Mwakoro 21

Te Burabeti e a Nako Missouri

(Mei–Tun 1831)

Mwaita kain te Aro a bon maeka naba i New York. Ioteba Timiti ma Sidney Rigdon a mena i Kirtland, Ohio. Ioteba e tuangia kain te Aro i New York bwa a na nako Ohio. A ongeaba nakon te burabeti. A nako Ohio.

Iesu e tuanga Ioteba ma Kain te Aro i Kirtland bwa a riai n tibwai abaia ma kain te Aro mai New York. Teuare Leman Copley e rangi ni bati abana. E berita bwa e na tibwai abana. Kain te Aro ma i New York a mwananga nakon te aba anne.

D&C 48:2

Teuare Leman Copley e aki kawakina ana berita. E aki tangiria kain te Aro mai New York bwa a na aban abana. A riai ni manga kitana ikanne. Akea aia tabo ae ana kona ni maeka iai.

Newel Knight e riki bwa aia mataniwi. E aki ata te baere e na karaoia. E a nako ni kawara te Burabeti are Ioteba. E titirakinna Ioteba bwa tera te bwai ae a riai ni karaoia Kain te Aro.

Te Uea e tuanga Ioteba ma Kain te Aro mai New York bwa a riai ni waetata ni mwananga nako n te kawa ae Missouri.

D&C 54:7–9

Imwain mwanangaia a karaoa aia kabowi Kain te Aro i Kirtland. Bon teniua aia bong ni kabowi. Te Uea e anga taian kaotioti tabeua aika kakawaki nakon Ioteba Timiti.

Te Uea e tuanga Ioteba bwa e na katuba temanna ae na riki bwa te moa n ibonga ae kakannato n te Ekaretia. Te ibonga ae kannato e na tia n anganaki te nakoa n ibonga ae te Merikitereka. Bon taan kairiri ngaia n te Ekaretia. A mwaiti taan kairiri n te Ekaretia aika a tia ni kabiraki nakon te nakoa n ibonga ae kannato.

E taku te Uea bwa a riai tabeman nako ni karaoi mwakuri ni mitinare i Missouri. A riai n tataekina te euangkerio i aon kawaia. Ngke e a tia aia kabowi, a nako mitinare nako Missouri.

D&C 52:9–10

Te Uea e tuanga Ioteba bwa te kabowi n te Aro are na manga karaoaki e na bo i Jackson County i Missouri. E tuanga Ioteba ma raona bwa a na nako iai. Tion e na kateaki n te tabo ane Jackson County. Iesu e na kaota te tabo are a na katea iai te kawa ae Tion.

D&C 52:1–5