Saints Move to Kirtland, ni Sam Lawlor

Abril 12–18

Doktrina ug mga Pakigsaad 37–40

“Kon Kamo Dili Magkahiusa Kamo Dili Ako”

Ang Dios nahibalo kon unsa ang gikinahanglan nga tun-an sa mga bata sa imong klase. Pagiyaha Siya kanimo samtang ikaw nagpili og mga baruganan ug mga kalihokan aron sa pagtabang kanimo og tudlo kanila.

Irekord ang Imong mga Impresyon

Dapita ang Pagpaambit

Pagpalibut og kopya sa mga kasulatan. Samtang ang matag bata naggunit sa mga kasulatan, ipakigbahin niana nga bata ang usa ka butang nga iyang nahinumduman gikan sa leksyon sa milabay nga semana o gikan sa pagbasa sa mga kasulatan sa panimalay niini nga semana.

Itudlo ang Doktrina: Mas Gagmay nga mga Bata

Doktrina ug mga Pakigsaad 38:24–27

Makahimo ako sa paghigugma sa uban.

Ang Ginoo gusto nga ang mga Santos mag-uban sa pagpundok didto sa Ohio ug maghigugmaay sa usag usa isip managsama. Unsaon nimo pagtabang sa mga bata nga mobati ug panaghiusa ug gugma alang sa uban?

Posible nga mga Kalihokan

• Gamita ang pahina sa kalihokan niini nga semana aron sa pagpakita sa mga bata nga sa dihang ang Simbahan bag-o pa kaayo, ang Ginoo nagsugo sa mga miyembro sa pagdungan og balhin ngadto sa Ohio (tan-awa usab ang mapa sa outline niini nga semana diha sa Dali, Sunod Kanako—Alang sa mga Indibidwal ug sa mga Pamilya). Gusto sa Dios nga magkat-on sila kon unsaon sa paghigugma ug pakig-uyon sa usag usa. Hangyoa ang mga bata og mga ideya mahitungod kon unsaon nila pagpakita og gugma alang sa usag usa.

• Basaha ang Doktrina ug mga Pakigsaad 38:25 ngadto sa mga bata, ug sultihi sila sa imong kaugalingon nga mga pulong kon unsa ang kahulugan sa pagtahud sa imong igsoong lalaki o babaye sama sa imong kaugalingon (tan-awa usab sa Mateo 7:12). Tabangi sila sa pagsulti og balik sa kasulatan, nagpuli sa “iyang igsoong lalaki” sa mga ngalan sa usag usa.

• Pagkanta og usa ka awit mahitungod sa paghigugma ug lakip sa uban, sama sa “Mouban Ko Nimo” o “We Are Different” (Songbook sa mga Bata, 78–79, 263). Samtang ikaw nagkanta, paguniti sa mga bata ang mga hulagway sa mga bata gikan sa ubang dapit sa kalibutan.

• Tabangi ang mga bata sa pagpaaksyon og usa ka eksena diin usa ka bata nga bag-o miapil sa ilang klase sa Primary. Unsaon nato pagtabang kaniya nga mobati nga giabiabi? Ang mga bata mahimong malingaw niini nga role play nga may mga finger puppet o ginunting nga mga tawo-tawo.

Doktrina ug mga Pakigsaad 38:30

Kon ako andam, ako dili kinahanglan nga mahadlok.

Usa ka paagi nga ang Langitnong Amahan nagtabang kanato nga dili mahadlok mao ang pagtudlo kanato nga mangandam.

Posible nga mga Kalihokan

• Balika sa makadaghan nga higayon ang hugpong sa mga pulong “Kon kamo andam kamo dili mahadlok” (bersikulo 30). Human sa pipila ka mga higayon, paglaktaw og usa ka pulong, ug pasultiha ang mga bata sa nawala nga pulong. Sultihi ang mga bata mahitungod sa usa ka panahon nga ikaw andam alang sa usa ka butang ug ang pagkaandam mitabang kanimo sa dili pagkahadlok.

• Tabangi ang mga bata sa paghunahuna og mga butang nga gusto sa Langitnong Amahan nga sila mangandam, sama sa pagpabunyag o pag-adto sa templo. Gamit og mga hulagway o mga butang aron makahatag kanila og mga ideya. Pagsulti mahitungod sa mga ideya nga sila maandam, ug padrowinga sila og mga hulagway sa ilang mga kaugalingon nga nangandam o nag-apil sa mga butang nga ilang gihunahuna.

Doktrina ug mga Pakigsaad 39:6, 23

Madawat ko ang gasa sa Espiritu Santo kon ako kumpirmahan.

Unsa ang gikinahanglan sa mga bata sa imong klase nga masabtan mahitungod sa pagdawat sa gasa sa Espiritu Santo? Ang mga panudlo sa Ginoo ngadto ni James Covel mahitungod niini nga ordinansa mahimong makatabang.

Posible nga mga Kalihokan

• Pagpakita og hulagway sa usa ka tawo nga gibunyagan ug usa ka tawo nga gikumpirmahan (tan-awa sa Libro sa mga Hulagway sa Ebanghelyo, nu. 104, 105). Basaha ang Doktrina ug mga Pakigsaad 39:23, ug hangyoa ang mga bata sa pagtudlo ngadto sa husto nga hulagway kon madungog ka nila nga nagbasa mahitungod sa bunyag ug kumpirma.

• Pagbasa og dungan sa Doktrina ug mga Pakigsaad 39:6, ug ipakita sa mga bata ang mga hulagway o mga butang nga nagrepresentar sa mga paagi ang Espiritu Santo nagpanalangin kanato (lakip niadtong ginganlan sa bersikulo 6). Papuli-puliha ang mga bata sa paggunit sa mga hulagway o mga butang, ug samtang sila nagbuhat, pagpamatuod mahitungod kon giunsa sa Espiritu Santo pagpanalangin kanimo niini nga mga paagi. Tabangi ang mga bata sa pag-ila og mga panahon nga sila mahimong mobati sa impluwensya sa Espiritu.

Itudlo ang Doktrina: Mas Dagko nga mga Bata

Doktrina ug mga Pakigsaad 37; 38:31–33

Ang Dios nagpundok kanato aron sa pagpanalangin kanato.

Ang pagpundok didto sa Ohio usa ka dako nga sakripisyo alang sa kadaghanan sa unang mga Santos. Karon wala kita sugoa sa pagpundok sa usa ka dapit, apan kita nagpundok isip mga pamilya, mga ward, ug mga stake.

Posible nga mga Kalihokan

• Ipakita sa mga bata ang pahina sa kalihokan niini nga semana o ang mapa diha sa outline niini nga semana diha sa Dali, Sunod Kanako—Alang sa mga Indibidwal ug mga Pamilya. Pagdungan og basa sa Doktrina ug mga Pakigsaad 37, ug tabangi ang mga bata sa pagpangita diha sa mapa sa mga dapit nga ginganlan diha sa pagpadayag. Unsa ang gisugo sa Ginoo nga buhaton sa mga Santos?

• Pagpili og importante nga hugpong sa mga pulong o kapahayag gikan sa Doktrina ug mga Pakigsaad 38:31–33 nga sa imong hunahuna naghulagway kon ngano ang Ginoo gusto sa Iyang mga katawhan nga magtipon sa pagpundok. Pagkatag og mga pulong gikan niini nga kapahayag libut sa kwarto, ug dapita ang mga bata sa pagpundok niini, ibutang kini sa hustong pagkasunod-sunod, ug sa pagpangita kon hain ang kapahayag makita diha sa mga bersikulo. Nganong gusto sa Ginoo nga kita magpundok?

Doktrina ug mga Pakigsaad 38:24–27

Gusto sa Dios nga ang Iyang katawhan magkahiusa.

Aron sa pag-andam sa mga Santos sa pagpundok, gitudloan sila sa Ginoo sa pagtan-aw sa usag usa isip mga managsama ug “magkahiusa” (bersikulo 27). Unsaon kaha niini nga panudlo sa pagpanalangin sa mga bata nga imong gitudloan?

Posible nga mga Kalihokan

• Pagbasa og dungan sa Doktrina ug mga Pakigsaad 38:24–27, ug dapita ang mga bata sa pagsulat sa mga pulong gikan niini nga mga bersikulo nga sa ilang hunahuna mga importante, lakip ang mga pulong nga gibalik sa pagsulti. Ngano nga gibalik sa pagsulti sa Ginoo kini nga mga pulong? Himoa nga ipakigbahin nila kon unsa ang ilang gisulat, ug paghisgot kon unsa ang ilang nakat-unan gikan niini nga mga pulong.

• Tabangi ang mga bata sa paghunahuna og mga sitwasyon diin ang usa ka tawo mahimong mobati nga walay labut, sama sa pagkabag-ong miyembro sa Simbahan o pagbalhin ngadto sa usa ka bag-ong kasilinganan o eskwelahan. Unsa ang gisugyot sa Doktrina ug mga Pakigsaad 38:24–27 mahitungod kon unsaon nato pagtagad ang usa ka tawo niini nga mga sitwasyon? Pag-role play og pipila ka posible nga mga sitwasyon.

• Pakigbahin og leksyon nga naggamit og butang nga naghulagway kon unsaon sa mga butang pagtipon o paghiusa nga mahimong usa, sama sa mga piraso sa panapton nga mahimong usa ka quilt o mga sangkap sa pagluto nga makahimo og usa ka tibuok pan. Unsa ang gitudlo kanato niini nga mga ehemplo mahitungod sa pagkahimong usa isip katawhan sa Dios?

Doktrina ug mga Pakigsaad 39–40

Ako makatuman sa akong mga saad.

Si James Covel nakahimo og saad sa pagsunod sa Ginoo, apan wala niya tumana ang iyang saad. Ang pagkat-on mahitungod sa iyang kasinatian makatabang sa mga bata sa paghinumdom sa importansya sa pagkamasulundon.

Posible nga mga Kalihokan

• Dapita ang mga bata sa pagbasa sa ulohan nga seksyon alang sa Doktrina ug mga Pakigsaad 39 ug 40, ug hangyoa sila sa pag-summarize pinaagi sa mga pulong o mga drowing kon unsa ang ilang nakat-unan mahitungod ni James Covel.

• Pagsulat og mga pangutana diha sa pisara nga motabang sa mga bata sa pagsabut sa seksyon 40, sama sa Unsa ang gipakigsaad ni James Covel nga buhaton? Nganong wala siya motuman sa iyang pakigsaad? Dapita ang mga bata sa pagpangita sa mga tubag diha sa seksyon 40.

• Tabangi ang mga bata sa paghinumdom sa mga saad nga ilang gihimo sa dihang sila gibunyagan (tan-awa sa Mosiah 18:8–10). Tabangi ang mga bata sa paglista og pipila ka mga kahadlok o “mga kabalaka sa kalibutan” (Doktrina ug mga Pakigsaad 40:2) nga mahimong nagpugong sa usa ka tawo gikan sa pagtuman niini nga mga saad. Dapita ang mga bata sa pagsulat sa ilang mga kaugalingon og mubo nga mensahe isip usa ka pahinumdom nga ang pagsunod sa mga sugo sa Langitnong Amahan motabang kanila sa pagbuntog sa mga kahadlok o kalibutanong mga kabalaka. Awhaga sila sa pagtipig sa ilang pahinumdom sa bisan diin nga dapit diin ilang makita sa kanunay.

Awhaga ang Pagkat-on diha sa Panimalay

Dapita ang mga bata sa paghisgot uban sa ilang mga ginikanan o ubang sakop sa pamilya kon unsaon nga sila mas mahiusa isip usa ka pamilya.

Pagpalambo sa Atong Pagtudlo

Pagmemorya og kasulatan. Hunahunaa ang pagpili og tudling sa kasulatan nga sa imong hunahuna makapalig-on sa mga pagpamatuod sa mga bata, ug tabangi sila sa pagmemorya niini. Ang mas batan-ong mga bata makamemorya og bahin sa usa ka kasulatan o sa yano usa ka hugpong sa mga pulong.