“Abril 12–18. Doktrina ug mga Pakigsaad 37–40: ‘Ug Kon Kamo Dili Magkahiusa Kamo Dili Ako,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)
“Abril 12–18. Doktrina ug mga Pakigsaad 37–40,” Dali, Sunod Kanako—Alang sa mga Indibidwal ug mga Pamilya: 2021
Mga Santos Mobalhin ngadto sa Kirtland, ni Sam Lawlor
Abril 12–18
Doktrina ug mga Pakigsaad 37–40
“Kon Kamo Dili Magkahiusa Kamo Dili Akò”
Ang pagsulat sa mga impresyon samtang magtuon ka mao ang usa ka paagi nga imong matuman ang tambag sa Dios sa “pagbaton og kaalam” (Doktrina ug mga Pakigsaad 38:30).
Irekord ang Imong mga Impresyon
Alang sa nahaunang mga Santos, ang Simbahan labaw pa sa usa ka dapit aron madungog ang pagsangyaw sa Dominggo. Sa Iyang tibuok pagpadayag ngadto ni Joseph Smith, ang Ginoo naghulagway sa mga pulong sama sa kawsa, gingharian, Zion, ug, sa kanunay, buhat. Lagmit kana ang nahimo nga kabahin sa unsay nakapadani sa kadaghanan sa nahaunang mga miyembro sa Simbahan. Bisan unsa pa man ka dako sa ilang paghigugma sa gipahiuli nga doktrina sa Simbahan, daghan usab ang gusto og butang nga ilang ikapahinungod ang ilang kinabuhi. Bisan pa man, ang sugo sa Ginoo sa mga Santos niadtong 1830 sa pagpundok didto sa Ohio dili sayon sundon alang sa uban. Alang sa mga tawo sama ni Phebe Carter, nagpasabut kini sa pagbiya sa komportable nga panimalay sa dili pamilyar nga pinuy-anan (tan-awa sa “Voices of the Restoration” sa katapusan niining latid). Karon klaro natong makita nga kadtong mga Santos nga nagtan-aw gamit lang ang mata sa hugot nga pagtuo: ang Ginoo adunay mga panalangin nga naghulat alang kanila didto sa Ohio.
Ang panginahanglan sa pagpundok ngadto sa Ohio dugay nang milabay, apan ang mga Santos karon maghiusa gihapon libut sa samang kawsa, sa samang buhat: sa “pagpadayag sa Zion” (Doktrina ug mga Pakigsaad 39:13). Sama niadtong nahaunang mga Santos, atong biyaan “ang mga kabalaka sa kalibutan” (Doktrina ug mga Pakigsaad 40:2) tungod kay mosalig kita sa gisaad sa Ginoo: “Ikaw makadawat … usa ka panalangin nga hilabihan ka mahinungdanon nga ikaw wala pa sukad makahibalo” (Doktrina ug mga Pakigsaad 39:10).
Tan-awa usab sa Mga Santos, 1:109–11.
Mga Ideya alang sa Personal nga Pagtuon sa Kasulatan
Doktrina ug mga Pakigsaad 37:1
Unsa ang gihubad ni Joseph Smith niadtong 1830?
Niini nga bersikulo, ang Ginoo nagpasabut sa buhat ni Joseph Smith sa dinasig nga rebisyon sa Biblia, nga gipasabut isip usa ka “paghubad.” Sa dihang nadawat ni Joseph ang pagpadayag diha sa seksyon 37, iyaha nang nakompleto ang pipila ka mga kapitulo sa basahon sa Genesis ug nakat-on mahitungod ni Enoch ug sa iyang dakbayan sa Zion (tan-awa sa Genesis 5:18–24; Moises 7). Ang pipila sa mga baruganan nga gitudlo sa Ginoo kang Enoch susama niadtong Iyang gipadayag diha sa seksyon 38.
Tan-awa usab sa Mga Hilisgutan sa Kasaysayan sa Simbahan, ChurchofJesusChrist.org/study/topics.
Si Joseph Smith nakigtambayayong uban ni Sidney Rigdon sa dinasig nga rebisyon sa Biblia. Paghulagway pinaagi ni Annie Henrie Nader
Ang Dios mopundok kanato aron sa pagpanalangin kanato.
Ang Ginoo mitapos sa Iyang sugo sa pagpundok ngadto sa Ohio pinaagi sa pag-ingon, “Tan-awa, ania ang kaalam” (Doktrina ug mga Pakigsaad 37:4). Apan dili ang tanan nakakita dayon diha niini nga kaalam. Sa seksyon 38, ang Ginoo mipadayag sa Iyang kaalam sa mas detalye. Unsay imong nakat-unan gikan sa mga bersikulo 11–33 mahitungod sa mga panalangin sa pagpundok? Ang mga miyembro sa Simbahan wala na gisugo sa pagpundok pinaagi sa pagbalhin og lokasyon; sa unsa nga mga paagi nga magpundok kita karon? Sa unsang paagi nga kining mga panalangin magamit ngari kanato? (tan-awa sa Russell M. Nelson, “Ang Pagpundok sa Nagkatibulaag nga Israel,” Liahona, Nob. 2006, 79–81).
Samtang magbasa ka sa nahabilin niini nga seksyon, tan-awa ang mga tudling nga tingali nakatabang sa mga Santos nga maangkon ang pagtuo nga ilang gikinahanglan sa pagsunod sa kasugoan sa Dios nga magpundok sa Ohio. Hunahunaa usab ang mahitungod sa mga sugo nga Siya mihatag kanimo ug ang pagtuo nga imong gikinahanglan aron matuman kini. Ang mosunod nga mga pangutana makagiya sa imong pagtuon:
-
Unsay imong nakit-an diha sa mga bersikulo 1–4 nga naghatag kanimo og pasalig sa kaugalingon diha sa Ginoo ug sa Iyang mga sugo?
-
Sa unsang paagi ang bersikulo 39 makatabang nimo sa pagtuman sa mga sugo sa Dios bisan kon kini nagkinahanglan og sakripisyo?
Unsa pay lain nga imong nakit-an?
Doktrina ug mga Pakigsaad 38:11–13, 22–32, 41–42
Kon ako andam, ako dili kinahanglang mahadlok.
Ang mga Santos nag-atubang na og daghang oposisyon, ug ang Ginoo nasayud nga mas daghan pa ang moabut (tan-awa sa Doktrina ug mga Pakigsaad 38:11–13, 28–29). Aron matabangan sila nga dili mahadlok, mipadayag siya og usa ka bililhon nga baruganan: “Kon kamo andam dili kamo mahadlok” (Doktrina ug mga Pakigsaad 38:30). Paggahin og usa ka minuto sa pagpamalandong sa mga hagit nga imong giatubang. Dayon samtang magtuon ka sa seksyon 38, paminaw alang sa pag-aghat nga maggikan sa Espiritu mahitungod sa mga paagi nga ikaw makaandam alang sa mga hagit aron dili ka mahadlok.
Tan-awa usab sa Ronald A. Rasband, “Ayaw Kabalaka,” Liahona, Nob. 2018, 18–21.
Doktrina ug mga Pakigsaad 39–40
Ang mga kabalaka sa kalibutan kinahanglan dili makabalda kanako gikan sa pagtuman sa mga pulong sa Dios.
Basaha ang mga seksyon 39–40, lakip sa makasaysayanon nga background diha sa mga ulohan nga seksyon, ug paghunahuna og mga paagi nga ang kasinatian ni James Covel lagmit magamit nganha kanimo. Pananglitan, hunahunaa ang mga higayon sa dihang ang imong “kasingkasing … diha sa atubangan sa [Dios]” (Doktrina ug mga Pakigsaad 40:1). Sa unsang paagi nga ikaw napanalanginan tungod sa imong pagkamatinud-anon? Paghunahuna usab kon unsa nga “mga kabalaka sa kalibutan” ang imong giatubang (Doktrina ug mga Pakigsaad 39:9; 40:2). Unsay imong nakit-an niini nga mga seksyon nga makapadasig nimo nga mas magmakanunayon sa pagkamasulundon?
Tan-awa usab sa Mateo 13:3–23.
Mga Ideya alang sa Pamilya nga Pagtuon sa Kasulatan ug Family Home Evening
-
Doktrina ug mga Pakigsaad 37:3.Aron matabangan ang imong pamilya nga makasabut sa sakripisyo nga gihimo sa mga Santos aron magkapundok ngadto sa Ohio, mahimo nimong itudlo ngadto sa mapa nga kauban niining latid.
-
Doktrina ug mga Pakigsaad 38:22.Sa unsang paagi nga si Jesukristo mahimo nato nga “magbabalaod” sa atong pamilya? Sa unsang paagi ang pagsunod sa Iyang mga balaod makapahimo nato nga “usa ka gawasnong mga katawhan”?
-
Doktrina ug mga Pakigsaad 38:24–27.Atong matudloan ang mga bata unsay gipasabut sa “paghiusa,” makatabang ka nila nga mosalig sa mga sakop sa pamilya ug maghisgut mahitungod sa rason nganong ang matag tawo importante sa imong pamilya. Ipasabut nga kamong tanan usa ka pamilya. Mahimo kang makatabang sa imong mga anak nga magdrowing og dako nga 1 diha sa usa ka poster ug i-adorno kini uban sa mga ngalan ug mga drowing o litrato sa matag sakop sa pamilya. Mahimo usab ninyong isulat diha sa poster ang mga butang nga inyong mabuhat aron mahimong mas magkahiusa isip usa ka pamilya. Mahimo usab kamo nga motan-aw sa video nga “Love in Our Hearts” (ChurchofJesusChrist.org) o mobasa sa Moises 7:18.
-
Doktrina ug mga Pakigsaad 38:29–30.Mahimo ninyong hisgutan ang bag-ohay lang nga kasinatian sa pamilya o sa personal nga gikinahanglan ang pagpangandam. Sa unsang paagi ang inyong pagpangandam nakaapekto sa kasinatian? Unsay gusto sa Ginoo nga atong pangandaman? Sa unsang paagi nga ang pagkaandam makatabang nato nga dili mahadlok? Unsay atong buhaton aron maandam?
-
Doktrina ug mga Pakigsaad 40.Unsa ang gipasabut sa “mga kabalaka sa kalibutan” sa (bersikulo 2) ngari kanato? Aduna bay bisan unsa nga mga kabalaka sa kalibutan nga nakapugong kanato gikan sa pagdawat og pulong sa Dios “uban ang kalipay”? Unsaon man nato kini sa pagbuntog?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Gisugyot nga awit: “Si Jesus Miingon Higugmaa ang Tanan,” Songbook sa mga Bata, 39.
Mga tingog sa Pagpahiuli
Pagpundok ngadto sa Ohio
Balangay sa Kirtland, ni Al Rounds
Lakip sa daghang mga Santos kinsa mipundok ngadto sa Ohio niadtong mga 1830 mao si Phebe Carter. Mipasakop siya sa Simbahan didto sa amihanang bahin sa Estados Unidos sa nagpangidaron siya og bayntehon, bisan og ang iyang mga ginikanan wala. Sa kaulahian gisulat niya ang iyang desisyon sa pagbalhin ngadto sa Ohio aron mahiusa sa mga Santos:
“Nahibulong ang akong mga higala sa akong gihimo, ako usab, apan sa sulod kanako may nag-ingon nga padayon lang. Ang kasubo sa akong inahan sa akong pagbiya daw dili nako maantus, ug kon dili tungod sa espiritu nga akong gibati nasayop unta ko sa kaulahian. Gisultihan ko sa akong inahan nga mas bali nga makita ko niya nga gilubong kay sa mag-inusarang moadto sa walay pagbati nga kalibutan.
“‘[Phebe],’ miingon siya, nangamuyo, ‘balik kanako kon imong masuta ang Mormonismo dili tinuod?’
“Mitubag ko, ‘oo, ma; mobalik ko.’ … Ang akong tubag nakahupay sa iyang kabalaka; apan nakapaguol kaayo kanamong tanan ang panagbulag. Sa dihang miabut na ang panahon sa akong pagbiya dili ko makaako sa pagsulti sa panamilit; busa akong gisulat ang akong mga panamilit sa matag usa, ug gibilin kini ibabaw sa lamesa, midagan sa silong ug misakay sa karwahe. Sa ingon ako mibiya sa akong pinalangga nga panimalay sukad sa akong pagkabata aron mahiusa ang akong kinabuhi uban sa mga santos sa Dios.”1
Diha sa usa niadtong mga mensahe sa pagpanamilit, misulat si Phebe:
“Minahal nga mga ginikanan—hapit nako mobiya sa gigikanan kong panimalay sa dugay nga panahon … wala ko kahibalo unsa kadugay—apan inubanan sa mapasalamaton nakong mga pagbati alang sa kalumo nga akong nadawat gikan sa akong pagkabata hangtud sa karong taknaa—apan ang Kahitas-an ingon og nagsugo niini sa bisan unsang paagi karon kay sa kaniadto. Itugyan nalang nato kining tanan ngadto sa mga kamot sa Kahitas-an ug magmapasalamaton nga kita gitugutan nga magkauban sa pagpakabuhi ubos sa maayo kaayo nga kahimtang sama sa atong naangkon, nagtuo nga ang tanang butang mamaayo ra alang sa atong kaayohan kon kita mohigugma sa Dios labaw sa tanan. Hinunoa nga makaampo kita sa usa ka Dios kinsa modungog sa sinsero nga mga pag-ampo sa tanan niyang mga nilalang ug mohatag kanato nianang labing maayo alang kanato. …
“Ma, nagtuo ko nga kabubut-on kini sa Dios nga ako moadto sa kasadpan ug nakumbinser ako nga mao gayud kini sulod sa dugay nang panahon. Karon makahimo na ako nga makaadto … ; nagtuo ko nga ang espiritu sa Ginoo ang nakahimo niini nga maigo sa tanang butang. O ayaw kahingawa alang sa imong anak; ang Ginoo mohupay kanako. Nagtuo ko nga ang Ginoo moamuma kanako ug mohatag nianang labing maayo. … Moadto ko kay ang Agalon nagtawag—siya mihimo sa akong katungdanan nga yano.”2
