I Noora te Oota, iroun Jon McNaughton

Tianuare 10

Bukin Tera e Kakaawaki te Moan Mii ni Burabeti?

Kabwarabwara nakon Reirei ao Berita aika Tabu; Iotebwa Timiti—Rongorongo 1:1–26

Te Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Kooram n te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro ibukin bwaai n aron akana imwiina, ao bairei kawai ake kona mwakuri ni bwaai ake ko maroroakin (ko kona ni baireia tera bwaai ake a na maroroakinaki inanon te boowi ni beretitentii):

• Ara kooram ke ara kiraati. Antai ae e kainnanoa ara ibuobuoki ao ara tataro? Tera ae ti kona ni karaoia ni buokiia? Antai ae ti na kaoa nakon te waaki ni kakukurei ae e na roko?

• Ara beku ke mwiokoara. Tera katabeara aika ti a tia ni kakoroi nanoia? Tera katabeara aika ti riai ni karaoi? E kanga aron kaoakiia tabeman nakon Kristo, ao ti na kanga ni kaoiia ngkai?

• Maiura. Tera te bwai ae ti a tia n rinanona mai mwaina ae e a tia ni kakorakora ara koaua? Baikara bwaai aika a riki inanon maiura, ao ti na kanga ni kateimatoaira ibon imarenara?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

E ngae ngke e a tia n raka iaon 200 te ririki man te tai are e moan ni katorobubua iai Iotebwa Timiti n tataro inanon te Buakonikai ae Tabu, te kaeka ae e karekea e rotaki iai maiura n ae korakora n te bong aei. Iangoi kakabwaia ake a roko nakon maium bukina bwa te Tama ao te Nati a kaoti nakon Iotebwa. Bukin tera e kakaawaki ibukiia ake ko reireiniia bwa ana karekei oin aia kakoaua n te Moan Kaotioti mairoun te Tamnei ae Raoiroi? Ko na kanga ni buokiia bwa ana karaoa aei? E na bae n ibuobuoki ibukim n rinanoi rongorongon te maungatabu ni kabuta n Eberi 2020, are e kauringaa iai ana ka 200 n ririki n te mii ni burabeti aei.

A kona kairake n aomata ni karekea aia kakoaua n te Moan Kaotioti.

Te Uaia n Reirei

Bukina bwa Iotebwa Timiti bon te kairake n tain te Moan Kaotioti, naake ko reireiniia a na kona ni kobotaua nakon ana kakaae ibukin te koaua. Anganiia kaain te kooram ao te kiraati teutana te tai n tibwauai aia iango ao nanoia ibukin Iotebwa Timiti—Rongorongo 1:1–26. Waaki ni kakukurei aika inano a kona ni buokiia ni kakorakorai aia koaua ae te Atua te Tama ao Iesu Kristo a kaoti nakon Iotebwa Timiti.

• Tera koaua n te euangkerio aika ti reiakin man ana atatai Iotebwa Timiti inanon te Buakonikai ae Tabu? A kona kaain te kooram ke te kiraati ni wareka ana rongorongo Iotebwa inanon Iotebwa Timiti—Rongorongo 1:7–20 ao tibwauai koaua aika a kunei. (Te katooto, te Atua e ongo ao e kaekai tataro; Taatan ao mwakana a koaua, ma mwakan te Atua e korakora riki; a tuai toki kaotioti.) A kanga koaua aikai ni kakabwaiai maiura?

• Ko kona naba n titirakiniia kaain te kooram ke te kiraati bwa ana rinanoi rongorongon te Moan Kaotioti man Eberi 2020 maungatabu ni kabuta (taraa Riaona, Meei 2020). Te katooto, a konaa n rinanoa ana rongorongo Beretitenti Russell M. Nelson “Ongo Irouna” (Riaona, Meei 2020, 88–92). Kaoia bwa ana tibwaua te bwai ae a kunea ao aia namakin ibukin te Moan Kaotioti.

• Aia Reirei Beretitenti n te Ekaretia n tatabemaniia nako a kakoaua ana mition mai ieta te Burabeti Iotebwa Timiti. A kona kaain te kooram ke te kiraati ni kabwaia man warekan aia koaua inanon teuana Aia Reirei Beretitenti n te Ekaretia manuo. (Angiin manuo aikai iai inanoia te mwakoro ae taekan te Burabeti Iotebwa Timiti. Ibukin karinanin mwakoro aikai, taraa Atuun Rongorongon te Euangkerio, “Moan Kaotioti,” topics.ChurchofJesusChrist.org.) Tabeua te bong imwain te kiraati, ko kona ni kaoia membwa n am kooram ke am kiraati bwa ana rinea temanna mairouia Beretitenti aikai ao n tibwaua ana rongorongo ae karaoia are a kona ni kabongana n reireina iai temanna taekan te Moan Kaotioti.

• Iangoia ni kaoia kaain te kooram ke te kiraati bwa ana kamatebwaia “The Restoration of the Gospel of Jesus Christ through Joseph Smith” inanon mwakoro 3 n Tataekina Au Euangkerio ([2019], 36–38) ao ni kataneiai n reirei taekan te Moan Kaotioti. Ko kona ni kaoia bwa ana tibwaua ana atatai Iotebwa Timiti ni kabonganai tabeua ana taeka, aika kuneaki inanon Iotebwa Timiti—Rongorongo 1:16–17.

• Naake ko reireiniia a ataia ae iai inanona tabeua rongorongon te Moan Kaotioti? Inanon rongorongo aikai n tatabeua nako a katauraoi kabwarabwara aika onoti are e anga tabwaninin te bwai ae riki inanon te Buakonikai ae Tabu. Ko na bae ni kakimototoa “Overview” mwakoron te karaki n Atuun Rongorongon te Euangkerio “Rongorongon te Moan Kaotioti” (topics.ChurchofJesusChrist.org). Ngkanne ko na tuangiia naake ko reireiniia bwa ana rinanoi kakimototo n rongorongo ake aua aika kuneaki iaan “Rongorongon te Moan Kaotioti.” A kona naba ni wareki tabeua koauan rongorongo man kabonganakin te bwai n reitaki ae katauraoaki. Tera ae a kunea ae e kakorakora aia koaua n te Moan Kaotioti? Ko kona ni mataku n te witeo “Ask of God: Joseph Smith’s First Vision” (ChurchofJesusChrist.org), are e kaota te Moan ni Kaotioti man kabonganakin kabwarabwara man te rongorongo aei. Bukin tera e raoiroi karekean rongorongo tabeua man te Moan Kaotioti? A kanga rongorongo aikai ni buokiira ni kinaa riki Tamara are i Karawa ao Iesu Kristo?

Karaoia inanon te Onimaki

Kaungaiia kain te kooram ke te kiraati ni iangoia ao ni korea mwiin te bwai are a na karaoia ni karaoi nanon namakin ake a karekei n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwauai aia iango.

Reitan Bwaai n Mwakuri

• Mataio 3:13–17; Mwakuri 7:54–60; 3 Nibwaai 11:3–10 (Te Atua te Tama ao Iesu Kristo a kaoti koauaia nakoia aomata n te aonaaba)

• “What Do We Learn about the Nature of God from the First Vision?” from “Face to Face with President Eyring and Elder Holland” (worldwide youth broadcast, Mar. 4, 2017), FacetoFace.ChurchofJesusChrist.org

Reirei n Ana Kawai te Tia Kamaiu

Te Tia Kamaiu e kaoia Ana taan iriiria bwa a na kakoauai koauan Ana reirei. Ngkana a karaoia, ao e na riing nanoia te Tamnei. Kona kanga ni kaungaia naake ko reireiniia ni kaota aia koaua? (Taraa Reirei n ana Kawai te Tia Kamaiu [2016], 11.)

Taraa naba “Prepare to Teach” (witeo, ChurchofJesusChrist.org).