Mwakoro 43

Iesu Ngke e Kamaiua Rataro

Te mwaane ae arana Rataro e maeka i Betania ma mwaanena aika Maria ao Mareta. Iesu e tangira Rataro ma mwaanena ao ngaiia a tangira naba Iesu.

Ioane 11:1–2, 5

Rataro e rootaki n te aoraki ae korakora. Te Tia Kamaiu e mena n te kaawa teuana. Maria ao Mareta a kanakoa aia rongorongo Nakoina ae e aoraki Rataro.

Ioane 11:3

Te Tia Kamaiu e tuangiia Ana reirei bwa a na nako ni buoka Rataro. Taan reirei a maaku n nako Betania. E bon kaan ma Ierutarem. Aomata tabeman i Ierutarem a tangiria n tiringa Iesu.

Ioane 11:6–8, 18

Iesu e tuangiia Ana reirei ae e a tia ni mate Rataro. E taekinna bwa e na kautia ni kamaiua. Te kakai aio e na buokiia ana reirei n ataia bwa ngaia te Tia Kamaiu. Iesu e nako Betania. Ngke e roko ikekei, Rataro e a bon tia ni mate inanon abong te bong.

Ioane 11:11–17, 19

Mareta e tuanga Iesu ae Rataro e na bon maiu ngke arona bwa e moantaai n roko. Iesu e taku bwa Rataro e na manga bon maiu. E tuanga Mareta ngkana e kakoaua. Mareta e taku eng. E ataia ae Iesu bon te Tia Kamaiu.

Ioane 11:20-27

Mareta e kitana Iesu n anaa tarina, Maria. Maria e nako ni kaitiboaki naba ma Iesu. A mwaiti aomata ake a iria. Maria e katorobubua, e tang, i waen te Tia Kamaiu. Aomata ake a iria a bon tang naba. Iesu e titiraki bwa e mena iaa rabwatan Rataro.

Ioane 11:28-34

Iesu e nako n te bwanga are e taunaki iai Rataro. Bon iai te atibu i matana. E tuangiia aomata bwa a na kamwainga te atibu.

Ioane 11:38-39

Iesu e taraa eta. E karabwa Tamara are i Karawa ibukin ongoraana n Ana tataro.

Ioane 11:41–42

Ao n te bwanaa ae takarua, Iesu e tuanga Rataro bwa e na otinako man te bwanga. Rataro e otinako. Aomata a noora te kakai anne ao a kakoaua bwa Iesu bon te Tia Kamaiu.

Ioane 11:43-45