Ritembwa 28–Tianuare 3

Reirei ao Berita aika Tabu 1

“Kakauongo, O Ngkami Aomata”

Am moan waaki ni katauraoi n reirei bon te tataro korakora ni kamatebwai Reirei ao Berita aika Tabu 1. Ngkana kam karaoia, kakauongo ibukin namakin n aron kainnanoia ataei, ao kakaei reirei ake a bongana nakoia. Taian namakin aikai a na buoki ngkami ni bairei waaki ni kakukurei aika bongana n reirei aikai.

Korei Am Namakin

Kaungaa te Tibwatibwa

Taua n tabeka ieta Reirei ao Berita aika Tabu, ao tuangiia ataei n taekin bwaai nako ake a atai ibukin taekan te boki aio. Antai ae koroia? Tera kanoana? Bukin tera ngkai e kakawaki? Bukin te buoka, kam kona n rairaki nakon “Mwakoro 23: Reirei ao Berita aika Tabu,” (Karakin Reirei ao Berita aika Tabu, 90-92). Taekina am tangira ibukin Reirei ao Berita aika Tabu ao ingaingan nanom n reirei ma iai n te ririrki aei.

Reirei te Reirei: Ataei aika a Uarereke

Reirei ao Berita aika Tabu 1:4

Rinanoia Ana Burabeti, te Uea E kauringiira kaangaangan te tamnei.

E katanoata te Uea bwa bwanana bon te “bwanaa ni kauring.” Ko na kanga ni kaungaia ataei bwa a na ongo ao n ongeaba n te kauring ae E anga?

Waaki ni Kakukurei aika a Kona ni Karaoaki

• Anganiia ataei bwa a na taui tamnein kanikina ni kauring—n aron kaangaanga n te kawai, te bong buaka, ke te boitin—ao taekina aroia ni kauringiira te kaangaanga. Ke taekina te karaki n aron te tai are ngke ko ongeaba nakon te kauring. Kabotaui kauring aikai nakon Ana kauring te Uea ae anganiira rinanoia burabeti. Kakoaua bwa E kauringira bukina bwa E tangiriira ao e tangiriira bwa ti na kamanoaki (taraa naba iteraniba ni kakukurei ibukin te wiiki aio).

• Wareware nakoia ataei man Reirei ao Berita aika Tabu 1:4: “Ao te bwana ni kauring bon nakoia aomata ni kabane.” Taekin bwaai tabeua are te burabeti e a tia n te tai ae nako n reirei bwa ti na kona ni kawakiniira. Kaota tamneina ngkana iai. Taekina are ko ira nanon ana reirei te burabeti.

Reirei ao Berita aika Tabu 1:17, 29

Iotebwa Timiti bon ana burabeti te Atua.

Ngke ngkoe ao ataei kam moana kamatebwaian te Reirei ao Berita aika Tabu, buokiia bwa a na katea aia koaua ibukin weteakin Iotebwa Timiti ni weteakina ae mimitong.

Waaki ni Kakukurei aika a Kona ni Karaoaki

• Kaota tamnein te Burabeti ae Iotebwa Timiti (taraa Nakomai, Irirai—Ibukiia Aomata n tatabeman ao Utu; taraa naba Bokin Tamnein te Euangkerio, nambwa. 87). Tuangiia ataei bwa a na tei ni kaniia te tamnei ao n taekina are a ataia n aron Iotebwa Timiti.

• Anganiia ataei bwa a na taua tamnein te Tia Kamaiu ao tamnein Iotebwa Timiti. Taekinna nakoia aron te Tia Kamaiu are anganiira rinanon Iotebwa Timiti, n aron te tua (taraa te kibu 17) ao Ana Boki Moomon (taraa te kibu 29). Tuangiia ataei bwa inanon Reirei ao Berita aika Tabu a na reiakina aron ana tua te Uea ae anga nakon te Ekaretia rinanon Iotebwa Timiti.

• Taekina am namakin iroun Iotebwa Timiti, ao kakoaua bwa te Atua “wetea au toro Iotebwa Timiti, jun.,ao n taetae nakoina mai karawa” (kiibu 17).

Reirei ao Berita aika Tabu 1:38

Ana taeka te burabeti bon ana taeka te Atua.

Ataei aika ko reireiniia a tia n ongo ngke te Beretitenti n te Ekaretia e taetae, ma aki ataia are ana taeka a roko mairoun te Atua. Buokiia bwa a na kinai ana taeka te burabeti bwa bon ana taeka te Atua.

Waaki ni Kakukurei aika a Kona ni Karaoaki

• Karaoa te takakaro ae uarereke man anga kairiiri nakon temanna te ataei n okira te kaetieti ibukiia ataei ake tabeman. Buokiia bwa a na noora are rimwiin ana kaetieti te ataei bon titebo ma irakin nanon am kaetieti ao bwa te burabeti bon titebo bwa e ira nanon te Uea. Wareka nakoia te kabanea n rain n Reirei ao Berita aika Tabu 1:38: “Bwa man oin bwanau ke man bwanaia au toro, bon titebo.”

• Uaia n anenea te anene n aroia burabeti, n aekan te kabanea ni kibu n “Follow the Prophet” (Children’s Songbook, 110–11). Tibwa am koaua bwa te burabeti e taekin ana taeka te Atua.

• Tibwai tamnei, rawerawe, ke te tamnei n te witeo ibukin te burabeti ae maiu. Kaota am koaua bwa te burabeti e tuangira te bwai ae tangiria te Atua bwa ti na ataia. Kaoiia ataei bwa a na tibwa te bwai ae a namakinna ibukin te burabeti.

  

  E reireiniira te burabeti aron te bwai are tangiria te Atua bwa ti na ataia.

Reirei te Reirei: Ataei aika a Ikawai

Reirei ao Berita aika Tabu 1:15-17, 29-30

Te Uea e ataa te kaangaanga ae ti kaitara ma ngaia, ma ngaia are E kaoka te euangkerio rinanon Iotebwa Timiti.

Ko kona ni buokiia ataei ni katauraoi ibukin kaangaanga n taai aika a na roko man reireiakiia aron Kaokakin te euangkerio are e katauraoa kamanoan te tamnei.

Waaki ni Kakukurei aika a Kona ni Karaoaki

• Buokiia ataei ni iangoi tabeua kaangaanga inanon te aonaaba n te bong aei. Rinanon Reirei ao Berita aika Tabu 1: 15-16 ma ngaia ao buokiia ni kinai tabeua kaangaanga are e taetae ni burabetii te Uea bwa a na riki. Kaoiia bwa a na kakaea inanon kiibu 17 ao 29-30 tera ae e a tia ni karaoia te Uea ni buokiira ni kaitarai kaangaanga n ara tai.

• Tuangiia ataei bwa a na iangoia ni katauraoi ibukin te mwananga. Tera ae a na uotia? E na kanga ni buokiia bwa a na ataia bwa e na kakarau n aia tai ni mwananga ke aia kaa e teke rabwana? Uaia ni wareka te kibu 17, ao maroroakina te bwai are e ataia te Uea bwa e na riki nakoira ao E kanga ni katauraoi ibukina. (Ngkana e riai, kabwarabwara bwa te “kabuanibwai” bon te urubekebeke ke te bwai ae kakamaaku.) A na kanga ana tua te Atua ni buokiira n tabeakina te kaangaanga n ara tai?

Reirei ao Berita aika Tabu 1:30

Ana Ekaretia Iesu Kristo ibukiia Aika Itiaki ni Boong aika Kaitira bon ana Ekaretia te Tia Kamaiu ae “koaua ao ni maiu.”

Ko na kanga ni buokiia ataei ni butimwaea te kakabwaia ae korakora n te riki bwa kaain te “koaua n tii ngaia ao te ekaretia ae maiu”?

Waaki ni Kakukurei aika a Kona ni Karaoaki

• Kaoiia ataei bwa a na korei bwaai tabeua ake a maiu ao ake tabeua a aki (ngkana e riai, uoti taian tamnei ke katooto). Tera te kaokoro imarenan bwaai aika a maiu ao aika a aki maiu? Ikotaki wareka te kibu 30. Tera ae nanonaki bwa te Ekaretia e “koaua”? bwa e “maiu”?

• Kaota te tamnei, ae koreaki ae tamnein te Tia Kamaiu, ao titirakiniia ataei ni kabwarabwara ma tauran te ruu ae tiringaki. Kabongana te waaki ni kakukurei aio ni buokiia ataei n nooria bwa ibukiia aomata aika mwaiti, Ana Ekaretia te Uea ae koaua e mena inanon te “roo” ao te “rootongitong.“ Ti na kangaa ni buokiia tabeman bwa a na reiakina taekan te Ekaretia?

Reirei ao Berita aika Tabu 1:37–38

Ana taeka te Uea akea tokina.

Ko kona ni buokiia ataei ni katea aia onimaki iroun Iesu Kristo man reireinakiia ae a koaua ao a onimakinaki Ana taeka.

Waaki ni Kakukurei aika a Kona ni Karaoaki

• Buokiia ataei ni kabotaui bwaai aika a aki teimatoa, n aekan te buroburo ke mwakorokoron te tino ake a bwaka, ma bwaai ake a taraa n teimatoa, n aron te maunga ke taai. Tuangiia bwa a na kakaea inanon kiibu 37–38 tabeua bwaai ake E taku te Uea bwa a teimatoa. Bukin tera bwa te kakabwaia n ataan ana taeka te Atua e na “aki mauna nako”?

• Buokiia ataei bwa a na ataia bwa “bwanaia au toro” ni ikotaki ma bwanaia abotoro ao burabeti. Buokiia ataei ni kakaei taian “taeka ni burabeti ao berita” n ana marooro temanna ana toro te Uea n te maungatbu ae nako. Kaota am koaua bwa taeka aikai a roko mairoun te Uea ao a na “kakoroaki bukiia.”

Kaungaa te Kamatebwai n te Mweenga

Rinanona ma ataei te bwai are a tia n reiakinna n te bong aei, ao kaoiia bwa a na anaa teuana te bwai are a namakinna bwa a riai n ataa taekana aomata. Kaungaia bwa a na ti bwauaia ma raraoia ke kaain aia utu.

Kanakoraoan Ara Anga reirei

A reiakinii bwaai ataei n aanga aika mwaiti. “A aki boraoi aroia ataei, ao ataei n tatabemaniia a rikirake n te aro ae waekoa. Am mwakuri n reireiniia ataei a na rangi n nakoraoi ngkana ko kabonganai katei n anga reirei aika kaokoro,”n raonaki n taian karaki, bwaai n ibuobuoki aika a nooraki, ao te katangitang (Reirei n Ana Kawai te Uea, 25).