“Mwakoro 4: Martin Harris ao Iteraniba ake a bua: 1824–1828,” Te Boki Wareware n Tuua ma Berita (2002), 17–21
“Mwakoro 4,” Te Boki Wareware n Tuua ma Berita, 17–21
Mwakoro 4
Martin Harris ao Iteraniba ake a bua
(1824–1828)
Ana utu Ioteba Timiti bon te utu ae kainnano ao ma n aki kaubwai ao ma n tangira te mwane. E kan buaka ana utu Ioteba ao e a nako n te tabo ae Pennsylvania bwa e na mwakuri iai ao ikanne e a kaitibo iai ma te aomata ae arana Mr. Hale.
Iai nati Mr. Hale ae te aine ae arana Emma ao ngke a kaitibo ma Ioteba ao e a reke aia tangira ao akea bwa a iein. Ao a nako ni maeka ma ana utu Ioteba. E a buoka tamana Ioteba ni mwakuri aia o-n-aroka.
A bati aomata aika ataia bwa iai taian raurau aika koora iroun Ioteba ao a kataia ni iraei mai rouna. A rangi ni kamwengabuaka Ioteba ao man otei taian kewe ibukina ma ana utu.
A bon rangi ni mwengabuaka Ioteba ma Emma ao a baireia bwa ana manga nako Pennsylvania ike ana maeka iai irarikia ana utu Emma. Ma teuana te kabuanibwai bwa e aki tau aia mwane ibukin te mwananga.
Ioteba Timiti – Karaki 1:61
Iai te aomata ae maeka irarikin Ioteba Timiti, n ana o-n-aroka ae bubura ao aran teuaei bon Martin Harris. E rangi ni bati ana mwane teuaei ao e rangi n akoia naba Ioteba ma Emma. E angania te mwane are e reke iai buokaia ibukin aia mwananga nako Pennsylvania.
E a moanna Ioteba Timiti n rairi taian koroboki ake i aon raurau koora. E aki atai nanon taian koroboki akanne ma e buokaki ni kaotaaki iroun te Atua. E kabongana te Urim ao te Tumi nan ibukin buokana n atai nanon taeka akanne. Ti kona ni wareki baike e rairi inanon te boki ae arana te Boki ni Moomon.
Martin Harris e nako naba Pennsylvania ike e a buoka iai Ioteba n ana rairairi. E rairairi Ioteba man raurau koora ao Martin e korei i aon te beba. Ioteba ao Martin a raira n te tai aei 116 iteraniban te Boki ni Moomon.
Ngke a tia n raira 116 te iteraniba ao e tangira Martin bwa e na uoti nakon mwengana bwa e tangiria kaain ana utu bwa ana noria. E a tuanga te Uea Ioteba bwa e kona ni uota iteraniba akanne Martin nakon mwengana ke aki e kaeka te Uea bwa e aki. E a manga tuatua riki Ioteba ao te Uea e a manga kaeka bwa e aki kona.
Ma e bon kairoro naba Martin n ana iango are e kan uoti iteraniba akanne nakon mwengana ma ngaia are a manga moan tuatua Ioteba nakon te Uea ana iango Martin anne ao n te tai aio e a kariaia te Uea iaan te kaantaninga are ti kaain ana utu aika a na noria ao akea riki irarikia.
E berita Martin bwa e na ongo ana taeka te Uea ao e a uoti nako iteraniba akekei nakon mwengana ike e a kaoti iai nakoia kaain ana utu, ma e aki kawakina ana berita Martin bwa e bon kaotia naba nakoia tabeman riki aomata. Imwin anne ao e a kawakin n te tabo teuana.
Imwin tabetai ao e a manga okira te tabo are kawakin iai ma e aki kona ni kunei. E a kakaai n taabo nako aika mwaiti ma a bon aki kona n reke bwa a bon bua.
E a moanna n rangi n tabetabe nanon Ioteba ibukin iteraniba ake a bua akekei ao ma n aki reke matuna iai.
E a tuangaki Ioteba iroun Iesu bwa e a tia ni karaoa te kaairua ae buakaka Martin Harris. E ngae ngke e berita Martin bwa e na ongo ana taeka te ea ao e bon aki kawakina te berita ao n tokina a bua iteranibaan te Boki ni Moomon akekei, ma ngaia are a riai n aki manga buoka rairana Martin Harris.
D&C 3:12–14
E taku naba Iesu bwa Tatan e tangira 116 taian iteraniba akanne bwa ana bua. Iterniba akaane a tia n reke irouia aomata aika bubuaka ake bon ngaia naba ake a tangiria bwa e na toki ana mwakuri te Atua ao ma n tangiria naba aomata bwa ana aki kakoaua te Boki ni Moomon. Ma e ngae n anne ao e taku Iesu bwa Tatan ma aomata akana bubuaka akanne a bon aki kona n tuka ke ni katoka ana mwakuri te Atua.
D&C 10: Preface, 8, 12, 22–29, 33, 43
E tuangaki naba Ioteba iroun Iesu bwa e na aki katabea ibukia karaki ake a tia ni bua inanon taian iteraniba ake a bua bwa bon karaki akanne aika a bon koreaki i aon raurau aika koora ake e na manga bon rairi Ioteba mai iai. Man anne ao a kona aomata aika raraoi ni wareka te Boki ni Moomon ao ma n kakoaua bwa bon te Boki ae koaua ao ike a kona naba n ataa rongorongon te euangkerio.