Mwakoro 53
E Tauraki Iesu n te Kaibangaki
A batiboa Iesu tautia ma kaai ni kataere. A Katuka te kunnikai ae uraura Iaona. A karaoa te bau are e kateketeke ao ni katikua iaon atuun Iesu. A ngareakinna ao a bawareia. A aranna bwa “Aia Uea Iutaia.”
A mwaiti aomata aika a iriia tautia ngke a kaira Iesu nakon te tabuki ae kaan ma Ierutarem. A karaoia bwa E na uota Oin ana kaibangaki. A neran baina ao waena nakon te kaibangaki ao n tabekia rake. A kabureia naba uoman mwaane, ake taan iraa.
E tataro Iesu. E bubutia te Tama are i Karawa bwa e na kabwarai aia bure tautia ake a Tauria iaon te Kaibangaki. A aki ataia ae Ngaia bon te Tia Kamaiu.
Maria, are tinan Iesu, e tei irarikin te kaibangaki. E mena ikekei naba te Abotoro are Ioane. Iesu e tuanga Ioane bwa e na tararua Tinana. Ioane e kaira tinan Iesu nakon mwengana.
E taona te Aonaaba te rotongitong. E korakai te Tia Kamaiu iaon te kaibangaki inanon te tai ae maan. N tokina Tamneina e kitana Rabwatana, ao E mate.
Ngke E mate, te mwaeiei e urui bwaa aika bubura ni kamwakorokoroi. Te keeten n te tembora, ae atongaki bwa te roki, e raeuaki nakon uoua mwakorona. A maaku tautian Rom.
Temanna mai ibuakoia ana reirei Iesu e anaa rabwatan Iesu mai iaon te kaibangaki. E niniria inanon te kunnikai ao ni katikua inanon nneia maate, te tabo are a taunaki iai aomata. Te atibu ae bubura e karabinoaki nako matan te nne ni mate.