te tia koroboki e koroboki iaon te beeba

Tianuare 25–31

Reirei ao Berita aika Tabu 6–9

“Aio Tamnein te Kaotioti”

Moana te katauraoi n reirei man warekan Reirei ao Berita aika Tabu 6–9. Nakomai, Iriirai—Ibukiia Aomata n Tatabemaniia ao Utu ao te karaki aio e kona ni kauki iango aron r eireinakiia ataei n am kiraati.

Korei Am Namakin

te aikaon ibukin te tibwatibwa

Kaunga te Tibwatibwa

Ataei a ataa karakin Oliver Cowdery ibukin kaekan ana tataro? (taraa Aika Itiaki, 1:58–60). Tao iai naba aia namakin ma te tataro are a kona n taekinna.

te aikaon ibukin te anga reirei

Reirei te Reirei: Ataei aika a Uarereke

Reirei ao Berita aika Tabu 6:5; 8:2; 9:7–9

Tamara are i Karawa e kona n taetae nakoira rinanon te Tamnei are Raoiroi.

Buokiia ataei bwa a na ataia bwa iai Tamaia ae tangiria i Karawa are e kakauongo nakon aia tataro ao ni kaekai rinanon te Tamnei are Raoiroi.

Waaki ni Kakukurei aika a Kona ni Karaoaki

• KamanenaMwakoro 5: Iotebwa Timiti ao Oliver Cowdery” (Karakin Reirei ao Berita aika Tabu, 22–25, ke te witeo ae kaineti nako iai ChurchofJesusChrist.org) n tuangiia ataei aron Oliver Cowdery ao are e reiakina aron Tamara are i Karawa n taetae nakoira. Tuangiia ataei bwa a na tuangko te mwakoro are mamaten nanoia n te karaki, ao tuangiia bwa a na ikaruoruo n tuangko aron Oliver Cowdery.

• Tuangiia ataei bwa Oliver Cowdery e kataia n raira Ana Boki Moomon ma e aki kona, ma ngaia are Iotebwa e butiia te Uea bwa tera bukina. Warekia nakoia ataei ana kaeka te Uea: ko riai moa ni kamatenanoa n am iango; ao ngkanne ko riai n titirakinai ngkana e riai” (Reirei ao Berita aika Tabu). Kaoiia bwa aongkoa a kamatebwai ao a tataro. Buokiia ataei bwa a na ataia bwa aio are ti kona iai ni karekei kaeka mairoun naba te Uea—man te kamatebwai ao butiakina ibukin Ana buoka.

  Oliver Cowdery

  Oliver Cowdery, iroun Lewis A. Ramsay

• Tuangiia ataei bwa a na riing atuia ao bwabwaia ngkana ko wareki taeka “te iango” ao “te nano” inanon Reirei ao Berita aika Tabu 8:2. Buokiia bwa a na ataia bwa Tamara are i Karawa e taetae nakoira rinanon te Tamnei are Raoiroi, are e anganiira iango ao namakin. Anene ni kabane ibukin te Tamnei ae RaoiroI, n aron “The Holy Ghost” (Aia Boki n Anene Ataei,105). Tera ae reiakinaki n te anene n aron te Tamnei n taetae nakoira? Tibwa te namakin ngke ko namakina te Tamnei are Raoiroi n am iango ao nanom.

Reirei ao Berita aika Tabu 6:33–36

Ma ana ibuobuoki te Tia Kamaiu, I aki kainnanoa ae N na maaku.

Iotebwa Timiti ao Oliver Cowdery e mwaiti bukina ae a maaku iai—te bwainikirinaki ao te maiu n raarikin bon ngaia tabeua kaangaanga ae a kaitarai. Ana rongorongo te Uea nakon Iotebwa ao Oliver e kona naba kaungaiia ataei ngkana a namakina te maaku.

Waaki ni Kakukurei aika a Kona ni Karaoaki

• Tuangiia ataei bwa a na okira te taeka “tai maaku, te nanai ae uarereke” (Reirei ao Berita aika Tabu 6:34) tabeua te tai. Kabwarabwara bwa te nanai bon te boota ni man, n aekan te tibu. Kaota tamnein te Tia Kamaiu ae te tia kawakin tiibu (taraa Bokin Tamnein te Euangkerio, nambwa 64) ao kakoaua bwa E tabe n tarataraira n aekan te tia kawakin tiibu ae tarataraia Ana tiibu. Bukina bwa E tangirira, ti na aki maaku.

• Tuangiia ataei bwa a na baka n riki bwa te nanai n tiibu ae a maaku. Tera ae a na kona n tabetai tiibu ni makua? Tuanga te ataei temanna bwa e na riki bwa te tia kawakin tiibu ae tabe ni kawakina te tiibu. Tera ae ti makua n tabetai? Kaota am koaua bwa Iesu Kristo bon aekan ara tia kawakin tiibu ao bwa E kona ni katoki maakura. Bootaki n anenea te anene ibukin te Tia kamaiu, n aron “Little Lambs So White and Fair” (Aia Boki n Anene Ataei, 58).

• Wareka Reirei ao Berita aika Tabu 6:36 nakoia ataei, ao tuangiia bwa a na okira te taeka “tai nanououa, tai maaku.” Buokiia ataei bwa a na iangoi kawai are a kona “n taraa,” ke ni uringa, te Tia Kamaiu inanon te wiiki ae na roko (taraa naba te iteraniba ibukin waaki ni kakukurei n te wiki aei).

te aikaon ibukin te anga reirei

Reirei te Reirei: Ataei aika a Ikawai Riki

Reirei Ao Berita Aika Tabu 6:5, 15-16, 22-23; 8:2; 9:7–9

E taetae te Tamnei are Raoiroi nakon au iango ao nanou.

Ataei ake ko reireiniia a na tia ni karekea te Tamnei are Raoiroi. A ataia ao ni kinaa te kaotioti nakon te aomata mairoun te Tamnei?

Waaki ni Kakukurei aika a Kona ni Karaoaki

• Koreia iaon te burakibooti te atu ao te buroo. Buokiia ataei bwa a na wareki kiibu ao iangoia bwa tera ae kabwarabwaraa te Tamnei are Raoiroi bwa e taetae nakon ara iango, nako nanora ke ni kauoua: Reirei ao Berita aika Tabu 6:15, 23; 8:2; 9:8; 9:9. Tuangiia ataei man am taneiai, e kanga arona ngkana te Tamnei ae Raoiroi e taetae nakon am iango ao nanom.

• Wareka ni bootaki Reirei ao Berita aika Tabu 6:5, ao kaoiia ataei n taekin namakin ake a reke irouia n te tataro ao kaekan aia tataro. Buokiia ni iangoi ana katooto temanna ni booki aika tabu are tataro ao e karekea kaekaan te titiraki (taraa 1 Nibwaai 2:16; Enoti 1: 1-6; Ita 2:18-3:6).

• Koroia iaon te burakibooti E kanga n taetae nakoira te Tamnei are Raoiroi? Kaoiia ataei ni kakaea inanon Reirei ao Berita aika Tabu 6: 15-16, 22-23; 8:2; 9:7-9 ibukin kaekaan te titiraki. Tibwa te namakin ae ko namakina te Tamnei are Raoiroi n taetae nakoim.

Reirei ao Berita aika Tabu 6:36-37

“Tai Maaku ni Karaoa ae Raoiroi”

Ataei ake ko reireiniia e kona n taai aika bati a namakina te maaku n tei ibukin te eti. Reirei ao berita aika Tabu 6:33–37 e kona ni kaungaiia bwa a na unga nanoia, inanon taai ni kaangaanga.

Waaki ni Kakukurei aika a Kona ni Karaoaki

• Wareki ni kabane Reirei ao Berita aika Tabu 6:33, ao ni maroroakina aroia tabeman a kona ni maaku ni karaoa ae raoiroi (taraa naba kiibu 28-29). Buokiia ataei ni kakai taeka ao kibuntaeka inanon kiibu 33-37 are buokiia n anganiia te korakora ni karaoa ae raoiroi.

• Buokiia ataei ni karaoi korotamnei ake a kona ni kaoti ni mweengaia ni kauringiia n “taraa [Iesu Kristo] n ami iango ni kabane” (kibu 36). Ngke a karaoa aia tamnei, maroroakina are te taratara nakon te Tia Kamaiu nanona ao e na kanga ni kawakiniia.

• Bootaki anenea te kuna ae taekan te korakora, n aron “Dare to Do Right” (Aia Boki n Anene Ataei,158).ke “Ti na Waaki Nako” (Anene, nambwa. 243). Butiia ataei ni kakaea n te anene tabeua bukina bwa e aera ti na “aki maaku” (kibu 36).

Reirei ao Berita aika Tabu 8:10

I kona ni bubuti.

Rinanon booki aika tabu, E kauringiira te Uea ni iai ara onimaki Irouna. Ko na kanga ni buokiia ataei ake ko reireinia bwa a na kunea te onimaki ae korakora iroun Iesu Kristo?

Waaki ni Kakukurei aika a Kona ni Karaoaki

• Koreia iaon te burakibooti N Akea ngkoe ko aki kona ni karaoa te bwai teuana; ma ngaia are bubuti inanon . Kaoiia ataei ni kataia ni iangoa te taeka are tau inanon uoua te mwaawa. Ngkanne bootaki wareka Reirei ao Berita aika Tabu 8:10 ni kakaea te kaeka. Bwaai baikara ae ti kona ni karaoi ngkana iai ara onimaki?

• Imwiin warekakin ni kabane Reirei ao Berita aika Tabu 8:10, buokiia ataei ni iangoi bwaai ake a kona ni butiia te Uea bwa a na buokaki iai. Kaoiia bwa a na korea te tamnei are onea mwiin te bwai teuana ae a bubuti ibukina. Ngkana a kaoti aia tamnei nakoia kaain te kiraati, ataei ake tabeman a na keetinna bwa tera ae e tei ibukin te tamnei.

te aikaon ibukin te kamatebwai

Kaungaa te Kamatebwai n te Mweenga

Buokiia ataei n rinea te taeka ae uarereke man Reirei ao Berita aika Tabu 6–9 bwa a kan taekinna ma tabeman, n aron are “tai maku ni karaoa ae raoiroi” (6:33), “tai nanououa, tai maaku” (6:36), ke “akean te onimaki akea te bwai ae ko kona ni karaoia” (8:10).

Kanakoraoan Ara Anga reirei

Kabonganai karaki. Karaki a buokiia ataei n ota n ana reirei te euangkerio ibukina bwa a kabwarabwaraa bwa a kanga tabeman ni maiuakini reirei akanne. Ngkana ko reirei, kakaei kawai ni kairi karaki—man taian boki aika tabu, man karakin te Ekaretia, ke man oin maium—are kaoti taian reirei inanon booki aika tabu.

iteraniba ibukin waaki ni kakukurei: Iesu Kristo E kona ni buokai ngkana I namakina te maaku