Abril 19–25. Doktrina ug mga Pakigsaad 41–44: ‘Akong Balaod sa Pagdumala sa Akong Simbahan,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)
Abril 19–25. Doktrina ug mga Pakigsaad 41–44,” Dali, Sunod Kanako—Alang sa mga Indibidwal ug mga Pamilya: 2021
Abril 19–25
Doktrina ug mga Pakigsaad 41–44
“Akong Balaod sa Pagdumala sa Akong Simbahan”
“Kon kamo mangayo,” ang Ginoo misaad, “kamo makadawat og pagpadayag ug dugang nga pagpadayag, kahibalo ug dugang nga kahibalo” (Doktrina ug mga Pakigsaad 42:61). Unsay imong mga ipangutana aron madawat ang pagpadayag nga imong gikinahanglan?
Irekord ang Imong mga Impresyon
Ang paspas nga pagtubo sa Simbahan niadtong 1830 ug 1831—ilabina sa dagkong mga pundok sa bag-ong mga kinabig nga miabut ngadto sa Kirtland, Ohio—nakapalipay ug nakapadasig ngadto sa mga Santos. Apan nagpakita usab kini og daghang mga hagit. Unsaon man nimo paghiusa ang dali kaayong milapad nga pundok sa tumutuo, ilabi na kon dala nila ang doktrina ug mga binuhatan gikan sa ilang kanhi tinuohan? Pananglitan, sa dihang miabut si Joseph Smith sa Kirtland sa sayo nga bahin niadtong Pebrero 1831, iyang nasuta nga ang bag-ong mga miyembro nagbahin sa komon nga kabtangan diha sa pagsulay sa pagsundog sa mga Kristiyano sa Bag-ong Tugon (tan-awa sa Mga Buhat 4:32–37). Ang Ginoo mihimo og importanting mga pagkoriher ug mga katin-awan kabahin niini ug sa ubang hilisgutan, sa kinatibuk-an pinaagi sa pagpadayag nga nahisulat diha sa Doktrina ug mga Pakigsaad 42, nga Iyang gitawag og “akong balaod sa pagdumala sa akong simbahan” (bersikulo 59). Niining pagpadayag, atong makat-unan ang mga kamatuoran nga mahinungdanon sa pag-istablisar sa Simbahan sa Ginoo sa ulahi nga mga adlaw, lakip sa usa ka dakong saad nga nagklaro nga aduna pay daghang angay makat-unan: “kon kamo mangayo, kamo makadawat og pagpadayag ug dugang nga pagpadayag, kahibalo ug dugang nga kahibalo” (Doktrina ug mga Pakigsaad 42:61).
Tan-awa usab sa Mga Santos, 1:114–19.
Mga Ideya alang sa Personal nga Pagtuon sa Kasulatan
“Siya nga nakadawat sa akong balaod ug nagbuhat niini, ang mao akong tinun-an.”
Sa sayo nga bahin sa 1831, ang mga Santos misugod sa pagpundok didto sa Ohio, matinguhaon sa pagdawat sa balaod nga gisaad sa Dios nga ipadayag didto (tan-awa sa Doktrina ug mga Pakigsaad 38:32). Apan una, ang Ginoo nagtudlo sa Iyang mga disipulo unsaon sa pag-andam sa pagdawat sa Iyang balaod. Unsa nga mga baruganan ang imong nakita diha sa mga bersikulo 1–5 nga nakatabang unta sa mga Santos nga madawat ang balaod sa Dios? Sa unsang paagi nga kining mga baruganan makatabang nimo sa pagdawat og mga panudlo gikan Kaniya?
Ang mga balaod sa Dios modumala sa Iyang Simbahan ug makadumala sa atong mga kinabuhi.
Ang mga Santos miisip sa pagpadayag nga makita diha sa Doktrina ug mga Pakigsaad 42:1–72 nga mahimong usa sa labing importante nga nadawat sa Propeta. Usa kadto sa unang namantala, migawas diha sa duha ka pamantalaan sa Ohio, ug yano kining giila isip “ang balaod.” Daghang mga baruganan niining seksyon ang napadayag na sa Ginoo sa kaniadto. Samtang kining seksyon wala naglakip sa matag sugo nga gusto sa Ginoo nga tumanon sa Iyang mga Santos, mapuslanon ra kining pamalandungan kon nganong kining mga baruganan importante sa pagsubli ngadto sa bag-ong gipahiuli nga Simbahan.
Tingali makatabang nimo ang pagbasa sa seksyon 42 sa ginagmay nga mga porsyon sama sa mosunod ug motino sa mga baruganan nga natudlo sa matag usa. Samtang imong gibuhat, ikonsiderar kon giunsa sa paggiya kini nga balaod sa Simbahan nga makatabang usab sa paggiya sa imong personal nga kinabuhi.
Mga bersikulo 4–9, 11–17, 56–58
Tan-awa usab sa 3 Nephi 15:9.
Doktrina ug mga Pakigsaad 42:30–42
Giunsa sa mga Santos sa “pagtutok sa [ilang] mga kabtangan” aron masuportahan ang mga kabus?
Usa ka importanting bahin sa balaod nga gipadayag diha sa seksyon 42 mao ang unsay nailhan isip balaod sa pagpahinungod ug pagkatinugyanan. Kini nga balaod nagtudlo sa mga Santos sa unsang paagi sila makahimo, sama sa sumusunod ni Kristo sa karaang panahon, “pag-ambit sa tanang mga butang” (Mga Buhat 2:44; 4 Nephi 1:3), “walay kabus taliwala kanila” (Moises 7:18). Ang mga Santos mipahinungod sa ilang kabtangan pinaagi sa paghatag niini ngadto sa Ginoo, pinaagi sa bishop (tan-awa sa Doktrina ug mga Pakigsaad 42:30–31). Ang bishop mihatag og balik ngadto kanila sa unsay ilang gikinahanglan (tan-awa sa bersikulo 32)—kasagaran kon unsa ang ilang gipahinungod ug dugang pa. Ang mga miyembro mihatag sa ilang mga sobra aron itabang sa kabus (tan-awa sa mga bersikulo 33–34). Kini nga balaod usa ka talagsaong panalangin ngadto sa mga Santos, ilabi na kadtong kinsa mibiya sa tanan aron moadto sa Ohio. Daghang mga Santos ang manggihatagon sa ilang mga donasyon.
Bisan og lahi ang atong gibuhat karon, ang mga Santos nagsunod gihapon sa pagpahinungod. Samtang magbasa ka sa Doktrina ug mga Pakigsaad 42:30–42, pamalandungi kon unsaon nimo pagpahinungod sa unsay nahatag sa Dios diha kanimo sa pagtukod sa Iyang gingharian ug mopanalangin niadtong nanginahanglan.
Tan-awa usab sa Linda K. Burton, “Nadumuluong Ako,” Liahona, Mayo 2016, 13–15; “The Law,” Revelations in Context, 93–95, history.ChurchofJesusChrist.org.
Christ and the Rich Young Ruler [Si Kristo ug ang Batan-ong Magmamando], ni Heinrich Hofmann
Doktrina ug mga Pakigsaad 42:61, 65–68; 43:1–16
Ang Dios naghatag og pagpadayag sa paggiya sa Iyang Simbahan.
Hunahunaa nga nakig-istorya ka uban sa usa ka bag-ong miyembro sa Simbahan kinsa matinguhaon nga masayud nga ang Simbahan gigiyahan pinaagi sa pagpadayag. Unsaon nimo sa paggamit ang Doktrina ug mga Pakigsaad 43:1–16 aron ipasabut ngadto kaniya ang sumbanan sa Ginoo sa paggiya sa Iyang Simbahan gipaagi sa Iyang propeta? Unsaon nimo sa paggamit ang Doktrina ug mga Pakigsaad 42:61, 65–68 sa pagtudlo mahitungod sa pagdawat og personal nga pagpadayag?
Tan-awa usab sa “All Things Must Be Done in Order,” Revelations in Context, 50–53, history.ChurchofJesusChrist.org.
Mga Ideya alang sa Pamilya nga Pagtuon sa Kasulatan ug Family Home Evening
-
Doktrina ug mga Pakigsaad 41:1–5.Unsay pipila ka mga ehemplo sa sibil nga mga balaod, ug sa unsang paagi nga kadtong mga balaod makabenepisyo kanato? Sa unsang paagi ang mga balaod ug mga sugo sa Langitnong Amahan makapanalangin kanato? Ang mga sakop sa pamilya makadrowing sa ilang kaugalingon nga nagtuman sa mga balaod sa Dios.
-
Doktrina ug mga Pakigsaad 42:45, 88.Unsay makatabang sa imong pamilya nga “magpakabuhi diha sa gugma”? (tan-awa usab sa Mosiah 4:14–15). Hunahunaa ang pagsulat o pagsulti og positibo nga mga butang mahitungod sa usag usa o mokanta og usa ka himno mahitungod sa gugma diha sa pamilya, sama sa“Love at Home [Gugma sa Panimalay]” (Hymns, nu. 294).
-
Doktrina ug mga Pakigsaad 42:61.Tingali mobasa ka niining bersikulo samtang magtrabaho og usa ka puzzle. Gamita ang puzzle sa pagtudlo kon unsaon sa Dios pagpadayag ang Iyang mga misteryo—“pagpadayag ug dugang nga pagpadayag, kahibalo ug dugang nga kahibalo.” Ang mga sakop sa pamilya mahimong mopaambit kon giunsa sa Dios sa pagpadayag ang kamatuoran ngadto kanila og ginagmay matag karon ug unya.
-
Doktrina ug mga Pakigsaad 43:25.Tingali adunay butang nga mahimong magamit sa imong pamilya aron makamugna og tingog sa usa ka dugdug isip usa ka paagi sa pagpaila sa usa ka diskusyon mahitungod sa bersikulo 25. Sa unsang paagi ang tingog sa Ginoo usa ka “tingog sa dugdug”? Magdungan sa pagpangita niining bersikulo alang sa mga paagi nga ang Ginoo lagmit motawag kanato sa paghinulsol. Unsaon nato nga mas dali nga motubag sa tingog sa Ginoo?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Gisugyot nga awit: “Gusto Ko nga Mosunod sa Ebanghelyo,” Children’s Songbook, 72; tan-awa sa “Ideas to Improve Your Family Scripture Study.”
Pagpalambo sa Atong Pagtudlo
Pag-amuma og usa ka mahigugmaong palibut. Ang paagi sa mga sakop sa pamilya nga mobati ug motagad sa usag usa dako og impluwensya sa espiritu sa imong panimalay. Tabangi ang mga sakop sa pamilya sa paghimo sa ilang bahin sa pag-establisar og mahigugmaon, matinahuron nga panimalay aron nga ang tanan mobati nga luwas nga mopakigbahin og mga kasinatian, mga pangutana, ug mga pagpamatuod. (Tan-awa sa Pagtudlo sumala sa Pamaagi sa Manluluwas, 15.)
Si Joseph Smith Nagsangyaw, ni Sam Lawlor