). Unsaon nato sa pagpakita sa atong pagsuporta sa atong mga lider?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Gisugyot nga awit “Manganta Ta og Kusog,” Songbook sa mga Bata, 124 (tan-awa sa “Ideas to Improve Your Family Scripture Study”).
Mga tingog sa Pagpahiuli
Emma Hale Smith
Ang mga pulong sa Ginoo ngadto ni Emma Smith nasulat diha sa Doktrina ug mga Pakigsaad 25 gipadayag kon unsa Iyang gibati kabahin niya ug sa iyang mga gikatampo ngadto sa Iyang buhat. Apan unsa man si Emma? Unsa ang atong nahibaloan kabahin sa iyang pagkatawo, sa iyang mga relasyon, sa iyang kalig-on? Ang usa sa paagi nga mailhan kining “pinili nga babaye” diha sa (Doktrina ug mga Pakigsaad 25:3) mao ang pagbasa sa mga gisulti sa mga tawo kinsa nakaila sa iyang pagkatawo.
Emma Smith, ni Lee Greene Richards
Joseph Smith Jr., iyang bana
“Uban sa dili matukib nga kahimuot, ug unsa ka dako nga pagbati sa kalipay ang mipuno sa akong dughan, sa dihang gikuha ko ang kamot, nianang gabhiona, sa akong minahal nga Emma—siya nga mao ang akong asawa, gani ang asawa sa akong kabatan-on, ug ang pinili sa akong kasingkasing. Daghan ang mga hulagway diha sa akong hunahuna sa dihang ako naghinuktok sa makadiyot sa daghang mga panghitabo nga gihatag kanamo sa pagsinati. Ang kakapoy ug mga kahago, ang mga kasakit ug mga pag-antus, ug ang mga kalipay ug mga pahalipay, matag karon ug unya, nga gisabwag diha sa among dalan ug mipanalangin sa among kinabuhi. O! unsa ka daghang hulagway mipuno sa akong hunahuna, karon siya ania, bisan unsa ang among mga pagsulay walay kahadlok, lig-on, ug walay pagduhaduha—walay kausaban, mapinanggaon nga Emma!”1
Lucy Mack Smith, iyang ugangan
“Batan-on pa siya kaniadto, ug, ang pagka natural nga puno sa pangandoy, ang iyang tibuok kasingkasing hingpit nga mapahinunguron sa buhat sa Ginoo, ug hingpit siya nga masaligon alang sa simbahan ug sa kawsa sa kamatuoran. Bisan unsa ang mahimong buhaton sa iyang mga kamot, buhaton niya kini sa tibuok niyang gahum ug dili hakog maghunahuna nga, ‘Aduna ba koy makuha nga bisan unsang kaayohan kay sa uban?’ Kon ang mga elder gipadala aron sa pagsangyaw, siya ang unang moboluntaryo sa iyang pag-alagad aron motabang sa ilang mga biste, bisan unsa pa ang kalisud nga iyang masinati.”2
“Ako wala makakita og babaye sa akong kinabuhi kinsa makalahutay sa matag matang sa kakapoy ug kalisud gikan sa bulan ngadto sa bulan, ug gikan sa tuig ngadto sa tuig, uban nianang walay pagsibog nga kaisug, kainit, ug pagpailub, nga iya gayud nga nabuhat; tungod kay ako nasayud nga unsa man ang iyang naantus; nga siya nakalahutay sa walay kasigurohan; nga siya nakalahutay sa pagpanglutos; ug nakabuntog sa kasuko sa mga tawo ug sa yawa, nga unta makapahugno sa hapit bisan kinsa nga laing babaye.”3
Si Joseph Smith Sr., ang iyang ugangan nga lalaki
Sa patriyarkal nga panalangin ni Emma, gipahayag ni Joseph Smith Sr., kinsa nagserbisyo isip patriyarka sa Simbahan:
“Emma, akong umagad, ikaw gipanalanginan sa Ginoo, tungod sa imong kamatinud-anon ug sa kamatuoran: ikaw mapanalanginan uban sa imong bana, ug maglipay diha sa himaya diin moabut diha kaniya: Ang imong kalag gisakit tungod sa kadautan sa mga tawo sa pagtinguha sa paglaglag sa imong bana, ug ang imong tibuok kalag nangamuyo diha sa pag-ampo alang sa iyang katubsanan: paglipay, tungod kay ang Ginoo nga imong Dios midungog sa imong pangaliya.
“Ikaw nagbangutan tungod sa katig-a sa mga kasingkasing sa panimalay sa imong amahan, ug ikaw nangandoy alang sa ilang kaluwasan. Ang Ginoo naminaw sa imong mga pangamuyo, ug pinaagi sa iyang mga paghukom iyang buhaton nga ang pipila kanila makakita sa ilang mga kabuang ug maghinulsol sa ilang mga sala; apan kini ipaagi sa kasakit aron sila maluwas. Imong makita ang daghang mga adlaw; oo, ang Ginoo moluwas kanimo hangtud nga ikaw pagatagbawon, tungod kay imong makita ang imong Manunubos. Ang imong kasingkasing magmaya diha sa talagsaong buhat sa Ginoo, ug walay usa nga makakuha sa imong pagmaya gikan kanimo.
“Ikaw mahinumdom gayud sa dakong pagpakig-angay sa imong Dios diha sa pagtugot kanimo nga makauban ang akong anak sa dihang ang anghel mihatag sa mga talaan sa mga Nephite sa iyang pag-atiman. Imong nakita ang daghang kasub-anan tungod kay gikuha sa Ginoo ang imong tulo ka anak: niini ikaw dili pagabasulon, tungod kay siya nasayud sa imong lunsay nga mga tinguha sa pagpasanay og usa ka pamilya, nga ang bansagon sa akong anak mahimong mapanalanginan. Ug karon, tan-awa, ako moingon diha kanimo, nga ingon sa gipamulong sa Ginoo, kon ikaw magatuo, ikaw mapanalanginan niini nga butang ug ikaw magdala og laing mga anak, hangtud sa kalipay ug katagbawan sa imong kalag, ug ngadto sa kalipayan sa imong kahigalaan.
“Ikaw mapanalanginan uban sa salabutan, ug makabaton og gahum sa pagtudlo sa imong isig ka babaye. Tudloi ang imong pamilya sa pagkamatarung, ug ang imong mga gagmayng bata sa pamaagi sa kinabuhi, ug ang balaan nga mga anghel magabantay kanimo: ug ikaw maluwas diha sa gingharian sa Dios, bisan pa man. Amen.”4
Emma Smith uban sa iyang mga anak. Panahon sa Pagkatawa, ni Liz Lemon Swindle
Emma’s Hymns, ni Liz Lemon Swindle