Mwakoro 51
E Maraki Kristo n te Nne n Aroka are Ketetemwane
Te Tia Kamaiu e tuangiia Betero, Iakobo, ao Ioane bwa a na nako ma Ngaia nakon te Nne n Aroka. E tuangiia bwa a na tataninga n te tai are E tataro iai.
E ataia Iesu bwa E na maraki ibukin aia bure aomata ni kabane. E aki kan maraki, ma E rineia bwa e na ongotaeka nakon Tamara are i Karawa.
Betero, Iakobo, ao Ioane a matuu nako ngke e tataro Iesu. E roko Iesu ao n nooria bwa a matu. E tuangiia bwa a na aki matu.
E a manga nako riki n tataro. Betero, Iakobo, ao Ioane a tangria n aki matuu, ma a bong rangi ni kua. A manga matu nako riki. E a manga nooria naba Iesu bwa a matu. E nako ao n tataro te kateniua n tai.
Ngke e tataro Iesu, E ruru ibukin marakina. E roko te anera ni kakorakoraa. E rang korakora marakina n te aro are ai te raraa maonona. E maraki ibukin ara bure nako bwa e aonga ni kona ni kabwaraaki ara bure ngkana ti raira nanora.
Iesu e kauta Betero, Iakobo, ao Ioane. E tuangiia bwa E na bon kamwaneaki man tiringaki. E taku Iesu bwa aomata aika buakaka a na roko ni kairia nako.