Marso 29–Abril 4

Pasko sa Pagkabanhaw

“Ako Mao Siya Kinsa Nabuhi, Ako Mao Siya Kinsa Gipatay”

Samtang mangandam ka sa pagsaulog sa Pagkabanhaw sa Manluluwas sa Dominggo sa Pasko sa Pagkabanhaw, pamalandungi kon sa unsang paagi ang pagpadayag sa bag-ong panahon nakapadugang sa imong hugot nga pagtuo nga si Jesukristo mao ang Bugtong nga Anak ug ang Manunubos sa kalibutan.

Irekord ang Imong mga Impresyon

Abril 3, 1836, mao ang Dominggo sa Pasko sa Pagkabanhaw. Human nakatabang sa pagpangalagad sa sakramento ngadto sa mga Santos nga nagpundok diha sa bag-o lang nga gipahinungod nga Templo sa Kirtland, sila si Joseph Smith ug Oliver Cowdery nakakaplag og hilom nga dapit luyo sa usa ka tabil sulod sa templo ug miyukbo diha sa hilom nga pag-ampo. Unya, niining sagrado nga adlaw sa dihang ang mga Kristiyano sa bisan asang dapit nanagsaulog sa Pagkabanhaw ni Jesukristo, ang nabanhaw nga Manluluwas mipakita Mismo diha sa Iyang Templo, namahayag, “Ako Mao Siya Kinsa Nabuhi, Ako Mao Siya Kinsa Gipatay” (Doktrina ug mga Pakigsaad 110:4).

Unsay ipasabut nga si Jesukristo mao “siya kinsa nabuhi”? Dili lang kini basta nagpasabut nga Siya mibangon gikan sa lubnganan sa ikatulo nga adlaw ug mipakita ngadto sa Iyang mga disipulo nga Taga-Galilea. Nagpasabut kini nga Siya buhi karon. Siya mamulong pinaagi sa iyang mga propeta karon. Siya naggiya sa Iyang Simbahan karon. Siya nag-ayo sa samaran nga mga kalag ug nagbangutan nga mga kasingkasing karon. Busa makapalanog kita sa mga pulong sa gamhanang pagpamatuod ni Joseph Smith: “Human sa daghan nga mga pagpamatuod nga gihatag mahitungod kaniya, kini mao ang pagpamatuod … nga kami naghatag kaniya: Nga siya buhi!” (Doktrina ug mga Pakigsaad 76:22). Makadungog kita sa Iyang tingog niining mga pagpadayag. Makasaksi kita sa Iyang kamot diha sa atong mga kinabuhi. Ug matag usa kanato mobati og “katam-is ug kalipay ko: Buhi ang Manunubos ko!’” (Hymns, nu. 136).

Mga Ideya alang sa Personal nga Pagtuon sa Kasulatan

Doktrina ug mga Pakigsaad 29:5; 38:7; 62:1; 76:11–14, 20–24; 110:1–10

Si Jesukristo buhi.

Nakita ni Propeta Joseph Smith ang nabanhaw nga Manluluwas sa pipila ka mga higayon, ug duha niining kasinatian nahisulat diha sa Doktrina ug mga Pakigsaad. Samtang magbasa ka sa mga seksyon 76:11–14, 20–24; 110:1–10, unsa ang nagustuhan nimo mahitungod sa pagpamatuod ni Joseph Smith? Nganong bililhon man ang iyang pagpamatuod nganha nimo?

Sa tibuok Doktrina ug mga Pakigsaad, ang Manluluwas mipamatuod sa Iyang kaugalingong misyon ug kabalaan. Unsay imong nakat-unan mahitungod sa buhi nga Kristo gikan sa mga pulong diha sa Doktrina ug mga Pakigsaad 29:5; 38:7; 62:1? Mahimo nimong ikonsiderar ang pagsulat sa mga pamahayag sama niini nga imong makit-an samtang magtuon ka sa Doktrina ug mga Pakigsaad.

Tan-awa usab sa Joseph Smith––Kasaysayan 1:17.

Doktrina ug mga Pakigsaad 29:26–27; 42:45–46; 63:49; 88:14–17, 27–31; 93:33–34

Tungod ni Jesukristo, ako mabanhaw.

Nasayud si Joseph Smith unsay bation sa magbangutan diha sa kamatayon sa mga minahal. Duha sa iyang mga igsoon, si Alvin ug Don Carlos, namatay nga mga batan-on pa. Si Joseph ug Emma milubong sa ilang unom ka anak, matag usa wala pay dos anyos. Apan gikan sa mga pagpadayag nga iyang nadawat, nakabaton si Joseph og mahangturon nga panglantaw sa kamatayon ug sa mahangturon nga plano sa Dios. Hunahunaa ang mga kamatuoran nga gipadayag diha sa Doktrina ug mga Pakigsaad 29:26–27; 42:45–46; 63:49; 88:14–17, 27–31; 93:33–34. Sa unsang paagi kini nakaapekto sa imong paglantaw sa kamatayon? Sa unsa nga paagi kini nakaapekto sa imong pagpakabuhi?

Tan-awa usab sa 1 Mga Taga-Corinto 15; M. Russell Ballard, “Ang Panan-awon sa Katubsanan sa mga Patay,” Liahona, Nob. 2018, 71–73; Mga Pagtulun-an sa mga Presidente sa Simbahan: Joseph Smith (2007), 203–211.

Doktrina ug mga Pakigsaad 18:10–13; 19:16–19; 45:3–5; 76:69–70

Natuman ni Jesukristo ang usa ka “hingpit nga pag-ula.”

Usa ka paagi aron makatutok diha sa Manluluwas atol sa panahon sa Pasko sa Pagkabanhaw mao ang pagtuon sa mga pagpadayag diha sa Doktrina ug mga Pakigsaad nga nagtudlo mahitungod sa Iyang maulaon nga sakripisyo. Ang pipila niini makita diha sa Doktrina ug mga Pakigsaad 18:10–13; 19:16–19; 45:3–5; 76:69–70. Tingali makahimo ka og lista sa mga kamatuoran mahitungod sa Pag-ula sa Manluluwas nga imong makit-an niining mga bersikulo. Aron mapalawman ang imong pagtuon, makadugang ka sa imong lista pinaagi sa pagpangita sa mga pakisayran sa mga kasulatan nga nalista sa “Pag-ula, Pag-ula sa Dugo” (Giya ngadto sa mga Kasulatan, scriptures.ChurchofJesusChrist.org).

Ania ang mga pangutana nga makagiya sa imong pagtuon:

• Nganong mipili man si Jesukristo sa pag-antus?

• Unsa ang kinahanglan nakong buhaton aron madawat ang mga panalangin sa Iyang sakripisyo?

• Unsaon nako pagkahibalo nga ang Iyang Pag-ula adunay epekto sa akong kinabuhi?

Lord of Prayer [Ginoo sa Pag-ampo], ni Yongsung Kim

Mga Ideya alang sa Pamilya nga Pagtuon sa Kasulatan ug Family Home Evening

Kinatibuk-ang komperensya.Tungod kay ang kinatibuk-ang komperensya nahiuyon sa Dominggo sa Pasko sa Pagkabanhaw niining tuiga, mahimo nimong hunahunaon kon sa unsang paagi nga mapalawman sa mga mensahe sa komperensya (lakip sa musika) ang pagpamatuod sa imong pamilya kabahin ni Jesukristo. Pananglitan, ang mga kabataan makadrowing og usa ka hulagway sa Manluluwas, o gunitan og pataas ang Hulagway Niya, kon ilang madungog ang mensahe o kanta mahitungod ni Jesukristo. Ang ubang mga sakop sa pamilya makahimo og lista sa mga kamatuoran nga ilang nadungog mahitungod sa Manluluwas. Pagkahuman, makapaambit ang mga sakop sa pamilya sa ilang gidrowing o gilista ug sa ilang kaugalingon nga mga pagpamatuod ni Jesukristo.

Doktrina ug mga Pakigsaad 88:14–17; 138:17, 50.Tingali malingaw ang imong pamilya sa paghunahuna og usa ka analohiya o leksyon nga gigamitan og butang aron mapasabut unsay kahulugan sa mamatay ug mabanhaw—usa nga nagpakita sa lawas ug espiritu nga gibulag ug dayon gihiusa, sama sa kamot ug usa ka gwantis. Sa unsang paagi nga mapalawman niini nga mga bersikulo ang atong pagpasalamat alang sa unsay nabuhat sa Manluluwas alang kanato?

“Ang Buhi nga Kristo: Ang Pagpamatuod sa mga Apostoles.”Aron makapadasig og kulukabildo mahitungod sa mga pagpamatuod sa mga propeta sa bag-ong panahon, mahimo nimong tahasan ang matag sakop sa pamilya sa pagbasa og porsyon sa “Ang Buhi nga Kristo: Ang Pagpamatuod sa mga Apostoles” ( Liahona, Mayo 2017, sulod sa atubangan nga hapin) ug mopaambit mahitungod ni Jesukristo. Mahimo usab nimong ipasalida ang video nga “Apostle Testimony Montage” (ChurchofJesusChrist.org). Unsa nga mga kamatuoran ang atong nakit-an nga makapadasig kanato?

“I Know That My Redeemer Lives.”Aron matabangan ang imong pamilya nga hunahunaon ang daghang paagi ang nabanhaw nga Manluluwas nagpanalangin kanato karon, mahimo kamong magdungan sa pagkanta sa “I Know That My Redeemer Lives [Ako Nasayud Nga Buhi ang Manunubos Ko]” (Hymns, nu. 136) ug itakdo ang mga kamatuoran nga gitudlo niining awit uban niadtong gitudlo diha sa mosunod nga mga kasulatan: Doktrina ug mga Pakigsaad 6:34; 45:3–5; 84:77; 98:18; 138:23. Tingali malingaw ang imong pamilya sa pagsulat og dugang nga mga bersikulo alang sa himno nga mopahayag kon giunsa nila pagkahibalo nga ang Manluluwas buhi.

Alang sa video sa Pasko sa Pagkabanhaw ug ubang mga tinubdan, tan-awa sa Easter.ComeUntoChrist.org.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Si Jesus Nabanhaw,” Songbook sa mga Bata, 44.

Pagpalambo sa Atong Pagtudlo

Pangita og mga leksyon sa inadlaw-adlaw nga mga butang. Hunahunaa kon sa unsang paagi ang mga kasinatian sa kada adlaw sa inyong mga sakop sa pamilya lagmit mosangpot sa mga panag-istoryahanay mahitungod sa usa ka kamatuoran sa ebanghelyo (tan-awa sa Pagtudlo sumala sa Pamaagi sa Manluluwas, 4). Pananglitan, usa ka unuson nga pag-ulan mahimong usa ka oportunidad sa pakig-istorya mahitungod sa paagi kon giunsa pagbubo sa Dios ang mga panalangin diha sa Iyang mga Anak.

Si Jesukristo nagpakita ngadto ni Propeta Joseph Smith ug ni Oliver Cowdery, ni Walter Rane