Panimalay ni Peter Whitmer, ni Al Rounds

Marso 1–7

Doktrina ug mga Pakigsaad 20–22

“Ang Pagsugod sa Simbahan ni Kristo”

Samtang magbasa ka sa Doktrina ug mga Pakigsaad 20–22, bukas nga modawat og mga impresyon sa Espiritu Santo. Hunahunaa ang pagsulat niini aron matan-aw nimo kini og balik.

Irekord ang Imong mga Impresyon

Ang buhat ni Propeta Joseph Smith sa paghubad sa Basahon ni Mormon nakompleto na. Apan ang buhat sa Pagpahiuli mao pa lang ang pagsugod. Klaro gikan sa nahaunang mga pagpadayag nga agig dugang sa pagpahiuli sa doktrina ug awtoridad sa pagkapari, ang Ginoo gustong mopahiuli sa usa ka pormal nga organisasyon—ang Iyang Simbahan (tan-awa sa Doktrina ug mga Pakigsaad 10:53; 18:5). Mao nga pagka Abril 6, 1830, kapin sa 40 ka tumutuo mihugop ngadto sa balay nga ginama sa truso sa pamilyang Whitmer didto sa Fayette, New York, aron sa pagsaksi sa pag-organisar sa Simbahan ni Jesukristo.

Mao gihapon, ang pipila ka mga tawo nahibulong, nganong gikinahanglan ang pag-organisar og Simbahan? Ang tubag mahimong makit-an, bisan tipik, diha sa mga pagpadayag nga may kalabutan sa unang panagtigum sa Simbahan niadtong 1830. Dinhi, gihulagway ang mga panalangin nga dili mahimong posible kon ang tinuod nga Simbahan ni Jesukristo wala pa “kini ingon nga naandan nga gitukod ug gipahimutang” sa ulahing mga adlaw (Doktrina ug mga Pakigsaad 20:1).

Tan-awa usab sa Mga Santos, 1:84–86, ug “Build Up My Church,” Revelations in Context, 29–32.

Mga Ideya alang sa Personal nga Pagtuon sa Kasulatan

Doktrina ug mga Pakigsaad 20:1–36

Ang Simbahan ni Jesukristo sa mga Santos sa Ulahing mga Adlaw gitukod diha sa tinuod nga doktrina.

Ang Seksyon 20 gipaila isip usa ka “pagpadayag sa kapunongan ug pangagamhanan” (ulohan sa seksyon). Apan sa wala pa gilatid ang mga polisiya sa Simbahan, ang mga katungdanan sa pagkapari, ug mga pamaagi alang sa pagpahigayon sa mga ordinansa, kini nga pagpadayag gisugdan pinaagi sa pagtudlo sa sukaranan nga mga doktrina. Samtang magbasa ka sa unang 36 ka mga bersikulo niining pagpadayag, pangutan-a ang imong kaugalingon kon nganong ingon kaha niana. Mahimo usab ka nga maghimo og lista sa mga kamatuoran sa ebanghelyo nga imong makit-an. Ania ang pipila ka mga ehemplo:

• Ang Basahon ni Mormon ug ang papel niini diha sa Pagpahiuli (mga bersikulo 8–12)

• Ang kinaiyahan sa Dios (mga bersikulo 17–19)

• Ang Pag-ula ni Jesukristo (mga bersikulo 20–27)

Nganong kining mga kamatuoran importante nga hatagan og gibug-aton samtang ang Simbahan gitukod?

Doktrina ug mga Pakigsaad 20:37, 75–79

Ang sagradong mga ordinansa mahinungdanon nga bahin sa pagpahiuli sa Simbahan.

Sa dihang naorganisar ang Simbahan, ang Ginoo mitudlo sa Iyang mga Santos mahitungod sa sagradong mga ordinansa, lakip sa bunyag ug sa sakramento. Samtang magbasa ka sa mga panudlo “mahitungod sa paagi sa bunyag” sa bersikulo 37, hunahunaa ang imong kaugalingong bunyag. Nakaangkon ka ba sa bisan unsang mga pagbati nga gihulagway niining bersikulo? Naangkon ba nimo kini karon? Pamalandungi unsa ang imong mahimo aron magpabilin nga lig-on ang imong “determinasyon sa pagserbisyo [ni Jesukristo] hangtud sa katapusan.”

Samtang magbasa ka mahitungod sa sakramento diha sa Doktrina ug mga Pakigsaad 20:75–79, paningkamuti sa pagbasa kining sagradong mga pag-ampo gikan sa panglantaw sa usa ka tawo nga nakadungog niini sa unang higayon. Unsa nga panabut ang imong nadawat mahitungod sa sakramento? mahitungod sa imong kaugalingon? Sa unsang mga paagi nga kining mga panabut makaapekto sa paagi nga ikaw mangandam sa pag-ambit sa sakramento niining semanaha?

Ang sakramento mao ang usa ka sagradong ordinansa.

Doktrina ug mga Pakigsaad 20:38–60

Ang pagserbisyo sa pagkapari nakapanalangin sa mga miyembro sa Simbahan ug sa ilang mga pamilya.

Kon adunay usa ka tawo mohangyo nimo nga hinganlan ang mga katungdanan sa usa ka tighupot sa pagkapari, unsay imong isulti? Basaha sa Doktrina ug mga Pakigsaad 20:38–60, nga nalista ang mga katungdanan sa pagkapari. Aduna bay butang niining mga bersikulo nga nakapausab sa imong gihunahuna mahitungod sa mga katungdanan sa pagkapari ug sa unsang paagi ang Manluluwas mihimo sa Iyang buhat? Sa unsang paagi nga ikaw napanalanginan pinaagi sa buhat nga gihulagway dinhi niining mga bersikulo?

Aron makat-on mahitungod sa paagi ang kababayen-an migamit sa awtoridad sa pagkapari diha sa buhat sa Simbahan, tan-awa sa Dallin H. Oaks, “Ang mga Yawe ug Awtoridad sa Priesthood,” Liahona, Mayo 2014, 49–52.

Doktrina ug mga Pakigsaad 21

Ang Simbahan ni Jesukristo gipangulohan sa usa ka buhi nga propeta.

Unsay imong nakat-unan gikan sa Doktrina ug mga Pakigsaad 21:4–9 mahitungod sa mga pulong sa mga propeta sa Ginoo? Hunahunaa ang mga saad nga gihulagway niining bersikulo 6 alang niadtong modawat sa mga pulong sa Ginoo pinaagi sa Iyang mga propeta. Para ninyo unsa man ang gipasabut niini nga mga saad?

Unsaon nimo nga makadawat sa mga pulong sa buhi nga propeta “ingon og gikan sa kaugalingong ba-ba sa [Dios]”? (bersikulo 5). Unsa nga tambag ang nahatag sa propeta karon nga makadala og mga panalangin nga gisaad diha sa bersikulo 6?

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 20.Unsa ang atong isulti kon adunay usa ka tawo nga mangutana kanato kon nganong nagkinahanglan kita sa Simbahan? Unsa ang mga tubag nga atong makit-an sa Doktrina ug mga Pakigsaad 20? Tan-awa usab sa D. Todd Christofferson, “Nganong Anaa ang Simbahan,” Liahona, Nob. 2015, 108–11.

Doktrina ug mga Pakigsaad 20:69.Unsa ang gipasabut sa “[naglakaw] nga balaanon sa panan-aw sa Ginoo”? Tingali makalingaw alang sa mga sakop sa pamilya ang magdrowing o magsulat diha sa piraso sa papel og mga butang nga makatabang nila nga maglakaw nga balaanon o mga butang nga makabalda nila sa pagbuhat sa ingon. Dayon mahimo silang makahimo og usa ka dalan gamit ang mga papel ug maningkamot sa paglakaw diha sa dalan, motunob lang diha sa mga drowing nga makadala kanila ngadto kang Kristo.

Doktrina ug mga Pakigsaad 20:37, 71–74.Kon adunay usa ka tawo sa inyong pamilya nga wala pa mabunyagi, kini nga mga bersikulo makagiya ngadto sa usa ka hisgutanan mahitungod kon unsaon sa pag-andam alang sa bunyag (tan-awa sa bersikulo 37) ug kon giunsa sa pagpahigayon ang mga bunyag (tan-awa sa mga bersikulo 71–74). Mahimong mopaambit ang mga sakop sa pamilya ug mga litrato o mga panumduman gikan sa ilang adlaw sa bunyag.

Doktrina ug mga Pakigsaad 20:75–79.Sa unsang paagi nga magamit sa imong pamilya kining mga bersikulo alang sa makahuluganon, balaanong pagtamud nga mga kasinatian sa sakramento? Kini nga mga bersikulo tingali nagsugyot og mga butang nga imong mapamalandungan atol sa sakramento, ug ang mga sakop sa pamilya mahimong mangita o magdrowing og hulagway niining mga butanga. Kon tukma, mahimo kang magdala niadtong mga litrato sa inyong sunod nga panagtigum sa sakramento isip usa ka pahinumdom sa unsay hunahunaon mahitungod sa sakramento.

Doktrina ug mga Pakigsaad 21:4–7.Hunahunaa ang pagdapit sa mga sakop sa pamilya sa pagpangita og mga hugpong sa mga pulong diha sa mga bersikulo 4–5 nga makatudlo kanato mahitungod sa pagsunod sa propeta sa Ginoo. Unsay gipasabut niining pagdawat sa mga pulong sa propeta diha sa pagpailub? sa hugot nga pagtuo? Kanus-a nga atong nadawat ang mga panalangin nga gisaad diha sa bersikulo 6?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Ang Simbahan ni Jesukristo,” Songbook sa mga Bata, 48.

Pagpalambo sa Atong Pagtudlo

Sunda ang kinabuhi sa Manluluwas. “Apan ang gahum sa Manluluwas sa pagtudlo ug pagbayaw sa uban naggikan sa paagi sa Iyang pagpakabuhi ug unsa Siya nga matang sa tawo. Kon mas makugihon ka nga naningkamot nga magpakabuhi sama ni Jesukristo, mas makahimo ka sa pagtudlo sama Kaniya” (Pagtudlo sumala sa Pamaagi sa Manluluwas, 13).

Gi-orden ni Oliver Cowdery si Joseph Smith, ni Walter Rane