Kabongana Nakomai, Iriirai—Ibukin te Kooram n te Nakoanibonga ae te Aaron ao aia Kiraati Ataeinnaine

Tera te kaantaninga ibukin te bootaki n te kooram ao te kiraati?

E a tia n anganiko te Uea te onimakinaki ae tabu: E a tia ni weteiko bwa ko na beku n te kooram n te Nakoanibonga ae te Aaron ke te beretitentii n te kiraati n Ataeinnaine. Mwakoron tabem bwa kona kairiiri ao ni waakina am bootaki n te kooram ke n te kiraati n te Tabati. Ni karaoa aei, e ibuobuoki ni kamataata bwa bukin teraa ngkai iai bootaki n aekan aikai.

Bootaki n te kooram n te Nakoanibonga ae te Aaron ao te kiraati irouia Ataeinnaine a kaokoro ma kiraati n aron te Reirei n Tabati ke te tieminari. Inanon kooram ke bootaki n te kiraati, ti karaoa ae e mwaiti riki nakon ae tii kamatebwaian atuun reirei. Ti reiakinii aron mwakuri ake e anganiira te Atua, ao ti baireia kain ara kooram ke ara kiraati ni karaoi mwakuri ni mweengara, n te Ekaretia, ao n ara komiuniti. Ti baire, n aron te katooto, bwa ti na kanga ni kakoroi nanon katabeara ngkai ngaira mwakoron ana taanga ni buaka te Uea aika kairake ni buoka ikotakiia Iteraera. Inanon bootaki aikai, ti aki n ae ti tii marooro iaon te mwakuri—ti karaoi babaire bwa a na karaoaki.

Ma te waaki ae e boboto iaon te mwakuri e aki nanonaki ae ti a katikui maroroakinan reirei aika kakaawaki tii ibukin te Reirei n Tabati. Ni koauana, reiakinan reirei aika kakaawaki inanon bootaki n te kooram ao bootaki n Ataeinnaine a bon kakaawaki—a buokiira ni kamataata nanona ngkai ti karaoa te mwakuri. Ngkai ti uaia ni kamatebwaia te euangkerio, te koaua are ti reiakinna e kona ni bitii nanora. Ti kona ni karekei kairiiri mai ieta iaon arora n “rikirake n rabakau ma n ikawai, ma n akoaki iroun te Atua ma aomata” (Ruka 2:52). Ngkai ti rikirake riki n rairaki nakon Iesu Kristo ao Ana euangkerio, ti na namakina te kan buokiia tabeman iaon kawain te berita, ni ikotaki ma ara utu, raraora, ao raora n te kooram ao n te kiraati.

Antai ae e kairii bootaki aikai?

E a tia ni weteiko te Atua bwa kain te kooram ao te beretitentii n te kiraati ao n anganiko te kariaiakaki ni kairiiri. Anne bukina ae ni katoa bootaki n am kooram ke te kiraati e riai ni kairaki iroun te membwa n am kooram ke beretitntii n te kiraati. Taan kairiiri ake a ikawai a na tii anga te ibuobuoki ao te boutoka ma a na bon aki anaa te kairiiri mai iroum. Taraa te tiekition ae atuunaki n “Uaia ni Marooro” ni moanakin ni kabane te kabwarabwara inanon te wiiki n te boki aei ibukin iango ni buokiko n ataa aron kairan te bootaki ao ni kakoroa nanona te kantaninga iai. Kabonganai taai ni bowi n te beretitentii ni baireia bwa ko na kanga ni kairii bootaki n te Tabati.

Antai ae e na anga te reirei?

Taan kairiiri aika a ikawai, membwa n te kooram ke beretitentii n te kiraati, ke membwa ake tabeman n te kooram ke n te kiraati ae a kona n anga te reirei. Ngkami kain te kooram ke te beretitentii n te kiraati, reitaki ma ami taan kairiiri ake a ikawai bwa antai ae e na rineaki bwa e na anga te reirei. Uringnga bwa ami taan kairiiri ake a ikawai e mwaiti ae a kona n anga. Ukoukoria n reiakinaki man aron are a tia n rinanona ao aia koaua. Aikai naba taai aika a tamaroa n tuangiia kairake bwa a na anga reirei—te anga reirei e kona ni kamatoa rairakiia ao ni karika te reitaki ae matoatoa ma kain te kooram ke te kiraati. Ngaia are anganiia te tai ae e tau n anga te reirei ae e bwanin ke iteran te reirei, ma tarai kainanoia ao aia konabwai naake n am kooram ke n am kiraati. Te katooto, taan kairiiri ake a ikawai a kona n angiin te tai n anga reirei n te kooram ke n te kiraati ma kairake ake a uarereke ke ma kairake ake aki rangi n rabakau n anga te reirei n te euangkerio. Ngkana a kaoaki kairake bwa a na anga reirei, te karo ke te aetuwaitia ae e ikawai e na buokiia ni katauraoi ngkana e kainanoaki.

Naake a bukinaki bwa a na anga reirei a kona ni kabongana te tiekition ae atunaki n “Reirei te Reirei” inanon ni kabane kabwarabwara n te wiiki n te boki aio ni buokiia ni katauraoi. Te tiekition aio iai inanona iango ni ibuobuoki ibukin te anga reirei ao marooro iaon reirei n te wiiki anne, ma taan reirei a aki kabaeaki ni kabonganai tii iango aikai n tii ngaia. Man ana kairi te Tamnei, taan reirei a kona ni katai iango aikai ke ni kabonganai ake irouia n reirei ni kaitarai kainanoia kain te kooram ke te kiraati ao ni buokiia ni kaotaia n reirei aika a kakaawaki.

Tera atuun reirei aika a kakaawaki ae ti na maroroakina n ara bootaki?

Kabwarabwara inanon te wiiki n atuun reirei bon reirei aika kakaawaki ae a kaman tia n rineaki ni katiteboaki ma te wareware are e katauaki ma Reirei ao Berita aika Tabu ibukin te wiiki anne, are e kuneaki n Nakomai, Iriirai—Ibukiia Aomata n Tatabemaniia ao Utu. N te kawai aei, reirei aika a kakaawaki ake a maroroakinaki n te kooram ao kiraati a na boutoka are a reiakinna kairake ni mweengaia.

E ngae ngke kabwarabwara inanon te wiiki a na reiakinaki n Tabati tabeua, ko bon konaa n marooro iaon atuun reirei aika kakaawaki ni kaineti ma kainnanoia kain am kooram ke am kiraati.

Te boki aei iai inanona kabwarabwara ibukin wiiki nako n aia tai ni bootaki te kooram n te Nakoanibonga ae te Aaron ao aia kiraati Ataeinnaine. N tabetai, ao ko na kainnanoia n riaoa teuana te reirei ibukin te maungatabu n te titeiki ke ni bukina riki tabeua.

Tera taben te tia kairiiri ae e ikawai?

Am taan kairiiri aika a ikawai iai tabeia ae e kakaawaki n te kooram n te Nakoanibonga ae te Aaron ao aia kiraati Ataeinnaine. A na tararua ao n anganiko reirei inanon weteam ni kairiiri. A na boutokaiko ao ni kakorakorako ngkai ko karaoi mwakuri n am kooram ke am kiraati. A na reireiniko reirei aika kakawaki, ao a na kakabwaiako rinanon aia katooto, taneiai, ao aia koaua.