Si Jesus nagbarug atubangan sa nangluhod nga mga katawhan

Matag Tuhod Moluhod, ni J. Kirk Richards

Marso 22–28

Doktrina ug mga Pakigsaad 29

Si Jesukristo Mopundok sa Iyang mga Katawhan

Usa sa katuyoan sa pagtuon sa mga kasulatan mao ang pagkat-on sa doktrina, o sa mga kamatuoran sa ebanghelyo nga mahinungdanon alang sa atong kaluwasan. Samtang magtuon ka sa Doktrina ug mga Pakigsaad 29 niining semanaha, pangitaa ang panabut sa doktrina nga makahuluganon kanimo.

Irekord ang Imong mga Impresyon

Bisan og ang Simbahan ni Jesukristo naorganisar na niadtong 1830, daghang mga kamatuoran sa ebanghelyo ang gikinahanglan pa nga ipadayag, ug daghan sa mga miyembro sa Simbahan ang adunay mga pangutana. Nabasahan nila ang mga panagna diha sa Basahon ni Mormon mahitungod sa panagpundok sa Israel ug ang pagtukod sa Zion (tan-awa sa 3 Nephi 21). Giunsa kini sa pagkahitabo? Ang pagpadayag nga giangkon ni Hiram Page nga nadawat namulong bahin nianang hisgutanan, nga nakapadugang lang sa katahap sa mga miyembro (tan-awa sa Doktrina ug mga Pakigsaad 28). Ang ubang mga tawo naghunahuna kabahin sa Pagkapukan ni Adan ug Eva ug sa espirituhanon nga kamatayon. Gihangop sa Ginoo kining mga pangutana niadtong 1830: “Bisan unsa ang inyong pangayoon pinaagi sa hugot nga pagtuo,” Siya misulti sa mga Santos, “samtang nagkahiusa sa pag-ampo sumala sa akong pagsugo, kamo makadawat” (Doktrina ug mga Pakigsaad 29:6). Ug Siya mohangop sa atong mga pangutana karon; Siya naghulat lang kanato sa pagpangutana Kaniya diha sa pag-ampo. Sa pagkatinuod, sama ka buhong nga doktrina nga pagpadayag ang makita diha sa Doktrina ug mga Pakigsaad 29, Siya usahay motubag pinaagi sa pagpakigbahin sa kamatuoran ug kahibalo nga lapas pa sa mga pangutana nga atong ipangutana sa unang higayon.

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 29

Ang Langitnong Amahan miandam sa hingpit nga plano alang sa atong kaluwasan.

Ang Doktrina ug mga Pakigsaad 29 nagtudlo og daghang kamatuoran mahitungod sa plano sa Dios alang sa Iyang mga anak. Samtang magbasa ka, pangitaa ang mga kamatuoran nga imong makat-unan mahitungod sa matag usa sa mosunod nga mga bahin sa plano:

• Premortal nga kinabuhi (tan-awa sa mga bersikulo 36–37)

• Paglalang (tan-awa sa mga bersikulo 31–33)

• Ang Pagkapukan ni Adan ug Eva (tan-awa sa mga bersikulo 40–41)

• Mortal nga kinabuhi (tan-awa sa mga bersikulo 39, 42–45)

• Ang Pag-ula ni Jesukristo (tan-awa sa mga bersikulo 1, 42–43, 46–50)

• Ang Pagkabanhaw (tan-awa sa mga bersikulo 13, 26)

• Ang Katapusang Paghukom (tan-awa sa mga bersikulo 12–13, 27–30)

Unsa ang bag-ong panabut ang imong naangkon? Sa unsang paagi nga malahi ang imong kinabuhi kon wala ka makahibalo niining mga kamatuoran?

Mahimo pa nimong tun-an og dugang ang mahitungod sa plano sa Langitnong Amahan diha sa “Ang Plano sa Kaluwasan” (Isangyaw ang Akong Ebanghelyo: Usa ka Giya sa Misyonaryo nga Pangalagad, rev. ed. [2018], ChurchofJesusChrist.org/manual/missionary).

Doktrina ug mga Pakigsaad 29:1–8

Si Jesukristo mopundok sa Iyang katawhan sa dili pa ang Iyang Ikaduha nga Pag-anhi.

Si Jesukristo namulong kabahin sa panagpundok sa Iyang katawhan “sama sa usa ka himungaan nga mopundok sa iyang mga piso sa ilawom sa iyang mga pako” (Doktrina ug mga Pakigsaad 29:2). Unsa ang gitudlo niini nga imahe diha nimo mahitungod sa tinguha sa Manluluwas sa pagpundok kaninyo? Samtang magbasa ka sa Doktrina ug mga Pakigsaad 29:1–8, pangitaa ang mga ideya nganong magpundok kita, kinsa ang mopundok, ug sa unsang paagi nga makatabang kita sa panagpundok sa “pinili” (bersikulo 7).

Sa atong panahon, ang panagpundok sa Zion nagpasabut sa paghiusa diha sa mga stake sa Zion sa tibuok kalibutan. Sa unsang paagi nga ang panagpundok makatabang kanato isip mga Santos nga “makapangandam sa tanan nga mga butang” alang sa mga kalisdanan nga moabut sa dili pa moabut ang Manluluwas sa Ikaduha nga Pag-anhi? (bersikulo 8; tan-awa usab sa mga bersikulo 14–28).

Tan-awa usab sa Mga Artikulo sa Hugot nga Pagtuo 1:10; Russell M. Nelson ug Wendy W. Nelson, “Paglaum sa Israel” (tibuok kalibutan nga debosyonal alang sa kabatan-onan, Hunyo 3, 2018, ChurchofJesusChrist.org).

himongaan ug mga piso

Pila Ka Higayon, ni Liz Lemon Swindle

Doktrina ug mga Pakigsaad 29:31–35

“Ang tanan nga mga butang ngari kanako mga espirituhanon.”

Sa unsang pagsabut nga ang tanang mga sugo mga espirituhanon? Sa pagkahibalo nga ang tanang mga sugo espirituhanon, unsa ang natudlo niana diha nimo mahitungod sa katuyoan sa mga sugo? Mahimo kang maglista og pipila ka mga sugo ug maghunahuna sa espirituhanon nga mga baruganan kalabut sa matag usa.

Unsa kaha ang kausaban kon tan-awon nimo ang espirituhanon nga kahulogan o katuyoan sa inyong kada adlaw nga tahas, bisan kadtong ingon og temporal o ordinaryo?

Tan-awa usab sa Mga Taga-Roma 8:6; 1 Nephi 15:30–32.

Doktrina ug mga Pakigsaad 29:36–50

Si Jesukristo ang nagtubos kanato gikan sa pagkapukan.

Kini nga pagpadayag gisugdan uban sa pagpaila sa Ginoo sa Iyang kaugalingon isip atong Manunubos, kinsa “miula alang sa [atong] mga sala” (bersikulo 1). Ang pagpadayag gipadayon sa pagpasabut sa pipila ka mga rason nganong nagkinahanglan kita og usa ka Manunubos. Hunahunaa kon unsaon nimo sa paggamit ang mga bersikulo 36–50 aron mapasabut kon nganong nagkinahanglan kita og katubsanan pinaagi sa Manluluwas nga si Jesukristo. Sa daghang mga tradisyon sa mga pagtuo, ang Pagkapukan giisip nga usa ka trahedya; unsay imong nakita niining mga bersikulo nga nagtudlo og positibo nga mga resulta sa Pagkapukan? (Tan-awa usab sa 1 Mga Taga-Corinto 15:22; 2 Nephi 2:6–8, 15–29; Mosiah 3:1–19; Moises 5:9–12.)

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 29.Mahimo ka nga makagamit sa mga imahe sa katapusan niining latid uban sa Doktrina ug mga Pakigsaad 29 aron matudloan ang imong pamilya mahitungod sa plano sa kaluwasan. Pananglitan, ang mga sakop sa pamilya mahimong makakat-on mahitungod sa nagkalainlaing bahin sa plano pinaagi sa pagbasa ug panaghisgut sa gisugyot nga bersikulo. Mahimo silang makapangita og dugang nga mga kamatuoran sa mga (topics.ChurchofJesusChrist.org) o Giya ngadto sa mga Kasulatan (scriptures.ChurchofJesusChrist.org). Isulat kon unsa ang imong nakat-unan. Nganong mapasalamaton kita nga nakahibalo mahitungod sa plano sa Kaluwasan? Sa unsang paagi ang pagkahibalo mahitungod niini nakaimpluwensya sa inadlaw-adlaw nakong kinabuhi?

Doktrina ug mga Pakigsaad 29:2, 7–8.Unsay buot ipasabut sa mapundok pinaagi sa Manluluwas? Unsaon nato sa pagtabang Kaniya nga mapundok ang pinili?

Doktrina ug mga Pakigsaad 29:3–5.Unsay atong makat-unan mahitungod sa Manluluwas niining mga bersikulo nga nagtabang kanato nga “ipataas ang [atong] mga kasingkasing ug pagmaya”? (bersikulo 5). Ang video nga “We Can Find Happiness” (ChurchofJesusChrist.org) makatabang nimo sa paghisgut kon sa unsang paagi ang pagkahibalo mahitungod sa plano sa kaluwasan nakahatag og kalipay sa imong pamilya.

Doktrina ug mga Pakigsaad 29:34–35.Ang pagbasa niining mga bersikulo makahatag sa imong pamilya og usa ka oportunidad sa paghisgut mahitungod sa espirituhanon nga mga rason luyo sa daghang mga sugo o propetikanhong tambag nga imong gipaningkamotan nga masunod. Pananglitan, nganong ang Ginoo gusto nga atong basahon ang mga kasulatan isip usa ka pamilya? Unsa ang espirituhanon nga kaayohan ang atong makita gikan sa pagsunod sa mga sugo?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Israel, Israel, God Is Calling [Israel, Israel, Dios Nagtawag],” Mga Himno, nu. 7.

Pagpalambo sa Atong Pagtudlo

Pangitaa si Jesukristo. Ang mga kasulatan nagtudlo kanato nga ang tanang gilalang sa Dios nagpamatuod ni Jesukristo (tan-awa sa Moises 6:62–63), busa pangitaa Siya samtang magbasa ka sa mga kasulatan. Hunahunaa ang pagtimaan o pagmarka sa mga bersikulo nga nagtudlo mahitungod Kaniya.

plano sa kaluwasan