“Beberuare 1–7. Reirei ao Berita aika Tabu 10–11: ‘Bwa Ko Aonga n Tokanikai’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Beberuare 1–7. Reirei ao Berita aika Tabu 10–11,” Nakomai, Iriirai—Ibukiia Aomata n Tatabemaniia ao Utu: 2021
Katotongan te moan iteraniba aika korobokiaki n Ana Boki Moomon.
Beberuare 1–7
Reirei ao Berita aika Tabu 10–11
“Bwa Ko Aonga n Tokanikai”
Tauan mwiin namakin n tain warekan koroboki aika tabu bon ti te arona ma unikan te koraa; e ngae ngke namakin aika uarereke a kona ni kairi nakon oin am kaotioti ae e manena.
Korei Am Namakin
Ngkai e a waaki nako te rairairi iaon Ana Boki Moomon, e kaoti te titiraki ae riai: Tera ae ana karaoia Iotebwa Timiti ao Oliver Cowdery ibukin iteraniba ake a rairaki ake a tia ni bua? Te bwai ae e riai ni karaoaki bwa a na oki rikaaki ao ni manga rairii mwakoro akanne, ma te Uea e kona n noori baike a aki kona n noria—mwaane aika buakaka a iangoia ni bitii taeka ake iaon iteraniba akekei ni karika te nanououa iaon ana mwakuri Iotebwa ae e kairaki man te tamnei. Te Atua iai ana babaire n tuuka ana kekeiaki Tatan ao n onea mwiin te bwai are e bua. Te babaire aei e a kaman karaoaki te nga n ririki mai mwaina ngke te burabeti Nibwaai e namakina kairana ni karaoan te kauoua n rekooti are e rinanon baika a riki n te tai naba anne. Imwiina, e karekea te kairi Moomon bwa e na kaira te rekooti aei inanon Ana Boki Moomon “ibukin te waaki ni wanawana” ae e a taia te Uea (taraa Ana Taeka Moomon 1:3–7).
“Wanawanau,” e taku te Uea nakon Iotebwa, “e korakora riki nakon ana kamwamwane te riaboro” (Reirei ao Berita aika Tabu 10:43). Anne te rongorongo ae e karau nano inanon taain aron ara bong, ngkai ana waaki ni mwakuri korakora te tia kakaitara ni kamamarai onimaki e a korakora. N aron Iotebwa, ti kona ni “kakaonimaki ao n reitinako” n ana mwakuri te Atua are e weteira iai bwa ti na karaoia.(kibu 3). Ngkane ti na kunea bwa E a tia ni katauraoa te kawai bwa “mataroan moone e na bon aki tokanikai” i aora (kibu 69).
Taraa Saints, 1:51–61.
Iango ibukin Am Kamatebwai I Bon Iroum ni Koroboki Aika Tabu
Reirei ao Berita aika Tabu 10:1–33
Tatan e ukoukora kamaunaan ana mwakuri te Atua.
Tatan e na tangiria ae ti na mwaninga ae bon iai ngaia—ke ti na aki ata ana anga ni kairoroira (taraa 2 Nibwaai 28:22–23). Ma ana taeka te Uea n Reirei ao Berita aika Tabu 10 e kaotia bwa Tatan n tainako, e mwamwakuri ni kaitara ana mwakuri te Atua. Ngkai ko wareka kiibu 1–33, kinai bwa e kanga Tatan n ukera kakiriwean ana mwakuri te Atua n ana tai Iotebwa Timiti (taraa naba kiibu 62–63). Baikara bwaai aika ti tebo are ko noorii n ana kawai ni mwakuri Tatan ni boong aikai? Ko kona n butiia te Uea bwa e na buokiko n nooria bwa e na kanga Tatan ni kaririko. Tera ae ko reiakina man mwakoro 10 ae e na kona ni buokiko n tuuka ana waaki Tatan?
Reirei ao Berita aika Tabu 10:34–52
Wanawanan te Uea e “korakora riki nakon ana kamwamwane te riaboro.”
N ae e riaon 2,400 te ririki mai mwaina, te Uea e katauraoa te anga n onea mwiin baan Ana Boki Moomon ake a bua (taraa 1 Nibwaai 19). Tera ae ko reiakinna ibukin te Uea man Reirei ao Berita aika Tabu 10:34–52? Baikara kakoaua ni wanawanan ao ana ataibwai te Uea ae ko a tia n nooria ni maium?
Te rekooti are e katauraoia te Atua n onea mwiin iteraniba ake a rairaki ake a bua e a kuneaki ngkai n 1 Nibwaai nakon Ominai. E kanga te rongorongo ao reirei n te rekooti aei “[n anga] riki taian kamataata iaon [te] euangkerio” i bukim? (Reirei ao Berita aika Tabu 10:45).
Moomon ngke e Kauarerekei kanoan Taiani Bwatua, iroun Tom Lovell
Ngkana I butia te Atua N na bon karekei.
Mwaitiia kain ana utu Iotebwa Timiti ao raoraona a tuanga bwa e na ukora nanon te Uea i bukiia. E kukurei Iotebwa ni karaoia, ma e kariaia naba te Uea n anganiia oin aia kaotioti. N Reirei ao Berita aika Tabu 11, te kaotioti are e karekea Iotebwa ibukin tarina are e ikawai Hyrum, e taku te Uea, “N na kaota nakoim Tamneiu, … ao ngkanne ko na atai … bwaai ni kabane ake ko bubutiai iai” (Reirei ao Berita aika Tabu 11:13–14).
E taku te Uea bwa Ana taeka bon “nakoia ni kabane ake a raoiroi nanoia, ao n tia ni karina aia biti ni koro wiita n taia” (kibu 27). N Reirei ao Berita aika Tabu 11, tera ae e kataia te Uea n tuangko ibukin te kaotioti i bon ibukim? ibukin irakin waakin ana mwakuri te Atua? Tera riki taian rongorongo aika iai Irouna i bukim?
Reirei ao Berita aika Tabu 11:15–26
Ngkai I kakae ni “karekea ana taeka [te Atua],” N a karekea Tamneina ao mwaakana.
Tao i mwain rairakin Ana Boki Moomon, Hyrum Smith e ingainga ni kan tataekina te euangkerio. Ngkai ko wareka ana kaeka te Uea ibukin nanona aei, iangoia bwa tera ae e nanonaki iroum ni “karekea ana taeka [te Atua]” (kibu 21). E kanga karekean ana taeka te Atua ni buokiko ni beku n Ana Ekaretia? E kanga n uota mwaakan te Atua nakon maium?
Iango ibukin Kamatebwai ni Koroboki aika Tabu n te Utu ao n te Bootaki n te Tairiki
-
Reirei ao Berita aika Tabu 10:5.Tera ae ti reiakinna man kiibu aikai iaon mwaakan te tataro? Ti kanga n “tataro ni katoa tai”? (Ibukin iango tabeua, taraa David A. Bednar, “Pray Always,” Ensign ke Riaona, Nobembwa 2008, 41–44.)
-
Reirei ao Berita aika Tabu 10:38–46.Ni buokiia kain am utu ni maroroakina bwa e kanga te Uea ni manga karekea onean mwin iteraniba ake a tia n rairaki n Ana Boki Moomon ake a bua, tao a kona kain te utu n taetae iaon te bwai are a tibwa tia ni kabuaa. Tera aia namakin imwin ataakina bwa e a bua te bwai anne? Tera aia namakin ngkana e a manga kuneaki? E ngae ngke baan Ana Boki Moomon ake a bua aki manga kuneaki, e kanga te Uea ni karekea onean mwiin te bwai are a kabuaa ni kaineti nakon Reirei ao Berita aika Tabu 10:38:38–46?
-
Reirei ao Berita aika Tabu 10:55–70.Kaoiia kain te utu ni kakaea ke makenii kibu n taeka ae a moanaki ma “Bon ngai” ke “N na.” Tera ae ti reiakinna man te kibu n taeka “Bon ngai” bwa antai Iesu Kristo ao aekakira Ngaia? Tera ae ti reiakinna man te kibu n taeka “N na” bwa tera a E kakaraoia? Kaungaia kain te utu bwa a na tibwaia bwa a kanga koaua aikai ni kakorakora aia koaua iroun Iesu Kristo.
-
Reirei ao Berita aika Tabu 11:12–14.Warekan kiibu aikai a kona ni buokiia am utu ni kinaa ngkana e taetae nakoia te Tamnei. Ko kona ni kaotaa te toti nako aontano ao kaoiia kain te utu ni mwaing nakon te tabo are iai iai te oota. E kanga aio n titabo ma iriran ana kairi te Tamnei ae Raoiroi? Tera baika ko rinanoi n oin maiura ae ko kona n tibwauaia?
-
Reirei ao Berita aika Tabu 11:15–30.Iangoia ni karinani bwaai ae te Uea e tuanga Hyrum Smith bwa e na karaoi bwa e aonga n tauraoi n tibwaua te eungakerio. Tera ae ti kona ni mwakuri iaona ngaira ni kabane kain te utu?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “Search, Ponder, and Pray,” Aia Boki n Anene Ataei, 109; taraa “Iango ni Katamaroa n Am Kamatebwai n te Utu ni Koroboki aika Tabu.”
Kanakoraoan Ara Anga reirei
Kabonganai koroboki aika tabu nakon Maium. Imwiin warekan te mwakoro man koroboki aika tabu, tuangiia kaain te utu bwa a na tibwauai kawai bwa e kanga te mwakoro anne ni kaineti nakon maiuia. Te katooto, a kona n tibwaia bwa e kanga te Tamnei ni kairiia n aron kawai ake a kabwarabwaraaki n Reirei ao Berita aika Tabu 11:12–13.
Iotebwa ao Hyrum Smith, iroun Ken Corbett