Mwakoro 10

E Bwabetitoaki Iesu

E maeka Ioane n te rereua inanon ririki aika mwaiti. E kunnikainna ni kunnikai aika karaoaki man iran te kamero, ao e amwarake ni karewen te maniberu ao te rokati. Aomata a roko man kaawa n ongora nakon ana reirei. E kinaaki n arana ae Ioane te Tia Bwabetito.

Mataio 3:1-5

Ioane te Tia Bwabetito e reireiniia aomata ibukin Iesu Kristo. E tuangiia bwa a na rairinanoia man aia bure ao man bwabetitoaki. Ioane e bwabetitoia naake a rairinanoia man aia bure.

Mataio 3:2–3, 5–6

Aomata a titirakina Ioane te Tia Bwabetito bwa a na kanga ni maiuakina te maiu ae e nakoraoi riki. E tuangiia bwa a na buokiia rarikin, a na tataekina te koaua, ao n raoiroi nakoia tabemwaang. E taku bwa Iesu Kristo e a kaan roko. Iesu e na anganiia te bwai n tituaraoi ae te Tamnei ae Raoiroi.

Mataio 3:2, 11–12; Ruka 3:10–14

N te taina ngke Ioane te Tia Bwabetito e bwabetitoia aomata n te karaanga are i Ioretan, Iesu Kristo e nakoina. E tuanga Ioane bwa e na bwabetitoia. Ioane e ataia bwa Iesu e a tia n ongotaeka nakon ana tua te Atua ao n aki kainnanoia bwa e na rairananona. Ioane e taku bwa e aki kainnanoa te bwabetito Iesu.

Mataio 3:13-15: 2 Nibwaai 31:5-7

Ma te Atua e tua nakoia aomata ni kabane bwa a na bwabetito, ngaia are Iesu e tuanga Ioane bwa e na bwabetitoia. Iesu e katea te banna ni katoto ibukira bwa ti na ongeaba n ana tua te Atua ao man bwabetitoaki.

Mataio 3:16: 2 Nibwaai 31:7-9

Ngke e otinako man te ran Iesu, e roko irouna te Tamnei ae Raoiroi. Te Atua e taetae mai Karawa, ni kangai, “Natiu ae tangiraki teuaei, ae I kakatonga irouna.” Ioane te Tia Bwabetito e kakoaua naba Iesu bwa bon Natin te Atua.

Mataio 3:16-17: Ioane 1:33-36: Iesu te Kristo, 150