Mwakoro 18
Iesu E Rineia Ana Abotoro
N te taina ao Iesu e reireiniia aomata man te booti iaon Namani Kariraia. Bon ana booti te mwaane ae arana Betero.
Betero ao raoraona a akawa n te tairiki n akea konaia naba temanna. Imwiin banen ana angareirei Iesu, E tuanga Betero bwa e na karuoa te booti i marawa. Ao e tuanga Betero ma raoraona bwa a na karuoa aia karaun i taari.
A reke konaia aika a mwaiti n te aro are a moanna n uruaki iai aia karaun.
Betero e weteia raoraona ake n te booti are tewaana bwa a na roko ni buokiia. A onrake aia booti ake uoua n te ika n te aro are a moanna n inako iai.
Betero ma raona a bon rangi ni miimi. A ataia bwa Iesu Kristo boni ngaia ae karika aio.
E katoro bubua Betero i rangan te Tia Kamaiu. E taku bwa e aki tau bwa e na kaniia Iesu. Iesu e tuanga Betero bwa e na aki maaku.
Uoman mai buakoia raon Betero, Iakobo ao Ioane, bon taari. Iesu e tuanga Betero, Iakobo ao Ioane bwa a na iriiria ao n riki bwa taan akawaia aomata.” Mwaane aikai a kitanii aia bwai ao n nako ma Iesu. Te Tia Kamaiu e tuangiia riki tabeman mwaane bwa a na Iriiria.
Iesu e rineia tengaun ma uoman Abotoro bwa a na kaira te Ekaretia. E tataro ni kabanea te tairiki bwa e aonga n rineia mwaane aika a koaua. N te ingabong are imwiina e rineia ao n katabuia tengaun ma uoman mwaane, n anganiia te nakoanibonga ao te kariaiakaki n riki bwa Abotoro.
A mwananga Abotoro nakon kaawa aika mwaiti. A reireiniia te euangkerio ao a kamaiuia aomata. A okirikaaki n tuanga Iesu bwaai ake a tia ni karaoi.