“Abril 5–Abril 11. Doktrina ug mga Pakigsaad 30–36: ‘Kamo Gitawag sa Pagsangyaw sa Akong Ebanghelyo,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)

“Abril 5–Abril 11. Doktrina ug mga Pakigsaad 30–36,” Dali, Sunod Kanako—Alang sa mga Indibidwal ug sa mga Pamilya: 2021

Imahe

nahaunang mga misyonaryo sa Simbahan

Abril 5–Abril 11

Doktrina ug mga Pakigsaad 30–36

“Kamo Gitawag sa Pagsangyaw sa Akong Ebanghelyo”

Diha sa mga kasulatan, makakaplag kita og mga ideya alang sa atong lahi nga mga kahimtang. Hangyoa ang Ginoo nga tabangan ka sa pagpangita sa mensahe nga gitumong alang kanimo diha sa Doktrina ug mga Pakigsaad 30–36.

Irekord ang Imong mga Impresyon

Si Parley P. Pratt nahimong miyembro sa Simbahan sulod pa sa usa ka bulan sa dihang gitawag “ngadto sa kamingawan” sa pagsangyaw sa ebanghelyo (Doktrina ug mga Pakigsaad 32:2). Si Thomas B. Marsh nahimong miyembro sa Simbahan sulod lang sa dyutayng panahon sa dihang siya gisultian nga, “Ang takna sa imong misyon miabut” (Doktrina ug mga Pakigsaad 31:3). Si Orson Pratt, Edward Partridge, ug daghan pa dili pa lang dugay nga nabunyagan sa dihang ang ilang tawag sa misyon miabut. Tingali kining tanang untop nga panahon gikinahanglan—niadtong tinglarag sa 1830, walay usa nga nahimong miyembro sa Simbahan sulod sa unom ka bulan. Apan adunay leksyon usab dinhi niining panig-ingnan alang kanato karon: kon aduna kay igong nahibaloan sa gipahiuli nga ebanghelyo pinaagi sa bunyag, igo na ang imong nahibaloan aron ipaambit kini sa uban. Dayag lang nga sa kanunay gusto nato nga madugangan ang atong kahibalo sa ebanghelyo, apan ang Dios wala gayud magpanuko sa pagtawag sa “walay nakat-unan” sa pagsangyaw sa Iyang ebanghelyo (Doktrina ug mga Pakigsaad 35:13). Gani, nagdapit Siya kanatong tanan, “ikaw mobuka sa imong ba-ba sa pagpadayag sa akong ebanghelyo” (Doktrina ug mga Pakigsaad 30:5). Ug atong buhaton kanang labing maayo dili pinaagi sa atong kaugalingong kaalam ug kasinatian apan “pinaagi sa gahum [sa] Espiritu” (Doktrina ug mga Pakigsaad 35:13).

Tan-awa usab sa “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” Revelations in Context, 54–69.

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 30–36

Ako gitawag sa pagsangyaw sa ebanghelyo ni Jesukristo.

Maanaa man o wala kay pormal nga tawag isip usa ka misyonaryo, gusto sa Ginoo nga imong ipaambit ang Iyang ebanghelyo, ug daghan sa Iyang mga pulong ngadto sa nahaunang mga misyonaryo niining dispensasyon nga alang usab kanimo. Samtang magtuon ka sa Doktrina ug mga Pakigsaad 30–36, isulat unsay imong nakat-unan mahitungod sa tawag sa pagsangyaw sa ebanghelyo. Mahimo ka nga maglista og mga butang nga ang Ginoo naghangyo sa Iyang mga misyonaryo (pananglitan, tan-awa sa Doktrina ug mga Pakigsaad 30:8) ug laing lista sa mga butang nga gisaad sa Ginoo kanila (pananglitan, tan-awa sa Doktrina ug mga Pakigsaad 30:11).

Sa unsa kaha nga paagi nga kining mga bersikulo nag-awhag sa usa ka tawo nga imong nailhan kinsa nagserbisyo o nag-andam sa pagserbisyo og usa ka pagsangyaw o misyon sa pagserbisyo sa Simbahan? Unsay imong nakita nga makapadasig nimo sa pagpaambit sa ebanghelyo?

Tan-awa usab sa Doktrina ug mga Pakigsaad 35:13–15; Russell M. Nelson ug Wendy W. Nelson, “Paglaum sa Israel” (tibuok kalibutan nga debosyonal alang sa kabatan-onan, Hunyo 3, 2018), HopeofIsrael.ChurchofJesusChrist.org; Silvia H. Allred, “Busa Panglakaw Kamo,” Liahona, Nob. 2008, 10–12.

Kitang tanan mga misyonaryo alang sa Simbahan ni Jesukristo.

Doktrina ug mga Pakigsaad 31:1–2, 5–6, 9, 13

Ang Ginoo makatabang kanako sa akong mga relasyon sa pamilya.

Ang mga pamilya niadtong 1830 nanglimbasug sa kadaghanan sa samang mga problema nga giatubang sa mga pamilya karon. Unsa nga mga giya ug mga saad nga gihatag sa Ginoo ngadto ni Thomas B. Marsh mahitungod sa iyang pamilya? Sa unsang paagi nga ang Iyang mga pulong makatabang kanimo diha sa inyong mga relasyon sa pamilya?

Alang sa dugang impormasyon mahitungod ni Thomas B. Marsh, tan-awa sa Mga Santos, 1:79–80, 119–20.

Doktrina ug mga Pakigsaad 32; 35

Napakyas ba ang misyon ngadto sa mga Lamanite?

Sa dihang sila si Oliver Cowdery, Peter Whitmer Jr., Parley P. Pratt, ug si Ziba Peterson migikan aron sa pagsangyaw ngadto sa mga American Indian sa kasadpan sa Missouri, nagtuo sila nga natuman nila ang gipanagna sa Basahon ni Mormon mahitungod sa mga Lamanite nga nagdawat sa ebanghelyo sa ulahi nga mga adlaw (pananglitan, tan-awa sa, 1 Nephi 13:34–41; Enos 1:11–18). Ug gani sa pagtapos sa ilang misyon, bisan og sila nakabaton og positibo nga mga panagtagbo sa pipila ka mga pundok, wala gayud silay nabunyagan bisan usa ka American Indian. Apan nakabunyag sila og kapin sa usa ka gatos ka mga tawo duol sa Kirtland, Ohio, diin sila mihapit padulong ngadto sa Missouri. Naapil niadtong mga nakabig kadtong nahimong mga impluwensyal nga mga lider sa Simbahan, lakip ni Sidney Rigdon, ug ang Kirtland sa kaulahian nahimong usa ka importanting dapit nga pundukanan alang sa Simbahan. Unsa ang gitudlo niining kasinatian diha nimo mahitungod sa paagi kon giunsa sa Ginoo pagtuman ang Iyang buhat?

Tan-awa usab sa “A Mission to the Lamanites,” Revelations in Context, 45–49.

Doktrina ug mga Pakigsaad 33:12–18

Kon akong itukod ang akong kinabuhi diha sa ebanghelyo sa Manluluwas, ako dili mapukan.

Ang Doktrina ug mga Pakigsaad 33 gipamulong ngadto ni Northrop Sweet ug ni Ezra Thayer, sa duha ka bag-ong kinabig. Si Northrop mibiya sa Simbahan sa wala madugay pagkahuman nahatag kini nga pagpadayag. Si Ezra matinud-anon nga miserbisyo sulod sa pipila ka panahon, apan sa katapusan nawala ra usab. Mahimong maayo kini nga oportunidad sa pagtimbang-timbang kon unsa ka kalig-on nga natukod “ibabaw [sa] sukaranan” (bersikulo 13) sa ebanghelyo. Unsa nga mga kamatuoran niining mga bersikulo nga makatabang nimo nga magpabilin nga matinud-anon ngadto sa Manluluwas?

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 30:2.Kumusta man ang atong pamilya sa pagtutok sa mga butang sa Dios kay “sa mga butang sa yuta”?

Doktrina ug mga Pakigsaad 31.Samtang magbasa ka sa mga saad sa Ginoo ngadto ni Thomas B. Marsh mahitungod sa iyang pamilya, mahimo nimong hisgutan ang mahitungod sa mga panalangin nga moabut ngadto sa imong pamilya tungod sa misyonaryo nga buhat. Mahimo usab nimong kantahon ang usa ka may kalabutan nga himno, sama sa “I’ll Go Where You Want Me to Go [Ako Moadto Asa Ikaw Buot Kanako nga Moadto]” (Mga Himno, nu. 270). Sa unsang paagi nga napanalanginan ang imong pamilya pinaagi sa pagpaambit sa ebanghelyo sa uban?

Doktrina ug mga Pakigsaad 33:7–10.Unsa nga paghulagway ang gigamit sa Ginoo niining tudling sa mga bersikulo sa pagpaambit sa ebanghelyo? Unsa pay laing mga imahe o sanglitanan ang mahunahunaan sa imong pamilya? Tingali kini nga mga imahe makatabang sa imong pamilya nga maghunahuna og mamugnaon nga paagi sa pagpakigbahin sa ebanghelyo. Kini nga panaghisgut mosangput dayon ngadto sa plano sa pagpaambit sa ebanghelyo. Hunahunaa ang pagdrama-drama sa pipila ka mga sitwasyon.

Doktrina ug mga Pakigsaad 34:10.Pagpili og hugpong sa mga pulong gikan sa bersikulo 10, ug dapita ang usa ka sakop sa pamilya sa paghunghung niini. Ang ubang mga sakop sa pamilya mosulay sa pagtag-an sa hugpong sa mga pulong. Dayon hangyoa ang usa ka sakop sa pamilya nga isulti ug kusog ang hugpong sa mga pulong. Sa unsang paagi nga kining kalihokan nakatabang kanato nga masabtan kon nganong ang Ginoo nagsugo kanato nga “ipabati ang imong tingog”?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Unta Tawagon Ko Nila sa Misyon,” Songbook sa mga Bata, 91.

Imahe

icon sa mga tingog sa pagpahiuli

Mga tingog sa Pagpahiuli

Nahaunang mga Kinabig

Bisan sa wala pa naorganisar ang Simbahan, ang Ginoo namahayag, “Ang umahan puti na ug andam na sa pag-ani” (Doktrina ug mga Pakigsaad 4:4). Kini nga pamahayag napamatud-an nga tinuod sa mga bulan nga misunod, tungod kay daghan ang nangita sa kamatuoran ang nagiyahan sa Espiritu sa Dios sa pagkaplag sa gipahiuli nga Simbahan ni Jesukristo.

Daghan niining nag-unang mga kinabig nahimong himan sa pagbutang og pundasyon sa Pagpahiuli, ug ang ilang mga sugilanon sa pagkakabig bililhon kanato karon. Ang pagtuo nga ilang gipakita mao gihapon nga pagtuo nga atong gikinahanglan aron makabig ngadto sa ebanghelyo ni Jesukristo.

Abigail Calkins Leonard

Sa dihang si Abigail Calkins Leonard nagpangidaron pa siya og mga trayntahon, mibati siya og mga tinguha nga mapasaylo sa iyang mga sala. Mobasa siya panagsa sa Biblia, ug ang mga tawo nga gikan sa Kristiyano nga mga simbahan mibisita kaniya sa iyang panimalay, apan naglibog siya mahitungod sa unsay nakalahi sa usa ka simbahan gikan sa lain. “Usa ka buntag,” miingon siya, “akong gikuha ang Biblia ug gibasa ang matag pulong, sa dihang miluhod ako.” Bug-os siya nga nag-ampo sa Ginoo. “Sa kalit lang nakakita ako og panan-awon,” miingon siya, “ug lain-laing mga tinuohan usa ngadto sa lain ang akong giagian, ug usa ka tingog ang nagtawag kanako, nag-ingon: ‘Kini gitukod aron makakwarta.’ Unya, sa unahan, nakakita ko og usa ka dakong kahayag, ug ang usa ka tingog gikan sa ibabaw nagtawag: ‘Ako mopasanay og katawhan, kinsa ako mahimuot nga moangkon ug mopanalangin.’” Pagka taud-taud niana, si Abigail nakadungog mahitungod sa Basahon ni Mormon. Bisan og wala pa siya nakaangkon og kopya, nagtinguha siya nga “masayud sa kamatuoran niini nga basahon, pinaagi sa gasa ug gahum sa Espiritu Santo,” ug siya “diha diha dayon mibati sa presensya niini.” Sa dihang nabasa na niya sa katapusan ang Basahon ni Mormon, siya “andam na sa pagdawat niini.” Siya ug ang iyang bana, si Lyman, nabunyagan niadtong 1831.¹

Si Thomas B. Marsh

Sa dihang si Thomas B. Marsh usa pa ka young adult, nagtuon siya sa Biblia ug mipasakop og usa ka Kristiyanong simbahan. Apan wala siya natagbaw, sa katapusan mipalayo gikan sa tanang simbahan. “Aduna koy dyutay nga diwa sa pagpanagna,” miingon siya, “ug misulti nga [usa ka relihiyoso nga lider] akong gilauman nga usa ka bag-ong simbahan motumaw, nga adunay kaputli sa kamatuoran niini.” Wala magdugay human niini, si Thomas nakaangkon og espirituhanon nga pag-aghat sa pagbiya sa iyang panimalay didto sa Boston, Massachusetts, ug mibiyahe sa kasadpan. Human migahin og tulo ka bulan didto sa kasadpang bahin sa New York nga wala makit-i unsay iyang gipangita, misugod siya sa pagpauli. Sa iyang pagpadulong, usa ka babaye nangutana ni Thomas kon nakadungog na ba siya kabahin “sa Bulawan nga Basahon nga nakit-an sa usa ka batan-on nga ginganlan og Joseph Smith.” Nahingangha niini nga hunahuna, si Thomas mibiyahe dayon paingon sa Palmyra ug gikahimamat si Martin Harris diha sa printahanan, igo lang nga ang unang 16 ka mga pahina sa Basahon ni Mormon mogawas na sa printahanan. Gitugutan si Thomas nga mokuha og kopya niadtong 16 ka mga pahina, ug gidala niya kini ngadto sa iyang asawa, si Elizabeth. “Nahimuot siya” sa basahon, nahinumdom siya, “nagtuo nga kini ang buhat sa Dios.” Si Thomas ug si Elizabeth sa kadugayan mibalhin ngadto sa New York uban sa ilang mga anak ug nabunyagan.² (Alang sa dugang impormasyon mahitungod ni Thomas B. Marsh, tan-awa sa Doktrina ug mga Pakigsaad 31.)

Si Parley ug Thankful Pratt

Sama nilang Thomas Marsh, sila ni Parley ug Thankful Pratt mitubag sa espirituhanong pagbati sa pagbiya sa ilang mauswagon nga umahan sa Ohio sa tumong sa pagsangyaw sa ebanghelyo sumala sa ilang nasabtan niini gikan sa Biblia. Sumala sa gisulti sa iyang igsoon, “Ang espiritu niining mga butanga nakaapekto kaayo sa akong panghunahuna sa hilabihan nga dili ko makapahulay.”³ Sa dihang miabut sila sa silangang New York, si Parley nakadawat og pag-aghat nga mopuyo lang una sa makadiyot diha sa dapit. Si Thankful, nakahukom sila, sa pagpadayon nga wala siya. “Ako aduna pay buluhaton dinhi niining rehiyon sa nasud,” misutli si Parley kaniya, “ug kon unsa man kini, o kon unsa kini kadugay himoon, wala ko masayud; apan ako moabut kon kini pagahimoon.”⁴ Dinhi kadto nga unang nadungog ni Parley ang kabahin sa Basahon ni Mormon. “Lahi akong nabati nga kaikag diha sa basahon,” miingon siya.⁵ Nangayo siya og usa ka kopya ug gibasa sa tibuok gabii. Pagkabuntag, nakahibalo siya nga ang basahon tinuod, mihatag og bili niini “labaw pa sa tanang bahandi sa kalibutan.”⁶ Sulod sa pila ka adlaw si Parley nabunyagan. Unya mibalik siya ngadto ni Thankful, kinsa gibunyagan usab. (Alang sa dugang impormasyon mahitungod ni Parley P. Pratt, tan-awa sa Doktrina ug mga Pakigsaad 32.)

Dibuho ni Parley P. Pratt ni Jeffrey Hein

Sidney ug Phebe Rigdon

Sa iyang pagpadulong gikan sa New York ngadto sa usa ka misyon sa Missouri, si Parley Pratt ug ang iyang isig ka mamumuo mihapit sa Mentor, Ohio, diha sa panimalay nilang Sidney ug Phebe Rigdon—karaan nga mga higala nga nailhan ni Parley gikan sa mga panahon didto sa Ohio. Si Sidney usa ka Kristiyano nga ministro, ug si Parley usa ka sakop sa iyang kongregasyon ug miisip kaniya nga usa ka espirituhanon nga tigmatuto. Matinguhaon kaayo si Parley nga mosulti sa iyang mga higala mahitungod sa Basahon ni Mormon ug sa Pagpahiuli sa ebanghelyo ni Jesukristo. Si Sidney mismo nangita alang sa pagpahiuli sa tinuod nga Simbahan nga iyang nakit-an nga gihulagway diha sa Bag-ong Tugon, bisan og nagduha-duha siya mahitungod sa Basahon ni Mormon sa sinugdanan. “Apan ako mobasa sa imong basahon,” gisultian niya ang iyang higala si Parley, “ug akong sutaon, kon kini ba usa ka pagpadayag gikan sa Dios o dili.”⁷ Human sa duha ka semana sa pagtuon ug pag-ampo, siya ug si Phebe nakumbinser nga ang basahon tinuod. Apan si Sidney nasayud usab nga ang pagpasakop sa Simbahan mahimong dako nga sakripisyo alang sa iyang pamilya. Tataw nga mawad-an siya sa iyang trabaho isip usa ka ministro, lakip sa iyang kahimtang sa katilingban diha sa komunidad. Samtang siya ug si Phebe naghisgut niining posibilidad, namahayag si Phebe, “akong gikwentada ang mahimong sangputanan, ug … akong tinguha nga buhaton ang kabubut-on sa Dios, mabuhi man o mamatay.”⁸