“Mwakoro 13: Ioteba ma Emma: Turai 1830,” Te Boki Wareware n Tuua ma Berita (2002), 51–55
“Mwakoro 13,” Te Boki Wareware n Tuua ma Berita, 51–55
Mwakoro 13
Ioteba ma Emma
(Turai 1830)
A mwaiti aia kanganga Ioteba ma Emma. Akea kaubwaia. A tangiria ni karekeia natia. Emma ti temanna natina te teinimwane ae uarereke, ma e a manga mate. E nanokawaki Emma. Rimwi riki a bon manga mwaiti natia ma Ioteba.
E rangi n tabeaianga nanon Ioteba ibukia ana utu. E tangiria bwa e na tararuaia. E tangiria n ununiki taian kain amwarake bwa e aong n tauraoi kanaia ana utu.
Ioteba e bon tabeaianga naba nanona n te Ekaretia. Aomata aika bubuaka a karaoi mwakuri aika bubuaka nakoia Taan Itiaki. Tabeman mai buakoia taan kairiri n te Aro a karabaia mai rouia aomata aika bubuaka aikai. Ioteba e kataua te mwakuri korakora bwa e na buokia Taan Itiaki.
N taai tabetai Ioteba e a kitana mwengana n nako ni buokia Taan Itiaki. Ioteba e rawawata ni kitania ana utu. E bon nanokawaki Emma ngkana e kitania Ioteba. E raoraoma ibukina.
Ioteba e titirakina Iesu bwa tera are na karaoia. Iesu e tuanga te burabeti ae Ioteba bwa e na aki raraoma ibukin ana kanganga ni kabane. E tuanga Iesu bwa e na aki makuia aomata aika buakaka. E taku Iesu nakon Ioteba bwa e na buobuokia n taai nako.
E tuangaki Ioteba iroun Iesu bwa e na ununiki ana kai n amwarake ibukia ana utu. Imwina e na nako ni buokia Taan Itiaki. E tuangaki Ioteba iroun Iesu bwa e na aki raraoma ibukin te amwarake, te kunnikai, ke te mwane. Taan Itiaki a na angan Ioteba bwaai ake e kainnanoi.
Iesu e angan Ioteba te kaotioti ibukin Emma. E taetae Iesu ibukin Emma ao e taku bwa te aine ae kaokoro arona. E a tia n rineia bwa e na kakaraoi mwakuri aika kakawaki.
E taku Iesu bwa Emma e riai n akoa Ioteba ngkana iai rawawatana. E riai ni buokia bwa e na kukurei ma n aki katabeaiangaki nanona.
E taku Iesu bwa Emma e riai n reireia Taan Itiaki. E riai ni buokia bwa a na rabakau taekan reirei aika tabu. E taku bwa te Tamnei are Raoiroi e na bon buokia n ata aron are e na reirei.
E taku Iesu bwa Emma e riai ni kamanena ana tai ni kekeiaki. E riai ni kekeiaki ao ma n korei taekan bwaai aika bati.
Iesu e tuanga Emma bwa e na rinei anene ibukia Taan Itiaki bwa a na anenei. Anene a na boretiaki n te boki n anene.
Te Atua e tangiria n ongora n aia anene aomata aika a karaoa te raoiroi ni kabanea. Aia anene ni kabane bon tataro nakoina. Aomata aika karaoa te raoiroi ni kabanea aika anene nakon te Atua a na bon kakabwaiaki.
Iesu e tuanga Emma bwa e na nanorinano. E tuanga bwa e na tangira buna. E tuanga bwa e na kukurei ibukina bwa e rangi ni bati te kakabwaiaki ae na anganaki Ioteba.
Iesu e tuanga Emma bwa e na aki tabeianga nanona n aron te maiu aei. E riai ni katauraoia nakon te aonnaba ae rangi n raoiroi riki i karawa. E riai ni kukurei ao ma n ongeaba nakon ana tua ni kabane te Atua. Ngkanne e a kona n nako karawa.
E taku Iesu bwa bwaai ni kabane aika e a tia n tuanga Emma bon bwaai ibukia aine ni kabane.