Ana Tabo ni man Martin Harris, iroun Al Rounds

Beberuare 22-28

Reirei ao Berita aika Tabu 18–19

“E Korakora Kakawakia Aomata”

Butiia Tamami are i Karawa bwa e na buokiko ni kakaai reirei inanon Reirei ao Berita aika Tabu 18–19 ake iai uaana ae onoti nakoia ataei.

Korei Am Namakin

Kaungaa te Tibwatibwa

Wareka Reirei ao Berita aika Tabu 18:2, ao kabwarabwara bwa te Tamnei e buoka Oliver Cowdery n ataia bwa koroboki aika tabu a koaua. Tuangiia ataei aron te namakin ngkana e kaotia te Tamnei nakoim bwa a koaua koroboki aika a tabu. Kariaia bwa a na tibwauai namakin ngkana a namakinna bwa koroboki aika tabu a koaua.

Reirei te Reirei: Ataei aika a Uarereke

Reirei ao Berita aika Tabu 18:10–12

Ngaira n tatabemaniira ti rangi ni kakawaki iroun te Atua.

Ngkana a ataia ataei bwa E tangiriia Tamaia are i Karawa— ao Natina ni kabane—e raka riki aia onimaki ao aia akoi nakoia raoia.

Waaki ni Kakukurei aika a Kona ni Karaoaki

• Buokiia ataei n raoniko n okiokira Reirei ao Berita aika Tabu 18:10 tabeua te tai. Kabwarabwaraa bwa “tamneira” e kaineti nakoia Natin te Atua. Okiokira te kibu 10 ma ataei, n te tai aei onea mwiin “tamneira” n araia ataei. (Taraa naba te iteraniba ibukin waaki ni kakukurei n te wiiki aei.)

• Buokiia ataei n iangoi bwaai ake a taku aomata bwa a kakawaki. Ngkanne kariaia ataei ni karekei aia tai n taraa te tirotaam, ao ngkana a karaoia, tuangiia ataei n tatabemania bwa teuanne ke neienne bon Natin te Atua ao moan te kakawaki. Kaotia bwa Tamara are i karawa, a moan rangi ni kakawaki riki nakon bwaai ni kabane ake a iangoi mai mwaina.

Reirei ao Berita aika Tabu 18:13–16.

Tibwauakin te euangkerio e uota te kimwareirei ae korakora.

Ko na kangaa ni kaira nanoia ataei bwa a na kaoiia ake tabeman n nakomai nakon Kristo bwa aonga n namakina te kukurei?

Waaki ni Kakukurei aika a Kona ni Karaoaki

• Tuangiia ataei aron te bwai teuana are e na uota te kimwareirei nakoim. Karekei aia tai ataei n tatabemaniia ni kaongoraeko te bwai are e uota te kimwareirei nakon teuanne ke neienne. Wareka Reirei ao Berita aika Tabu 18:13, 16. Tera ae uota te kimwareirei nakon te Uea? Tera ae E taku bwa e na uota te kukurei nakoira?

• Anenea te kuna ni kabane ibukin te mwakuri ni mitinare, n aron “I Kan Riki bwa te Mitinare Ngkai” (Aia Boki n Anene Ataei, 168), ao ni buokiia ataei ni iangoi kawai nako ake a kona n tibwaua te euangkerio, n raonna inanon mweengaia. Tuangiia te tai are ko tibwaua te euangkerio, ao karekea aia tai ataei ni kaota aia namakin.

Reirei ao Berita aika Tabu 19:18–19, 23–24

Iesu Kristo E ongeaba nakon Tamana are i Karawa, e ngae ngkana e kaangaanga.

Ana motinnano te Tia Kamaiu n “[aki] nimma te mwangko ae e mao, ao ni keerikaaki (te kibu 18) bon te bwai ni kakairi nakoira ni kabane n ongeaba nakon Nanon Tamara are i Karawa. Iangoia bwa ko na kanga ni kaungaia ataei n iriira ana banna ni katooto Iesu Kristo.

Waaki ni Kakukurei aika a Kona ni Karaoaki

• Kaota tamnein kurakain Iesu Kristo i Ketetemwane (taraa kamataata n te wiiki aei i nanon Nakomai Iriirai—Ibukia Aomata n Tatabemania ao Utu). Titirakiniia ataei bwa a na tuangko bwa tera ae e riki n te tamnei aei. Koroia ni kakimototoa n oin am taeka te bwai are taekinna te Tia Kamaiu inanon Reirei ao Berita aika Tabu 19:18–19 n aron Korakaina. Karawawataa bwa te korakai ibukin ara bure bon te kabanea ni matoatoa are na reke iroun temanna, ma Iesu e tangira Tamana ao ngaira, E ongeaba nakon Nanon te Atua. Ti na kanga n ongeaba nakon Tamara are i Karawa?

• Buokiia ataei ni iangoi mwakuri aika bebete n airi ma mwakoro n taeka inanon Reirei ao Berita aika Tabu 19:23. Wareka te kibu tabeua te tai ao ataei a karaoa te mwakuri. Buokiia ni iangoi kawai are ti kona n reiakina Kristo ao ni kakauongo n ana taeka.

Reirei te Reirei: Ataei aika a kawai

Reirei ao Berita aika Tabu 18:10–12

Ngaira n tatabemaniira ti rangi ni kakawaki iroun te Atua.

A mwaiti aomata ma namakinan aia kaangaanga ae aki bati ni kakawaki; tabeman akea irouia te akoi nakoia aomata aika a kaokoro ma ngaiia. Te rongorongo ae mwaakaroiroi n Reirei ao Berita aika Tabu 18:10 e kona ni bita taratarakira ao aomata irarikira.

Waaki ni Kakukurei aika a Kona ni Karaoaki

• Titirakinia ataei bwa a na korea aran teuanne ke neienne n te mwakoro ni beeba ao ni kabuta te beeba ni katobibia n te ruu . Tuangiia bwa a na koroboki iaon te beeba n tatabeua are a karekea taekan temanna ae a tangiria. Kaungaiia bwa a na akoi ao ni iango ao n taetae raoi. Ni buokiia ataei ni wareka Reirei ao Berita aika Tabu 18:10–12, kaoiia bwa a na tibwa te bwai are a reiakinna n aron te Atua n atai arora. Kabwarabwara bwa ti rangi ni kakawaki iroun te Atua ibukina bwa ngaira Natina.

• Kaota nakoia ataei te bwai teuana ae rangi ni kakaawaki iroum. Ti na kanga n tararuai bwaai ake a kakawaki iroura? Tuanga te ataei bwa e na wareka Reirei ao Berita aika Tabu 18:10. Ti na kanga ni kaotia nakoia aomata bwa “kakawakin [tamneia] e rangi ni kakawaki” n ara taratara?

  

  Kakawakin te Tamnei, iroun Liz Lemon Swindle

Reirei ao Berita aika Tabu 19:16–19

E korakai Iesu Kristo ibukiu.

Ko na kanga ni kaoa tamnein te rau n am kiraati n te aro bwa te Tamnei are Raoiroi e kona ni kakoaua nakoia ataei bwa Iesu Kristo boon aia bure?

Waaki ni Kakukurei aika a Kona ni Karaoaki

• Tibwaua karakinan Iesu Kristo ni koraki ibukin ara bure (taraa “Mwakoro 51: Iesu E Korakai n te Nne n Aroka i Ketetemwane,” Karaki man te Nu Tetamenti 129–32, ke n te witeo iaon ChurchofJesusChrist.org). Tuangiia ataei bwa a na taekina riki te karaki n oin aia taeka, ao ngkanne tuangiia bwa a na warekia bwa e kanga te Tia Kamaiu ni kabwarabwaraa te namakin inanon Reirei ao Berita aika Tabu 19:16–19. Tera ae ti reiakinna man Ana kabwarabwara?

• Tuangiia ataei bwa a na kamatui mataia ngkana ko wareka Reirei ao Berita aika Tabu 19:16–19 ao ni iangoa aron aia namakin ibukin te Tia Kamaiu. Buokiia ataei ni kakaea inanon Anene n Taromauri ke n Aia Boki n anene ataei ibukin anene are na buokiia ni kabwarabwara aia namakin ibukin Iesu Kristo (taraa taekana n te intekiti ni booki aikai). Tuangiia ataei bwa a na anenei anene ake a rinei ao ni kaoti aia koaua.

• Buokiia ataei bwa a na kamatenanoa te kateniua n taekan te onimaki.

Reirei ao Berita aika Tabu 19:26, 34–35, 38

Ana kakabwaia te Atua a korakora riki nakon kaubwain aonaaba.

Boretiakin Ana Boki Moomon e rangi ni bobuaka, ao Iotebwa Timiti e aki kona ni kabooa. Te Uea e tuanga Martin Harris bwa e na “kabooanakoa mwakoron [ana] bwai,” a na tabo ni man ae nakoraoi, ni kabooa te tia booreti (kibu 34). Ti a tia ni karekei kakabwaia aika a kamiimi ibukin aia angakarea Martin ao a mwaiti riki.

Waaki ni Kakukurei aika a Kona ni Karaoaki

• Koreia iaon te burakibooti titiraki n aekan aikai ni buokiia ataei bwa a na ataia Reirei ao Berita aika Tabu 19:26, 34–35, 38: Tera te bwai ae tuanga Martin Harris te Uea bwa e na karaoia? Bukin tera E tuangnga bwa e na karaoia? Tera are E beritai iai bwa boon mwiina? Tuangiia ataei bwa a na mwakuri ni kakauoman ni kakaei kaeka nakon kiibu aikai. Titirakiniia bwa tera ae a na namakinna ngke arona bwa ngaiia Martin Harris.

• Kaotia nakoia ataei kaobiin Ana Boki Moomon, ao tuangiia te bwai teuana ae ko tangiria iai. Tuangiia bwa a na tibwaua aron aia namakin ibukina. Taekinna ni kakimototoa aron ana anga karea Martin Harris bwa e aonga ni konaa ni boretiaki Ana Boki Moomon (Karaki man Reirei ao Berita aika Tabu, 33). Tera are taku te Uea nakon Martin inanon Reirei ao Berita aika Tabu 19:38 are na kona ni buokia bwa e na kakaonimaki ao n ongeaba? Buokiia ataei ni iangoi bwaai aika kona n anga bwa a na ongeaba nakon te Atua ke n ibuobuoki n Ana mwakuri.

Kaungaa te Kamatebwai n te Mweenga

Tuangiia ataei bwa a na iangoa temanna are e na kona ni buokaki man te bwai ae a tia n reiakinna man Reirei ao Berita aika Tabu 18 or 19—ibukin te katooto, bwa ti bane ni kakawaki iroun te Atua. Kaungaia bwa a na bairea aron tibwauakin te bwai are a tia n reiakinna ma te aomata anne.

Kanakoraoan Ara Anga reirei

Buokiia ataei n reirei man koroboki aika tabu. Tabeman ataei e kaangaanga irouia warekan koroboki aika tabu. Kaatuua iangoan teuana te kibu ke te mwakoro n taeka ae e na kona ni buokiia.