Mwakoro 1

Eritabeta ao Takaria

Takaria ma buna, Eritabeta, bon Iutaia aika a maeka irarikin Ierutarem. A ongotaeka nakon ana tua te Atua. A tataro inanon ririki aika mwaiti ibukin reken natiia. Ngke a kara, a teimatoa n akea natiia.

Ruka 1:5–7, 13

Takaria bon te ibonga n te tembora. N te bong teuana te anera ae arana Kaberiera e nakoina. E taku Kaberiera bwa e na kaekai aia tataro Takaria ao Eritabeta te Atua. E na riki natiia. E taku Kaberiera bwa a riai n arana natiia bwa Ioane.

Ruka 1:8–13, 19

E taku Kaberiera bwa e na riki Ioane bwa ana burabeti te Atua ae raoiroi. E na reireiniia aomata taekan Iesu Kristo.

Ruka 1:15–17

E aki kakoaua Takaria te anera. E a rangi ni kara Eritabeta ni karekea natina. E taekina anne Kaberiera ibukina bwa e aki kakoaua te bwai ae e a tia te Atua ni beritanna, e na aki kona Takaria n taetae ni karokoa are e bungiaki Ioane.

Ruka 1:18–20