“Mwakoro 38: Te Bwaeao ae Rangi ni Maiti Boona,” Te Boki Wareware n Tuua ma Berita (2002), 145–50
“Mwakoro 38,” Te Boki Wareware n Tuua ma Berita, 145–50
Mwakoro 38
Te Bwaeao ae Rangi ni Maiti Boona
Ana Boki Mote
Te moa n mwakoro n Te Bwaeao ae Rangi Ni Mwaiti Boona bon te kaotioti are anganaki Ioteba Timiti. E aranaki bwa ana Boki Mote. Mote bon ana burabeti te Atua. E maeka n taai ake rimoa.
Ana Boki Mote e kaota ana taeka te Atua are taekinna nakon Mote ngke e mena n te maunga ae rietata. Mote e nora te Atua ao e taetae ma ngaia. E taku te Atua bwa iai ana mwakuri Mote teuana are e riai ni karaoia.
Te Atua e kaota te aonnaba nakon Mote. E nori bwaai ni kabane Mote aika a na riki nakon te aonnaba. E noria Natin te Atua ni kabane ake a na maekana te aonnaba.
Te Atua e kitana Mote. E roko Tatan. E tuanga Mote bwa e na taromauri. E bon aki kona n taromauria Tatan Mote. E taku Mote, “Ngai bon natin te Atua.” E butia te Atua Mote bwa e na buokia. Imwin e tuanga Tatan bwa e na kitanna. E rang n un Tatan ibukina bwa Mote e rawa n iria. E bon aki kona Mote n iria. E kitana Mote Tatan.
E kaonaki Mote n te Tamnei Ae Raoiroi. E roko te Atua ma n taetae ma Mote. E taekinna te Atua bwa te Tia Kamaiu, Iesu Kristo, bon Natin te Atua. E taku te Atua bwa a mwaiti aonnaba. Iesu e bon karaoi. E na manga karaoi riki aonnaba. A na bon mwaiti aonnaba n taai nako. Natin te Atua ana maeka iai.
E atai aron ana mwakuri te Atua Mote. E mwakuri te Atua bwa a na buokaki aomata bwa aonga ni maeka ma ngaia n aki toki. E mwakuri bwa e na buokia aomata bwa aonga n riki n ai arona. N te Boki ae Mote e kaota aron te burabeti are Enoka ma te kawa are Tion.
Ana Boki Aberam
Te kauoua m mwakoro n Te Bwaeo, ae Rangi Ni Mwaiti Boona bon ana Boki Aberam. N te bong teuana n Turai 1835, te mwaane ae arana Chandler e roko i Kirtland. Teuae Chandler e kaota rabwatan te mate ae kawakinaki raoi mai Aikubita nakoia aomata. Ngkana a mate aomata i Aikubita rabwataia a niniraki n te kunnikai. (Rabwataia aranaki bwa maami.)
Tabeua taian ninira bon beba aika rang ni bwai n ikawai aikai ao bon raon rabwata ni mate aikai. Iai koroboki tabeua aika kaokoro aika a mena i aon beba aikai. Chandler e a kakaea te aomata temanna ae kona ni wareka te koroboki aei. E ongo bwa Ioteba Timiti e kona n raira te koroboki anne.
E nora te koroboki Ioteba i aon te beba. E kona ni wareka te koroboki. E tuanga Chandler are e koreaki inanona. Tabeman mai rouia Kain te Aro a uoti nira ni beba aikai mai roun Chandler.
Ioteba e raira te koroboki nakon te beba. Oliver Cowdery ma William Phelps a korei baike e rairi Ioteba nakoia.
Koroboki akanne bon aika e korei te burabeti ae rangi n ataaki te Aberam. Aberam e maeka i Aikubita n taai aika baka nako. Iesu e taetae ma Aberam.
Iesu e tuanga Aberam aron maiura imwain nakora nakon te aonnaba. E taku Iesu bwa e karika aonnaba. E karaoi taai, namwakaina ma taian itoi. E kariki kaai, maan ni kabane ma aomata.
Aberam e karaoi taekan ana reirei Iesu ni kabane. Te Boki ae Aberam e buokira bwa ti na ataia burabeti ma te nakoa n ibonga.
Abraham 1:31
Koroboki Ake e Korei Ioteba Timiti:
Te kateniua ni mwakoro n te Boki ae Te Bwaeao Ae Mwaiti. Boona a bon koreaki iroun Ioteba Timiti. N te boki are Ioteba Timiti - Rongorongona, Ioteba e a kaota te moan mii ni kaotioti nakoina. E kaota aron moan kunean koora aika baatua. Ioteba e a kaota naba aroia anera ma i karawa ake anganna ma Olivery Cowdery te nakoa n ibonga. N te boki ae Ioteba Timiti - Mataio, Ioteba e kaeti mwakoro tabeua n te Bwaibwara.
Te ka aua ni mwalkoro n te Bwaeao ae Mwaiti Boona bon taekan Ana Koaua te Ekaretia. N te bong teuana temanna te aomata ae roko ni kawara Ioteba Timiti. Te aomata aei ae korea ana boki teuana. E tangiri bwaai tabeua man te Ekaretia. E a butia Ioteba Timiti bwa e na tuanga bwa e kanga ni moa n kateaki te Aro.
Ioteba Timiti e korea bukin moan katean te Ekaretia. E kaoti bwaai ake a kakoauai aomata n te Ekaretia. Te Atua e bon buoka Ioteba Timiti n ata are koreia. Ioteba e korei te bwi ma teniua bwaai aika kakawaki. E arani bwa Koauan te Onimaki.
N Mati 1, 1842, te Koaua n te Onimaki a boretiaki nutibeban te Aro. Kain te Aro a wareki Koauan te Onimaki. A kakoaua are e a tia ni koreia Ioteba.
Taekan Ana Koaua Ana Ekaretia Iesu Kristo Irouia Aomata Aika Itiaki n Tokini Bong
Joseph Smith
1.
Ti kakoaua te Atua, te Tama ae akea tokina ao Natina ae Iesu Kristo ao te Tamnei ae ae Raoi roi.
2.
Ti kakoaua bwa a na reke kaia aomata ni kabane ibukin oin aia bure, ma tiaki man ana bure Atam.
3.
Ti kakoaua bwa ibukin maten Iesu Kristo, a kona ni kamaiuaki aomata ni kabane ngkana a ongeaba nakon taian tua ma mwakuri nako n te Euangkerio.
4.
Ti kakoaua bwa moan tuan ma mwakurin te Ekaretia bon aikai: Teuana,Onimakinan te Uea ae Iesu Kristo; uoua, Te Raira n nano; teniua, Te Bwabetitoaki ni kateboaki i aan te ran nakoni kabwarani bure; aua, Te Katokabai i aon atura ibukin karekean te bwai n tituaraoi ae te Tamnei ae Raoiroi.
5.
Ti kakoaua bwa a akikona aomata ni kabwarabwara te Euangkerio ke ni karaoi mwakurina nako, ma ti ngkana e kaotia te Atua nakoia ana tabonibai, ao ti ngkana a katokai baia naba i aon atun te aomata ma n anganna te kariaiakaki ni kabwarabwara te Euangkerio.
6.
Ti kakoaua bwa e riai n ti tebo aron te nakoa n ana Ekaretia Iesu Kristo ae ngkai ma are rimoa. Nakoa akanne bon, abotoro, burabeti, taani kawakin ekaretia, tan Reirei, taan taekina te Euangkerio ao a bati riki.
7.
Ti kakoauai bwaai n tituaraoi aika taian newe (taetae nako), te taetae ni burabeti, te kaotioti, taiani mii, katoki aoraki, kabwaraan nanon taian newe ao bwaai n tituaraoi riki tabeua.
8.
Ti kakoaua te Bwaibwara bwa bon ana taeka te Atua. Ma ti kakoaua naba bwa e aki tabwanin rairana. Ti kakoaua bwa Ana Boki Moomon bon ana taeka naba te Atua.
9.
Ti kakoauai bwaai ni kabane ake e kaoti te Atua rimoa ao ngkai. Ti kakoaua naba bwa e na boni manga kaoti bwaai aika korakora ma ni kakawaki riki ake a kaeti nakon Uean te Atua.
10.
Ti kakoaua botakia tibun Iteraera ma kaokaia baronga ake tebwina, ao e na kateaki naba Tion (Ierutarem ae Boou) i aon te kaontenanti ae Amerika. Ti kakoaua naba bwa e na tautaeka Kristo n aomata i aonnaba, ao ma ni kabouaki aonnaba ao e na mimitong n ai aron te bwaretaiti.
11.
Ti kaotia bwa iai inaomatara n taromauria te Atua n aron ae ti tangiria. Ti kakoaua naba bwa a inaomata aomata n taromauri n aron nanoia n te tabo are a tangiria, ao ma n taromauri nako baike a tangiri.
12.
Ti kakoaua te aantaeka irouia uea, beretitenti, taan tautaeka, ao taani moti, n ongeaba, ni karinea ao ni buoka kamatoaan te tua.
13.
Ti kakoaua bwa ti riai n etieti, ni koaua, ni itiaki, n akoi, ao ti riai ni karaoa ae raoiroi nakoia aomata ni kabane. Ti atongnga ni koaua ba ti ira ana reirei te abotoro ae Bauro. Ti kakoauai ma ni kantaningai bwaai ni kabane aika raraoi, ti a tia ni keiakin taiani kanganga aika mwaiti n taai aika nako ao ara kantaninga bwa ti na bon tokanikai i aoni kanganga ni kabane aika ana manga kaoti nako ira. Ti keiaki ni karekea te raoiroi, te tara raoi, te taekinaki raoi ao te bwai ae tau ibukin te karaoiroaki.
JOSEPH SMITH