“Mwakoro 34: Te Atua e Kauringia te Botannaomata ae Tion: Turai–Aokati 1833,” Te Boki Wareware n Tuua ma Berita (2002), 128–31
“Mwakoro 34,” Te Boki Wareware n Tuua ma Berita, 128–31
Mwakoro 34
Te Atua e Kauringia te Botannaomata ae Tion
(Turai–Aokati 1833)
Tatan e ribaia Kain te Aro bwa a na maeka i Jackson County. E aki tangiria bwa a na katea te kawa ae bubura ae Tion. E tangiria aomata tabeman bwa a na ribaia n aia nano n rang. Tatan e tangiria aomata aika buakaka bwa a na kanakoia Kain te Aro mai Jackson County. Aomata aika buakaka a bon karaoa are tangiria Tatan. A kataia ni kan kanakoia Kain te Aro.
Aomata aika un a ikotaki ma n iangoa aia botaki ni kakiriwe. Te botaki ni kakiriwe anne a kanakoia tabeman mwaane nakoia mataniwin te Aro. Mwaane akanne a tuangia Kain te Aro bwa a na kitana Jackson County. Ma taan kairiri n te Aro ataia bwa te Atua e tangiria bwa a na katea te kawa ae Tion i Jackson County. A tuangia taan kakiriw akanne bwa aki kona ni kitana aia tabo anne.
A oki rikaki mwaane akanne ma n kawara aia botaki ni kakiriwe. A rangi n un taan kakiriwe. A ninia aia auti ni boreti Kain te Aro. A uruakia. Kain te Aro aikoa kona ni manga boreti booki ma nutibeba.
Taan kakiriwe a taua Ebikebo Partridge ma te Tari Allen ao a bukunnakuia. A katoka te korota ae kabuebue ma taian burae ni man i aon rabwataia. Taan kakiriwe a kuneia Kain te Aro ake tabeman ao a oreia.
Teniua te bong imwina ao taan kakiriwe a rinanon te kawa i aon aia aoti. A takaruaea taekan nanoia n nanon rang ibukia Kain te Aro. A taku bwa a na uebania ake a reke irouia. A kataia ni kakaeia mataniwin te Aro. A karabaia, mataniwin te Aro mai rouia taan kakiriwe.
Temanna ma ibuakoia mataniwi bon Oliver Cowdery. E kitana Jackson County. E nako n nora Ioteba i Kirtland.
Oliver e tuanga Ioteba aron are a karaoia aomata aika bubuaka i Tion. A kan ataia Kain te Aro i Jackson County bwa tera ae a na karaoia.
Ioteba e tuanga Oliver taekan taian kaotioti tabeua are e anganna Iesu. E taku te Uea bwa Kain te Aro a riai ni katea te tembora i Tion. Kain te Aro a riai ni kabwakai aia kabwian bai. Aia kabwia ni bwai e na kaboa karaoan te tembora. Iesu e tuanga Ioteba bwa e na rikirake ni bubura, Tion ngkana a ongeaba Kain te Aro nakon te Atua. A na bon katuaeaki Kain te Aro ngkana a aki ongeaba nakon te Atua.
E taku Iesu bwa a riai n ongeaba Kain te Aro nakon tuan te aba ni kabane. Kain te Aro a na ira te rinerine ma n rineia aomata aika raoiroi bwa taan kairiri n te aba. N taai tabetai aomata aika buakaka a riki bwa taan kairiri n te aba. Aio are e a karekea te aki kukurei nakoia aomata aika raoiroi.
E tua te Uea nakoia Kain te Aro bwa a na toki man karaoan bwaai aika buakaka. E taku Iesu nakoia Kain te Aro bwa a na a aki raraoma ibukia botaki n aomata aika buakaka akanne. A riain aki ribaia aomata aika buakaka. A riai ni kabwarai aia bure aia kairiribai. A riai ni buaka ngkana a tuangaki i roun te Atua bwa a na buaka. Ana katuaeaki aomata aika buakaka iroun te Atua.
Imwina, Iesu e tuangia Kain te Aro i Tion bwa e na iai taian kakumekume aika a na riki nakoia. A tia n aki ongeaba nakon taian tua ni kabane. N te bong teuana, Iesu e na buokia Kain te Aro ni katea Tion. Ngkanne Iesu e na kakabwaia.