“Beberuare 8–14. Reirei ao Berita aika Tabu 12–13; Iotebwa Timiti—Rongorongo 1:66–75: ‘I Aomi Raou ni Mwakuri’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Beberuare 8–14. Reirei ao Berita aika Tabu 12–13; Iotebwa Timiti—Rongorongo 1:66–75” Nakomai, Iriirai—Ibukiia Aomata n Tatabemaniia ao Utu: 2021
Beberuare 8–14
Reirei ao Berita aika Tabu 12–13; Iotebwa Timiti—Rongorongo 1:66–75
“I Aomi Raou ni Mwakuri”
Iotebwa Timiti ao Oliver Cowdery a karekea riki aia ataatai ngke a tataro ibukin te koaua are a reiakina man koroboki aika tabu (taraa Iotebwa Timiti—Rongorongo 1:68). Ko na kanga n tou mwiin aia banna ni katooto?
Korei Am Namakin
Mwaitia aomata ni kabutaa te aonaaba tao ana tuai n ongo taekan te tabo ae aranaki bwa Harmony Pennsylvania. Ma te Uea e aki toki n rinei taabo aika aki ataaki ibukin angiin bwaika a kakawaki n Abanueana. N te tabo ae e onrake n te aroka i rarikin Harmony ni Meei 15, 1829, Ioane te tia Bwabetito e kaoti bwa te aomata ae e a tian ni mangauti nakon Iotebwa Timiti ao Oliver Cowdery. E katokai baina iaon atuia ao n anganiia te Nakoanibonga ae te Aaron, ni weteiia bwa “raou ni mwakuri” (Reirei ao Berita aika Tabu 13:1).
N ataaki bwa te rao ni mwakuri ma Ioane te tia bwabetito, are e bwabetitoa te Tia Kamaiu ao ni katauraoa te kawai ibukin Kauaokina (taraa Mataio 3:1–6, 13–17), e na karika te nanorinano, ke tao n rangi n rootaki n te namakin nakoia uoman ataeinimwaane aika ai tibwa uabui tabun aia ririki. N te tai anne, Iotebwa ao Oliver a bon tuai kinaaki, n aron naba Harmony. Ma te beku n ana mwakuri te Atua bon ti ibukin ae e kanga arora ni beku, tiaki bwa antai ae e na ataira. Ma e ngae ngke e uarereke ke e aki noraki te bwai are ko karaoia n te tai anne, ngkoe naba te rao ni mwakuri n ana mwakuri te Uea ae e korakora.
Iango ibukin Am Kamatebwai I Bon Iroum ni Koroboki Aika Tabu
E tangirai te Uea bwa N na buoka waakinan ao katean ana waaki Tion.
Joseph Knight Sr ao kainabana, Polly, a kaitibo ma Iotebwa Timiti ngke, 20 ngkoa ana ririki, e moana mwakurina n aia onaroka i Colesville, New York. Joseph Knight e kabwarabwara bwa bon te tia mwakuri ae moan te tamaroa ae e a tibwa mwakuri irouna. E kakoauaa ana koaua Iotebwa Timiti iaon te bwatua koora ao e kaira Polly ni kawara Iotebwa Timiti ngke e raira Ana Boki Moomon ni mweengana i Harmony Pennsylvania. N te tai naba anne Polly e a kakoauaa. N uaa tokin maeuia, Joseph ao Polly a tiku n onimaki nakon te euangkerio ae e kaokaki. E riaon 60 kain te utu ae te Knight a kaina ao ni buoka katean te Ekaretia i New York, Ohio, Missouri, Nauvoo, ao n tokina i Salt Lake City.
E tangiria Joseph Knight ni kan ataia bwa e na kanga ni ibuobuoki n ana mwakuri te Uea. Ana kaeka te Uea (ngkai Reirei ao Berita aika Tabu 12) e kaineti “nakoia naba naake a tangira wakinan ao katean te mwakuri aei” (kibu 7)—ni ikotaki ma ngkoe. Tera ae e nanonaki iroum “ukoukora waakinan ao katean ana waaki Tion”? (kibu 6). A kanga reirei ao aroaro n kiibu 7–9 ni buokiko n karaoa aei?
Taraa naba “The Knight and Whitmer Families,” Revelations in Context, 20-24.
Te Nakoanibonga ae te Aaron e kaokaki iroun Ioane te Tia Bwabetito.
N ti teuana te tiententi, Ioane te tia Bwabetito e kaotii koaua aika mwaiti iaon te Nakoanibonga ae te Aaron. Iangoia ni karinanii bwaai ake ko reiakinii man te mwakoro aei (ni ikotaki ma ake n atuun te mwakoro aei). Ko na kunea bwa e na ibuobuoki ngkana ko kamatebwaia tabeua kibu n taeka ake ko kunei. Aikai tabeua katooto bwa ko aonga ni waaki:
-
“Kiingin aia mwakuri n ibuobuoki anera”: 2 Nibwaai 32:2–3; Moronaai 7:29–32; Jeffrey R. Holland, “The Ministry of Angels,” Ensign ke Riaona, Nobembwa 2008, 29–31; Bwai ni Kairi Nakon Koroboki aika Tabu, “Anera,” scriptures.ChurchofJesusChrist.org
-
“Kiingin … te euangkerio n rairannano”: 3 Nibwaai 27:16–22; Reirei ao Berita aika Tabu 84:26–27; Dale G. Renlund, “The Priesthood and the Savior’s Atoning Power,” Ensign ke Riaona, Nobembwa 2017, 64–67
-
“Natin Rewi”: Warekaia Iteraera 3:5–13; Reirei ao Berita aika Tabu 84:31–34; Bwai ni Kairi nakon Koroboki aika Tabu, “Nakoanibonga ae te Aaron,” “Rewi,” scriptures.ChurchofJesusChrist.org
Tera taian kakabwaia ae ko a tia ni karekei rinanon te otenanti n te Nakoanibonga ae te Aaron?
Iotebwa Timiti e Bwabetitoa Oliver Cowdery, iroun Del Parson
Iotebwa Timiti—Rongorongo 1:66—75
Taian otenanti a anganai te kariaiakaki nakon mwaakan te Atua.
Titita Carole M. Stephens, te kauntira mai imwaaina n te Beretitentii ni Kabuta n te Bootaki n Aine, e reirei: “Otenanti ao berita n te nakoanibonga a katauraoa karekean te kakabwaia ae e bwanin are e berita te Atua nakoira, are e kona n reke man Ana mwakuri ni Kamaiu te Tia Kamaiu. A anganiia natin te Atua mwaane ao aine te mwaaka, mwaakan te Atua, ao e anganiira te kona ni katauraoi ni karekea te maiu ae akea tokina” (“Do We Know What We Have?” Ensign ke Riaona, Nobembwa 2013, 13).
Ngkai ko wareka Iotebwa Timiti—Rongorongo 1:66–75, n raonaki ma bwaai aika ana taraaki ni kabanean te kibu 71, iangoia bwa tera ae kaira nanoia Iotebwa ao Oliver n titiraki ibukin te bwabetito, ao noora te kakabwaia are e roko nakoia imwiin karaoakin te otenanti n te nakoanibonga. Iangoa ni wareka kanoan am tieno are ko a tia ni koreia imwiin karekean otenanti ke korei mwiin bwaai ake ko uringii man karaoan waaki aikai. Tera kakabwaia ake ko karekei rinanon taina otenanti n te nakoanibonga?
Taraa naba Reirei ao Berita aika Tabu 84:20–22; Saints, 1:65–68.
Iango ibukin Kamatebwai ni Koroboki aika Tabu n te Utu ao n te Bootaki n te Tairiki
-
Reirei ao Berita aika Tabu 12;8.Bukin tera taian anua ake a karinanaki n te kibu aei e riai ngkana ti karaoa ana mwakuri te Uea?
-
Reirei ao Berita aika Tabu 13.Tera ae e na kamatoa aia koaua am utu iaon kaokakin te Nakoanibonga ae te Aaron? Te witeo “Kaokakin te Nakoanibonga ae te Aaron” (ChurchofJesusChrist.org) ke te mwakuri n korotamnei ae e kairaki ma te kabwarabwara aei e kona ni buokiia am utu n noora aron kaokakin te Nakoanibonga ae te Aaron. Ana kukurei ni korea tanmein te bwai ae e riki, n aron are a warekia n Iotebwa Timiti—Rongorongo 1:68–74? A konaa naba n tibwai aia koaua iaon te mwaaka n te nakoanibonga inanon maiuia.
Taraa naba “Priesthood Restoration Site” iaon history.ChurchofJesusChrist.org.
-
Iotebwa Timiti—Rongorongo 1:68.Ti na kanga n iriira aia katooto Iotebwa Timiti ao Oliver Cowdery ni kakaean boon ara titiraki? Tao n ami tai ni wareware ni kabane, ko kona ni karaoia bwa te bwai ae e na kakaraoaki n toki ao n titiraki ngkana iai ae iai ana titiraki n te bwai are a warekia.
-
Iotebwa Timiti—Rongorongo 1:71, ana koroboki.Tera ae e anaa nanoia kain am utu iaon ana taeka Oliver Cowdery? Bongi raa n am utu ae a riki bwa “boong aika a na aki mwanuokinaki”?
-
Iotebwa Timiti—Rongorongo 1:73–74.Tera ae e karikia te Tamnei ae e Raoiroi iaoia Iotebwa ao Oliver? N ningai ae te Tamnei e buokiia am utu ni mataata ni koroboki aika tabu ao ni kimwareirei iroun te Uea?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “The Priesthood Is Restored,” Aia Boki n Anene Ataei, 89.
Kanakoraoan Ara Anga reirei
Kamatebwaia atuun te reirei. N am utu, rinea atuun te reirei ae ko tangiria ni karababa kamatebwaiana. N aron te katooto, n te wiiki aei ao ko kona ni kabongana te Topical Guide ke Bwai ni kairi nakon Koroboki aika Tabu (scriptures.churchofJesusChrist.org) ni kakaei kiibu iaon te Nakoanibonga ae te Aaron.
I Aomi Raou ni Mwakuri, iroun Linda Curley Christensen