“Beberuare 22–28. Reirei ao Berita aika Tabu 18–19: ‘Kakawakiia Aomata e Rang Korakora’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Beberuare 22–28. Reirei ao Berita aika Tabu 18–19,” Nakomai, Iriirai—Ibukiia Aomata n Tatabemaniia ao Utu: 2021
Ana Onaroka Martin Harris, iroun Al Rounds
Beberuare 22–28
Reirei ao Berita aika Tabu 18–19
“Kakawakiia Aomata e Rang Korakora”
Te kaotioti n Reirei ao Berita aika Tabu a karekeaki man kaekaan bwaai aika onoti n riki inanon ae e kaniia 200 te ririki n nako, ma te reirei are a reiakina e bon aki tainaki. Kakaei taian reirei aikai inanon am tai ni wareware, ao iangoia bwa a kanga ni kaineti nakoim.
Korei Am Namakin
Martin ao Lucy Harris iai aia onaroka ae bon teuana mai ibuakon onaroka i Palmyra, New York ae moan te tamaroa. A karekea mai imwiin ririki aika bati, a tia ni kona iai ni karikirakea aia utu, ao e a tia n anganiia aroia ni karineaki n aia komiuniti. Ma n 1829 e rangi ni mataata bwa Ana Boki Moomon e tii kona ni boretiaki ngkana Martin e anga ana onaroka ibukin tangoan te mwane ni kaboa te burinta. Iai ana koaua Martin iaon ana Boki Moomon, ma akea ana koaua Lucy. Ngkana e kariaia Martin n anga ana onaroka ibukin te tango mwane ao e aki nakoraoi kaboakin ana Boki Moomon, e na kabuaa ana onaroka ao n uruana ana mare. N taai tabetai ke n te tai teuana, ti bane ni kaitaraaki ma te titiraki ae ai aron are e kaitarai Martin: Tera uaan Ana euangkerio Iesu Kristo nakoiu? Tera ae I tangiria n anga ni buoka katean abanuean te Atua? E na buokiira ngkana ti uringa ae akea temana ae e a tia ni kabwaka te boo ae e bubura ni kakabwaiaia natin te Atua nakon riki Iesu Kristo, “te kabanea ni korakora i buakomi ni kabane” (Reirei ao Berita aika Tabu19:18).
E karaoa ana babaire Martin n anga ana onaroka ibukin te tangomwane. Ana anga nano e kabwaka boon boretinakin 5,000 te moan kaobi n Ana Boki Moomon. Ao ngkai, imwin are a tia ni boreetiaki 190 te mirion kaobiin Ana Boki Moomon, mirion aomata ni kabutaa te aonaaba ae a tia ni kakabwaiaaki.
Ibukin te rongorongon riki iaon bweretinakin ana Boki Moomon, taraa Saints, 1:76–84.
Iango ibukin Am Kamatebwai I Bon Iroum ni Koroboki Aika Tabu
Reirei ao Berita aika Tabu 18:10–16
E kimwareirei te Uea ngkana ti rairananora.
Noria bwa mwaitira te taeka ae rairananom ao te rairanano are e kabonganaaki inanon Reirei ao Berita aika Tabu 18 ao 19, ao iangoia bwa tera ae ko reiakina man taeka aikai n te tai are e kabonganaki iai. Iango i aon riki Reirei ao Berita aika Tabu 18:10–16; bwa a kanga kiibu aikai n roota am namakin iaon te rairanano—oin am rairanano ao te beku ni kaoiia tabeman bwa ana rairinanoia?
Taraa naba Aramwa 36:18–21; Dale G. Renlund, “Repentance: A Joyful Choice,” Ensign ke Riaona, Nobembwa 2016, 121–24.
Reirei ao Berita aika Tabu 18:34–36
Warekan Reirei ao Berita aika Tabu ai aron ongoraean bwanaan te Uea.
Ngkana iai ae titirakiniko bwa tera aekakin bwanaan te Uea, tera am taeka? Iangoa te titiraki aei ngkana ko wareka Reirei ao Berita aika Tabu 18:34–36. Tera ae ko reiakinna iaon bwanaan te Uea man warekan Reirei ao Berita aika Tabu? Tera ae ko kona ni karaoia ni karekei kairi mairoun te tamnei?
Reirei ao Berita aika Tabu 19:15–20
E korakai Iesu Kristo bwa I aonga ni kona n rairananou ao n Nakoina.
Te Nu Tetemanti e kabwarabwara korakain te Tia Kamaiu i Keketemwane man aia taratara tekoraki ake a noria. N Reirei ao Berita aika Tabu 19:15–20, Iesu Kristo e taekina aron Korakaina n Oin ana taeka. Ngkai ko wareka te rongorongo ae tabu, ae oin rongorongona, tarai taeka ao kibu n taeka ake a kabwarabwara aron korakaina. Iangoia bwa tera ae e reireiniko taeka ke kibu n taeka aikai. Bukin tera e anga nanona te Tia Kamaiu bwa e na korakai? Iangoia ni korea mwiin am namakin ibukin Iesu Kristo ao Ana Mwakuri ni Kamaiu ibukim.
Taraa Ioane 15:13; Motiaea 3:7; Aramwa 7:11–12; Reirei ao Berita aika Tabu 18:10–13.
Kakawakiia Aomata e rang Korakora, iroun Liz Lemon Swindle
Reirei ao Berita aika Tabu 19:26–27, 34–41
Ana kakabwaia te Atua a korakora riki nakon kaubwain te aonaaba.
E aki rang raoiroi kaboan Ana Boki Moomon i Palmyra, ao n tokina, Martin Harris e a riai ni kaboa nako mwakoron ana onaroka ae bubura ni kabwara te tarau (taraa “The Contributions of Martin Harris,” Revelations in Context, 7––8). Iangoa te anga nano anne—ao te kakabwaia ae ko atia ni karekea ibukin anne—ngkai ko wareki kiibu aikai. Ko riai n iangoia naba bwa tera ae E tuangko te Uea bwa ko na anga nano iai. Tera ae ko kunei inanon kiibu aikai ae kaungako bwa ko na karaoi anga nano aikai ma “te kimwareirei” ao “te kukurei”? (taraa naba kiibu 15–20).
Reirei ao Berita aika Tabu 19:23
Te rau e roko man reiakinan Iesu Kristo ao man Iriirana.
Iangoa ana kakao te Tia Kamaiu “Reirei mai Irou.” Tera ae ko reiakinna ibukin Iesu Kristo n Reirei ao Berita aika Tabu 10? Korei am iango, ao iangoia bwa a kanga koaua aikai iaon te Tia Kamaiu ni buokiko ni karekea te rau. Tera nanon aio iroum n “nakonako ma te nimamannei n [Tamneina]”?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Reirei ao Berita aika Tabu 18:1–5.Tao a na kona kain te utu n tibwai tabeua man “taai aika mwaiti” (kibu 2) ngke te Tanmei e kaotia nakoia bwa koroboki aika tabu a koaua, n aiaron are E karaoia nakon Oliver Cowdery. A na kanga am utu n “onimakini bwai ake a koreaki” (kibu 3) inanon koroboki aika tabu? Ko na kanga ni katea aan am utu iaon te “bwa” (kibu 4) n te euangierio?
-
Reirei ao Berita aika Tabu 18:10–13; 19:16–19.A na kona kain te utu ni wareka Reirei ao Berita aika Tabu 18:10–13 ao n onea mwiin te taeka ae “aomata,” “te aomata” ao “aomata ni kabane” n aran teuaane ke neienne.” Ko kona ngkane ni marooro bwa a kanga kiibu aikai ni buokiira ni mataata bwa kakawakira ngaira iroun te Tama ao te Nati (taraa Reirei ao Berita aika Tabu 19:16–19).
-
Reirei ao Berita aika Tabu 18:21–25.Iai mai ibuakoia am utu ae iai nanon arana? Tao ko kona ni marooro iaona bwa bukin tera aara a kakawaki ao tera ae nanonaki ni katoka aran Iesu Kristo i aora (taraa Motiaea 5:7). Aio te tai ae e tamaroa ni buokiia kain te utu ni katauraoiia ni katoka aran Kristo i aoia ngkana a babetitoaki.
-
Reirei ao Berita aika Tabu 19:15–20.Ni buoka am utu bwa a na karekea te taneiai ae e manena man kiibu aikai, tao ko kona ni wareware nakoia ngkai ko kaota tamnein Iesu Kristo (teuana ae e kaairaki ma te kamataata aio). Kain te utu a kona ngkanne n tibwa aia namakin iaon te Tia Kamaiu. Te anene n taromauri ae mamaten nanomii e kona naba ni kaoa te Tamnei.
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae tamaroa “I Mimi N Ana Tangira,” Anene n Taromauri, nambwa. 20.
Kanakoraoan Am Kamatebwai I Bon Iroum
Anga titiraki. Reirei ao Berita aika Tabu bon kakoauaan ae titiraki a kairi nakon te kaotioti. Ngkana ko kamatebwai koroboki aika tabu, korei titiraki ake a roko iroum. Ngkane iangoia ao tataro ni kakaea kaekaana.
Kristo Ngke e Tataro n te Onaroka i Ketetemwane , iroun Hermann Clementz