Tianuare 24

N na Kanga ni Katauraoai n Ira Buakon ana “Mwakuri ae Kamiimi” te Atua?

Reirei ao Berita aika Tabu 3–5

Uaia ni Marooro

Kairaki iroun kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Nakoanibonga ae te Aaron ke Ana Botoniango te Bootaki n Ataeinnaine. Imwiina kaira te marooro ibukin taekan bwaai n aron akana imwiina, ao bairei kawai ake ko na mwakuri iaon bwaai ake ko maroroakin (ko kona ni baireia n te boowi ni beretitentii baikara bwaai ake a na maroroakinaki):

• Ara kooram ke ara kiraati. Tera ae ti kona ni karaoia ni karika te bonano imarenaia kaain te kooram ke te kiraati? Baikara kouru ae ti tangiria ni bane n uaia ni mwakuriia?

• Ara beku ke mwiokoara. Tera ae ti karaoia n tibwaua te euangkerio? Baikara baika ti a tia n rinanoi ni karaoan te mwakuri n te tembora ao n rongorongon te utu?

• Maiura. Ti kanga n tia n nora bain te Uea inanon maiura? Tera te namakin n tamnei ae e a tia n reke iroura inanon tain kamatebwaian booki aika tabu n te wiiki aei?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon te baire ao te kakao are a karaoia n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Ngke a moan waaki Aika Itiaki n ongora rongorongon te euagkerio ae e a tia ni kaokaki, a mwaiti aika tangiria ni kan ataia bwa tera ae a na kona ni karaoia n ibuobuoki inanon te mwakuri. Taman te Burabeti Iotebwa Timiti, Joseph Smith Sr., bon temanna mai buakoia naake a titiraki ni kan ataa ana kantaninga te Uea. Ana kaeka te Uea, e kuneaki n Reirei ao Berita aika Tabu 4, are man te tai anne e a tia ni kairi nanoia rooro n aomata bwa a na beku ma “nanoia, marurungiia, aia iango ao korakoraia ni kabane,” (te kibu 2). Ngkana tao te beku n te mwakuri ni mitinare ke te beku inanon nakoa nako ke te katabeaki n te Ekaretia, te rabakau ae tau ibukin te mwakuri n ibuobuoki bon ti te arona: te nano ni kan beku iroun te Atua n raonaki ma te onimaki, kantaninga, te tangira ae kororaoi ao te tangira. (taraa Reirei ao Berita aika Tabu 4:2–6). Ko na kanga ni buokiia kaain te kooram ke te kiraati ni kakorakora nanoia ni kan beku iroun te Uea ao ni katauraoi ibukin tibwanga n taai aika a na roko ni karaoa te beku?

Ibukin katauraoam ni kairiia kaain te kooram ke te kiraati n te kamatebwai aei, ko kona ni wareka ao n iangoa teuana te rongorongo ke ae mwaiti riki are a kuneaki n “Reitan Bwaai n Mwakuri.”

Tabeakinaia naake a rootaki n te kainnano bon mwakoron te mwakuri ni kamaiu.

Te Uaia n Reirei

A bae n tia n anaaki nanoia kaain te kooram ke te kiraati ni kan beku ibukin te Uea ma te kakaonimaki riki man warekan Reirei ao Berita aika Tabu n te wiiki aei. Ni kaungai nanoia bwa a na tibwauai aia iango, ko kona ni kaoia n iangoia aongkoa are a bubuti ibukin reken aia mwakuri. Tera rabakauia aika tau ake a na korei iaon aia retiume ke ni maroroakinna n tain te intawiu ibukin te mwakuri? A kona ni manga noora Reirei ao Berita aika Tabu 4 ao n atai rabakau aika tabu ake e kainnaoi te Uea ibukiia naake a tangiria ni kabaeaki n Ana mwakuri. Rinea teuana ke ae mwaiti riki mai buakon waaki ni kakukurei akana inano ni buokiia naake ko reireiniia n iangoia bwa tera ae a kona ni karaoia ni kabaeakiia riki iroun te Atua n ana “mwakuri ae kamiimi” (Reirei ao Berita aika Tabu 4:1).

• Ni buokiia naake ko reireiniia n reiakinaki bwa a na kanga n ira kawaekoan te mwakuri ni kamaiu, korea iaon te burakibooti nanon taeka akana imwiina ibukin te mwakuri ni kamaiu: Te Atua e kaoia ni kabane bwa a na nakon Kristo ao ni buoka Ana mwakuri man maiuakinan ana euangkerio Iesu Kristo, tabeakinaia naake a rootaki n te kainnano, kaoaia ni kabane bwa a na karekea te euangkerio, ao n ikotiia utu n te maiu ae akea tokina. Kaoiia kaain te kooram ke te kiraati ni maroroakinna bwa a kanga anua ake a karinanaki n Reirei ao Berita aika Tabu 4 ni buokaki iai ni karaoi mwakoron nako te mwakuri ni kamaiu. Bwenauaia kairake nakon taian kurubu, ao tuangiia kurubu n tatabeua bwa a na maroroakin kawai are a a na kona iai ni karikirakei anua aikai. Tera ae ti kona ni karaoia ni karika te mwakuri ni kamaiu bwa te mwakoro ae kakaawaki riki inanon maiura?

• Kaoiia kaain te kooram ke te kiraati bwa a na rinanoa teuana mai buakon rongorongo are a kuneaki n “Bwaai n Mwakuri,” n taraa te taeka are e taekinaki are a kona ni tibwauaia bwa kona kanga ni beku ibukin te Uea ma te kakaonimaki riki inanon taian nakoa n te Ekaretia, katabeaki, ke mwioko riki tabeua. Tuangiia bwa a na tibwaua te taeka are a rineia ao bukin tera ngkai a kunea bwa e rangi ni bongana. A na kanga ni karaoa nanon te bwai are a tia n reiakinna ngkai ao n taai aika a na roko?

• Tabeman kaain te kooram ke te kiraati a bae ni katauraoia n nako ni beku n aroia mitinare. Tuangiia bwa a na tibwauaia e kanga aroia ni katauraoi nakon te beku. Ni kaungai nanoia inanon aia kekeiaki, ko kona n tibwaua te titiraki are e taku Unimwaane David A. Bednar are e karekei n te tai ae mwaiti: “Tera ae I kona ni karaoia ni kanakoraoa riki aron au katauraoi ni beku n aron te mitinare ae bwanin ana tai?” (“N Riki bwa te Mitinare,” Riaona, Nob. 2005, 45). A kanga kaain te kooram ao te kiraati ni kaeka te titiraki aei? Tera atatai ake e a tia ni katauraoi Unimwaane Bednar? Ko kona ni kaoa temanna ke ae mwaiti riki mitinare ake a tia ni bane aia tai ni tibwauaia tera are a karaoia ibukin katauraoaia nakon te mwakuri ni mitinare ao tera are a tangiria bwa a na kaman tia ni karaoia.

Mwakuri inanon te Onimaki

Kaungaiia kaain te kooram ke te kiraati ni iangoia ao korea mwiin te bwai are a na karaoia ni karaoa nanon te namakin are a karekea n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwa aia iango.

Reitan Bwaai n Mwakuri

• Mataio 28:19–20; Reirei ao Berita aika Tabu 18:9–16; 50:13–14; 88:81 (Iai ara beku bwa ti na tibwaua te euangkerio)

• Dieter F. Uchtdorf, “Ane Kakannato Riki I Buakomi,” Riaona, Meei 2017, 78–81

• Carl B. Cook, “Beku,” Riaona, Nob. 2016, 110–12

• “Preparing to Serve,” ChurchofJesusChrist.org/topics/missionary-preparation

Reirei n ana Kawai te Tia Kamaiu

Te Tia Kamaiu e kaoia Ana reirei bwa a na kaota aia koaua, ao ngke a karaoia, a riingaki nanoia iroun te Tamnei. Ngkai ko anga reirei ibukin te ongotaeka, n aron te katooto, kaoia kaain te kooram ke kiraati bwa a na tibwaua aia koaua ibukin kakaawakin kawakinan taian tua. (Taraa Reirei n ana Kawai te Tia Kamaiu [2016], 11, 32.)