I Aomi Raou ni Mwakuri, iroun Linda Curley Christensen ao Michael T. Malm

Beberuare 14

Tera te Nakoanibonga?

Reirei ao Berita aika Tabu 12–13; Iotebwa Timiti—Rongorongo 1:66–75

Te Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Kooram n te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro ibukin bwaai n aron akana imwiina, ao bairei kawai ake kona mwakuri iai ni bwaai ake ko maroroakin (ko kona ni baireia tera bwaai ake a na maroroakinaki inanon te boowi ni beretitentii):

• Ara kooram ke ara kiraati. Tera taian waaki ni kakukurei aika ti a tibwa tia ni karaoi? A nakoraoi karaoaia? A ngaa iai aika a nakoraoi, ao ti na kanga ni katamaroai?

• Tibwangara ke mwiokoara. Antai ae e kainnanoa ara ibuobuoki? Ti na kanga ni buokiia?

• Maiura. Baikara kouru ae ti mwakuri iaoia i bon iroura n tatabemaniira? Tera bwaai aika ti rinanona inanon maiura ae ti kona n tibwauaia? Tera kakabwaia ake ti a tia ni karekei?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Ngkana ko wareka kaokan te Nakoanibonga ae te Aaron n Reirei ao Berita aika Tabu 13, kataia warekia nakoia naake ko reireiniia. A ota ni mwaakan te nakoanibonga inanon maiuia? A kanga otenanti n te nakoanibonga n aron te bwabetito ao te toa ni buokiko ni karekea mwaakan te Tia Kamaiu? Iangoi atatai aika ko kona n tibwauai. Ni katauraoiko n reirei taekan te nakoanibonga, iangoia ni kamatebwaia koroboki aika tabu ake a taekinaki n te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu ao te “Nakoanibonga” inanon Kairi nakon Koroboki aika Tabu (scriptures.ChurchofJesusChrist.org).

E buokiira koroboki aika tabu ni kaotaira bwa e kanga te nakoanibonga ni kakabwai maiura.

Te Uaia n Reirei

Ni moana te marooro iaon te nakoanibonga, ko kona ni kaoia kaain te kooram ke te kiraati n tibwaua te bwai ae ataia ibukin kaokan te Nakoanibonga ae te Aaron, n raonaki ma te bwai ae a warekia n te wiiki aei n Reirei ao Berita aika Tabu 13 ao Iotebwa Timiti—Rongorongo 1:66–75. Ko kona naba ni kaota te tamnei are e tei ibukin te Nakoanibonga ae te Aaron (n aron Gospel Art Book [2009], nambwa 93) ao kaoia kaain te kooram ke te kiraati bwa ana tibwaua te bwai ae ataia n te bwai ae riki aei. Bukin tera ti kakaitau ngkai e kaokaki te nakoanibonga? A kona waaki ni kakukurei aikai ni buokiia naake ko reireiniia bwa a na ataa nanon te nakoanibonga ao ti kanga ni kakabwaiaaki mai iai.

• Ana kanga kaain te kooram ke te kiraati ni kabwarabwara nanon te nakoanibonga nakon temanna ae tuai man ongo taekana mai imwaina? Ni buokiia, ko kona ni koroi ni karinani iaon te burakibooti titiraki tabeua mairouia tabeman aomata iaon taekan te nakoanibonga, n aron Tera te nakoanibonga? E kanga temanna ni karekea te nakoanibonga? E na kanga ae iai irouna te nakoanibonga ni mwakuri? Tera ae a karaoia ake iai irouia te nakoanibonga? Kaoia naake ko reireiniia bwa ana ukeukerii kaeka ni kabonganai booki aika tabu ao bwaai n ibuobuoki riki tabeua aika kuneaki n “Reitan Bwaai n Mwakuri” ao koroi kaekaaia iaon te burakibooti. Ko na kona n titirakiniia bwa ana tibwauai kakabwaia ake a tia n reke inanon maiuia ibukin te nakoanibonga. Ko kona naba ni kaota ao ni maroroakina te witeo “How the Priesthood Works” (ChurchofJesusChrist.org; taraa naba Dale G. Renlund, “The Priesthood and the Savior’s Atoning Power,” Riaona, Nobembwa 2017, 64–67).

• Ngkana ko reireiniia naake iai irouia te Nakoanibonga ae te Aaron, a kona ni kabwaia man rinanoan ana roangorongo te Tari Douglas D. Holmes “What Every Aaronic Priesthood Holder Needs to Understand” (Riaona, Meei 2018, 50–53). Ko kona ni mwiokoia kaain te kooram n tatabemaniia bwa ana rinanon moan barakarabe tabeua n te rongorongo ke teuana mai ibuakon barakarabe ake aua. Kaoia aomata n tatabemaniia bwa ana tarai bwaai tabeua ake e namakin bwa a kainnanoi ni kan atai naake iai irouia te Nakoanibonga. Anganna ana tai bwa e na tibwaua te bwai ae e reiakinna ao ni kabwarabwara bwa bukin tera e rinea te reirei anne.

• Ngkana ko reireiniia ataeinnaine, ko kona n tibwaua ana rongorongo Beretitenti Russell M. Nelson “Spiritual Treasures,” are e taekinaki nakoia ataeinnaine (Riaona, Nobembwa 2019, 76–79). Ko kona n tuangiia kaain te kiraati bwa ana ukoukora ana rongorongo ni kakaea te bwai ae a kona ni karaoia n ae bwanin ni “karekea mwaakan te Tia Kamaiu” nakon maiuia (iteraniba 77). Tera ae reirei Beretitenti Nelson ibukin aron karekean mwaakan te nakoanibonga? E kanga mwaakan te nakoanibonga ni kakabwaiaira? Kaungaia ataeinnaine bwa a na iangoia bwa a na kanga ni karaoa nanon te kakao aei mairoun Beretitenti Nelson: “I kaungai ngkami bwa kam na kamwatebwaia ma te tataromwaaka koaua ni kabane aika kam kona ni karekei iaon mwaakan te nakoanibonga” (iteraniba 79).

Mwakuri inanon te Onimaki

Kaungaiia kain te kooram ke te kiraati ni iangoia ao ni korea mwiin te bwai are a na karaoia ni karaoi nanon namakin ake a karekei n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwauai aia iango.

Reitan Bwaai n Mwakuri

• Reirei ao Berita aika Tabu 84:17–22; 107:1–5 (Mwaakan ao ana kariaia ana Nakoanibonga te Atua)

• Ebera 5:4; Taekan Te Onimaki 1:5 (Naake iai irouia te Nakoanibonga a weteaki iroun te Atua ao a katabuaki iroun te aomata are iai irouna te kariaia)

• Reirei ao Berita aika Tabu 121:34–46 (Mwaakan ao ana kariaia te nakoanibonga e mwakuri ti iaon reirein te raoiroi)

• Mataio 3:1–6; 28:16–19; Ioane 15:16; Reirei ao Berita aika Tabu 12:3–4 (Mwaane ao aine aika kororaoi a taetaekina te euangkerio)

• Mwakuri 3:1–8; Iakobo 5:14–15 (A anga kakabwaia naake iai irouia te Nakoanibonga ni kamaiuia aoraki ao naake a karawaawataki)

• 3 Nibwaai 11:21–22; 18:1–5; Reirei ao Berita aika Tabu 107:20 (Naake iai irouia te Nakoanibonga a karaoi otenanti)

• Reirei ao Berita aika Tabu 65:2; 107:18–21 (Naake iai irouia te Nakoanibonga a ibuobuoki n tararua te Ekaretia)

• “Aaronic Priesthood,” “Melchizedek Priesthood,” “Priesthood,” in True to the Faith (2004), 3–4, 101–2, 124–28

Reirei n Ana Kawai te Tia Kamaiu

Te Tia Kamaiu e reireiniia Ana reirei bwa a na nakon koroboki aika tabu ibukin kaeka nakon titiraki ao ni karekea te korakora n tamnei. Ko na kanga ni kaungaia naake ko reireiniia bwa ana nakon koroboki aika tabu ni kakaei kaeka nakon aia titiraki ao aia kakaewenako? (Taraa Reirei n Ana Kawai te Tia Kamaiu [2016], 30.)