Katotongan moan Ana Boki Moomon are koreaki n te bai.

Beberuare 1–7

Reirei ao Berita aika Tabu 10-11

“Bwa Ko Aonga n Tokanikai”

Tataro mwaaka ni wareka Reirei ao Berita aika Tabu 10-11, iangoa ae ko kona ni buokiia ataei n atai koaua inanon taian mwakoro aikai. Taian iango n te kamataata aei—ibukiia ataei aika uarereke ao ataei aika ikawai—a kona ni ibuobuoki.

Korei Am Namakin

Kaungaa te Tibwatibwa

Tuangiia ataei bwa a na taekina are a uringnga man te reirei are mai imwaaina iaon Martin Harris ao iteranibaa aika bua n rairakin Ana Boki Moomon. Tibwaua taekana are a aki uringnga. Kam na tangiria n taraa“Mwakoro 4: Martin Harris ao Iteranibaa ake a Bua” (Karaki man Reirei ao Berita aika Tabu, 18–21).

Reirei te Reirei: Ataei aika a Uarereke

Reirei ao Berita aika Tabu 10:5

Ngkana I tataro n taainako, Tamara are i Karawa E na kakabwaiaai.

N tabetai a taku ataei bwa a kona n tataro n taai ao n taabo ake a tia ni katauaki, ao ngkana a tii katorobubua ao ni kamatuui mataia. Ko na kanga ni buokiia bwa a na reiakina aron te “tataro n taainako”?

Waaki ni Kakukurei aika a Kona ni Karaoaki

• Kaoti tamnein bwaai aika ti karaoi n taainako, n aron te amwarake, te matu, ke te takakaro. A kanga bwaai aikai ni buokiira? Kaota tamnein te ataei ae tabe n tataro ngke ko wareware nakoia ataei man Reirei ao Berita aika Tabu 10:5 te taeka “tataro n taainako.” Tuangiia ataei bwa a na manga okirii taeka aikai tabeua te tai. E na kanga te tataro n aki toki ni buokiira?

• Kabongana te iteraniba ibukin waaki ni kakukurei ni buokiia ataei ni iangoi taabo aika a mwaiti ao taai ake ti kona iai n tataro.

• Tuangiia ataei bwa a na korea oin tamneia ke aia utu n tataro n taai aika kakaokoro ao n taian tabo, n aron are inanon te taromauri, imwain te reirei, ke n tain te matu. Kabwarabwara bwa te tataro e aki toki n nanonaki tataro n taainako inanon tain te ngaina. Ti na kangaa n tataro ngkana ti otabwaniniaki irouia aomata n aron are n te reirei ke ma raraora?

  

  E na buokiira te Uea ngkana ti tataro.

Reirei ao Berita aika Tabu 11:12–13

Te Tamnei are Raoiroi e kairai bwa N na karaoa ae raoiroi.

Riki n te ririki n ataei, a kona iai ataei ni kinaa te Tamnei ngkana e taetae nakoia.

Waaki ni Kakukurei aika a Kona ni Karaoaki

• Karaba wikin te taura ke te tooti ao tamnein moangaren te aomata n te tabo teuana inanon te ruu. Taungiia ataei bwa a na kakaei bwaai aikai. Wareka Reirei ao Berita aika Tabu 11:13, ao buokiia ataei ni kinai taeka ake a irekereke nakon bwaai ake a kunei. Tera ae a reirei taeka aikai n aron ana ibuobuoki te Tamnei are Raoiroi nakoira?

• Anganiia ataei aanga tabeua are a na kan karaoa aia rinerine imarenan te eti ao te kairua—n aron te rinerine n taekina te koaua ke ni kewe, ke rinean te akoi ke te iowawa. Ti na kanga n ataia bwa e ngaa te rinerine ae eti? Bootaki wareka Reirei ao Berita aika Tabu 11:12, ao kakoaua bwa te Tamnei are Raoiroi e na buokiira ni karaoa te rinerine ae eti ngkana ti kakauongo Nakoina.

• Anenei anene aika kaineti ma Ana Kairiri te Tamnei are Raoiroi n aron “Kakauongo, Kakauongo” (Aia Boki n Anene Ataei,107). Titirakiniia ataei bwa tera ae a reiakinna man te anene bwa e na kanga te Tamnei are Raoiroi ni buokiira.

Reirei te Reirei: Ataei aika a Ikawai Riki

Reirei ao Berita aika Tabu 10:5

Ngkana I tataro n taainako, I konaa n tokanikai iaon ana kariri Tatan.

Ko kona ni buokiia ataei n ataia bwa te tataro ae matoa e anganiia te mwaaka n tokanikai iaon Tatan.

Waaki ni Kakukurei aika a Kona ni Karaoaki

• Korei taeka ke kibuntaeka man Reirei ao Berita aika Tabu 10:5 ao iaon beeba aika kaokoro, ao tuangiia ataei bwa a na katikui n te aro ae riai. Kaungaia bwa a na tarai kiibu ngkana a kainnanoa buokaia. Ni kaineti ma te kibu aio, tera te kakabwaia ae roko ngkana ti tataro n taainako? E kanga uringan te tataro rinanon ara bong ni buokiira, riki ngkana ti kaririaki bwa ti na karaoa te bwai ae kairua?

• Kaoiia ataei bwa a na taui mwiin taai ngke ti kona n tataro ao taabo ake ti kona n tataro iai. Ibukin iango riki tabeua, kaungaiia bwa a na wareka Aramwa: 34:17–27.

• Buokiia ataei ni karaoa te kanikina ae uarereke ke te tamnei are e na kauringiia n tataro n taainako. Kaoiia bwa a na katinei aia kanikina inanon mweengaia n te tabo are a na noori iai n taainako.

Reirei ao Berita aika Tabu 11:12–13

E kairai te Tamnei are Raoioroi bwa N na karaoa ae raoiroi.

Aki toki kairake n aomata ni mimi n taainako bwa e kanga aron namakinan ana kairi te Tamnei are raoiroi. Ko kona ni kabongana Reirei ao Berita aika Tabu 11 n reireiniia ataei bwa a na kanga ni kinaa “bwa te Tamnei are kairiri nakon karaoan ae raoiroi” (te kibu 12).

Waaki ni Kakukurei aika a Kona ni Karaoaki

• Buokiia ataei bwa a na korei araia aomata ake a nako ni kawariia ngke a kainnanoa te buoka ke iai aia titiraki. Bukin tera bwa ti na onimakiniia aomata aikai bwa a na buokiira? Kaoiia ataei bwa a na wareka Reirei ao Berita aika Tabu 11:12 ao kakaea te taeka are e tuangaki Hyrum Smith bwa e na kakoaua. Tera ae ti reiakinna man te kibu aei bwa ti na onimaki inanon ana kairi te Tamnei are Raoiroi?

• Tuangiia ataei bwa tera ae a na taekinna nakon raoia are e titirakiniia bwa tera aia namakin ngkana te Tamnei are Raoiroi e taetae nakoia. Kaoiia ataei bwa a na wareka Reirei ao Berita aika Tabu 11:12–13 ni kakaei kaeka tabeua aika riai.

• Tibwauaia ma ataei namakin tabeua ake ko tia ni karekei ma te Tamnei are Raoiroi ni kairiko ni karaoa ae raoiroi. Kaoiia ataei bwa a na iangoia ngkana a tia ni karekei aekan namakin aikai ao n tibwaua aia taneiai ngkana a namakina te rau ni karaoana. Kakoaua bwa Tamara are i Karawa e tangiria ni kairiira rinanon te Tamnei ae Raoiroi. Kaungaiia ataei n ataia inanon te wiiki ae na roko ngkana iai aia namakin n aekan ae taekinaki inanon Reirei ao Berita aika Tabu 11:12–13.

Reirei ao Berita aika Tabu 11:21, 26

I kainnanoa ataakin te euangkerio bwa I iaonga ni kona ni buokiia tabeman ni kunea te koaua.

Ataei ake ko reireiniia a na iai aia tai ae mwaiti n taekina te euangkerio. A kona kiibu aikai n reireiniia aron te katauraoi ibukin taai akanne.

Waaki ni Kakukurei aika a Kona ni Karaoaki

• Kaoiia ataei bwa a na karaoa aia kaotioti bwa a na kanga ni maroroakina taekan te euangkerio ma tabeman ake a tuai n ongo mai mwaina. Te katooto, a na kanga ni kaekai titiraki iaon taekan Ana Boki Moomon? A na kanga ni kabwarabwara bwa antai Iesu Kristo? Wareware ma ataei Reirei ao Berita aika Tabu 11:21, 26. Tera ae tuanga Hyrum Smith te Uea te bwai ae riai ni karaoia bwa e aonga ni kona n reirei te euangkerio? Tera ae nanonaki ni “karekean” ana taeka te Atua, ao ti na kangaa ni karaoa aio? Ti na kanga n “kaikoi” ana taeka te Atua inanora?

• Kaoiia ataei bwa a na tibwaua te kibu are a tangiria ao kabwarabwara bwa bukin tera ngkai a tangiria. Kariaia bwa a na taekina aron te boki ae tabu ni kakabwaiai maiuia ao tera are a karaoia ni kamatebwaia ana taeka te Atua n te mweenga. Kaungaia bwa a na katei aia kouru ni kamwaita riki warekan ana taeka te Atua.

• Bootaki n anenea te kuna ibukin tibwauan te euangkerio, n aron “I Want to Be a Missionary Now(Aia Boki n Anene Ataei,168). Tera ae reirei te anene aei n arora ni kona n riki bwa mitinare ni katoa bong?

• Tibwaua te bwai teuana man “Hope of Israel” iroun Beretitenti Russell M. Nelson ao Titita Wendy W. Nelson (ana bootaki n taromauri te roronrikirake n te aonaaba, Tuun 3, 2018, ChurchofJesusChrist.org) ni kaungaia ataei ni buoka ni ikotiia Natin te Atua man tibwauakin te euangkerio.

Kaungaa te Kamatebwai n te Mweenga

Kaoiia ataei bwa a na maroro ma temanna kaain te utu n aron te bwai ae a reiakinna man Reirei ao Berita aika Tabu 10 ke 11 n te bong aei. Te katooto, a konaa ni tibwaa aron aia baire n tataro n taainako.

Kanakoraoan Ara Anga reirei

Ukoukora te kaotioti ni katoabong. Ngkana ko katauraoi n reirei, tataro ao iangoi booki aika tabu inanon te wiiki. Ko na kunea bwa te Tamnei “e na kaotaa am iango” (Reirei ao Berita aika Tabu 11:13). Taian iango ao namakin iaon aron te anga reirei e kona n roko nakoim n taainako ao n te tabo nako—ngkana ko mwananga ni mwakuri, ko karaoi mwakuri n te auti ke n taetae ma tabeman.