Abril 19–25

Doktrina ug mga Pakigsaad 41–44

“Akong Balaod sa Pagdumala sa Akong Simbahan”

Sa panahon sa imong pagpangandam niini nga semana, pamati sa mga panghunahuna nga imong madawat gikan sa Espiritu. Unsa sa imong hunahuna ang gikinahanglan sa mga bata aron makakat-on gikan sa Doktrina ug mga Pakigsaad 41–44?

Irekord ang Imong mga Impresyon

Dapita ang Pagpaambit

Pag-itsa og bola ngadto sa usa ka bata, ug hangyoa ang bata sa pagpakigbahin og usa ka sugo nga iyang nahibaloan. Padayona ang pag-itsa sa bola hangtud ang tanan may higayon sa pagpakigbahin og usa ka butang.

Itudlo ang Doktrina: Mas Gagmay nga mga Bata

Doktrina ug mga Pakigsaad 42:2

Ako makasunod sa mga balaod sa Dios.

Samtang ang simbahan nagtubo ug ang mga miyembro nagpundok sa Kirtland, Ohio, gipadayag sa Ginoo ngadto ni Propeta Joseph Smith kon unsa ang Iyang gitawag nga Iyang “balaod” ug gimandoan ang mga Santos sa “[pag]patalinghug ug paminaw ug pagsunod” niini. Unsaon nimo pagtabang ang mga bata sa pagsabut nga kita mapanalanginan kon kita masulundon?

Posible nga mga Kalihokan

• Basaha ang Doktrina ug mga Pakigsaad 42:2, naghatag og importansya sa pulong nga “pagsunod.” Hatagi ang mga bata og pipila ka yanong mga eksena diin ang usa ka bata nagpili sa pagsunod o dili pagsunod sa usa ka balaod o lagda. Hangyoa ang mga bata sa pagpaminaw og maayo ug sa pagpahiyom kon ang tawo diha sa istorya nagsunod ug sa pagkusmod kon ang tawo wala magsunod. Pakigbahin og mga panalangin nga imong nadawat kon ikaw nagsunod sa mga balaod sa Dios.

• Pagdula pinaagi sa paghatag sa mga bata og lagda nga sundon. Sama pananglit, makasulti ka nila nga kinahanglan gayud nga ipataas ang ilang kamot ug tawgon aron sa pagtubag sa mga pangutana. Dayon pabansaya sila sa pagsunod pinaagi sa pagpangutana kanila ug pagtawag niadtong kinsa mipataas sa ilang mga kamot. Unsa nga mga balaod ang gihatag sa Dios kanato?

• Kompletoha ang pahina sa kalihokan uban sa mga bata, o pagkanta og usa ka awit mahitungod sa pagsunod sa mga balaod sa Dios, sama sa “Gusto Ko nga Mosunod sa Ebanghelyo” (Songbook sa mga Bata, 72). Sultihi ang mga bata kon sa unsa nga paagi ang pagsunod sa mga balaod sa Dios nagdala kanimo og kalipay.

  

  Kita nakakat-on sa mga sugo sa Dios diha sa Primary.

Doktrina ug mga Pakigsaad 42:38

Nagserbisyo ako ni Jesukristo kon ako nagserbisyo sa uban.

Ang Ginoo gusto sa Iyang mga Santos nga moamuma sa mga kabus ug timawa. Tabangi ang mga bata sa pagsabut nga kon sila nagserbisyo sa mga tawo nga nanginahanglan, nagserbisyo usab sila sa Manluluwas.

Posible nga mga Kalihokan

• Kon si Jesukristo ania pa sa atong klase karon, unsa ang atong isulti ngadto Kaniya? Unsaon nato Siya sa pagtagad? Pagpakita og hulagway sa Manluluwas, ug ipasabut ang pagtulun-an ni Jesus nga kon kita magpakita og gugma ngadto sa uban, nagpakita usab kita og gugma ngadto Kaniya. Tabangi ang mga bata sa pagbalik og sulti sa bersikulo 38 uban kanimo, pipila ka mga pulong sa usa ka higayon.

• Tabangi ang mga bata sa paghunahuna og mga paagi nga sila makaserbisyo ni Jesus pinaagi sa pagserbisyo sa uban. Makakaplag sila og pipila ka mga ideya gikan sa video “Pass It On” (ChurchofJesusChrist.org) o gikan sa mga hulagway sa Manluluwas nga nagtabang sa uban, sama sa mga hulagway Kaniya nga nag-ayo sa masakiton o nagmaloloy-on ngadto sa mga bata. (tan-awa sa Libro sa mga Hulagway sa Ebanghelyo, mga nu. 42, 47). Ipamatuod nga kon sila moserbisyo sa uban, sila nagserbisyo usab kang Jesus.

Doktrina ug mga Pakigsaad 43:1–7

Ang Ginoo nangulo sa Iyang Simbahan pinaagi sa Iyang propeta.

Ikaw makatabang sa mga bata nga dili malingla sa tibuok nila nga mga kinabuhi pinaagi sa pagtudlo kanila, samtang sila gagmay pa, sa sumbanan sa Ginoo alang sa paggiya sa Iyang Simbahan pinaagi sa buhing propeta.

Posible nga mga Kalihokan

• Pagpakita og hulagway sa nagkalainlaing katawhan, lakip ang usa ka hulagway sa bag-ong propeta. Ipakulob ang mga hulagway, ug papuli-puliha ang mga bata sa pagpabali og tagsa-tagsa sa mga hulagway hangtud ilang makit-an ang propeta. Ipasabut ang pagtulun-an sa Ginoo nga ang propeta lamang “ang gitudlo nganha kaninyo sa pagdawat sa mga sugo ug mga pagpadayag gikan [sa Ginoo]” sa paggiya sa Simbahan (Doktrina ug mga Pakigsaad 43:2).

• Panganta og dungan sa usa ka awit mahitungod sa mga propeta, sama sa katapusang bersikulo sa “Sunda ang Propeta” (Songbook sa mga Bata, 58). Pakigbahin sa imong pagpamatuod nga ang propeta naggiya sa Simbahan.

Itudlo ang Doktrina: Mas Dagko nga mga Bata

Doktrina ug mga Pakigsaad 41:5

Ang usa ka tinun-an mao ang usa ka tawo kinsa nagdawat sa balaod sa Dios ug nagsunod niini.

Ang mga bata ba nga imong gitudloan nahibalo kon unsa ang kahulugan sa mahimong disipulo ni Jesukristo? Doktrina ug mga Pakigsaad 41:5 makatabang kanila sa pagsabut kon unsaon nga mahimong mas maayo nga mga disipulo.

Posible nga mga Kalihokan

• Isulat ang Doktrina ug mga Pakigsaad 41:5 sa usa ka pirasong papel, nagbilin og mga blangko diin ang pulong “disipulo” kinahanglan nga anaa diha niana. Hangyoa ang mga bata sa pagsulat diha sa mga blangko, mangita diha sa Doktrina ug mga Pakigsaad 41:5 kon nanginahanglan sila og tabang. Unsa ang kahulugan nga mahimong usa ka disipulo ni Jesukristo? Pakigbahin kon giunsa nimo sa pagpaninguha nga mahimong mas maayo nga disipulo ni Kristo.

• Human sa panaghisgot sa Doktrina ug mga Pakigsaad 41:5, hangyoa ang mga bata sa paghunahuna og mga balaod nga atong nadawat gikan sa Ginoo. Dapita sila sa pagpuli-puli og lihok sa pagsunod og usa niadtong mga balaod samtang ang nahibilin sa klase nagtinguha sa pagtag-an kon unsa kini.

• Hatagi ang matag miyembro sa klase og gilis sa papel, ug hangyoa sila sa pagsulat diha niini og usa ka paagi nga sila mahimong mas maayo nga disipulo. Dapita ang matag bata sa pagpakigbahin kon unsa ang ilang gisulat, dayon i-tape ang tanang gilis aron sa pagmugna og usa ka kadena nga papel.

Doktrina ug mga Pakigsaad 42:61, 68

Ang Dios nagpadayag og mga kaalam ngadto niadtong kinsa mangayo.

Ang mga bata mangutana og daghang mga pangutana samtang sila nagtubo sa ilang kahibalo sa kalibutan ug sa ebanghelyo. Unsaon nimo sa paggamit ang Doktrina ug mga Pakigsaad 42:61, 68 aron pagtabang kanila nga mahibalo kon unsaon sa pag-angkon og kaalam gikan sa Ginoo?

Posible nga mga Kalihokan

• Hangyoa ang mga bata sa pagpakigbahin kanimo og usa ka butang nga nagtabang kanila nga mobati og kalinaw ug usa ka butang nga nagtabang kanila nga mobati og kalipay. Dapita sila sa pagbasa sa Doktrina ug mga Pakigsaad 42:61 nga mangita sa mga pulong nga “malinawon” ug “hingpit nga kalipay.” Tabangi ang mga bata sa paghunahuna og mga kamatuoran nga gipadayag sa Dios nga nagdala kanila og kalinaw ug hingpit nga kalipay.

• Basaha ang Doktrina ug mga Pakigsaad 42:61, 68 uban sa mga bata, maghatag og importansya sa hugpong sa mga pulong “pagpadayag ug dugang nga pagpadayag, kahibalo ug dugang nga kahibalo.” Ipasabut nga ang Ginoo dili mopadayag sa tanan diha-diha; hinoon, naghatag Siya kanato og ginagmay sa matag higayon. Ipakita kon giunsa ang puzzle pagsulbad sa hinay-hinay, o paggamit og usa ka butang nga susama aron sa pagtabang sa mga bata sa pagsabut niini nga baruganan. Pakigbahin og kasinatian sa dihang ikaw nakadawat og pagpadayag nga mipanalangin kanimo.

Doktrina ug mga Pakigsaad 43:1–7

Ang propeta lamang ang makadawat og pagpadayag alang sa tibuok Simbahan.

Samtang ang mga bata nagtubo, sila may purohan nga makasugat og mga tawo kinsa gusto nga mogiya kanila nga mahisalaag. Unsaon nimo pagtabang sa mga bata nga mosalig sa sumbanan sa Dios sa paggiya sa Iyang mga anak pinaagi sa Iyang pinili nga propeta?

Posible nga mga Kalihokan

• Dapita ang mga bata sa paghanduraw nga usa ka tawo nagbarug diha sa pagpamatuod nga miting ug misulti sa ward nga siya nakadawat og pagpadayag alang sa Simbahan (sama pananglit, nga kita kinahanglan nga dili na moinom og gatas o nga kita kinahanglan nga magsugod sa paghimo og miting sa sakramento kada Martes imbis kada Dominggo). Nag-ingon siya nga kita kinahanglan maminaw ngadto sa unsay iyang isulti kay sa ngadto sa propeta. Unsa kaha ang sayop niana? Tabangi ang mga bata sa pagsiksik sa Doktrina ug mga Pakigsaad 43:1–7 aron sa pagsuta kon giunsa sa Ginoo paghatag sa mga sugo ngadto sa Iyang Simbahan.

• Ipakita ang usa ka hulagway sa buhing propeta, ug dapita ang mga bata sa pagpakigbahin og usa ka butang nga bag-ohay niyang gitudlo. Kon nagkinahanglan sila og tabang, ipasalida ang video clip o pagbasa og tudling gikan sa usa ka mensahe sa bag-ong kinatibuk-ang komperensya. Nganong usa kini ka panalangin nga adunay buhi nga propeta karon?

Awhaga ang Pagkat-on diha sa Panimalay

Dapita ang mga bata sa pagpili og usa ka balaod o sugo nga gibati nila nga sila kinahanglan nga motutok sa pagsunod niini nga semana. Awhaga sila sa pagpakigbahin sa ilang mga tumong ngadto sa ilang mga pamilya.

Pagpalambo sa Atong Pagtudlo

Tudloi ang mga bata sa pagrekord og mga panghunahuna. Bisan ang mga bata makakat-on sa kinaiya sa pagrekord og espiritwal nga mga panghunahuna. Sila makarekord og mga panghunahuna pinaagi sa pagmarka sa mga kasulatan, pagdrowing og mga hulagway, o paghimo og yano nga mga pagsulat diha sa journal.